'Epetsutari 4

Kɨritsitu hetsie metewiyatɨ kememɨteyuxewi

1'Ayumieme neri Ti'aitame hetsie netiwiyatɨ nekananutahɨiyaka, waɨriyarika nekanixepitɨaka, 'aixɨa 'anemekɨ xemu'uwanikɨ, kemɨreuyewetse yamɨtikamienikɨ kemɨ'ane muta'inierie kexemɨte'uta'inierie xeme. 2Tixaɨtɨ xekatehɨkɨtɨtɨ xekeneyu'erieka naimekɨ, xepɨka'ayu'eririyani, 'axeketeneutewini xekaha'atɨ, xekeneyunewieka matsi xeyunaki'erietɨ. 3'Iyari kemɨtatixewiriya, xekeneyumexɨitɨaka xemɨyuhayewakɨ xeyuxewitɨ 'aixɨa xeteyuxeiyatɨ. 4Xeiwaiyari tekanihɨkɨtɨni, meta 'Iyari kaniyuxewini. Yaxeikɨa xeme kepauka xemuta'inierie, tita xetekwewietɨ xemɨte'akɨ, mɨkɨta kaniyuxewini. 5Ti'aitame kaniyuxewini, xeimetsie yuri tekateni'erieka, xeime hetsie tetewiyatɨ tekaniuka'ɨyarieni. 6Kakaɨyari yunaime mɨwa'ukiyari mɨkɨta kaniyuxewini, mɨkɨ yunaime katiniwa'aitɨaka, yunaime kaniwakuyuitɨwani, yunaime wahetsie katiniwiyani.

7Matsitsɨ taxexuitɨ yatepɨtemikie ketemɨte'inɨatsiyarie, Kɨritsitu kemɨtatimikwa. 8'Ayumieme mɨpaɨ paine 'utɨarika:

«Wapaitɨ 'anutiyaka,

me'anutaxɨriyakame kaniwarehapani yumɨireme,

meta teɨteri 'imikieri kaniwarumini».

9(¿Merikɨte ketita tixata «wapaitɨ 'anutiyaka» maine, mɨpaɨ xɨari paine, peukayune meri 'emeukatewatsie kwiepa paitɨ? 10Kemɨ'ane meukayunixɨ, mɨkɨ kanihɨkɨtɨnita kemɨ'ane muyuawi heima manutitɨa 'ateewa, naime mɨhɨniyanikɨ). 11Mɨkɨ mɨpaɨ pɨtiwarumi, hipatɨ nɨ'ariekate memakɨnekɨ, hipatɨta texaxatamete, hipatɨ tehekɨatamete, hipatɨta te'ɨwiyamete meta te'ɨkitamete. 12Yakatiniwarumini waraye'atɨanike yuteɨterima yamemɨte'uximayakakɨ kememɨte'uhɨritɨarie. Wakɨmana Kɨritsitu waiyarieya kaniweriyariekamɨkɨ. 13Mɨpaɨ tekatenipitɨarieka mexi te'aye'axɨaxime tanaitɨ temɨtaxewinikɨ yuri ketemɨte'erie Kakaɨyari nu'ayatsie, ketemɨteheitima. Mɨpaɨ tekatenipitɨarieka tewi maye'awe temakɨnekɨ, temɨtsetseɨyenikɨ Kɨritsitu kemɨraye'awe hepaɨ, mɨkɨ Kɨritsitu ta'inɨaritɨkaku.

14'Ana tepɨtehayewani tɨɨri wahepaɨ teyɨatɨ. Tepɨkakuyuitɨariwani naime 'ɨkitsikakɨ, hamewari kemɨtiuyuane 'ekakɨ, teɨteri kememɨteyukwamana, kememɨteyu'iyaritɨa mete'irɨmatɨ memeuyexɨrienikɨ. 15Matsi yuri te'utiyuatɨ tetetakanaki'erietɨ, tekanitiwerikuni 'iya hepaɨ te'anenetɨ temakɨnekɨ naimekɨ. 'Iya kanitamu'utɨni Kɨritsitutɨtɨ. 16Tanaitɨ hetsiena tetewiyatɨ tekanitawerirɨmeni, tewi waiyarieya yumu'utsie tiwiyatɨ kemɨtiwere naitɨ. Waiyarieya nawɨtɨarieni kaniutaxewiriyarieni, turuyari naitɨ 'ixewiriyakaku, xexuitɨ waiyariteya yatiyurienekaku kemɨreuyewetse. Yaxeikɨa tewi waiyarieya kemɨtiyuweriya yɨkɨmana, tameta tetetakanaki'erietɨ tekanitɨrɨkariyarieka waiyarieya tehɨkɨtɨtɨ.

