2 Samuel 10
10
David ta derotá amonita- i arameonan
(1 Krónikanan 19:1-19)
1Poko tempu despues rei di e amonitanan a muri i su yu hòmber Hanun a bira rei na su lugá. 2E ora ei David a bisa: ‘Lo mi demostrá Hanun, yu di Nahash, mes tantu fieldat ku su tata a demostrá mi.’ P'esei David a laga su ofisialnan bai kondoler Hanun ku pèrdida di su tata. Pero ora e ofisialnan di David a yega pais di e amonitanan, 3e hefenan di e amonitanan a bisa nan shon Hanun: ‘Bo ta kere di bèrdè, ku David ke honra bo tata, awor ku el a manda su mensaheronan pa kondoler bo? Bo no ta kere ku David a manda su sirbidónan serka bo pa nan eksplorá, spioná i destruí e siudat?’
4E ora ei Hanun a kohe e ofisialnan di David prezu, el a laga feita mitar banda di nan barba i a laga kòrta nan paña te riba nan atras. Despues el a manda nan bai. 5Ora David a tende e notisia akí, el a manda mensahero bai topa nan, pasobra e hòmbernan a keda yen di bèrgwensa. Rei a manda bisa nan: ‘Keda Yériko te ora boso barba krese atrobe, e ora ei boso bini bèk.’ 6E amonitanan a ripará ku nan a daña pa nan mes serka David. P'esei nan a manda mensahero pa hür 20.000 sòldá di infanteria arameo di Bet-Rehob i Soba, i 1000 hòmber di rei di Maaka; mas e hòmbernan di Tob, ku tabata 12.000. 7Ora David a tende, el a manda Yoab ku tur e sòldánan mihó entrená riba e enemigu. 8E amonitanan a sali bai para kla pa e bataya na entrada di porta di siudat, miéntras e arameonan di Soba i Rehob i e hòmbernan di Tob i Maaka a tuma posishon — kada grupo apart — den fèlt. 9Dor ku Yoab a ripará ku nan tabata bai atak'é tantu dilanti komo patras, el a skohe algun di e mihó sòldánan di Israel i a laga nan tuma posishon dilanti di e arameonan. 10E sobrá sòldánan el a pone bou di mando di su ruman Abishai, pa esaki pone nan para kla dilanti di e amonitanan. 11E ora ei el a bisa: ‘Si e arameonan ta muchu fuerte pa mi, bo mester bin yuda mi; i si e amonitanan ta muchu fuerte pa bo, ami ta bai yuda bo. 12Sea fuerte i laga nos komportá nos ku balentia pa nos pueblo i pa e siudatnan di nos Dios. SEÑOR hasi loke E ta haña ta bon.’ 13Despues di esei Yoab i su sòldánan a kuminsá bringa kontra e arameonan, pero e arameonan a hui bai laga nan. 14Ora e amonitanan a mira ku e arameonan a hui, nan tambe a hui pa Abshai i nan a retirá den siudat. Yoab a stòp di bringa kontra e amonitanan, i regresá Herusalèm. 15Ora e arameonan a mira ku nan a sufri derota kontra Israel, nan a bolbe reuní nan forsanan. 16Hadadezèr a manda buska e arameonan ku tabata biba na e otro banda di riu Eufrat i laga nan sali bai guera. Nan a yega Helam bou di mando di Shobak, komandante di ehérsito di Hadadezèr. 17Ora David a tende e notisia akí, el a mobilisá henter Israel, krusa Yordan i yega Helam. Ei e arameonan a enfrentá David i nan a bringa kontra dje. 18Pero e arameonan mester a hui pa Israel. David a mata 700 kabai di hala garoshi di guera i 40.000 sòldá di kabayeria. El a heridá nan komandante Soba di tal manera ku esaki a muri einan mes. 19Ora tur e reinan ku te e ora ei tabata someté na Hadadezèr, a ripará ku Israel a derotá nan, nan a sera pas ku Israel i someté nan n'e. E arameonan no a riska yuda e amonitanan mas.
Currently Selected:
2 Samuel 10: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
