Luka 7

Jesu u folisa mutang'a nduna wa masole

(Mat 8.5-13)

1Jesu ha s'a felize ku bulelela nyangela litaba zeo kaufela, a y'o kena mwa Kapernauma. 2Mo, nduna wa masole wa Muroma n'a na ni mutanga ya n'a lata hahulu. Mutanga yo n'a kula hahulu, mane n'a s'a li fakaufi ni ku shwa. 3Nduna yo, a man'o utwa za Jesu, a mu lumela ba bañwi kwa bahulu ba Majuda ku y'o mu kupa kuli a t'o mu foliseza mutang'a hae. 4Ha ba t'o fita ku Jesu, ba pihelela ku mu kupa, ba li, “Mutu yo luli u swanelwa ku tusiwa. 5U lata sicaba sa luna, mane ki yena ya lu yahezi sinagoge.”

6Cwale Jesu a ya ni bona. Ha s'a li fakaufi, muñ'a ndu a luma balikani ba hae ku y'o li ku Jesu, “Mulena, u si ke wa ikataza. Ni ikutwa kuli ha ku ni swaneli, na, kuli u tahe mwa ndu ya ka. 7Mane ni ikutwa ni kuli ha ni na tukelo ya ku taha ku wena. U laele feela, mi mutang'a ka u ka fola. 8Niha ni li mutu ya buswa ki ba bañwi, ni na, ni na ni masole mwatas'a ka. Ha ni li ku yo muñwi, ‘Zamaya!’ wa ya. Ku yo muñwi ha ni li, ‘Taha!’ wa taha. Mi ha ni laela mutang'a ka kuli, ‘Eza se!’ wa si eza.”

9Jesu a komoka h'a utwa cwalo. A sikuluhela kwa batu ba ba ne ba mu latelela, mi a li ku bona, “Na mi bulelela, ‘Ha ni si ka fumana tumelo ye swana ni ye, nihaili mwa Isilaele.’ ”

10Ba ba ne ba lumilwe ba kutela kwa ndu ya nduna, mi ba y'o fumana mutang'a hae a iketile hande.

Jesu u zusa mwan'a mbelwa

11Habusa, Jesu a ya mwa munzi o bizwa Naine. Balutiwa ba hae ni batu ba bañata ba mu latelela. 12H'a sutelela kwa munyako wa munzi, a katana batu ba ba ne ba lwezi mufu, mwana a li muñwi ku m'ahe, mi ki musali wa mbelwa. 13Mulena h'a mu bona, a mu shwela makeke, mi a mu bulelela, a li, “U si ke wa lila!” 14A sutelela kwa sala, a si ngunyuta, mi ba ba si lwezi ba yema. Jesu a li, “Mutangana, na ku bulelela, zuha!” 15Mufu a zuha, mi a kala ku bulela. Jesu kiha s'a mu fa m'ahe.

16Batu kaufela ba kenelwa ki sabo, mi ba lumbeka Mulimu, ba li, “Lu tezwi ki mupolofita yo mutuna. Mulimu u til'o pilisa batu ba hae.”

17Litaba za Jesu za hasana mwa Judea kaufela, ni mwa mabaka a potolohile naha yeo.

Ba ba lumilwe ki Joani Mukolobezi

(Mat 11.2-19)

18Balutiwa ba Joani ba mu kandekela zeo kaufela. Joani kiha s'a biza ba babeli ku bona. 19A ba luma ku Mulena, ku y'o mu buza kuli, “Na, ki wena ya n'a bulezwi ki Joani kuli wa taha, kapa lu libelele yo muñwi hape?”

20Ha ba se ba fitile ku Jesu, ba li, “Lu lumilwe ki Joani Mukolobezi ku t'o ku buza kuli, ‘Na, ki wena ya n'a bulezwi kuli wa taha, kapa lu libelele yo muñwi?’ ”

21Ka yona nako yeo, Jesu a folisa ba bañwi kwa matuku a bona, kwa buyanga, ni mioya ye maswe. A kwalulula meeto a libofu ze ñata, mi za bona. 22#Isa 35.5-6; 61.1 Kih'a alaba balutiwa ba Joani, a li, “Mu zamaye, mu y'o bulelela Joani ka ze mu boni ni ze mu utwile kaufela. libofu za bona, liyanga za zamaya, ba mbingwa ba fola, bo susu ba utwa, bafu ba zuha ni ku pila, mi Litaba ze Nde li lutiwa babotana. 23U litohonolo ya sa sitatali ka na.”