Yɨkɨ 'anemekɨ kemɨrayeniereni Kɨritsitu hetsie tiwiyatɨ

17'Ayumieme 'ipaɨ nepaine, Ti'aitame hetsie netiwiyatɨ 'ipaɨ nepɨtihekɨata. Xepɨka'u'uwani hipatɨ kememɨyɨa memɨkatateɨterima. Yakɨ xeikɨa mekateniku'eriwani mɨkɨ, 18mekaniuyɨriyarieni kememɨteyumate yu'iyaritsie, heitserie mepɨkahexeiya Kakaɨyari tukari mɨwapitɨanikɨ, mɨkɨ 'atsimemɨkatematekɨ wa'iyari mɨtsetse'ikɨ. 19Kememɨ'anene, mɨkɨ yu'iyaritsie mekaniximɨmɨanini, mepɨyuwaɨriya memɨrukuyatɨwenikɨ kememɨteyukahiwe'erie, yamemɨteyuriekakɨ naime tita mɨkati'itiya yuhetsiemieme metehiwe'erietɨ.

20Peru xeme mɨpaɨ xepɨkate'u'ɨkitɨarie Kɨritsitu hepaɨtsita. 21Xɨari hepaɨtsitana xepɨ'enana, hetsiena xetewiyatɨ xepɨte'uta'ɨkitɨarie tita yuri mɨraine, Ketsutsi hetsie kemɨtimatsiɨkɨ. 22'Ayumieme kexemɨte'u'ɨkitɨarie, xekenanutihɨna tita mɨtiye'i, xeketeneuhayewa kexemɨyɨakai meripaitɨ. Kemɨ'ane mɨpaɨ mɨtiyuriene, mɨkɨ kanitapɨnirɨmeni 'irɨmari kemɨtihiwe'eritɨa. 23Xehekwariyarietɨ xekenakɨni, yu'iyaritsie 'aixɨa xeteyɨkɨhɨawetɨ. 24Xekenanakatɨki tita 'aixɨa mɨti'ane, tita mɨtiunetɨarie Kakaɨyari hepaɨ 'anetɨ. Mɨkɨ tita yuri mɨrainetsie memɨmiemete wahepaɨ heitseriemekɨ yaxeketenekahuni, Kakaɨyari xe'ayexeiyatɨ xekeneyɨaka.

25'Ayumieme xeketeneuhayewa xete'itawatɨ, yuxexuitɨ yuri xeketeneyutahɨawi, tanaitɨ 'axeikɨa temɨtaxewinikɨ xeiwaiyaritsie temɨmiemekɨ. 26Xɨka xeha'aka, perutsɨ 'axaxepɨkateyurieni, xepɨka'ipitɨaka xeitukari xemɨha'akakɨ. 27Meta, Kauyumarie xepɨkapitɨaka xehetsie muyuhayewanikɨ. 28Kemɨ'ane mɨtinawayakai ketiuhayewa tinawanetɨ, ketikumaɨwani matsi yumamakɨ 'aixɨa tiyurienetɨ, mɨrexeiyanikɨ mɨkɨ memɨteheuyehɨwa mɨtiwayetuiriwanikɨ.

29Niuki 'axamanɨyɨne xɨka xeteta 'atineni, 'aixɨa pɨkayɨni, matsi pɨta xɨka 'aixɨa 'anemekɨ xe'utiniukani watseiriyatɨ kemɨ'ane meiyehɨwa, mɨpaɨ xekeneutiyuaneni pɨta, 'aixɨa xemɨwayurienikɨ 'enakaremete. 30Xepɨka'ihiweritɨaka Kakaɨyari 'Iyarieya Mɨtiyupata. Mɨkɨ kanixetseyutɨni kɨmana xemu'inɨatsie mexi tukari ka'aye'awe kepauka temɨxɨnarieni. 31Xeketeneuhayewa xehayutsiɨriyatɨ xeteyuka'uxiwe'erietɨ xeyuhaxɨawiyatɨ xe'utihiwatɨ 'axaxe'utiyuatɨ. Mɨkɨ naitɨ ketixani'eriwani xehetsɨa, meta naitɨ 'axamɨti'ane. 32'Aixɨa xete'u'iyaritɨ xekenakɨni, xekeneyunenimayaka, xeketeneuyuyehɨwirieka, xeme Kakaɨyari kemɨtixeheuyehɨwiri Kɨritsitu hetsie xetewiyakaku.

Currently Selected:

'Epetsutari 4: hch

Highlight

Copy