Likezo 27

Paulusi u iswa kwa Roma

1Ha ku se ku lukisizwe kuli lu ka ya kwa Italia ka sisepe, ba beya Paulusi ni mapantiti ba bañwi mwa mazoho a muzamaisi wa masole ya n'a bizwa Juliusi, ili wa likuta le li bizwa la Augusto. 2Lwa longana mwa sisepe se ne si zwa kwa Adramiti, se si ne si lukela ku kulisa makamba a naha ya Asia, mi lwa fuula. Aristarko, ili Mumasedonia wa kwa Tesalonika, n'a zamaya ni luna. 3Habusa lwa y'o fita mwa Sidoni. Juliusi ya n'a na ni mukekecima ku Paulusi, a mu lumelela ku y'o bona mizwale ya hae ni ku fiwa z'a n'a tokwa. 4Lwa zwelapili, mi kakuli ne lu katanyeza moya, lwa kulisa soli sa Sipera. 5Lwa sila liwate fakaufi ni naha ya Silisia ni ya Pamfilia mi lwa t'o fueka mwa Mira, munzi o mwa Lisia. 6Hona mo, muzamaisi a fumana sisepe se ne si zwa kwa Alexandria mi si ya kwa Italia. Kiha s'a lu longa mwateñi.

7Lwa zamaya ka bunya mazazi a mañatanyana, kabakala ku lwaniswa ki moya, mi kwa mafelelezo, lwa be lwa y'o fita ka butata bo butuna fakaufi ni munzi o bizwa Kinido. Moya wa lu hanisa ku fueka, kiha lu zamaya kwatuko a soli sa Kreta, ku t'o fitelela sinyunya sa Salmone. 8Lwa zamaya kwatuko a munanga, i sa li ka butata bo butuna, mi lwa be lwa t'o fita fa sibaka se si bizwa Siko se Sinde, fakaufi ni munzi wa Lasea.

9Lwa sinya nako ye telele mo, ku fitela ha ku bonahala kuli kanti ku zwelapili mwa musipili ku na ni kozi, kakuli lizazi la ku itima lico ne li se li fitelezi, mi silimo ne si se si ile. Kiha Paulusi a ba fa kelezo ye, a li, 10“Banna, ni bona kuli musipili wa luna, ku zwa fa, i ta ba butata feela. Lisinyehelo li ta ba teñi kwa neku la libyana ni sisepe cwalo, mane mafu a ka ba teñi.” 11Kono muzamaisi wa masole n'a lumelelana ni se ne si bulezwi ki muzamaisi wa sisepe ni muñ'a sona, isiñi se ne si bulezwi ki Paulusi. 12Likamba n'e si le linde ku y'o fuekela mwateñi ni ku ina ka nako ya maliha. Kabakaleo, buñata bwa batu ba lumela kuli ku fuulwe, mi ku likwe ku y'o fita kwa Fenekisi haiba kwa konahala. Ki lifuekelo la Kreta le li talimile mboela wa wiko ni mutulo wa wiko, mi ne ku konahala ku y'o ina maliha kaufela foo.

Liñungwa mwa liwate

13Kwa fuka moyanyana o n'o zwa kwa mboela, mi batu ba hupula kuli mulelo wa bona ne li o munde. Cwale ba fuula, mi ba zamaya kwatuko a munanga wa Kreta. 14Kono moya o mutuna wa liñungwa o' bizwa Eurakilo, wa fukuka u zwa kwa malundu a soli. 15Wa nata sisepe, mi, kakuli ne ku sa konahali ku talimana ni ona, lwa tuhela ku lika, mi sisepe sa kukiswa ki moya. 16Lwa y'o fumana mukundanyana ha lu y'o booloka kwa mboela wa solinyana sa Kauda. Kiha lu konile ku swala ka tata kakolonyana ka sisepe kuli ka si ke ka sinyeha. 17Ka hohelwa fa sisepe, mi sona sisepe ba si tateza mihala ka tata. Ne ba saba kuli ba ka swana ba kashezwa fa muuwa wa munanga wa Libya. Kiha ba wisa lisila le lituna la sisepe, mi sa kukiswa ki moya. 18Liñungwa-tuna leo la zwelapili, mi kamukwaocwalo habusa ba kala ku nepakela libyana ze ñwi mwa mezi. 19Ka le li tatama, ba latela mwa liwate ni lisebeliso ze ñwi za sisepe ka mazoho a bona. 20Lu ngile mazazi a mañata lu sa boni lizazi kapa linaleli, moya u nz'o sweli ku fuka ka tata. Kwa mafelelezo lwa be lwa felelwa ki sepo ya kuli lu ka pila.

