Maheberu 7

Mulena ni Muprisita Melekisedeke

1 # Sim 14.17-20 Melekisedeke yo, i n'e li mulena wa Salema ni muprisita wa Muambakani Mulimu ya Pahami. Abrahama ha n'a zwa kwa ndwa kw'a n'a fenyize malena, Melekisdeke a y'o mu katanyeza, mi a mu tohonolofaza. 2Abrahama kiha s'a mu fa kalulo ya bulishumi ku z'a n'a luwile kaufela. Taluso ya pili ya libizo la Melekisedeke kikuli “Mulena ya Lukile.” Mi kakuli ne i li mulena wa Salema, libizo la hae hape li talusa kuli ki “Mulena wa Kozo.” 3Ndat'ahe ni m'ahe ni ba lusika lwa habo cwalo ha ba zibiwi. Mi ha ku zibwi f'a pepezwi ni f'a shwezi. U swana ni Mwan'a Mulimu. Ki muprisita kuya kuile.

4Mwa bona kuli i n'e li yo mutuna cwañi! Abrahama ha n'a li toho ye ñwi ya lusika lwa hae, u file Melekisedeke kalulo ya bulishumi ya z'a n'a hapile kaufela mwa ndwa. 5#Lipa 18.21 Mi ba lusika lwa Livi, bao ili baprisita, ba laelwa ki Mulao kuli ba nge kalulo ya bulishumi kwa batu ba Isilaele, kikuli, ba nga kwa banabahabo bona, niha ba li ba ba simuluhile ku Abrahama cwalo. 6Melekisedeke n'a sa simuluhi ku Livi, kono a fiwa ki Abrahama kalulo ya bulishumi ya z'a n'a luwile, mi a mu tohonolofaza, yena ya n'a amuhezi lisepiso za Mulimu. 7Ha ku na ya ka pihisa kuli ya tohonolofaza ki yo mutuna ku fita ya tohonolofazwa. 8Ka taba ya baprisita, kalulo ya bulishumi i ngiwa ki batu ba ba shwa, kono haili ka Melekisedeke, kalulo ya bulishumi i ngilwe ki ya pila, sina mo ku pakelwa mwa Mañolo. 9Mi cwale lu ka na lwa li, ni yena Abrahama h'a zwisa kalulo ya bulishumi yeo, ni yena Livi na bu zwisa, nihaike ki ba lusika lwa hae ba ba amuhela kalulo ya bulishumi ka nako ye. 10Kakuli, ka nako yeo, Livi n'a si ka pepwa kale, kono lu ka li n'a li teñi mwa mubili wa kukw'a hae Abrahama h'a t'o katana ni Melekisedeke.

11Ki fa buprisita bwa Livi fo n'o tomilwe Mulao o filwe batu ba Isilaele. Cwale kambe musebezi wa baprisita ba Livi n'o bile o' kondile hande, kambe ne ku si ke kwa tokwahala kuli ku bonahale muprisita wa mushobo u sili, muprisita ka mukwa wa Melekisedeke, isiñi ka mukwa wa Aruni. 12Kakuli buprisita ha bu fetuha, mulao ni ona u swanezi ku fetuha. 13Mi Mulen'a luna, ya bulelwa ka za hae, n'a li wa mushobo u sili, mi ha ku na nihaili a li muñwi feela mwa lusika lwa habo ya kile a ba muprisita ya sebelelize Mulimu kwa katala. 14Kwa zibahala hande kuli n'a pepilwe ili wa mushobo wa Juda, mi Mushe h'a si ka bulela se siñwi ka lusika lo, h'a bulela ka baprisita.

Muprisita yo muñwi ya swana ni Melekisedeke

15Mi taba ki ye, ye tiisa zeo kaufela. Ku tile muprisita u sili ya swana ni Melekisedeke. 16H'a si ka beiwa muprisita ka milao kapa ka taelo ya batu. U bile muprisita ka maata a bupilo bo bu si na ku fela. 17#Lipi 110.4 Kakuli Mañolo a li, “U ta ba muprisita kuya kuile, ka mukwa wa Melekisedeke.” 18Taelo ya kale cwale, i beilwe kwatuko kakuli n'e fokola, mi n'e si na tuso. 19Mulao wa Mushe kaniti ha u si ka kondisa sika. Kono sepo ye nde ku fita ya pili i se i keni cwale, ye lu suteleza ku Mulimu.

20Ku ekeza ku zeo, ku na ni buitamo bwa Mulimu. Ne ku si na buitamo bo bu cwalo, ha ne ku beiwa baprisita ba bañwi. 21#Lipi 110.4 Kono Jesu u bile muprisita ka buitamo, Mulimu h'a ize ku yena,

“Mulena u ezize buitamo,

mi h'a na ku fetula muhupulo wa hae.

‘U ta ba muprisita kuya kuile.’ ”

22Ka taba yeo, Jesu u fetuhile paki ya bulikani bo bu fita bwa pili.

23Ku na ni fapahano ye ñwi hape. Baprisita ba bañwi bao, ne ba li ba bañata kakuli ne ba shwa, mi ne ba sa koni ku zwelapili mwa musebezi wa bona. 24Haili Jesu yena, u pila kuya kuile, mi buprisita bwa hae ha bu na ku shimbulukela ku mutu u sili. 25Cwale, ka nako ye ni ka linako kamukana, wa kona ku pilisa ba ba taha ku Mulimu ka yena, kakuli u pila nako kaufela a nz'a ba lapelela ku Mulimu.

26Jesu, ki yena Muprisita wa luna yo Muhulu ye ne lu tokwa. Ki ya kenile. Ha ku si ka fumanwa foso kapa sibi ku yena. U kauhanyizwe ni batu ba baezalibi, mi u filwe situlo se si pahami kwa lihalimu. 27#Malivi 9.7 H'a swani ni baprisita ba bañwi ba bahulu, kakuli h'a tokwi ku eza litabelo za zazi ni zazi ili za swalelo ya libi za hae pili, mi ku tuha fo, za libi za batu. U ezize sitabelo si li siñwi, hañwi feela, mi hape i bile sa mafelelezo, h'a ikezize sitabelo ili yena. 28Mulao wa Mushe u keta batu ba ba si ka luka ku ba baprisita ba bahulu. Kono linzwi la buitamo bwa Mulimu, le li tile mwamulaho a Mulao, li ketile Mwana ya petehile kuya kuile, kuli a be Muprisita yo Muhulu.

Currently Selected:

Maheberu 7: Lozi09

Highlight

Copy