2 Corintios 5
5
1Nca⁴ ˀya³qui²xi⁴-ni¹⁴jin⁴ tsa² je² ntˀia³son³ˀnte³ xi³ jo³-ni³ to⁴čhjoa⁴carpa jña³ vi³yo³ˀya²-ni¹⁴jin⁴ cˀoa⁴-sˀin² cjoi⁴tson¹, tjin¹-na³jin⁴ jnco³ ni³ˀya³ xi³ Ni³na¹ tsa³cˀe¹nta³-na³jin⁴, xi³ tsi² tsa² ntsja³ cho⁴ta⁴ coan³nta³-ni³, xi³ ti¹jna³ntsjai² ncˀa³jmi³. 2Tse³nai²⁴-jin⁴ i⁴ ntˀia³son³ˀnte³-na⁴jin⁴, nca³ cjai¹ me³-na³jin⁴ chˀa²cja¹son²ncˀai³⁴-jin⁴ je² ntˀia³-na⁴jin⁴ xi³ cjoi⁴nčhoa³-ni³ ncˀa³jmi³. 3Tsa² je³qui³chˀa²cjai¹⁴-jin⁴, cˀia⁴ li²coi³ coan⁴sjai³-jin⁴ nca³ ti³yo³jti²-jin⁴. 4Nca⁴ cˀoa⁴-ti⁴sˀin²ni³ jin⁴-jin⁴ xi³ ti³yoi³⁴-jin⁴ je² ntˀia³na³jño³-vi⁴, tse³nai²⁴-jin⁴ nca³ ñˀain³ cji³ne²-na³jin⁴ cjoa⁴, li²coi³ nca³ me³-na³jin⁴ nca³ chja⁴ˀa²xin²-na³jin⁴ ntˀia³na³jño³-vi⁴, to⁴nca³ coi³ nca³ me³-na³jin⁴ chˀa⁴cja¹soin²⁴-jin⁴, jme¹-ni³ nca³ je² xi³ mˀen³ cˀoa⁴-sˀin² cˀoa⁴ntjai²ya³jin³-ni³ cao⁴ cjoa⁴vi³jna³chon³. 5Cˀoa⁴ je² xi³ tsa³cˀe¹nta³-na³jin⁴ tˀa³tsˀe⁴ xi³ ti⁴coi³-ni³ je²-vi⁴, je² Ni³na¹, xi³ qui³tsjoa³-na³jin⁴ je² Espíritu Santo xi³ qui³sˀe³jna³nqui³-na³jin⁴. 6Cˀoa⁴-sˀin² tjio¹jnco³ta³coin²⁴-jin⁴ nca³ntsjai², nca³ ˀya³qui²xi⁴-ni¹⁴jin⁴ nca³ ti³yo³tˀa³xin²-lai⁴jin⁴ Nai³-na¹ tjen⁴ nca³ ti³yo³jin³-jin⁴ yao³-na⁴jin⁴. 7Nca⁴ ti³ma²-ni¹⁴jin⁴ xi³ tˀa³tsˀe⁴ xi³ ma³cjain¹-na³jin⁴, li²coi³ xi³ tˀa³tsˀe⁴ xi³ to⁴cho²tsain³-jin⁴. 8To⁴nca³ tjio¹jnco³ta³coin²⁴-jin⁴, cˀoa⁴ nqui²sa⁴ coan⁴tsjoa³-na³jin⁴ tsa² ti³yo³tˀa³xin²-lai⁴jin⁴ yao³-na⁴jin⁴, nca³ ti³yo³coai⁴-jin⁴ Nai³-na¹. 9To⁴coi³ cˀoa⁴-ti⁴ nqui²sa⁴ nˀion¹ vˀe²ta³con²-lai⁴jin⁴ nca³ nta³ sa³sen¹ta³con²-lai⁴jin⁴ nca³ je², a³xo⁴ nca³ ti³yo³tˀa³xin²⁴-jin⁴, a³xo⁴ nca³ ya⁴ ti³yo³coai⁴-jin⁴. 10Cjoa⁴nˀion¹ coi⁴yoa³² nca³tsˀia³² nqui³xcon⁴ cjoa⁴te¹xo³ma³-le⁴ Cristo, jme¹-ni³ nca³ jnco¹jnco¹ cˀoai⁴-si¹ni³na¹ jo³-sˀin² qui³nˀian³² cao⁴ yao³-na¹, tsa² nta³ tjin¹ a³xo⁴ tsa² chˀao³ tjin¹.
