SAN LUCAS 20
20
Ra unaba diidxa cabe tu naca Jesús
(Mt. 21.23-27; Mr. 11.27-33)
1Ti dxi cusiidi Jesús ca binni que ndaani yu'du ro'. Cayuí' né be laaca stiidxa Dios. Raqué nuu be beeda ca xaíque sti ca sacerdote ne ca maistru de ley ne ca xaíque sti guidxi, 2rabi ca laabe:
―Gudxi laadu tu nacu para cayu'nu irá ndi', o tu gudxi lii gu'nu cani.
3Para rabi be laaca':
―Naa laca zanaba diidxa laatu tobi. Lagabi naa, 4tu biseenda Juan beda nduu nisa binni. De Dios zeeda ni la? o de binni guidxilayú.
5Oraque na ca':
―Xi gabi nu laabe pue. Purti pa gabi nu Dios la? zabi be laanu xiñee qué ñuni cre nu laa. 6Peru pa gabi nu binni la? zuchá ca binni ri guie laanu, purti runi cre ca Dios gudxi Juan xi iní'.
7Oraque na ca qué ganna ca tu biseenda Juan. 8Para rabi be laaca':
―Nin naa qué zabe laatu tu biseenda naa gune irá ndi'.
Sti ca hombre qué iquiiñe'
(Mt. 21.33-44; Mr. 12.1-11)
9Ne bizulú be gudixhe be ti ejemplu para ca binni que, na be:
―Uyuu ti hombre bizuhuaa yaga uvas lu layú sti', ne óraque biree ze sti guidxi. Bisaana ni lu ná caadxi binni gapa ni. Bindaa be guidxi ra ze be que. 10Dxi ma gunda dxi iruugu uvas que biseenda be ti mozo stibe para chi caa bia' raca caber laabe. Peru gudiñe cani cayuni dxiiña lu layú que mozo que ne biseenda ca laa nisi ná'. 11Bigueta biseenda be sti jmozo be. Ne zaqueca ucuaa cabe laa gudiñe cabe laa, bi'ni cabe burla laa ne biseenda cabe laa nisi ná'. 12Bigueta biseenda be raguionna jmozo be. Zaqueca udiñe cabe laa ne uladxi cabe laa.
13Oraque na be: “Xi gune yanna. Chi useenda xiiñe ni nadxiee'. Zandaca ora gu'ya cabe laa zapa xpia' cabe.” 14Peru ora bi'ya cabe laa na cabe: “Ndi nga ni chi guiaana né irá sti bixhoze. Latá' guuti nu laa ti guiaana né nu ni laanu.” 15Ne ulee cabe laa de ndaani le' que, ne biiti cabe laa.
Yanna xi na tu guni xpixuaana layú que laacabe ya'. 16Zeeda, zuuti laacabe ne zudii layú que stobi.
Ora bina diaga ca binni que xi na be, na ca':
―Nin qué ñacala'dxi Dios.
17Peru óraque biiya dxi be laaca' ne na be:
―Pa cadi zacá ni la? xi riní' Xqui'chi Dios ra na:
Guie ni bisa'bi cani cucuí yoo que, guie que pe naaze yoo que yanna.
18Tu guiaba lu guie que, zacaná, peru tu gueda guiaba guie que luguiá la? zacadé.
Enda riguixe impuestu
(Mt. 21.45-46; 22.15-22; Mr. 12.12-17)
19Ucala'dxi ca xaíque sti ca sacerdote ne ca maistru de ley que, ninaaze ca laabe purti nanna ca gudixhe be ejemplu que para laaca'. Peru bidxibi ca ca binni que. 20Para biseenda ca caadxi tu chi undaachi laabe, inaba diidxa laabe xiixa, casi ñaca racala'dxi ca ganna ca xi na be, peru para idxela si ca modo inaaze ca laabe para utiidi ca laabe lu ná gobernador. 21Na ca rabi ca laabe:
―Maistru, nanna du jneza riní' lu' ne jneza rusiidi lu'. Qué rulabi lu tutiica naca binni, sínuque rusiidi lu modo pe racala'dxi Dios sa binni. 22Gudxi laadu pa jneza quixe nu lu ná César o pa co'.
