Marikuxi 9

1Hikɨ mɨpaɨta katiniwarutahɨawe:

—Yurikɨ mɨpaɨ nepɨxerahɨawe, hipatɨ 'ena memu'uwa mepɨkakwini mexi mekanenieriwawe kemɨtiyɨni kepauka Kakaɨyari munuani tɨrɨkaɨyemekɨ ti'aitatɨ.

Ketsutsi yɨkɨ 'anetɨ kemɨratɨa

(Mar 9:2-13 – Ruk 9:28-36, Mat 17:1-13)

2Hikɨ 'ataxewime tukari 'anukayaku Ketsutsi kaniwarewitɨni Pekuru, Kakuwu meta Wani, yemuri 'amanutitewitsie yuhɨkɨame. Hikɨ mana wahɨxie yɨkɨ 'anetɨ kanayani. 3Kemarieya xawatɨtɨ kanayani kwi tuxatɨ 'ɨwi hepaɨ, kwiepa muxuawe tituriyame mɨpaɨ 'aneme meyeitɨani pɨkayɨwe. 4Mana 'Eriyaxi meta Muitsexi mekaniuyuhekɨata, mɨkɨ Ketsutsi hamatɨa mekatenikuxatakaitɨni. 5Hikɨ Pekuru mɨpaɨ Ketsutsi katiniutahɨawe:

—Ti'ɨkitame 'aku, 'aixɨa kani'aneni 'ena temu'uwakɨ. Kamɨtsɨ xamaru tepɨtiwewieni haikame, 'ahetsiemieme xeime, Muitsexi hetsiemieme xeime meta 'Eriyaxi hetsiemieme xeime.

6'Atsipɨkatiyumaiwekai kemɨtayɨni, yunaitɨ waɨkawa memumamakaikɨ. 7Hikɨ yapauka haiwitɨri kaniwaranukanani, hikɨ mɨkɨ haiwitɨritsata xewitɨ kanetaniuni mɨpaɨ 'utaitɨ: «'Ikɨ kanineniwetɨni neminaki'erie. Xekene'enieka».

8Yapauka, mehanieretɨkɨneka naitsarie, xeime mepɨka'uxei wa'aurie 'uweme, Ketsutsi xeikɨa mekaniuxeiya.

9Hikɨ yemuritsie me'akahutɨ, Ketsutsi kaniwaruhɨritɨani nixeime memɨkatehaxaxatɨwanikɨ kememɨte'unenierixɨ, kepaukake Yuri Tewi mɨkite watsata manukukeni. 10Kemainekai yamepɨtekakɨ mepɨkate'utaxa, peru mɨkɨ niuki mekanixɨatɨakaitɨni tita mɨtixatakai «mɨkite watsata manukukeni».

11Hikɨ mɨpaɨ mekatenita'iwawiya:

—¿Mɨkɨ 'inɨarikɨ memɨte'ɨkitamete titayari mɨpaɨ mete'utiyuane kename heuyewetse 'Eriyaxi meri munuani?

12Mɨkɨ mɨpaɨ katiniwaruta'eiya:

—Kaniyuritɨni. 'Eriyaxi meri kaninuamɨkɨ, 'aixɨa mitiyurieni tinaime. ¿Matsi kere'uxa Yuri Tewi hepaɨtsita, kemɨreuyewetse waɨkawa mɨtikwinekɨ mɨxani'eriwanikɨ? 13Peru ne mɨpaɨ nepɨxekɨhɨawe, 'Eriyaxi 'ari kaninuani, meta kemɨtiwanakekai yamepiyuri, mɨpaɨ kemɨre'uxa hepaɨtsitana.

Ketsutsi 'aixɨa reu'eriekame temaikɨ kemɨrayeitɨa kakaɨyari 'axamɨ'ane 'iwiyakaku

(Mar 9:14-28, 30-32 – Mat 17:14-19, 22-23, Ruk 9:37-45)

14Merikɨtsɨ kepauka memu'axɨa hipatɨ teyɨ'ɨkitɨwamete mematitekaitsie, yumɨireme teɨteri mekaniwaruxeiya wa'aurie meta 'inɨarikɨ memɨte'ɨkitametetɨkai niuki mexɨatɨakame wahamatɨa. 15Hikɨ yapauka teɨteri me'ixeiyaka mekaniuhɨxiyani meta hepana mekaniutinautsa mekanitawaɨritɨani.

16Mɨkɨ mɨpaɨ katiniwaruta'iwawiya mɨkɨ 'inɨarikɨ memɨte'ɨkitametetɨkai:

—¿Titakɨ niuki xetexɨatɨakai wahamatɨa?