Ni³na¹ tsa³cˀe¹jna³tˀain³ Pablo je² en¹ xi³ ni²cjao¹nta³-ni³
11To⁴coi³ cjoa⁴ nca³ cˀoa⁴-sˀin² xcon¹ ˀyai³⁴-jin⁴ Nai³-na¹, cˀoa⁴-sˀin² ni²ntˀe¹tˀai³⁴-jin⁴ cho⁴ta⁴, to⁴nca³ Ni³na¹ nta³ ve³son²tsen³-na³jin⁴. Cˀoa⁴ co³ya²-le⁴ nca³ cˀoa⁴-ti⁴ ˀya³son²tsen³-na³jin⁴ ya⁴jin³-le⁴ cjoa⁴fa³ˀai³tsjen³-no³. 12Li²coi³ nˀo²sje³nta³ nqui²jnco³cˀa²-ni³⁴jin⁴ yao³-na⁴jin⁴ nqui³xcon³, to⁴nca³ vˀai²ˀnte²-lai²⁴jin⁴ nca³ jon² nca³ nˀo²sje³je³ya³-na³jin⁴ nca³ jin⁴-jin⁴, jme¹-ni³ nca³ sˀe⁴-si¹ni³no³ en¹ xi³ coi⁴xon¹-lao⁴³ je² xi³ vˀa³sje³je³ya³ jo³ cjoan³ yao³-le⁴, cˀoa⁴ li²coi³ vˀa³sje³je³ya³ xi³ tsˀe⁴ ni⁴ma⁴-le⁴. 13Tsa² sca¹-na³jin⁴, coi³ xi³ tˀa³tsˀe⁴ Ni³na¹, cˀoa⁴ tsa² nta³ tjio¹-ta³coin²⁴jin⁴, coi³ xi³ tˀa³tsaon⁴³ nca³ jon². 14Je² cjoa⁴tjao²cha³-le⁴ Cristo cjoa⁴nˀion¹ sˀin¹-na³jin⁴, nca³ je³qui³ni²cja³ˀai³tsjain³-jin⁴ je²-vi⁴, nca³ jnco³ xi³ cˀen³ xi³ tˀa³tsˀe⁴ nca³tsˀi³, coi³ tjio¹cˀen³-ni³ nca³tsˀi³. 15Cˀoa⁴ cˀen³ xi³ tˀa³tsˀe⁴ nca³tsˀi³, jme¹-ni³ nca³ je² xi³ tjio¹con³, li²coi³ ti⁴coa⁴tio⁴con³-ni³ xi³ ti⁴tˀa³tsˀe⁴-ni³, to⁴nca³ xi³ tˀa³tsˀe⁴ je² xi³ cˀoa⁴-sˀin² cˀen³, cˀoa⁴ xi³ qui³ni²cja³ˀa¹ya²-ni³le⁴ xi³ tˀa³tsˀe⁴. 16To⁴coi³ nca³ ntˀai⁴-vi⁴ xi³ fi²-sa³ni³ jin⁴-jin⁴ ni⁴ˀya³-jin² xi³ ˀyai³⁴-jin⁴ jo³-sˀin² tjio¹ cjoa⁴fa³ˀai³tsjen³-le⁴ cho⁴ta⁴, nta³ tsa² cˀoa⁴-sˀin² tsa³ˀyai³⁴-jin⁴ Cristo jo³-sˀin² tjio¹ cjoa⁴fa³ˀai³tsjen³-le⁴ cho⁴ta⁴, to⁴nca³ ntˀai⁴-vi⁴ li²coi³ ti⁴cˀoa⁴-sˀin²ni³ ˀya³-ni³jin⁴ nca³ je². 17Cˀia⁴ tsa² jnco³ xi³ ti¹jna³cao⁴ Cristo, coan³cho⁴tse⁴ya³ nqui²ntia³-ni³. Je² cjoa⁴ nca³sˀa⁴ je³ja³ˀa³to³. Coe⁴-ni³ coan³cho⁴tse⁴ nca³yi³je³ cjoa⁴. 18Cˀoa⁴ nca³yi³je³ je²-vi⁴ Ni³na¹ nčhoa¹-ni³. Xi³ to⁴tˀa³tsˀe⁴ Cristo qui³si³cjao²nta³-na¹ Ni³na¹ xi³ ti⁴tˀa³tsˀe⁴-ni³, cˀoa⁴ qui³tsjoa³-na³jin⁴ je² xa¹ nca³ si⁴cjao²nta³-ni³jin⁴. 19Coi³ je²-vi⁴ nca³ Ni³na¹ tsa³cˀe²jna³cao⁴ Cristo, nca³ qui³si³cjao²nta³-ni³ son³ˀnte³ xi³ ti⁴tˀa³tsˀe⁴-ni³. Li²coi³ ya⁴ qui³si³cˀa³ je¹-le⁴, cˀoa⁴ tsa³cˀe¹jna³tˀain³-na³jin⁴ je² en¹ xi³ ni²cjao²nta³-ni³jin⁴. 20Cˀoa⁴-sˀin² nca³ jin⁴-jin⁴ ti³yo³nca³jao³-lai⁴jin⁴ Cristo, jo³-ni³ tsa² Ni²na¹ xi³ vˀe¹tsˀoa³-no³ xi³ to⁴tˀa³tsain⁴-jin⁴. Vˀe²tsˀoa³-lai²⁴jin⁴ xi³ to⁴tˀa³tsˀe⁴ Cristo, cho⁴va²nta³-nio³ cao⁴ Ni³na¹. 21Je² xi³ tsi² tsa³jnqui³ je¹, Ni³na¹ qui³si³nta³-ni³ je¹ xi³ tˀa³tsan⁴², jme¹-ni³ nca³ ña¹ cˀoa⁴coan³ cjoan³-nia³² je² cjoa⁴qui²xi⁴-le⁴ Ni³na¹, nca³ ti³yo³coa⁴² Cristo.
Currently Selected:
2 Corintios 5: mauDBL
Highlight
Share
Copy
Want to have your highlights saved across all your devices? Sign up or sign in
© 1960, Wycliffe Bible Translators, Inc. All rights reserved.