Tsutɨarika 42

Kutse 'iwamama 'Ekipitutsie mepekɨ

1Merikɨtsɨ Kakuwu kepauka mɨtiutamari, kename tɨriku hexɨawe 'Ekipitu, mɨpaɨ yuniwema katiniwarutahɨawe: «¿Ketitayari mana xetekutei, kwi xeyuxexeiyatɨ xeikɨa? 2Mɨpaɨ nekatinimarieka kename tɨriku hexɨawe. Mana xekenehu xekenenanaiyu tahetsimieme temɨkakwinikɨ hakakɨ».

3Tamamata meyupaɨmetɨ mekaniyukuha'aritɨani Kutse 'iwamama 'Ekipitu meteheunanaiyuka. 4Peru Kakuwu Wenikamini pɨka'upitɨa mɨyemiekɨ Kutse mutaya, mɨpaɨ tiku'eriwatɨ: Nɨkahɨrixɨa mɨwa hemierieni. 5Hikɨ 'Ixaheri tɨɨriyamama kepauka memeta'axɨa metetaxɨawienike, matsi naitsarie waɨkawa kanihaakaxatɨkaitɨni, Kanani kwieyaritsie.

6Kutse kuwexinaruri pɨhɨkɨtɨkai mɨkɨ kwieyaritsie. Tɨriku mepɨwatuiriekai, naitsarie kiekaritetsie teɨteri memɨ'axekai. Kepauka 'iwamama hetsɨana memu'axɨa, kwiepapai mekaniukahɨxima'uni. 7Kutse waruxeiyaka yu'iwama, kaniwaretimani. Perutsɨ mɨkawamateni hepaɨ katiniwarutahɨawe:

—Xemetsɨ, ¿hakewa xepeyekɨ?

Mɨkɨ mɨpaɨ mekatenita'eiya:

—Tame Kanani kwieyaritsie tepeyekɨ tɨriku tepɨkunanetɨwe.

8Kutse pɨwaretimaikai, peru mɨkɨ 'iwamama mepɨka'imatekai. 9Merikɨ 'ana Kutse kanaye'erieni, kemɨtiuheinɨkai wahetsiemieme. 'Ayumieme mɨpaɨ katiniwarutahɨawe:

—Xemetsɨ 'awie nenieremete xepɨyɨa xetatsihupietɨwetɨ.

10Mɨpaɨ mekatenita'eiya:

—Hawaikɨ ti'aitame, matsiparewiwamete tepɨyɨa. Tɨriku tepɨkunanetɨwe xeikɨa. 11Tame tepɨxeinuiwari tapaapa puyuxewi, heitseriemekɨ yatepɨtekahu, tepɨka'awienenieremete.

12Kutse mɨpaɨ katiniwaruta'eiya:

—Pɨkayuri, xeme kexemutiyuane. Xepɨkunieretɨwe xeikɨa kemɨtiu'ane.

13Perutsɨ mɨkɨ tawarita mɨpaɨ mekatenita'eiya:

—Tame, mate'uximayatsiriwamete, tamamata heimana huta tepɨyupaɨmekai, tanaitɨ tapaapa puyuxewi Kanani kwieyaritsie kanekani. Tamuta peyuhayewaxɨ yupaapa hetsɨa, xewitɨri pɨka'uyeika.

14Merikɨtsɨ Kutse tawarita mɨpaɨ katiniwarutahɨawe:

—Netsɨ kenemɨtixekɨhɨawe, 'awie nenieremete xekaniyɨaka.

15Kamɨtsɨ xɨka yuri xe'utiyuaneni: Ti'aitame kemaine yaxeikɨa tepɨxe'anutaxɨrieni 'ena, yu'iwa xe'atɨayuke xepanuyekɨne. 16Xeme, xewitɨ yu'iwa pɨwitɨmie, xekenanunɨ'a. Hipatɨta katsariyanata xepaye'uka. 'Anake mɨpaɨ tekatenetimaikuni xɨka 'aku yuri xe'utiyuaneni, mexɨka katixaɨtɨni, yurikɨ mɨpaɨ nekanaineni Parahuni hetsiemieme, hupamete xekaniyɨaka.

17Hikɨ Kutse kaniwaranutaxɨrieni katsariyanata haika tukari. 18Hikɨ hairieka tukaritsie mɨpaɨ katiniwarutahɨawe:

—Ne tewi Kakaɨyari nemayemakaxe nepɨhɨkɨ, xemeta yaxeketeneuyuri kenemɨtixetahɨawe, xemɨyutawikweitsitɨanikɨ. 19Xɨkatsɨ xeme heitseriemekɨ yaxetekahuni, 'uwa xewitɨ xeikɨa kaniyuhayewamɨkɨ. Hipatɨta xekaniyehuni, tɨriku xekanituayuni xeniwema memɨtehekwakakɨ. 20Perutsɨ tsiere yumuta xekaneni'atɨiriekuni, neyuri nemɨtixeta'eririenikɨ xemɨkakwinikɨ 'ena.

Mɨpaɨ mekaniutiyuani:

—'Aixɨa pɨyɨni, mɨpaɨ tepɨteyurieni.

21'Ana mɨpaɨ metenanuyutahɨawekaitɨni yunaitɨ:

—Xɨari hikɨ tepɨte'uka'eniwa tamuta temɨte'ukwinitɨakɨ, tsepa mɨtatsiku'imaiyakai tepɨka'enu'eni, hikɨri xɨari 'ayumieme tekateniuka'eniwani.