17Xewitɨ tewi mɨpaɨ katinita'eiya:

—Neuxei ti'ɨkitame, neniwe 'uki nepɨmatsi'atɨiri, kakaɨyari 'axamɨ'ane pinɨ'ɨ pɨka'ipitɨa mɨtaniunikɨ. 18Kepauka mikuwiwiya, petihɨpa. Kwaimuxari putahewa, yutametekɨ pɨtiutakewe meta naranitɨ payeika. Ne nekaniwarutawawirieni teyɨ'ɨkitɨwamete 'ahetsɨa miemete 'aixɨa reu'eriekame memayeitɨanikɨ, peru mepɨka'uyɨwekaxɨa.

19Hikɨ Ketsutsi mɨpaɨ kaniutayɨni:

—Xeme hikɨ xemɨmiemete yuri xepɨkate'erie. ¿Kepaɨmexɨa peuyewetse 'akuxi xehamatɨa nemuyeikani? ¿Kepaɨmexɨa 'akuxi nepɨtixenewirieka? Xekenawitɨki mɨkɨ temaikɨ.

20Hikɨ mekani'atɨirieni. Mɨkɨ kakaɨyari 'axamɨ'ane Ketsutsi 'uxeiyaka, yapauka temaikɨ kaniutanɨni kwiepa kanikahɨani meta kanikurupenekaitɨni 'atakwaimuxatɨ.

21Ketsutsi mɨpaɨ katinita'iwawiya paapaya:

—¿Kepaɨmexɨari mɨyapɨ'ane?

Mɨkɨ mɨpaɨ kaniutayɨni:

—Nunutsiyari paitɨ. 22Heiwa taipa kaneihɨpani meta hapa 'imienike. 'Ekɨ xɨka peyɨweni tixaɨtɨ pemɨtiyurieni, ketaneutinenimayata meta ketaneuparewi.

23Ketsutsi mɨpaɨ katinitahɨawe:

—¿Ketitayari peraine, xɨka neyɨweni? Kemɨ'ane yuri mɨti'erie, hetsiena mieme naitɨ pɨtiyɨwe.

24Hikɨ temaikɨ paapaya mɨpaɨ katiniuhiwa:

—Huu yuri nepɨti'erie. Keneneuparewi xɨka 'etsiwa xeikɨa yuri neti'erieka.

25Ketsutsi meyumɨireme teɨteri waruxeiyaka 'ame'anautsaxɨaximeme hepana meyukuxeɨrienike, 'iyari 'axamɨ'ane kaniutatieni, mɨpaɨ tikɨhɨawetɨ:

—Keneu'ena 'iyari 'axamɨ'ane, pemɨka'ipitɨa mɨtaniunikɨ meta meu'enanikɨ, ne nekameninɨ'aka pemixɨnakɨ meta tawarita pemɨka'ikuwiwiyanikɨ.

26'Iyari 'axamɨ'ane, kaniutahiwa meta karima hau'erietɨ kanetihɨani kanitayɨyɨakatsitɨani. Mɨki hepaɨ 'anetɨ kanayani temaikɨ, 'ayumieme 'etsiwatɨkaku yunaitɨ mɨpaɨ mekaniutiyuani: «Kaniumɨniri». 27Peru Ketsutsi temaikɨ mamaya 'uwiyaka kanenukuhana, hikɨ temaikɨ 'akaniutakeni.

28Hikɨ kiita heutahaku, teyɨ'ɨkitɨwametemama yɨhɨkɨate mɨpaɨ mekatenita'iwawiya:

—¿Titayari tame teteyutatexi te'eyenɨ'anike?

29Mɨkɨ mɨpaɨ katiniwarutahɨawe:

—Yunenewietɨ xeikɨa kaniyɨweni meyenɨ'anikɨ 'ipaɨ 'aneme.#9:29 RV60 yunenewietɨ meta yuhakietɨ paine.

30Hikɨ mana mekanekɨne, Karereya kwieyaritsie mekaniuyekɨne. Pɨka'inakekai xewitɨ mɨtitamarienikɨ, 31teyɨ'ɨkitɨwamete katiniwa'ɨkitɨakaitɨni. Mɨpaɨ katiniwakɨhɨawekaitɨni: «Yuri Tewi kenemɨtihɨkɨ, nekaniyetuiyamɨkɨ teɨteri wahetsɨa. Mɨkɨ mekanenimiekuni, nemierieme hairieka tukari 'anukayayu nekananukukemɨkɨ».

32Peru mɨkɨ 'ikɨ niuki mepɨkahetimaiwawekai, meta mekanimamakaitɨni me'ita'iwawiyake.

Kemɨ'ane matsi mɨmariwe

(Mar 9:33-37 – Mat 18:1-5, Ruk 9:46-48)

33Merikɨtsɨ Kaperunaume mekaneta'axɨani. Kiita meheutahaxɨaku mɨpaɨ katiniwaruta'iwawiya:

—¿Titakɨ niuki xetehexɨatɨakai huyeta?

