Tsutɨarika 15

Kakaɨyari tɨratu kemɨtiuwewi 'Apɨrami hamatɨa

1Hikɨ mɨpaɨri tiɨyɨku, Yawé 'Apɨrami kaniutahɨawe heinɨtsika hepaɨ tiyuxexeiyamekɨ:

«'Apɨrami, pepɨkaheumaka.

Ne 'ahetsie nunuwame nekanihɨkɨtɨni,

kenemɨmatiyetuirieni waɨkawa katinayeimɨkɨ».

2Hikɨ 'Apɨrami mɨpaɨ katinita'eiya:

—Yawé nekakaɨyari, ¿titayari 'imikieri penetiyetuirieni, ne nunutsi 'akuxi nepɨkahexeiya, tita nemɨrexeiya neti'uximayatsiriwame 'Eriyetsexi Ramatsiku kiekame tipiinieya katinayeimɨkɨ? 3Xeimetɨma nunutsi pemɨkanetsiyetuiriewekɨ, xewitɨ netsiparewiwame nepiinite katinanupimɨkɨ.

4Yawé mɨpaɨ katinitahɨawe:

—Hawaikɨ mɨkɨ tewi 'apiinite mɨranupini pɨka'ayani, 'apiinite mɨranupini yurikɨ 'aniwe pɨyɨaneni.

5Hikɨ Yawé kanenuyewitɨni takwa paitɨ, mana mɨpaɨ katinitahɨawe:

—Muyuawitsie keneutinieri, keniwaruti'inɨata xurawetsixi, xɨka peyɨweni pemɨwaruti'inɨata. Mɨpaɨ mekaniyupaɨmekakuni 'anuiwarima.

6'Apɨrami Yawé yuri pɨtiuta'eriri, 'ayumieme Yawé mɨkɨ heitserie hexeiyame kanayeitɨani. 7Mɨpaɨta katinitahɨawe:

—Ne Yawé nekanihɨkɨtɨni, nemɨmatsi'ayewitɨ 'Uxi karireutsixi wakwieyaritsie nemɨmatsiyetuirienikɨ 'ikɨ kwie.

8Perutsɨ 'Apɨrami mɨpaɨ katinita'iwawiya:

—Yawé neti'aitɨwame, ¿kehepaɨ neretimani kename penetsiyetuirieni?

9Yawé mɨpaɨ katinita'eiya:

—Kenene'atɨiri xeime wakaxi, xeimeta kapura, xeimeta tuuru muxa yunaitɨ haika wiyari mehɨtɨkaime, yaxeikɨata xeime haɨmɨ 'amɨnena xeimeta kukuru yakɨmɨnena.

10'Apɨrami 'ikɨ naime katini'atɨirieni, hixɨata kaniwaxitexɨani, huhutatame 'anuyutaxeiyatɨkaime katiniuyatsa, peru pɨkawarutixite memawɨwawe. 11Hikɨ wirɨkɨxi mekani'axekaitɨni wahetsie memɨkwikwi'ikaikɨ, matsi 'Apɨrami kaniwatatuaxakaitɨni.

12Kepauka kɨyɨrirumekakɨ, 'Apɨrami kaniukumɨni, yapauka yɨriya kananukateni hetsiena, hikɨ kanimakaitɨni. 13Yawé mɨpaɨ 'Apɨrami katiniutahɨawe:

—Mɨpaɨ ketinemaika 'anuiwarima xeime kwieyaritsie mepɨtiteni yapaɨmexɨa, mana mepɨteta'aitɨarieni, menanaimarietɨ, nauka tsienituyari wiyari. 14Peru neta yaxeikɨa nepɨwa'uximatɨani mɨkɨ teɨteri memɨtewata'uximayatsitɨani, 'ana mepayekɨne 'anuiwarima metixɨnarieme, waɨkawa mɨraye'atɨka mete'upitɨ. 15'Ekɨta pekanikumawerimɨkɨ peka'uximatɨarietɨ, waɨkawa pe'ukiratsitɨtɨke pekanimɨmɨkɨ. 16Nauka nuiwariyari me'anuyeyayu, waxiɨyarima 'ena mekani'axɨakuni, hikɨ 'ena memɨtama 'amuxeutsixi 'axamekateniu'iyarini 'ana nekaniwarakumaweriyamɨkɨ.

17Kepauka tau makayunixɨ, kepauka mukuyɨrixɨ, kaniuhekɨare huxunu hepaɨ 'anetɨ kɨtsi watiwietɨ, meta tai mana puyewiekai, mɨkɨ tewaxi memɨxitekietɨka wahixɨata mekaniuyekɨkakaitɨni. 18Mɨkɨ tukaritsie Yawé 'Apɨrami hetsɨa tɨratu kaniuwewieni. Mɨpaɨ katinitahɨawe:

—'Ikɨ kwie nepɨwayetuirieni 'anuiwarima, haa 'Ekipitu mieme manuyeka, meta 'amɨpa manuyekatsie paitɨ 'Eupɨrate mɨtitewatsie. 19Keni teɨteriyari wakwie nekanixatani, meta kenitsixi, karimuneutsixi, 20hetitsixi, peretseutsixi, xepahitsixi, 21'amuxeutsixi, kananeutsixi, keriketseutsixi meta kewutseutsixi wakwie.

Currently Selected:

Tsutɨarika 15: hch

Highlight

Copy