Simuluho 49

Jakobo u polofita za bana ba hae mi wa ba fuyaula

1Jakobo a biza bana ba hae, a li, “Mu kopane hamoho, mi ni ta mi bulelela ze ka mi tahela kwapili.

2“Bana ba Jakobo, a mu sutelele,

mu t'o teeleza.

Mu teeleze s'a bulela ndat'a mina

Isilaele.

3“Rubeni, mweli wa ka, ki wena maata

a ka,

ni mwan'a ka wa mwa bunca bwa ka,

mwan'a ka ya ikutwisisa,

ya maata ku fita bana ba ka kaufela.

4U sibangoki ya swana ni mezi

a sibuba sa macwe,

mi ha u na ku bubana,

kakuli u kile wa fosa ni yo muñwi

wa basali ba ndat'aho.

U silafalize bulobalo bwa ka

ka ku kena mwateñi!

5“Simioni ni Livi ki bana hamoho.

Malumo a bona ki lilwaniso ze situhu.

6Ha ni na ku kopana ni bona

mwa lingambolo za bona za kwa mukunda.

Ha ni na ku ba yo muñwi wa ba siango

sa bona,

kakuli ba bulaile batu ha ba nyemile,

ni ka bukebenga bwa bona ba pumaka

lipoho misifa.

7Buhali bwa bona bu kutiwe

kakuli bwa sabisa.

Ni bunyemi bwa bona,

bu kutiwe ni bona,

kakuli bu na ni lunya.

Ni ta ba hasanyeza mwa naha ya Jakobo

kamukana.

Ni ta ba zwaka ni Maisilaele.

8“Juda, banabahenu ba ta ku lumba.

U swala lila za hao fa ngele.

Banabahenu ba ta ku kandelela.

9 # Lipa 24.9; Sin 5.5 Juda u mwan'a tau!

U bulaya z'a lelekisa,

mi kihona a kutela f'a ipatanga.

Juda ki tau.

Wa ikotolola, mi ha lobezi

ha ku na ya kona ku lika ku mu zusa.

10U swalelezi sisupo sa bulena,

mi u si beile mwahal'a mahutu a hae.

U ta ina cwalo ku fitela

muñ'a ona luli h'a ka taha,

a t'o busa batu kamukana.

11U fungezi mbongolo ya hae kwa kota

ya veine,

ku ye ñwi ya likota ze nde hahulu.

Liapalo za hae u li tapisize ka waine,

mwa waine ye fubelu sina mali.

12Meeto a hae a pazima

inge waine ye fubelu ye munati.

Meeno a hae ki a muzilili.

13“Zebuloni u ta pila kwatuko a liwate.

Lisepe li ka t'o fwamanga fa makamba

a hae.

Naha ya hae i ta y'o fita kwa Sidoni.

14“Isakare ki mbongolo ye maata.

U butile mwahal'a milaka.

15Ha s'a boni bunde bwa mapumulelo ao,

mi s'a lemuhile ku tabisa kwa naha,

wa minyalala kuli a lwale mulwalo

wa hae,

a be mutanga ya eza misebezi ye tata.

16“Dani u busa hande batu ba hae.

Ba ta swana ni mishobo ye miñwi

ya Maisilaele.

17Dani u ta swana ni noha ye kwatuko

a nzila,

mbumbe ye na ni buhazo kwatuko

a mukwakwa,

ye luma kwa taku ya pizi

kuli ya i pahami a we ngalamena.

18“Ni litezi ku pilisa kwa hao,

Muñ'a Bupilo.

19“Gadi u ta tasezwa ki masholi,

kono u ta ba lwanisa

ni ku ba lelekisa.

20“Ashere, yena, naha ya hae

i ta tahisa lico ze ñata.

U ta ba ni lico ze swanela mulena.

21“Nafetali ki lizwii le li imatela

li lukuluhile.

Kwa buheha tuzwii twa yona!

22“Josefa ki kota ya veine

ye beya hahulu kwatuko a liwelu-welu.

Mitai ya yona i pahama limota.

23Bazumi ba til'o mu lwanisa

ka situhu.

Ba mu lelekisize ka buta ni masho

a bona.

24Kono buta bwa bona bwa lobeha,

mi misifa ya mazoho a bona ya pumiwa

ki maata a Mulimu ya Maata wa Jakobo,

yena mulisana, Licwe la Isilaele.

25Mulimu wa ndat'aho

ya nz'a ku tusa,

Mulimu ya Maata Kaufela

ya nz'a ku fuyaula,

pula ya litohonolo ye zwa kwahalimu,

mezi a buliba a kwatas'a mubu,

limbuyoti za mazwele ni mba,

26limbuyoti za lico ni lipalisa,

litohonolo za malundu a kale,

lika ze tabisa za kuya kuile,

li ine fa toho ya Josefa.

Li be fa pata ya ya ketilwe

mwahal'a banabahabo.

27“Benjamine ki lyakanyani

le li bulaya.

Kakusasa u ca s'a bulaile,

mi manzibwana u sa nz'a lunguta

z'a hapile.”

28Ao, ki ona masika a lishumi ni a mabeli a Isilaele, mi se ki sona s'a ba bulelezi ndat'a bona. A ba fuyaula a nz'a fa yo muñwi ni yo muñwi mbuyoti ye mu swanela h'a nz'a itaeza ni bona.

Lifu la Jakobo

29Jakobo cwale a ba laela, a li, “Ni tuha ni y'o kopana ni bahesu ba ba shwile. Mu ni buluke ni bo ndate mwa sikoti se si mwa simu ya Eferoni wa Muhiti. 30#Sim 23.3-20 Liñope le li kwa upa wa Mamare mwa naha ya Kanana li lekilwe ki Abrahama, hamohocwalo ni simu, ku Eferoni wa Muhiti ku eza mayumbelo.

31 # Sim 25.9-10; 35.9 “Ki mona mw'a bulukilwe Abrahama ni musal'a hae Sara. Ki mona mw'a bulukilwe Isaka ni musal'a hae Rebeka. Mi ki mona mo ni bulukile Lea. 32Simu ni sikoti se si mwateñi ne li lekilwe kwa Mahiti.” 33#Lik 7.15 Jakobo ha s'a felize ku fa litaelo zeo kwa bana ba hae, a kutiseza mahutu a hae fa mumbeta, a timela, mi a y'o kopana ni bahabo ba ba shwile.

Currently Selected:

Simuluho 49: Lozi09

Highlight

Copy