34Mɨkɨ kayuwatɨ xeikɨa mekaniumakaitɨni, niuki memɨxɨatɨakaikɨ huyeta kemɨ'ane mɨkɨ matsi waɨkawa meuyewekai.

35Hikɨ 'a'ayerɨka, tamamata heimana yuhutame waruta'inieka yu'aurie, mɨpaɨ katiniwarutahɨawe:

—Xewitɨ xɨka mexɨakame 'ayeimɨkɨni, kaneuyeweka yunaime waparewiwame mayuyeitɨanikɨ 'imatɨreme mayuyeitɨanikɨ.

36Hikɨ nunutsi 'ahanaka wahixɨapa kanitakeni. Meta 'itituka mɨpaɨ katiniwarutahɨawe:

37—Kemɨ'ane mitanaki'erieni xeime 'ikɨ tɨɨri nehetsɨa miemekɨ, kemɨ'ane mɨnetsitanaki'erieni, nexeikɨa pɨkanetsitanaki'erieni, matsi kemɨ'ane mɨnetsiheyenɨ'a kanitanaki'eriemɨkɨta.

Kemɨ'ane mɨkatatsi'aye'unie mɨkɨ tahetsie katiniwiyani

(Mar 9:38-40 – Ruk 9:49-50)

38Wani mɨpaɨ katinitahɨawe:

—Ti'ɨkitame, xeime tahetsie mɨkatiwiya tekanexeiya warayenɨ'awame kakaɨyarixi 'axamemɨ'anene, 'ahetsɨa waniu miemetɨtɨ. Mɨkɨ tahetsie mɨkatiwiyakɨ, 'ayumieme tepɨkaheipitɨa.

39Ketsutsi mɨpaɨ kaniutayɨni:

—Xepɨkaheiku'imaiyani. Tewi xɨka tɨrɨkaɨyemekɨ 'inɨari tiyurieneni, mɨpaɨ 'utaitɨ kename nehetsɨa mieme, pɨkayɨwe nehepaɨtsita 'axamainenikɨ. 40Kemɨ'ane mɨkatatsi'aye'unie, tahetsie katiniwiyani. 41Kemɨ'ane xeitekɨxiyari mɨxeharitɨani Kɨritsitu hetsɨa miemete xemɨhɨkɨkɨ, mɨkɨ yu'iwarika pɨkareuyehɨani pɨtipitɨarieni.

Titakɨ mɨtitiketamɨre

42»Peru, kemɨ'ane yu'iwa 'axamɨyurieni 'ikɨ tɨɨri yuri memɨte'erie nehetsie, 'aixɨa kaniyɨmɨkɨ matsi matá mahete xɨka 'akatɨtɨarienike kɨipieyatsie meta xɨka haramaratsie heukahɨiyanike. 43Xɨka 'amamakɨ 'axapetiyurieneni, kenawiteki. 'Aixɨa kaniyɨmɨkɨ matsi xɨka peheutahani tukari maxuawetsie pemamapurutɨ, keyuri hutame mamayari pehexeiyatɨ yuheyemekɨ mɨta'atsie xɨka peheukahɨiyani. 44Mana kwitsi mɨwakɨme pɨkamɨni tai pɨkatɨweni. 45Xɨka 'a'ɨkakɨ 'axapetiyurieneni, kenawiteki. Matsi 'aixɨa pɨyɨni xɨka pe'ɨkapurutɨ peheutahani tukari maxuawetsie, keyuri hutame 'ɨkate pehexeiyatɨ tai yuheyemekɨ mɨta'atsie xɨka peheukahɨiyani. 46Mana kwitsi mɨwakɨme pɨkamɨni tai pɨkatɨweni. 47Meta, xɨka 'ahɨxikɨ 'axapetiyurieneni, keniwayetu'i. Matsi 'aixɨa kaniyɨmɨkɨ tapa xeikɨa peheunieretɨ pemeutahanikɨ Kakaɨyari mɨra'aitatsie, keyuri hutame hɨxite pehexeiyatɨ taipa peheukahɨiyanikɨ. 48Mana

»“kwitsi mɨwakɨme pɨkamɨni,

meta tai pɨkatɨweni”.

49Yunaitɨ mekani'itiyakuni taikɨ, naitɨ mawari kemɨti'itiwa 'unakɨ.

50»'Una 'aixɨa kani'aneni, peru xɨka 'una hamuritɨ 'ayani, ¿titakɨ ha'utsiwime xeteheyeitɨanikeyu 'una? 'Una xekenexeiyani yuhetsie 'aixɨa xeteyuxeiyatɨ».

Currently Selected:

Marikuxi 9: hch

Highlight

Copy