Maki 11

Jezu byɔ́ Jeluzalɛ́mu

(Matíe 21.1-11; Luki 19.28-40; Jǎan 12.12-19)

1Jezu kpódó ahwanvú tɔn lɛ́ɛ kpó ko sɛkpɔ́ Jeluzalɛ́mu, bó ko ɖo malín málín mɛ dó Betaníi kpódó Bɛtifajée kpó, ɖo olívutín só ɔ́ kpá; bɔ Jezu sɛ́ ahwanvú tɔn we dó, 2bó ɖɔ nú yě ɖɔ: “Mi yi gletoxo e ɖo nukɔn mitɔn nɛ́ ɔ́ mɛ. Mi byɔ́ mɛ tlóló ɔ́, mi ná mɔ tócíví e jí mɛɖé ma ko xá gbeɖé ǎ ɔ́ ɖokpó ɖo sinsin; mi tún kan n'i, bó kplá ɛ wá nú mì. 3Mɛ ɖé ka kan nǔ e wú mi ɖo mɔ̌ wa wɛ ɔ́ byɔ́ mi hǔn, mi yí gbe n'i ɖɔ: ‘Nǔ tɔn wɛ hú dó Aklúnɔ;’ énɛ́ ɔ́, mɛ ɔ́ ná jó e nú mi tlóló, bɔ mi ná kplá ɛ wá fí.”

4Yě ka yi toxo ɔ́ mɛ, bó mɔ tócíví ɖokpó ɖo sinsin ɖo hɔn ɖé to, ɖo ali kpá, bó tún i. 5Mɛ e ɖo te fínɛ́ lɛ́ɛ ɖě kanbyɔ́ yě ɖɔ: “Ani wa wɛ mi ka ɖe nɛ́? Nɛ̌ ka gbɔn bɔ mi ɖo kan tún nú tócíví ɔ́ wɛ?” 6Yě ka yí gbe nú yě lě e Jezu ɖɔ gbɔn é, bɔ yě jó yě dó. 7Yě kplá tócíví ɔ́ wá nú Jezu, bó tɛ́ awu yětɔn lɛ́ɛ nyi tócíví ɔ́ jí, bɔ Jezu jínjɔ́n jí. 8Mɛ gěgé tɛ́ avɔ yětɔn lɛ́ɛ nyi ali ɔ́ jí, mɛ ɖě gbo ama kɔn nyi ali ɔ́ jí. 9 Bɔ mɛ e ɖo nukɔn nú Jezu lɛ́ɛ kpódó mɛ e ɖo gǔdo tɔn lɛ́ɛ kpó nɔ́ sú xó, bó nɔ́ ɖɔ: “Ozána! Susu nú mɛ e jǎwe ɖo Aklúnɔ nyǐkɔ mɛ é. 10Susu nú axɔ́súɖuɖu e jǎwe é; axɔ́súɖuɖu tɔ́ mǐtɔn Davídi tɔn. Ozána! Susu nú Mawu Ajalɔ̌nlɔn ɖo jǐxwé.”

11Jezu yi Jeluzalɛ́mu, bó byɔ́ sinsɛnxɔ mɛ, lobo kpɔ́n lě e nǔ lɛ́ɛ ɖo yiyi gbɔn wɛ é. Ée é ka mɔ ɖɔ hwenu ko ɖo sisɛyi wɛ ɔ́, é kpódó mɛsɛ́dó tɔn wěwe lɛ́ɛ kpó lɛ́ kɔ yi Betaníi.

Jezu dó nu atín ɖé

(Matíe 21.18-19)

12Ayǐhɔ́ngbe tɔn hwenu e Jezu kpódó mɛsɛ́dó tɔn lɛ́ɛ kpó wá ɖo Betaníi gosín wɛ ɔ́, xovɛ́ sin i. 13É ka mɔ fígitín ɖé sɛ́ dó, bɔ é dó ama ganjí, bɔ é ɖidó atín ɔ́ sá, bó ná kpɔ́n ɖɔ émí ná mɔ sínsɛ́n ɖé ɖ'é jí a jí; lo ɔ́, ée é yi atín ɔ́ sá ɔ́, é mɔ nǔtí ɖo jǐ tɔn zɛ ama tɔn lɛ́ɛ wú ǎ, ɖó hwenu e é nɔ́ sɛ́n ɔ́ ko su ǎ. 14Jezu ka ɖɔ nú atín ɔ́ ɖɔ: “Mɛ ɖé ní ma sɔ́ ɖu sínsɛ́n towe gbeɖé ó,” bɔ ahwanvú tɔn lɛ́ɛ se xó e é ɖɔ nɛ́ ɔ́.

Jezu nya nǔsatɔ́ lɛ́ɛ sín sinsɛnxɔ mɛ

(Matíe 21.12-17; Luki 19.45-48; Jǎan 2.13-22)

15Jezu kpódó mɛsɛ́dó tɔn lɛ́ɛ kpó lɛ́ lɛ́ kɔ wá Jeluzalɛ́mu, bɔ Jezu byɔ́ sinsɛnxɔ mɛ, bó jɛ nǔsatɔ́ lɛ́ɛ kpódó nǔxɔtɔ́ e ɖo xɔ ɔ́ mɛ lɛ́ɛ bǐ kpó nya jí; é flí akwɛ́ɖyɔ́tɔ́ lɛ́ɛ sín távo xwe, bó flí ahwannɛ́satɔ́ lɛ́ɛ sín zinkpo lɛ́ɛ nyi ayǐ, 16bó dó sɛ́n nú yě ɖɔ mɛɖé ní ma sɔ́ hɛn ajɔ̌nú ɖěbǔ dín gbɔn sinsɛnxɔ ɔ́ mɛ ó. 17 É ka jɛ nǔ kplɔ́n yě jí ɖɔ: “È ko wlán dó Mawuxówéma ɔ́ mɛ ɖɔ: ‘Xwé ce ɔ́, ɖɛxwé wɛ è nǎ nɔ́ ylɔ́ ɖɔ, bɔ akɔta lɛ́ɛ bǐ ná nɔ́ wá ɖɔ xó xá Mawu ɖ'é mɛ.’ Midɛɛ lɛ́ɛ ka sɔ́ dó ɖó ajotɔ́ lɛ́ɛ sín avatɛn ná.”