23Peru maca nanna be xi cá ique ca' para rabi be laaca':
―Xiñee racala'dxi tu usaba tu naa. 24Latané moneda ca guuya'. Tu cá lú ni.
Para na ca':
―César.
25Oraque rabi be laaca':
―Laudii César sti César, ne laudii Dios sti Dios.
26Bidxagayaa ca modo bicabi be laaca', ne dxi do' uyuu ca' purti qué nidxela ca modo nusaba ca laabe nezalú ca binni que.
Unaba diidxa cabe pa dxandí zabani gue'tu'
(Mt. 22.23-33; Mr. 12.18-27)
27Ne laca beeda caadxi saduceu ra nuu be, cani qué runi cre pa dxandí zabani gue'tu'. Ne na ca rabi ca laabe:
28―Maistru, bicaa Moisés lu gui'chi pa chu' ti hombre ichaganá ne gueda gati, qué ñapa xiiñi la? naquiiñe ichaganá bi'chi be xheela be ne gapa xiiñi casi ñaca xiiñi be. 29Uyuu gadxe bi'chi'. Bichaganá lugola que ne beda gati, qué ñapa xiiñi'. 30Para bichaganá rairopa que gunaa que ne laca guti, qué ñapa xiiñi'. 31De raqué bichaganá raguionna que gunaa que, ne zaqué bichaganá idubi gadxe que gunaa que, ne guti ca'. Nin tobi ca qué ñapa ca xiiñi ca'. 32Ne laca guti gunaa que. 33Yanna ora ibani gue'tu ya', uná de laacabe xheela gunaa que, purti idubi gadxe cabe bichaganá cabe laa.
34Para rabi be laaca':
―Laga nuu binni ndaani guidxilayú ri la? richaganá ca' ne rucheela ca'. 35Peru cani ma cá lá guiasa de lade gue'tu para ibani ndaani guidxilayú cubi la? qué zachaganá ca ne qué zucheela ca'; 36purti ma qué zati ca', sínuque ma naca ca casi ca ángel, ne zahuinni dxandí xiiñi Dios laaca ra usibani laaca'. 37Dede Moisés bisiidi zabani gue'tu'. Cá ni lu gui'chi ra biiya be dxa yaga caya'qui que. Rabi be Dios Dios sti Abraham, ne sti Isaac, ne sti Jacob. 38Dios la? cadi Dios sti gue'tu laa, sínuque Dios sti cani nabani, ne para laabe nabani irá binni, neca ma guti.
39Oraque na caadxi de ca maistru de ley:
―Jneza uníu', Maistru.
40Ne ma qué ñuni ru ca pur ninaba diidxa ca laabe gasti'.
Tu xiiñi Cristu
(Mt. 22.41-46; Mr. 12.35-37)
41Ne rabi be laaca':
―Ximodo nga na tu xiiñi David Cristu ya'. 42Purti dede David bicaa lu Salmo:
Na Dios rabi Señor stinne':
“Gurí cuee'
43dede ora ma udixhe cani nanala'dxi lii xañee lu'.”
44Pa rabi David laabe Señor sti la? ximodo xiiñi David laabe ya'.
Bidxiiba Jesús donda ique ca maistru de ley
(Mt. 23.1-36; Mr. 12.38-40; Lc. 11.37-54)
45Irá binni que bina diaga ora rabi be ca discípulu stibe:
46―Laguuya gá laatu né ca maistru de ley, purti riula'dxi ca gacu ca lari de yanni ñee ca para uluí' naca ca tuuxa, ne ugapa diuxi binni laaca luguiaa. Ne riula'dxi ca cui ca ndaani yu'du ra ribí binni ni jma risaca, ne zaqueca ra endaró. 47Raxha ca lidxi ca viuda, ne óraque riní' né ca Dios xadxí para si uluí' nacha'hui ca'. Laaca nga jma naná ziaba ná ca'.
Currently Selected:
SAN LUCAS 20: zai
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 1988, Wycliffe Bible Translators, Inc. All rights reserved.