Mututo 2

Ku pepwa ni ku piliswa kwa Mushe

1Munna wa lusika lwa Livi a nyala musali wa lona lusika lo. 2#Lik 7.20; Maheb 11.23 Musali yo a itwala, mi a pepa mushimani. Ha s'a boni bunde bwa mbututu yo, a mu pata likweli ze talu. 3Kono ha s'a palelwa ku mu pata, a nga sizuma se si lukilwe ka mataka, mi a si lila kwande ka lingongwe. Kiha s'a lobaza mbututu mwateñi, mi a y'o mu beya mwahal'a bucwañi bo butelele kwa munanga wa nuka. 4Kaizel'a hae n'a inzi kwahulenyana, a libelezi ku bona se si ka tahela mbututu.

5Mwan'a Faro wa musizana a taha kwa nuka ku t'o tapa, basizana ba hae ba nze ba zamaya-zamaya fa munanga. A bona sizuma mwa bucwañi, mi a luma mutang'a hae ku y'o si nga. 6Mukwae yo a si kwahulula, mi a fumana mbututu wa mushimani mwateñi, a nz'a lila. A mu shwela makeke, a li, “Yo, ki yo muñwi wa bana ba Maheberu.”

7Kaizel'a mbututu kiha s'a buza mukwae yo, a li, “Kana ni ka y'o ku bizeza musali wa Muheberu a t'o ku lelela mwana yo, nji?”

8A li, “Ee, akufa.” Musizana a zamaya mi a y'o biza m'a mbututu. 9Mukwae a li ku yena, “U nge mwanana yo, u y'o ni utela yena, mi ni ka ku holisanga ha u ka eza cwalo” Cwale musali a nga mbututu, mi a y'o mu lelela yena. 10#Lik 7.21 Mwana ha s'a hula-hulile, a mu isa ku mwan'a Faro, mi yo a mu eza mwan'a hae. A li, “Ni mu zwisize mwa mezi,” kih'a mu beya libizo la Mushe.

Mushe u sabela kwa Midiani

11 # Maheb 11.24 #Lik 7.23-28 Mushe ha s'a hulile, a y'o potela bahabo, mi a bona mo ne ba hapelelezwa ku sebeza ka tata. A bona Muegepita h'a nata Muheberu, yo muñwi wa bahabo. 12A talima kafa ni kafa, mi ha s'a boni kuli ne ku si na mutu, a bulaya Muegepita yo, mi a pumbeka situpu sa hae mwa mushabati. 13Habusa a kuta, mi a bona banna ba Maheberu ba babeli ba lwana. Kiha s'a bulelela ya fosize, a li, “Kiñi s'o natela mwanahenu?”

14Yena a mu alaba, a li, “Wena, ya ku ezize mubusi ni muatuli wa luna ki mañi? Kikuli u bata ku ni bulaya sina m'o bulaezi Muegepita yani, nji?” Mushe a saba, mi a nahana, a li, “Kanti batu ba ziba se ni ezize!”

15 # Lik 7.29; Maheb 11.27 Faro ha s'a utwile taba yeo, a lika ku bulaya Mushe, kono Mushe a saba, mi a y'o ina mwa naha ya Midiani. H'a il'o fita mwateñi, a y'o pumulela kwa siliba.

16Muprisita wa mwa Midiani n'a na ni bana ba supile ba basizana. Basizana bao ba t'o ka mezi, mi ba taza likungu mo ne li nwelanga lingu ni lipuli za ndat'a bona. 17Kono balisana ba taha mi ba ba lelekisa. Mushe kiha s'a t'o ba tusa, mi a nwisa limunanu za bona. 18Ha ba kutela ku ndat'a bona Reuwele, a ba buza, a li, “Kiñi kacenu ha mu kutile kapili cwalo?”

19Ba alaba, ba li, “Lu tusizwe ki Muegepita kwa balisana ba ba lu hanisanga ku nwisa, mane u lu kezi mezi ni ku nwisa limunanu za luna.”

20Ndat'a bona a ba buza, a li, “U kai? Mu siyeziñi mutu yo koo? A mu zamaye, mu y'o mu biza, a t'o ca ni luna.”

21Mushe a lata ku ina hona mo, mi Reuwele a mu fa mwan'a hae ya bizwa Zipora kuli a be musal'a hae. 22Zipora a pepa mwana wa mushimani. Mushe a nahana, a li, “Na, ni muzwahule mwa naha i sili,” kiha s'a mu beya libizo la Gerishomi.

23Mwamulaho a nako ye telele, mulena wa Egepita a shwa. Maisilaele, bona, ba bilaela hahulu mwa butanga bwa bona, mi ba lilela tuso. Sililo sa bona sa y'o fita ku Mulimu. 24#Sim 15.13-14 A utwa pilaelo ya bona, kih'a hupula bulikani bwa hae ni Abrahama, Isaka ni Jakobo. 25A bona butanga bwa Maisilaele, mi a ba utwela butuku.

Currently Selected:

Mututo 2: Lozi09

Highlight

Copy