Zakaria 1
1
Muñ'a Bupilo u biza batu ba hae kuli ba kutele ku yena
1 #
Ezra 4.24—5.1; 6.14 Muñ'a Bupilo a fa mupolofita Zakaria manzwi a, ili mwa kweli ya busupa ni i liñwi ya silimo sa bubeli sa puso ya Dariusi mulena yo muhulu wa Peresia. Zakaria n'e li mwan'a Berekia, mi ili muikulu wa Ido. 2Muñ'a Bupilo ya Maata Kaufela a bulelela Zakaria kuli a taluseze batu, a li, “Na, Muñ'a Bupilo, ne ni nyemezi hahulu bo kukw'a mina. 3Kono cwale na mi bulelela, ni li, ‘Mu kutele ku na, mi ni na, ni ta kutela ku mina. 4Mu si ke mwa ba sina bo kukw'a mina. Bapolofita ba ba ne ba li teñi pili ne ba ba bulelezi manzwi a ka, ku ba taluseza kuli ba si ke ba pila bupilo bo bu maswe bwa sibi hape. Kono ne ba sa ni utwi kamba ku ni kuteka. 5Cwale bo kukw'a mina ni bapolofita bao ha ba sa li yo. 6Ni file bo kukw'a mina litaelo ni litemuso ka batanga ba ka bona bapolofita, kono ha ba si ka li mamela mi ba tahelwa ki ziezi. Kwa mafelelezo ba baka mi ba lumela kuli ki na, Muñ'a Bupilo ya Maata Kaufela, ya ba utwisize butuku bo bu swanela likezo za bona, sina mo ne ni lelezi.’ ”
Pono ya lipizi ye bonwi ki mupolofita
7Mwa silimo sa bubeli Dariusi a nz'a li mulena yo muhulu, ka lizazi la bumashumi a mabeli ka a mane la kweli ya bulishumi ka i liñwi ili kweli ya Shebati busihu, Muñ'a Bupilo a ni fa litaba ka pono. 8#Sin 6.2-8 Na bona lingeloi la Muñ'a Bupilo li pahami pizi ye kunoñu. La yema mwahal'a libumbu la likota za mikwe ili mwa libala, mi mwamulaho wa lona ne ku na ni lipizi ze ñwi, ze kunoñu, ze sweu, ni za mibala-bala. 9Na li buza, na li, “Muñ'a ka, lipizi ze li talusañi?”
La ni alaba, la li, “Ni ta ku bonisa se li talusa. 10Muñ'a Bupilo u ba lumile ku t'o tatuba lifasi.”
11Za bihela lingeloi, za li, “Lu potolohile lifasi kaufela, mi lu fumani kuli kaufel'a lona ha li sa na tuso mi li tuzwi.”
12Cwale lingeloi la li, “Muñ'a Bupilo ya Maata Kaufela, n'o halifezi Jerusalema ni minzi ya Juda ka lilimo ze mashumi a supile. Ku ta nga nako ye kuma kai pili u si ka ba bonisa musa wa hao?”
13Muñ'a Bupilo a alaba lingeloi ka manzwi a omba-omba. 14Lingeloi la ni bulelela ku huweleza s'a bulezi Muñ'a Bupilo ya Maata Kaufela, h'a ize, “Ni na ni lilato le lituna ni buikalabelo ka munzi wa ka o kenile ona Jerusalema. 15Ni halifezi hahulu macaba a ikola kozo ni bupilo bo bunde cwalo. Ha ne ni sa nyemezi batu ba ka, ona macaba a, a hulisize hahulu manyando a bona. 16Cwale ni kutezi mwa Jerusalema ku t'o bonisa munzi wo musa wa ka. Tempele ya ka i ka zuswa hape, ni munzi u ta yahiwa sinca.”
17Hape lingeloi la ni bulelela kuli ni zibise sicaba, ni li, “Muñ'a Bupilo ya Maata Kaufela u li minzi ya hae i ka zwelapili hape, mi hape u ta tusa Jerusalema, mi u ta u biza munzi wa hae luli.”
Pono ya manaka
18Mwa pono ye ñwi na bona manaka a lipulu a mane. 19Na buza lingeloi le ne li bulela ni na, na li, “Manaka a, a talusañi?”
La alaba, la li, “A yemela mibuso ye maata ya lifasi ye hasanyize batu ba Juda, Isilaele, ni Jerusalema.”
20Cwale Muñ'a Bupilo a ni bonisa babeleki ba bane ba ba na ni lisando. 21Na buza, na li, “Banna ba ba til'o ezañi?”
La alaba, la li, “Ba til'o sabisa ni ku shandaula macaba a n'a hatelezi Juda ni ku hasanya batu ba mwateñi.”
Currently Selected:
Zakaria 1: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.