2 Timotea 4

Likelezo za mafelelezo

1Fapil'a Mulimu ni fapil'a Jesu Kreste, muatuli wa ba ba pila ni ba ba shwile, ni ka ku hupula kuli Kreste u ta taha hape ku t'o busa, na ku laela. 2U lute linzwi la Mulimu, u tundamene ku li bulela, i ka ba ka nako ye nde kamba ye maswe. U kolwise, u kalimele, u tiise lipilu za ba ba ku teeleza, mi u eze cwalo ka pilu-telele kaufela. 3Nako ya taha fo batu ba ka hana ku teeleza tuto ya niti. Ba ka latelela litakazo za bona, mi ba ta ikubukanyeza baluti ba bañata, ba mifuta-futa, ba ba ta ba bulelela ze ba lata ku utwa. 4Ba ta tuhela ku teeleza kwa niti, mi ba yembulukele kwa matangu. 5Kono wena, u be ni buiswalo mwa linto kaufela, u itiise mwa manyando, u eze musebezi wa hao wa ku luta Litaba ze Nde, mi u pete liswanelo za hao kaufela sina mutanga wa Mulimu.

6Haili ka na, nako ya ka ya ku eziwa sitabelo i se i li fakaufi, mi ni tuha ni siya bupilo bo. 7Ni lwanile ndwa ye nde, ni fitile kwa mafelelezo a siyano, mi ni bulukile tumelo. 8Mi cwale mupuzo wa ba ba tuzi u ni libelezi, ili o' bonisa ku luka o ni ta fiwa ki Mulena ka lona lizazi leo, yena muatuli ya lukile. Mi h'a na ku ni fa ona, na ni li nosi, kono u ta u fa ni bona bao kaufela ba ba libelezi ka lilato nako ya ku taha kwa hae.

Manzwi a ku Timotea

9Lika mo u ka konela kaufela ku taha ku na ka bubebe. 10#Bakol 4.14; Fil 24; 2 Bakor 8.23; Magal 2.3; Tite 1.4 Demasi u ni sabezi. U latile hahulu za lifasi le, mi u ile kwa Tesalonika. Kresensi u ile kwa Galatia ni Tite kwa Dalmatia. 11#Bakol 4.14; Fil 24; Lik 12.12, 25; 13.13; 15.37-39; Bakol 4.10 Ki Luka feela ya inzi ni na. U nge Mareka, mi u tahe ni yena, kakuli u ka kona ku ni tusa mwa musebezi wa ka. 12#Lik 20.4; Baef 6.21-22; Bakol 4.7-8 Tikiko ni mu lumile kwa Efese. 13#Lik 20.6 Ha u taha, u ni bitulele cansi ya ka ye ni siile mwa Troase ku Karpo. U tiseleze ni libuka cwalo, sihulu matalo fo ni ñozi.

14 # 1 Tim 1.20; Lipi 62.12; Baro 2.6 Alexandere, mumbuti, u ni utwisize butuku hahulu. Mulena u ta mu kutiseza sina mw'a ezelize. 15U mu tokomele ni wena, kakuli n'a hanyeza ka tata litaba za luna.

16Ha ni zekiswa, lwa pili, ha ku na ya ni yemezi. Ba ni sabezi kaufel'a bona. Mulimu a si ke a balela mulatu wo ku bona! 17Kono Mulena a ba ni na, mi a ni fa maata, mane ni kile na kona ku bulela linzwi ka ku tala kuli Balicaba kaufela ba utwe. Mi na piliswa kwa mulomo wa tau. 18Mulena u ta ni pilisa kwa bumaswe kaufela, mi u ta ni isa mwa Mubuso wa hae wa kwa lihalimu. Ku iswe kanya ku yena kamita ni mita! Amen.

Litumeliso za mafelelezo

19 # Lik 18.2; 2 Tim 1.16-17 U lumelise Prisila ni Akila, ni lubasi lwa Onesiforo. 20#Lik 19.22; Baro 16.23; Lik 20.4; 21.29 Erasto u siyezi mwa Korinte, mi ni siile Trofimo mwa Mileta kakuli n'a kula. 21U like ka tata ku taha, maliha a si ka punyeha.

Eubulo, Pudensi, Linusi, Klaudia ni banabahabo luna kamukana ba ku lumelisa.

22Mulena a be ni wena. Sishemo sa Mulimu si be ni mina kaufela.

Currently Selected:

2 Timotea 4: Lozi09

Highlight

Copy