21Batu ha ba se ba ngile nako ye telele ba sa ci, Paulusi a yema fapil'a bona, mi a li, “Banna, kabe ne mu utwile ze ne ni bulezi, kuli lu si ke lwa fuula mwa Kreta, kabe lu pimile ziezi ni sinyehelo ye. 22Kono cwale, na mi kupa kuli mu tiye lipilu! Ha ku na nihaili a li muñwi ku mina ya ka shwa. Sisepe feela ki sona se si ta sinyeha. 23Kakuli busihu bo, bo bu felile, ni boni lingeloi la Mulimu, yo ni li mutu wa hae, hape ye ni sebeleza. 24La li ku na, ‘U si ke wa saba, Paulusi! U swanezi ku y'o yema fapil'a Mulena yo Muhulu Sesare, mi Mulimu, ka sishemo sa hae, u ku file bupilo bwa b'o zamaya ni bona kaufela.’ 25Hakulicwalo, banna, mu tiye lipilu, kakuli ni sepile Mulimu. U ta eza sina mw'a ni bulelezi. 26Kono lu ta kashezwa mwa soli se siñwi.”

27I ne i li ka busihu bwa bulishumi ka a mane, mi liñungwa ne li sa lu kasheza kafa ni kafa mwa liwate la Mediteranea. Malungasiku, bazamaisi ba sisepe ba kakanya kuli lu se lu sutelelzi fakaufi ni likamba. 28Cwale ha ba shulumuna muhala o' na ni linjanga, ba fumana kuli buliba ne bu bata ku eza lilabo ze lishumi ka ze ketalizoho. Hamulahonyana ba eza cwalo, mi ba fumana ze lishumi feela. 29Ne ba saba kuli sisepe sa luna si ka swana sa liba fa macwe. Kiha ba se ba si yemisa ka manjanga a mane a kwa litusi la kwa mulaho, mi ba lakaza hahulu kuli bu se. 30Bafuluhi ba lika ku toba mwa sisepe. Ba shulumunena kakolonyana mwa mezi, mi ba ikezisa ike ba y'o shulumuna manjanga kwa litusi la kwa pili. 31Kono Paulusi a bulelela muzamaisi wa masole ni bona masole cwalo, a li, “Haiba batu bao ba ka zwa mwa sisepe, ku felile. Ha mu sa na ku pila.” 32Masole kiha ba puma mihala ye ne sweli kakolonyana, mi ka tupwikela mwa mezi.

33Lizazi ha li se li bata ku pazula, Paulusi a kupa batu kaufela kuli ba ce lico, a li, “Se ku felile lisunda ze peli mu nze mu litezi ku si na se mu cile. 34Cwalehe, ni kupa kuli mu ce se siñwi ha mu lata ku pila! Ha ku na nihaili mulili u li muñwi feela o ta kumuha kwa litoho za mina.” 35Ha s'a bulezi cwalo, a nga buhobe, mi a lapela ba nze ba bona kaufela. A bu ketula, mi a kala ku ca. 36Kaufel'a bona kiha ba tiya lipilu, mi ba ca ni bona. 37Kaufel'a luna ne lu li batu ba mianda ye mibeli ni mashumi a supile ka ba silezi mwa sisepe mo. 38Ha ba se ba cile hande kaufel'a bona, ba imulula sisepe ka ku poseza buloto mwa mezi.

Sisepe sa pazuha

39Ha bu se bu sile, bazamaisi ba sisepe ha ba si ka ziba naha kuli ki ifi, kono ba lemuha sikonyana se si na ni likamba, mi ba lakaza ku y'o fuekela sisepe kwateñi, haiba ku ka konahala. 40Cwale ba pumaka manjanga mi a tupwikela mwa mezi. Hape ba tamulula mabala a ku sikululisa sisepe. Kiha ba yemisa lisila la kwa pili kuli moya u kukiseze sisepe kwa likamba. 41Kono sisepe sa t'o ciñeka fa suuwa ka litusi la kwa pili mi sa kakatela, sa palelwa ku zamaya. Mi ka yona nako yeo, mandinda a kala ku si lobaka tuemba-emba kwa mulaho.

42Masole ba eza mulelo wa ku bulaya mapantiti kaufela kuli ku si ke kwa ba ni ya ka tapa, mi a y'o ipata. 43Kono muzamaisi wa masole, ya n'a lata ku pilisa Paulusi, a ba hanisa ku peta mulelo wa bona. Bakeñisa ku eza cwalo, a laela batu kaufela ba ba ne ba kona ku tapa kuli ba tulakele pili mwa mezi, mi ba tapele kwa likamba. 44Ba bañwi ne ba na ni ku ba latelela, ba nze ba swalelezi fa mapulanga kapa tuemba to tu pazuhile kwa sisepe. Mi mo, ki mona mo ba il'o ombokela kaufel'a bona ba nze ba pila.

Currently Selected:

Likezo 27: Lozi09

Highlight

Copy