Zakaria 3

Mupolofita u bona muprisita yo muhulu mwa pono

1 # Ezra 5.2; Sin 12.10 Mwa pono ye ñwi Muñ'a Bupilo a ni bonisa Joshua muprisita yo muhulu a yemi fapil'a lingeloi la Mulena. Mi Satani n'a yemi kwatuko a Joshua, a itukiselize ku mu zekisa. 2#Juda 9 Lingeloi la Muñ'a Bupilo la li ku Satani, “Muñ'a Bupilo a ku atule, wena Satani. Muñ'a Bupilo ya lata Jerusalema a ku fe mulatu. Munna yo, Joshua, u swana sina kota ye yokozwi fa liiso i nze i tuka.”

3Joshua n'a yemi fo a nz'a apezi liapalo ze masila. 4Lingeloi la li kwa batusi ba lona ba kwa lihalimu, “A mu zwise liapalo zeo za masila z'a apezi mutu yo.” Cwale kih'a li li ku Joshua, “Ni zwisize sibi sa hao, mi ni ta ku fa liapalo ze nca, z'o ta apala.”

5La laela batusi ba lona ku apesa Joshua tukwe ye kenile kwa toho. Ba eza cwalo mi ba mu apesa liapalo ze nca, lingeloi la Muñ'a Bupilo li nze li yemi mo.

6Cwale lingeloi la bulelela Joshua. 7La bulela kuli Muñ'a Bupilo ya Maata Kaufela n'a ize, “Haiba u mamela milao ya ka ni ku eza misebezi ye ni ku file, fohe ni ta ku fa maata a ku talima za Tempele ya ka ni ku mamela malapa a yona, mi ni ta utwa litapelo za hao, sina mo ni utwela litapelo za mangeloi a fapil'a ka. 8#Jer 23.5; 33.15; Zak 6.12 Teeleza cwale, Joshua, wena ya li muprisita yo muhulu. Mu teeleze ni mina baprisita ba bañwi, mina sisupo sa bunde bwa kwapili. Ni ka tisa mutang'a ka ya bizwa Mutai! 9Ni beya fapil'a Joshua licwe li li liñwi le li na ni maneku a supile. Ni ka cakula manzwi fateñi, mi ka lizazi li li liñwi feela ni ta zwisa sibi sa naha ye. 10#Mika 4.4 Lizazi leo ha li ka fita, yo muñwi ni yo muñwi wa mina u ka mema wahabo kuli a t'o ina ni yena ka kozo mwa likota za mina za veine ni za lifeiga.”

Currently Selected:

Zakaria 3: Lozi09

Highlight

Copy