Maki 16

È fɔ́n Jezu sín kú

(Matíe 28.1-18; Luki 24.1-12; Jǎan 20.1-10)

1Ée gbɔjɛzán Jwifu lɛ́ɛ tɔn wá yi ɔ́, Mali Magidalanu ɔ́ kpódó Mali Jaki sín nɔ ɔ́ kpó, kpódó Salomɛ́ɛ kpó, xɔ nǔsáwǔ wǎnɖagbenɔ, bó ná yi sá nú Jezu sín cyɔ. 2Aklúnɔzán gbe zǎnzǎn tɛɛn hwenu e hwe ɖo tíntɔ́n wɛ ɔ́, yě yi Jezu sín yɔdo kɔn. 3Yě nɔ́ kanbyɔ́ yěɖée ɖɔ: “Mɛ̌ ká ná blí awǐnnya e ɖo yɔdo ɔ́ nu ɔ́ síin nú mǐ?” 4Ée yě kpɔ́n dɔ̌n sɛ́ dó ɔ́, yě mɔ ɖɔ è ko blí awǐnnya ɖaxó énɛ́ ɔ́ sín yɔdo ɔ́ nu. 5Yě byɔ́ yɔdo ɔ́ mɛ, bó mɔ dɔ̌nkpɛvú ɖé ɖo ayǐjínjɔ́n ɖo ɖisíxwé, bɔ é dó awu wěwé, bɔ xɛsi ɖaxó ɖé jɛ yě jǐ. 6Dɔ̌nkpɛvú ɔ́ ka ɖɔ nú yě ɖɔ: “Mi ma ɖi xɛsi ó; Jezu Nazalɛ́ti tɔn e è ká nyi aklúzu jí ɔ́ ba wɛ mi ɖe. È ko fɔ́n ɛ sín kú, é sɔ́ ɖo fí ǎ; fí e è ɖi i dó ɔ́ ɖíe. 7 Lo ɔ́, mi yi ɖɔ nú Piyɛ́ɛ, kpódó ahwanvú ɖě lɛ́ɛ kpó ɖɔ: é ko jɛ nukɔn nú mi xwe Galilée. Fínɛ́ wɛ mi ná yi mɔ ɛ ɖe, lě e é ko ɖɔ gbɔn nú mi é.”

8Ayi yětɔn bǐ gbadó, bɔ yě ɖo sísɔ́sísɔ́ wɛ, bó tɔ́n sín yɔdo ɔ́ mɛ, bó hɔn. Yě ká glá ɖɔ xó ɖé nú mɛɖé ǎ, ɖó yě ɖo xɛsi ɖi wɛ.

Jezu tɔ́n dó Mali Magidalanu ɔ́ jí

(Matíe 28.9-10; Jǎan 20.11-18)

[ 9Ée è fɔ́n Jezu sín kú Aklúnɔzán gbe zǎnzǎn ɔ́, é tó sɔ́ éɖée xlɛ́ Mali Magidalanu e jí é nya yɛ nyanya tɛ́nwe sín é hwɛ̌. 10Éyɛ́ ka yi ɖɔ nú mɛ e kpódó Jezu kpó kó nɔ kpɔ́, bɔ yě wá ɖo aluwɛ mɛ, bó ɖo avǐ ya wɛ lɛ́ɛ é. 11Ée yě se ɖɔ Jezu ɖo gbɛ, bɔ Mali mɔ ɛ ɔ́, yě ɖi ǎ.

Jezu tɔ́n dó ahwanvú tɔn we jí

(Luki 24.13-35)

12Énɛ́ ɔ́ gúdo ɔ́, Jezu sín ahwanvú we ɖo ali jí xwe gleta. Jezu ka sɔ́ ninɔmɛ ɖěvo, bo tɔ́n dó yě jǐ. 13Ahwanvú lɛ́ɛ lɛ́ kɔ wá yi ɖɔ nú ahwanvú ɖě lɛ́ɛ. Yě ka ɖi nǔ nú yě lɔmɔ̌ ǎ.

Jezu tɔ́n dó ahwanvú tɔn wǒ-ɖokpó lɛ́ɛ jí

(Matíe 28.16-20; Luki 24.36-49; Jǎan 20.19-23; Mɛsɛ́dó 1.6-8)

14Gǔdo gúdo ɔ́, Jezu wá zé éɖée xlɛ́ ahwanvú tɔn wǒ-ɖokpó lɛ́ɛ hwenu e yě ɖo nǔ ɖu wɛ é. É kɛ nu dó nǔmaɖi yětɔn kpódó tótlítlí yětɔn kpó wú nú yě; ɖó yě ɖi nǔ nú mɛ e mɔ ɛ, bó wá ɖɔ nú yě lɛ́ɛ é ǎ. 15 É ka ɖɔ nú yě ɖɔ: “Mi gbɔn gbɛ ɔ́ bǐ mɛ, bo jlá Wɛn Ɖagbe Mawu tɔn ɔ́ gbɛtɔ́ lɛ́ɛ bǐ. 16Mɛ e ná ɖi nǔ, bɔ è nǎ lɛ yɛhwesin n'i ɔ́ ná gán. Mɛ e ma ka na ɖi nǔ ǎ ɔ́, è nǎ ɖǒ hwɛ n'i. 17Nǔ e mɛ e ɖi nǔ nú mì lɛ́ɛ ná nɔ jlɛ́ ɔ́ ɖíe: ɖo nyǐkɔ ce mɛ ɔ́, yě ná nɔ́ nya yɛ nyanya lɛ́ɛ sín gbɛtɔ́ lɛ́ɛ jí, bó ná nɔ́ ɖɔ xó dó gbe yɔ̌yɔ́ mɛ. 18Yě na bo zé dan ɔ́, é ná wa nǔɖé nú yě ǎ; yě na bo nu nǔvɛ́nu ɔ́, é ná wa nǔɖé nú yě ǎ. Yě ná nɔ́ ɖó alɔ azinzɔnnɔ lɛ́ɛ jí, bó ná nɔ́ gbɔ azɔn nú yě.”

Jezu yi jǐxwé

(Luki 24.50-53; Mɛsɛ́dó 1.9-11)

19 Ée Aklúnɔ ɖɔ xó énɛ́ lɛ́ɛ nú yě gúdo ɔ́, è sɔ́ ɛ yi jǐnukúnsin, bɔ é jínjɔ́n ɖisíxwé nú Mawu. 20Ahwanvú tɔn lɛ́ɛ ka sɔ́nǔ, bó jɛ Mawuxó jlá jí gbɔn fí bǐ. Aklúnɔ nɔ́ dó alɔ yě ɖo azɔ̌ énɛ́ kɔn, bó nɔ́ ɖe xlɛ́ ɖɔ xó e ɖɔ wɛ yě ɖe ɔ́ nyí nǔgbó, gbɔn nǔdábaɖa e yě nɔ́ jlɛ́ lɛ́ɛ gbla mɛ.]

Currently Selected:

Maki 16: Fon13

Highlight

Copy