Simuluho 42

Bahulwani ba Josefa ba t'o leka lico mwa Egepita

1Jakobo ha s'a utwile kuli ku na ni lico mwa Egepita, a li kwa bana ba hae, “Kiñi ha mu nze mu talimana feela kwa meeto, mu si na se mu eza? 2#Lik 7.12 Ni utwile kuli ku na ni mabele mwa Egepita. A mu ye kwateñi, mu y'o leka lico kuli lu si ke lwa bulaiwa ki tala.” 3Cwale bahulwani ba Josefa ba lishumi ba ya kwa Egepita ku y'o leka mabele. 4Jakobo n'a si ka luma Benjamine munyan'a Josefa, kakuli n'a saba kuli mwendi a ka swana a tahelwa ki ziezi.

5Bana ba Isilaele ba y'o leka mabele, hamoho ni ba bañwi, kakuli ne ku na ni tala mwa naha ya Kanana. 6Josefa, ili muzamaisi wa naha ya Egepita, n'a lekisa mabele kwa batu ba lifasi kamukana. Cwale bahulwani ba Josefa ba taha, ba t'o kubama fapil'a hae ba nze ba inamezi fafasi. 7Josefa a sa bona feela bahulwani ba hae, a ba ziba, kono a ikezisa inge ya sa ba zibi. A bulela ni bona ka buhali, a li, “Mu zwa kai?”

Bona ba alaba, ba li, “Lu zwa kwa Kanana. Lu til'o leka lico.”

8Josefa n'a zibile bahulwani ba hae, kono bona ne ba si ka mu ziba. 9#Sim 37.5-10 Kiha s'a hupula litolo z'a n'a nz'a lolanga ka bona, mi a li, “Mu matwela mina. Mu til'o bona naha ya luna fo ku ka kenelwa ka bunolo.”

10Ba alaba, ba li, “Batili, mulen'a luna. Lu tile feela ku t'o leka lico, luna batanga ba hao. 11Kaufel'a luna lu bana ba mutu a li muñwi. Ha lu matwela, muñ'a ka. Lu batu ba ba sepahala.”

12Josefa a li ku bona, “Batili! Mu til'o bata feela makenelo a mwa naha ya luna.”

13Ba li, “Kaufel'a luna lu ba lishumi ka ba babeli, muñ'a ka. Lu bana ba munna a li muñwi mwa naha ya Kanana. Ñomba ku luna u siyezi ni ndat'a luna, mi munyan'a luna yo muñwi u shwile.”

14Josefa a li, “Kihona mo ne ni bulelezi cwalo. Mu matwela. 15Mu ta likiwa ka mukwa wo. Ni konka ka libizo la Faro kuli ha mu na ku kuta, konji f'a ka tahela munyan'a mina kwanu. 16Mu lume yo muñwi wa mina, a y'o mu nga. Ba ba siyezi ba ka libelelwa ku fitela ku bonahala niti ya ze mu bulela. Hakusicwalo, ka Faro ya pila, mu matwela luli.” 17Ha s'a bulezi cwalo a ba buluka mwa tolongo mazazi a malalu.

18Ka lizazi la bulalu, Josefa a li ku bona, “Na, ni mutu ya saba Mulimu. Hakulicwalo, mu ka kona ku ipilisa ha mu lumela ku eza se. 19Haiba mwa sepahala luli, ku ta siyala a li muñwi feela wa ku mina mwa tolongo, mwa ndu mo ne mu bulukilwe, mi ba ba siyezi ba iseze mabasi a mina lico ze mu lekile. 20Mu tise ñomba wa mina kwanu ku na, ku t'o ni kolwisa kuli ze mu bulela ki niti, mi ha mu na ku bulaiwa.”

Ba lumela. 21Ba ambolisana, ba li, “Ee, kaniti lu na ni mulatu ka kezo ye lu ezize ku munyan'a luna. Lu boni manyando a matuna a n'a keni ku ona ha n'a lu kupa tuso, kono ne lu si ka isa pilu. Kikabakaleo ni luna ha lu nyandiswa.”

