Baroma 10
10
1Banabahesu, se ni lakaza ka pilu ya ka kaufela, ni se ni kupela Majuda ku Mulimu ka tapelo, kikuli ba piliswe! 2Na kona ku ba pakela kuli ba tukufalezwi za Mulimu, kono mukwa wo ba bata ku sebeleza Mulimu ka ona ha u si ka tomwa fa zibo ya niti. 3Ha ba si ka utwisisa mw'a ezeza Mulimu ku tusa batu, kuli ba kone ku ba ba ba lukile fapil'a hae. Ba likile ku ipumanela ili bona mikwa ya bona ya ku ba ba ba lukile. Cwale, ha ba si ka latelela mukwa o Mulimu a kondisa batu ka ona. 4Kakuli Kreste u felisize Mulao wa Mushe kuli batu kaufela ba ba lumela ba ezwe ba ba lukile fapil'a Mulimu.
Ku piliswa ki kwa batu kaufela ba ba lumela ku Mulena
5 #
Malivi 18.5
Mushe u ñozi cwana ka za ku luka ko ku zwa kwa ku mamela Mulao, u li, “Mutu ya eza s'a latelwa ki Mulao, u ta pila ka ona.” 6#Mul 30.12-14 Kono se si bulelwa bakeñisa ku luka ka tumelo ki se, “U si ke wa ipulelela kuli, ‘Ki mañi ya ka ya kwa lihalimu?’ ” Fo, ki ku kutiseza Kreste fafasi. 7Hape, u si ke wa li, “Ki mañi ya ka ya kwatas'a lifasi?” Fo, ki ku zusa Kreste kwa bafu. 8Cwale, se si bulelwa ki sika mañi? Ki se, “Linzwi la Mulimu li fakaufi ni wena. Li fa milomo ya hao ni mwa pilu ya hao.” Linzwi le, ki lona linzwi la tumelo le lu luta. 9Ha u ka bulela ka mulomo wa hao kuli Jesu ki Mulena, mi u lumela mwa pilu ya hao kuli Mulimu u mu zusize kwa bafu, u ta piliswa. 10Kakuli mutu u lumela ka pilu ya hae, mi u eziwe ya lukile ki Mulimu. Mutu u bulela ka mulomo wa hae, mi Mulimu wa mu pilisa. 11#Isa 28.16 Ku ñozwi kuli, “Mañi ni mañi ya lumela ku yena h'a na ku swaba.” 12Fa, ki ku kopanya batu kamukana, kakuli ha ku na fapahano mwahal'a Majuda ni balicaba. Kaufel'a bona ba na ni Mulena a li muñwi ya fa limpo za hae ku ba ba mu lapela kamukana. 13#Joel 2.32 Sina mo ku ñolezwi, “Mutu kaufela ya ta lapela ka libizo la Mulena u ta piliswa.”
14Kono ba ta mu lapela cwañi, haiba ha ba si ka lumela? Ba ta lumela cwañi, ba si ka utwa linzwi? Ba ta utwa cwañi, linzwi ha li sa lutiwi? 15#Isa 52.7 Linzwi li ta lutiwa cwañi ku si na ba ba lumilwe ku li luta? Sina mo ku ñolezwi kuli, “Ba na ni mahutu a mande cwañi, ba ba tisa litaba ze nde!” 16#Isa 53.1 Kono ha ba si ka amuhela kaufel'a bona Litaba ze Nde za Mulimu. Isaya kasibili u li, “Mulena, ki mañi ya lumezi litaba za luna?” 17Cwalehe, tumelo i zwa fa ku utwa, mi ku utwa ku zwa fa ku luta litaba za Kreste.
18 #
Lipi 19.4
Cwale na buza, ni li, “Kana ki niti kuli ha ba si ka utwa litaba za Kreste?” Batili, ba li utwile! Ku ñozwi kuli,
“Mulumo wa manzwi a bona
u yambile lifasi kaufela.
Manzwi a bona a il'o fita
mane ni kwa mafelelezo a lifasi.”
19 #
Mul 32.21
Ni sa buza hape, ni li, “Kana batu ba Isilaele ha ba si ka utwisisa, nji?” Ya alabile pili ki Mushe kasibili, h'a ize,
“Ni ta mi bulaisa muna
ka batu be i si sicaba luli.
Ni ta mi nyemisa ka sicaba sa batu
ba likuba.”
20 #
Isa 65.1
Mi Isaya ki ndume, h'a ize.
“Ni fumanwi ki ba ba ne ba sa ni bati.
Ni iponahalize ku ba ba ne ba sa ni buzi se siñwi.”
21 #
Isa 65.2
Kono h'a bulela ka za Isilaele, u li, “Ni otololezi mazoho a ka lizazi kaufela kwa batu ba ba sa utwi, ba ba ni fetuhela!”
Currently Selected:
Baroma 10: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
