SAN MARCOS 16

Ra bibani Jesús

(Mt. 28.1-10; Lc. 24.1-12; Jn. 20.1-10)

1Udi'di si dxi enda riziila'dxi', para uzí' María Magdalena ne Salomé ne María jñaa Jacobo nisa rindá' naxhi para chi uchá ca ladi Jesús. 2Domingo siadó' ro' biree cabe ze cabe ra ba' que ne yendá cabe raqué ma gundani gubidxa. 3Ne nuu cabe xizaa tu cuee guie ni ye'gu ruaa ba' que.

4Peru ora yendá cabe biiya cabe ma adxé ladu nexhe ni. 5Ne ora biuu cabe ndaani ba' que biiya cabe zuba ti hombre huiini ladu derechu naba'qui ti lari quichi de yanni ñee, ne bidxibi cabe. 6Peru óraque na hombre que rabi laacabe:

―Cadi idxibi tu, nanna cuyubi tu Jesús de Nazaret ni ucuá lu cruz que, peru ma bibani be. Ma qué guinni be rarí'. Laidxiña gu'ya tu ra guta be, 7ti che tu chi tidxi tu ca discípulu stibe ne Pedru ma che be Galilea ne raqué gu'ya ca laabe, casi gudxi be laaca'.

8Ne biree uxooñe cabe de ra ba' que purti cayaca diti cabe tantu cadxibi cabe ne qué ñabi di cabe ni iruti purti cadxibi cabe.

Ra biiya María Magdalena Jesús

(Jn. 20.11-18)

9Bibani Jesús de lade gue'tu domingo siadó' ro', dxi ruzulú semana, ne nirudó' María Magdalena biiya laabe. María nga dxa gunaa ni ulee be gadxe binidxaba luguiá que. 10Ne yetidxi María ni cani uzá né Jesús tobi si. Nuu ca triste ne cayuuna ca'. 11Ne gudxi be laaca nabani Jesús ne ma biiya be laa, peru qué ñuni cre ca laabe.

Biiya chupa discípulu Jesús

(Lc. 24.13-35)

12Udi'di si ngue bidxiña Jesús ra nuu xhupa de laaca neza ze ca gui'xhi', peru qué nuluí' pa laabe ngue. 13Para bigueta ca ngue yetidxi ca ca xcaadxi que, peru laca qué ñuni cre ca'.

Ra biseenda Jesús ca apóstol sti'

(Mt. 28.16-20; Lc. 24.36-49; Jn. 20.19-23)

14Ultimu bidxiña Jesús ra nuu once discípulu sti', ra zuba irá ca ruaa mexa' ne udinde né be laaca xiñee qué ñuni cre ca cani biiya laabe ma nabani be, ne xiñee tan naguidxi ladxidó' ca'. 15Ne óraque rabi be laaca':

―Yanna, laché idubi guidxilayú. Lachigüí né irá binni stiidxa Dios. 16Tu guni cre ne chu' nisa la? zalá. Peru tu qué guni cre la? ziaana donda sti luguiá'. 17Ne zudiee ca seña ri cani guni cre: zabee cabe binidxaba ni riguite ique binni ne zaní' cabe idioma ni qué niziidi cabe. 18Zanaaze cabe beenda lu ná cabe, ne pa gue cabe xiixa ni napa venenu la? gasti qué zaca cabe, ne zaguixhe ná cabe luguiá binni huará ne zianda ca'. Naa nga quixhe irá nga lu ná cabe para guni cabe.

Biasa Jesús ze ibá'

(Lc. 24.50-53)

19Biluxe si gudxi Señor Jesús laacabe irá nga, biasa ze ibá' ne gurí cue' Dios. 20Ne laacabe la? biree cabe yegüí cabe stiidxa Dios irá ladu. Ne laca Señor ucané laacabe bisihuinni dxandí ni cayuí' cabe que pur ca milagru ni bi'ni cabe. Amén.

Currently Selected:

SAN MARCOS 16: zai

Highlight

Copy