1 Pitrosi 5
5
Ku babalelwe mutapi wa Mulimu
1Cwale, ni eleza mwahal'a mina ba ba li bahulu ba keleke. Ni na, ni muhulu. Ni paki ya manyando a Kreste, mi ni na ni kabelo mwa kanya ye ta bonahala. Se ni kupa ku mina ki se. 2#Joa 21.15-17 Mu be balisana ba mutapi w'a mi file Mulimu. Mu u lise ka ku tabela, sina mw'a latela Mulimu, isiñi ka ku hapelezwa. Mu eze musebezi wa mina, isiñi ka takazo ya ku fumana mali kono ili ya ku lata ku sebeza. 3Mu si ke mwa lika ku busa bao mu filwe ku ba babalela, kono mu be mutala kwa mutapi. 4Mi Imutongo yo Muhulu h'a ka fita, mu ta fiwa mupuzo wa kanya, wa bulena, o sa sinyehi.
5 #
Mash 3.34
Kamukwaoswana, ni mina micaha mu ipeye kwatas'a banna-bahulu. Mu be ni buikokobezo kaufel'a mina, mu nze mu tusana hande. Kakuli ku ñozwi kuli, “Mulimu u hanyeza baikuhumusi, kono u shemuba ba ba ikokobeza.” 6#Mat 23.12; Luk 14.11; 18.14 Kabakaleo, mu ikokobeze mwatas'a lizoho le li maata la Mulimu, kuli a mi hulise ka nako ye swanela. 7#Litu 2.1-18 Mu nepele lipilaelo za mina kaufela ku yena, kakuli wa mi babalela.
8Mu tokomele, mi mu libelele! Sila sa mina, Satani, u zamaya a potoloha a nz'a lila sina tau ye bata yo i ka ca. 9Mu tiye mwa tumelo ya mina mi mu mu hane, kakuli mwa ziba kuli banabahabo mina ba balumeli, ba ba hasanezi kai ni kai mwa lifasi, ba mwa manyando a swana ni a mina. 10Kono ha mu se mu nyandile nakonyana, Mulimu ya na ni sishemo kaufela, ya mi bizelize ku tabela kanya ya hae ye sa feli ka ku kopana ni Kreste, u ta mi kondisa ili yena, a mi tiise, a mi fe maata, mi a mi tome fa mutomo o tiile. 11Maata ki a hae kuya kuile! Amen.
Litumeliso za mafelelzo
12 #
Lik 15.22,40 Ni mi ñolezi liñolo le li kuswani le, ka ku tusiwa ki mwanahabo luna Silvano, ye ni bona kuli wa sepahala. Ni bata ku mi eleza ni ku mi kolwisa, ka bupaki bwa ka, kuli se ki sona sishemo sa Mulimu sa niti. Mu tiyele ku sona.
13 #
Lik 12.12, 25; 13.13; 15.37-39; Bakol 4.10; Fil 24 Keleke ye mwa Babilona, ili ye ketilwe ki Mulimu ni yona, ya mi lumelisa, hamohocwalo ni mwan'a ka Mareka. 14Mu tubetane ka lilato la balumeli.
Kozo i be ni mina kaufela ba ba li ku Kreste.
Currently Selected:
1 Pitrosi 5: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.
