Simuluho 37

Josefa ni banabahabo

1Jakobo a ina hona mo mwa naha ya Kanana, mw'a n'a yahile ndat'ahe. 2Ze, ki zona litaba za Jakobo.

Josefa, a sa li mushimani wa lilimo ze lishumi ka ze supile, n'a nz'a lisanga lingu ni lipuli ni bahulwani ba hae, bana ba Biliha ni ba Zilipa, basali ba ndat'ahe. A bulelela ndat'ahe likezo ze maswe ze ne ba bulelwa ka zona bahulwani ba hae.

3Isilaele n'a lata hahulu Josefa ku fita bahulwani ba hae kamukana, kakuli n'a mu pepezi mwa bucembele. A mu ezeza baki ye telele ye na ni mazoho. 4Bahulwani ba hae ha ba bona kuli ndat'a bona n'a lata hahulu Josefa ku fita bona, ba toya munyan'a bona hahulu, mane ne ba palelwa ku bulela ni yena ka likute.

5Zazi le liñwi Josefa a lola, mi a bulelela bahulwani ba hae ka tolo yeo. Kiha ba mu toya hahulu ku fita pili. 6A li, “A mu utwe mo ni lolezi. 7Kamukan'a luna ne lu li mwa simu lu nze lu tamaka mañata a mabele. Cwale ñata ya ka ya zuha, ya ikemela hande. Mañata a mina a t'o i beya mwa sikwenda, a eza inge a showelela ñata ya ka.”

8Banabahabo ba mu buza, ba li, “Kana luli u hupula kuli u ta ba mulen'a luna, wena? Kana u hupula kuli u ta lu busa, wena?” Cwale sitoyo sa bona sa ekezeha ku fita pili, kabakala tolo y'a n'a ba bulelezi.

9Josefa a lola hape, mi a bulelela bahulwani ba hae, a li, “Ni lolile tolo ye ñwi hape, mi ni boni lizazi ni kweli ni linaleli ze lishumi ka i liñwi li nze li ni showelela.”

10Tolo yeo a i bulelela bo ndat'ahe ni bahulwani ba hae, mi ndat'ahe a mu omanya, a li, “Ki tolo mañi y'o lolile? Kana u hupula kuli bo m'aho ni bahulwani ba hao, mane ni na kasibili, lu ka taha ku t'o ku showelela, wena?” 11#Lik 7.9 Bahulwani ba Josefa ba mu shwela muna, kono ndat'ahe yena, n'a nz'a hupula ka taba yeo.

Josefa u lekiswa kwa Egepita

12Bahulwani ba Josefa ne ba il'o liseza mitapi ya ndat'a bona kwa Sikemi. 13Cwale Isilaele kih'a li ku Josefa, “Bahulwani ba hao ba il'o liseza mitapi kwa Sikemi. U itukise, mi ni ta ku luma ku bona.”

Josefa a alaba, a li, “Se ni itukisize.”

14Ndat'ahe a li ku yena, “Zamaya, u y'o lekula bahulwani ba hao, ni mitapi haiba i iketile hande. Mi u kute, u t'o ni zibisa.” Ndat'ahe a mu fundula cwalo mwa Musindi wa Heberoni.

Josefa a y'o fita kwa Sikemi. 15A fumanwa ki mutu a nz'a lika-lika mwa naheñi. Mutu yo kiha s'a mu buza, a li, “Kanti u bata sika mañi?”

16Josefa a alaba, a li, “Ni bata bahulwani ba ka. Muñ'a ka, u ni supeze ko ba liseza mitapi ya bona.”

17Mutu yo a li, “Ba se ba tutile kale, mi ne ni utwile hande ha ba li ba ya kwa Dotani.” Cwale Josefa a ba latelela, mi a y'o ba fumana kwa Dotani.

18Ba mu bona a sa li kwahulenyana, a si ka ba sutelela kale. Ba lelisana ka yena, mi ba lumelelana ka ku mu bulaya. 19Ba nze ba bulelisana, ba li, “Ki kao kaloli, ka taha! 20A mu itukise, lu mu bulaye, mi lu nepele situpu sa hae ku se siñwi sa liliba ze. Lu ka bulela kuli u bulailwe ki sibatana. Cwale lu ta bona ko li ta felela litolo za hae.”

21Rubeni h'a utwa cwalo, a lika ku pilisa Josefa, a li, “Lu si ke lwa mu bulaya.” 22A ekeza, a li, “Mu si ke mwa sulula mali. Mu mu nepele feela mwa siliba se, se si mwa naheñi, kono mu si ke mwa mu holofaza.” N'a bulela cwalo ka mulelo wa ku mu pilisa ni ku mu kutiseza ku ndat'ahe. 23Josefa h'a t'o fita kwa bahulwani ba hae, ba mu tubula baki ya hae ye telele ye na ni mazoho. 24Ba mu swala, mi ba mu nepela mwa siliba se si kalile.

25Ha ba nze ba ca, ba bona sitopa sa Maishimaele ba ba zwa kwa Giliadi. Likamele za bona ne li lwezi mifuta-futa ya milyani ni sende ye nunka hande, ze ne ba isa kwa Egepita. 26Juda kiha s'a li kwa banabahabo, “Lu ka kutelwa kiñi ka ku bulaya munyan'a luna ni ku pata pulao? 27A lu mu lekiseñi kwa Maishimaele ba. Haiba lu eza cwalo, lu ka ba lu si ka mu holofaza. Hande-nde, ki munyan'a luna, nama ya nama ya luna ni mali a mali a luna.” Banabahabo ba lumela. 28#But 10.13; Lik 7.9 Balekisi ba Mamidiani ha ba fita, bahulwani ba Josefa ba y'o mu zwisa mwa siliba, mi ba mu lekisa kwa Maishimaele muwaya-waya wa silivela o eza mashumi a mabeli. Mi Maishimaele bao ba ya ni yena kwa Egepita.

29Rubeni h'a kutela kwa siliba, mi a y'o fumana kuli Josefa n'a siyo mwateñi, a pazula liapalo za hae ili ku bonisa maswabi. 30A kutela kwa banabahabo, a li, “Mushimani h'a sa li yo mwani! Ni ta eza cwañi?”

31Kiha ba bulaya puli, mi ba cimbeka baki ye telele ya Josefa mwa mali. 32Ba isa baki ku ndat'a bona, ba li, “Lu fumani siapalo se. Bona haiba ki sona sa mwan'a hao.”

33A si ziba, mi a li, “Ee, ki sona sa hae. U bulailwe ki sibatana! Josefa u pumakilwe bubindi-bindi!” 34Jakobo a pazula liapalo za hae, mi a itama ze nsu mwa teka ku bonisa maswabi. A silisa mwan'a hae nako ye telele. 35Bana ba hae ba bashimani ni ba basizana ba taha ku t'o mu omba-omba, kono a hana ku omba-ombiwa, a li, “Ni ta lila mwan'a ka ku fitela ni y'o kopana ni yena mwa lifasi la ba ba shwile.” Cwale a zwelapili ku silisa mwan'a hae Josefa.

36Ka yona nako yeo, ha ba li mwa Egepita, Mamidiani ba lekisa Josefa ku Potifaro, yo muñwi wa manduna ba Faro, ya n'a li yo muhulu wa mapolisa ba lapa la mulena.

Currently Selected:

Simuluho 37: Lozi09

Highlight

Copy