22 # Sim 37.21-22 Rubeni a li, “Ne ni mi bulelezi kuli mu si ke mwa utwisa mushimani butuku, kono ha mu si ka utwa. Kifohe cwale lu lifiswa lifu la hae.” 23Josefa n'a utwa ze ne ba bulela, kono bona ne ba sa zibi kuli wa utwa, kakuli ne ba tolokelwanga ha ne ba bulelanga ni yena. 24Josefa a ba siya, mi a y'o lila. Ha s'a kona ku bulela ni bona hape, a kuta, a t'o supa Simioni, mi yena a tamwa ba nze ba bona.

Bahulwani ba Josefa ba kutela kwa Kanana

25Josefa a laela kuli masaka a bona a taziwe ka mabele, ni kuli ba kutisezwe mali a bona yo muñwi ni yo muñwi mwa saka ya hae, mi ba fiwe lico za mufaho. Zeo kaufela ba li ezezwa. 26Mitangana ba paheka masaka a ba lekile fa limbongolo, mi ba funduka. 27Fo ne ba til'o tibelela, yo muñwi wa bona a kwalula saka ya hae kuli a fe mbongolo ya hae lico. Kiha s'a fumana mali fa mulomo wa saka. 28A biza ba bañwi, a li, “Mu bone, bati ba ni kutiselize mali a ka! Ki a, mwa saka.” Ba tula lipilu. Ba talimana-talimana ka sabo ye tuna hahulu, mi ba buza, ba li, “Kanti Mulimu u lu ezize cwañi?”

29Ha ba t'o fita mwa Kanana ku ndat'a bona Jakobo, ba mu kandekela ze ne ba tahezi kamukana. 30Ba li, “Muzamaisi wa naha yani u bulezi ni luna ka buhali, mane a ba a lu zekisa kuli lu til'o twela naha ya hae. 31Lu mu bulelezi, lwa li, ‘Luna lu batu ba ba sepahala, ha lu matwela. 32Lu ne lu li ba lishumi ka ba babeli ku ndat'a luna. Yo muñwi wa luna u tokwahalile, haili yo munyinyani u siyezi ni ndat'a luna mwa Kanana.’ 33Yena a alaba, a li, ‘Ni ta kolwa kuli mwa sepahala ka mukwa wo. Yo muñwi wa mina u ta siyala ni na kwanu. Ba bañwi ba ta iseza mabasi a mina a shwa tala lico. Ku felile. Mu funduke! 34Mu y'o nga ñomba wa mina, a tahe kwanu ku na. Fohe, ni ta ziba kuli ha mu matwela, kono mu batu ba ba sepahala. Ni ta mi kutiseza munyan'a mina, mi mu ta fiwa tukelo ya ku leka ni ku lekisa mwa naha mo.’ ”

35Cwale ha ba sulula masaka a bona, mukotana wa mali wa yo muñwi ni yo muñwi n'o li mwa saka ya hae. Ha ba bona mikotana ya mali yeo, ba saba hahulu hamohocwalo ni ndat'a bona. 36Ndat'a bona, yena Jakobo, a li ku bona, “Cwale mu bata ku ni siya ni si na bana. Josefa h'a yo. Simioni h'a yo. Cwale se mu bata ku iseleza ni Benjamine! Na, ni zielehile luli!”

37Rubeni a li ku ndat'ahe, “Haiba ni sa ku kutisezi Benjamine, u bulaye bana ba ka ba babeli. U mu beye feela mwa mazoho a ka, mi ni ta kuta ni yena.”

38Kono Jakobo a li, “Mwan'a ka h'a na ku ya ni mina. Muhulwan'a hae u shwile, mi ki yena feela ya siyezi. A ka swana a shwela mwa nzila. Na, ni se ni supezi hahulu mi ha ni sa kona ku kena mwa maswabi a mu bata ku ni tiseza ona ka bomu. A ka ni bulaya feela.”

Currently Selected:

Simuluho 42: Lozi09

Highlight

Copy