Tsakariyaxi 13
13
'Axamɨti'ane kemɨti'itiyani
1»'Iya tukaritsie haixa kaneuyepierimɨkɨ mɨkɨkɨ ke'axamemɨte'uyuri memɨhauxinarienikɨ meta memɨ'itiyanikɨ Rawiri nuiwarimama meta Kerutsareme kiekatari.
2»'Iya tukaritsie kakaɨyarixi memɨwewiyatɨka kememɨtetetewa nepikumaweriya, hatsuaku tawari me'ayexeiyarietɨ mepɨka'akɨne —mɨpaɨ kanaineni Yawé Naimekɨmɨtɨrɨkaɨye—. Metatsiere nepɨwakumaweriya Kakaɨyari niukametemama memɨyuxatakai meta 'iyari mɨka'itiya mɨwanɨkai. 3Xɨka 'akuxi xewitɨ Kakaɨyari niukame yuxatatɨ tixatamɨkɨni, paapamamatɨtɨ mɨpaɨ mepɨte'itahɨawe: “'Ekɨ Yawé hetsiemieme pepɨtiku'itawa. 'Ayumieme 'ekɨ pekanimieriemɨkɨ”. Hikɨ Kakaɨyari niukameya muyuxatakaikɨ, paapamamatɨtɨ mepitseni mepimieni.
4»'Iya tukaritsie Kakaɨyari niukametemama mepɨyutitetewiya kemɨtiyɨni kememɨtenieritɨarie hepaɨtsita. Hipameri mepɨkatewa'itaiya nawi kamixayari me'anakatɨkɨtɨ, 5matsi yunaitɨ mɨpaɨ mekaniutiyuanekuni: “Ne Kakaɨyari niukameya nepɨkahɨkɨ, ne nemuka'etsa nekanihɨkɨtɨni. Temaikɨyaritɨtɨ ne, mana kwiepa nekatini'uximayaka”. 6Xɨkata xewitɨ mɨpaɨ tiwaruta'iwawiya: “¿Ketitayari 'amamatsie peraxitekietɨka?”, mɨkɨ mɨpaɨ kanitayɨmɨkɨ: “Nehamikuma wakie neheyeikatɨ mɨya nepɨranuyetɨa”».
'Uximatɨarika meta kemɨreuyehɨwiyarieni
7Mɨpaɨ kanaineni Yawé Naimekɨmɨtɨrɨkaɨye:
«'Ixipara, kenanukukexi, nemuxatsi wahɨweme kenaye'unietɨ,
kenaye'unietɨ tewi 'aixɨa nemɨtimate.
Muxatsi wahɨweme keneumi'a
memɨtaxɨriexɨanikɨ muxatsi
hikɨ neta muxatsi 'etsimemɨpepe nepɨtiwakwinitɨani».
8Mɨpaɨ kanaineni Yawé:
«'Ikɨ kwieyaritsie kiekatari mepayehaikariyarieni
me'ayehutatɨ mekanikwi'iwakuni,
hairieka miemete mekaniyuhayewakuni.
9Peru mɨkɨ memuyuhayewaxɨ taipa nekaniwakayatsamɨkɨ,
'aixɨa nepɨwayurieni pɨrata ke'aixɨa mɨ'itɨariwa taipa hepaɨ,
nepɨwata'inɨata huru taipa kemɨti'inɨatsiwa hepaɨ.
Hikɨ 'ana menetsi'ayexeiyatɨ mepakɨne
neta nepɨwata'eiya.
Ne mɨpaɨ nepɨtayɨni: “Mɨkɨ mepɨneteɨterima”,
mɨkɨta mɨpaɨ mepɨtiyuani: “Yawé takakaɨyari kanihɨkɨtɨni”».
Currently Selected:
Tsakariyaxi 13: hch
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.