24Balutiwa ba Joani ha ba se ba ile, Jesu a kala ku bulela ka za Joani kwa nyangela, a li, “Ha ne mu ile ku Joani mwa naheñi, ne mu li mu ka y'o bona sika mañi? Lutaka lo lu nyanganyiswa ki moya? 25Kikuli se ne mu y'o bona i n'e li nto mañi? Mutu ya apezi liapalo ze nde ka ku fitisisa, nji? Batili, kakuli ba ba apala ze cwalo, ni ba ba ipilela ka minyaka, ba fumanwa mwa mandu a malena! 26Cwale ne mu il'o bonañi? Mupolofita? Ee, mane ya fita mupolofita! 27#Mala 3.1 Kakuli ki za Joani ze ñozwi ha kutwi, ‘Ki yo mulumiwa wa ka, ku bulela Mulimu. Bona, ni mu luma fapil'a hao ku y'o ku lukiseza nzila.’ ” 28Jesu a li ku bona, “Na mi bulelela, Joani ki yo mutuna kwa batu ba ba pepilwe kaufela, kono yo munyinyani mwa Mubuso wa Mulimu ki yo mutuna ku yena.”

29 # Mat 21.32; Luk 3.12 Batu kaufela hamoho ni batelisi cwalo, ba lumba Mulimu ha ba utwa zeo, kakuli ne ba kolobelizwe ka kolobezo ya Joani. 30Kono Bafalisi ni Baluti ba Mulao, bona, ne ba hanile mulelo wa Mulimu, ka ku hana ku kolobezwa ki Joani.

31Jesu a bulela hape, a li, “Batu ba nako ye ni ka ba likanyeza ni sika mañi? Ba swana niñi? 32Ba swana ni banana ba ba inzi fa patelo ba nze ba huwelezana, ba li, ‘Lu mi lizelize lipala, kono ha mu si ka bina. Lu opezi lipina za maswabi, kono ha mu si ka lila!’ 33Joani Mukolobezi u tile a sa ci buhobe, a sa nwi waine, kono mu ize, ‘U na ni moya o maswe.’ 34Na, Mwan'a Mutu, ni tile ni inze na ca ni ku nwa, mi mwa li, ‘A mu bone muci ni sitakwa yo, mulikan'a batelisi ni baezalibi!’ 35Nihakulicwalo, butali bwa Mulimu bu bonahala ku luka ku bona ba ba bu amuhela kaufela.”

Jesu h'a li mwa ndu ya Simoni wa Mufalisi

36Yo muñwi wa Bafalisi a memela Jesu kwa lico mwa ndu ya hae. Jesu a ya, mi a ina kwa tafule. 37#Mat 26.7; Mar 14.3; Joa 12.3 Ne ku na ni musali wa mikwa ye maswe mwa munzi mo. Ha s'a utwile kuli Jesu u mwa ndu ya mufalisi yo, a taha ni botela ya alabastera ye tezi mafula a nunka hande. 38A t'o ina kwamulaho kwa mahutu a Jesu, a nz'a lila, mane mioko ya kolobisa mahutu a hae. Kiha s'a taula mahutu a Jesu ka milili ya hae a nz'a tubeta ni ku a toza mafula. 39Cwale mufalisi ya n'a memile Jesu h'a bona cwalo, a li mwa pilu ya hae, “Ha ne i ka ba kuli mutu yo ki mupolofita, kambe n'a zibile kuli musali yo ki musali ya cwañi, ya nz'a mu swala-swala kwa mahutu, kakuli mikwa ya hae i maswe.”

40Jesu kih'a bulelela mufalisi, a li, “Simoni, ku na ni se ni bata ku ku bulelela.”

Simoni a alaba, a li, “Muluti, ki taba mañi? Ni bulelele!”

41Jesu a li, “Mutu yo muñwi n'a kolotisize batu ba babeli mali. Wa pili n'a kolotile mali a mañata. Wa bubeli a kolota kalulo ya bulishumi bwa mali a pili. 42Ha ne ba palezwi ku mu lifa, a ba swalela bubeli bwa bona. Cwale ya ka mu olisa hahulu ki mañi ku bao ba babeli?”

43“Ni kakanya kuli mwendi ki ya swalezwi sikoloti se situna,’ kwa alaba Simoni.

Jesu a li, “U alabile hande.” 44Cwale kiha s'a talima musali, mi a li ku Simoni, “Wa mu bona musali yo? Ni tile mwa ndu ya hao, kono ha u si ka ni fa mezi a ku tapa kwa mahutu, kono yena u tapisize mahutu a ka, ka mioko ya hae, ni ku a taula ka milili ya hae. 45Ha u si ka ni tubeta, kono yena h'a si ka pumula ku tubeta mahutu a ka, ha ni sa li ni kenela mo. 46Ha u si ka ni toza mafula kwa toho, kono yena u tozize mahutu a ka, ka mafula a na ni muunko o munati. 47Cwale na ku bulelela kuli lilato le lituna l'a bonisize li paka kuli libi za hae ze ñata li swalezwi. Haili ya swalezwi hanyinyani, yena u bonisa lilato le linyinyani.”

48Cwale Jesu a li ku musali, “Libi za hao u li swalezwi.”

49Ba ba ne ba inzi ni yena fa tafule ba kala ku bulelisana mwahal'a bona, ba li, “Yo ki mañi, mane u swalela ni libi?”

50Kono Jesu a li ku musali, “Tumelo ya hao i ku pilisize. U zamaye ka kozo.”

Currently Selected:

Luka 7: Lozi09

Highlight

Copy