22Hikɨ Xuweni mɨpaɨ katiniwarutahɨawe:

—Ne 'ayumieme mɨpaɨ nepɨtixekɨhɨawekai, tepɨkate'ikwinitɨaka tepɨka'ikumemiwani, xepɨkanetsi'u'eni. Hikɨri xɨari 'ayumieme tekatenayukatuayani mumawekɨ.

23Kutse 'ekipitutari waniukikɨ mɨwakɨhɨawekaikɨ, 'iparewiwameya pɨwahekɨatɨakai waniukikɨ. Mɨkɨ mɨpaɨ mepɨkatemaikai wa'eniekame mepɨka'eriekai waniukikɨ. 24'Anari Kutse 'anayeyaka yuxaɨta 'awie kaniutatsuani. Heyunɨtɨaka hutarieka nuaka, Tsimehuni kaniuta'aita, mɨhɨiyanikɨ yu'iwama wahɨxie.

25Hikɨ Kutse katiniuta'aita memuka'ikatɨarienikɨ tɨriku hɨpɨneme, yaxeikɨata watumini mukamanariexɨanikɨ wa'ikata, meta memuka'inɨatɨarienikɨ huyeta mieme. Mɨpaɨ mekateniuyurieni. 26Hikɨ yupuxuri mewaruti'ikatɨaka, mekanakunuaxɨani yu'utɨma.

27Perutsɨ hakewa memekuhenikekai taikai, xewitɨ mana yupuxu titiminike, yukuxitari kananukɨxɨna, muwa yutumini kaniutaxeiya. 28Hikɨ yu'iwama mɨpaɨ katiniwarutahɨawe:

—Neuxei, kari netumini nepeukayetsiyarie. 'Uwa patika yaxeikɨa paɨmetɨ.

Hikɨ 'iwamama waɨkawa mekaniutimamani. Mɨpaɨ mekaniutiyuanekaitɨni:

—¿Kehepaɨtɨtɨri Kakaɨyari pɨtatsiyuriene?

29Kepauka memuta'axɨa Kanani kwieyaritsie, yupaapa Kakuwu mekateniutaxatɨani, naime kememɨte'anuyekɨ:

30—Kuwexinaruri 'Ekipitu kwieyaritsie ti'aitame, waɨkawa pɨtatsiheku'iwawiyakai. Mɨpaɨ pɨtarekuhɨawekai: “'Awienenieremete xekateyɨa”. 31Tame mɨpaɨ tepɨteheitahɨawixɨ: “Tixaɨ tame heitseriemekɨ yatepɨtekahu tepɨka'awienenieremete. 32Tame tepɨxeinuiwari tapaapa puyuxewi. Tamamata heimana huta tepɨyupaɨmekai, xewitɨri pumawe, tamuta xeikɨa peyuhayewaxɨ Kanani kwieyaritsie”.

33»Hikɨ tewi mana mɨti'aita mɨpaɨ katatinetahɨawe: «'Ikɨkɨ mɨpaɨ nekatinimaikamɨkɨ xɨka 'aku heitseriemekɨ yaxetekahuni, xewitɨ 'ena kaniyuhayewamɨkɨ, hipatɨ xeikɨa xekaniyehuni xeniwema memɨkaheyehaakakwitɨwenikɨ. 34Perutsɨ xekaneni'atɨiriekuni yumuta 'imatɨreme, yuri nemɨtixeta'eririenikɨ kename 'awie nenieremete xekayɨa. 'Anake xe'iwa nekanixeyetuiriemɨkɨ, yaxeikɨata heitseriemekɨ tepɨxemateni, 'ena xemu'uwanikɨ#42:34 xemu'uwanikɨ. Yaxeikɨa nekutsiyu xemɨwewiekakɨ. takwiepa kemɨtixenake».

35Hikɨ kepauka yukuxitari memanukuxɨnaxɨa, mekanitaxeiya purutsa watumini muyetei. Mɨkɨkɨ yunaitɨ mekaniutimamani. 36Hikɨ Kakuwu mɨpaɨ katiniwarutahɨawe:

—Xemeri neniwema tixaɨtɨ xepɨkanetehayewieni. Kutse tahamatɨari 'apɨka'uyeika, Tsimehuni meta pumawe. Hikɨtari Wenikamini xepɨyewitɨxime. Waɨkawa xepɨnetsihiweritɨa xeikɨa.

37Perutsɨ Xuweni, yupaapa mɨpaɨ katiniutahɨawe:

—Ne Wenikamini nepanuwitɨni nepɨyɨhɨritɨani nemi'atɨanikɨ. Mexɨka neka'i'atɨani, pepɨyɨwe neniwema yuhutame pemɨwarukwini.

38Kakuwu tawarita mɨpaɨ kaniutayɨni:

—Neniwe pɨkayemie xe'utɨma. Kutseri pɨka'uyeika, mutaya xeikɨa puyuhayewane. Xɨka huyeta yɨkɨ reiyurieni, xemetsɨ pɨxehetsietɨni xɨka ne 'ukiratsi hiwerikakɨ ne'umɨni.

Currently Selected:

Tsutɨarika 42: hch

Highlight

Copy