18Vɔ̌sánú-xwlémawutɔ́gán lɛ́ɛ kpódó sɛ́nkplɔ́nmɛtɔ́ lɛ́ɛ kpó se nǔ e Jezu wa nɛ́ ɔ́, bó jɛ lě e yě ná wa gbɔn bó hu i ɔ́ sín wě ɖe jí, yě ka ɖo xɛsi ɖi wɛ, ɖó mɛ lɛ́ɛ bǐ wɛ nǔkplɔ́nmɛ Jezu tɔn nɔ byɔ́ ayi mɛ ná.

19Ée gbadanu wá su ɔ́, Jezu kpódó mɛsɛ́dó tɔn lɛ́ɛ kpó tɔ́n sín toxo ɔ́ mɛ.

Atín e Jezu dó nu ɔ́ fyɔ́

(Matíe 21.20-22)

20Ayǐhɔ́ngbe tɔn zǎnzǎn tɛɛn ɔ́, Jezu kpódó ahwanvú tɔn lɛ́ɛ kpó wá sɔ́ ali, bó ɖo yiyi wɛ, bó mɔ atín e Jezu dó nu ɔ́, bɔ é ko xú bǐ káká yí dó ɖɔ. 21Piyɛ́ɛ ka flín nǔ e jɛ wá yi ɔ́, bó ɖɔ nú Jezu ɖɔ: “Mɛ̌si, kpɔ́n atín e a dó nu ɔ́ nɛ́ xú nɛ́!” 22-23 Bɔ Jezu yí gbe, bó ɖɔ nú ahwanvú tɔn lɛ́ɛ ɖɔ: “Mi ɖi nǔ nú Mawu; má ɖɔ nǔgbó nú mi, ényí mɛɖé ɖɔ nú só élɔ́ ɖɔ: ‘Sɛ sín fí, bo yi jɛ xu mɛ,’ bó ma ká xo nǔ kpɔ́n ɖo ayi mɛ ǎ, lobo ɖi ɖɔ nǔ e ɖɔ wɛ émí ɖe ɔ́ ná jɛ ɔ́, é ná jɛ. 24Énɛ́ ɔ́ wú wɛ un ɖo ɖiɖɔ nú mi wɛ ɖɔ: Nǔ ɖěbǔ e mi ná byɔ́ Mawu ɖo ɖɛ mɛ ɔ́, mi ɖeji ɖɔ émí ko mɔ yí; mi ka ná mɔ ɖ'é jí nǔgbó. 25 Ényí mi ka ɖo te, bó ɖo ɖɛ xo wɛ bó flín ɖɔ nɔzo émítɔn wa nǔ nyi do nú émí hǔn, mi sɔ́ kɛ ɛ; énɛ́ ɔ́, Tɔ́ mitɔn e ɖo sɛ́xwé ɔ́ ná sɔ́ hwɛ kɛ mi lɔmɔ̌. [ 26Amɔ̌, ényí mi ma nɔ sɔ́ hwɛ kɛ mɛ ǎ ɔ́, Tɔ́ mitɔn e ɖo sɛ́xwé ɔ́ ná sɔ́ hwɛ kɛ mi lɔmɔ̌ ǎ.”]

Mɛ̌ ká ná acɛ Jezu?

(Matíe 21.23-27; Luki 20.1-8)

27Jezu kpódó ahwanvú tɔn lɛ́ɛ kpó lɛ́ kɔ yi Jeluzalɛ́mu, bó byɔ́ sinsɛnxɔ mɛ, bɔ hwenu e Jezu ɖo sa ɖi gbɔn xɔ ɔ́ mɛ wɛ ɔ́, vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpó, kpódó mɛxó lɛ́ɛ kpó sɛkpɔ́ ɛ, 28bó kanbyɔ́ ɛ ɖɔ: “Acɛ tɛ́ wɛ a ka ɖó, bó nɔ́ ɖo nǔ énɛ́ lɛ́ɛ wa wɛ? Mɛ̌ ká ná acɛ énɛ́ ɔ́ we?” 29Jezu ka yí gbe nú yě ɖɔ: “Un ná kan xó ɖokpó byɔ́ mi, nú mi ná sin tɔn mì ɔ́, nyɛ lɔ ná ɖɔ acɛ e un nɔ dó wa nǔ énɛ́ lɛ́ɛ ná ɔ́ nú mi. 30Mɛ̌ ká sɛ́ Jǎan dó bɔ é wá lɛ yɛhwesin nú mɛ? Mawu wɛ a, abǐ gbɛtɔ́ lɛ́ɛ? Mi ɖɔ nú má se.” 31Yě ka jɛ ɖiɖɔ jí ɖo yěɖée tɛ́ntin ɖɔ: “Ényí mǐ yí gbe n'i ɖɔ Mawu wɛ ɔ́, é ná kanbyɔ́ mǐ ɖɔ: ‘Bɔ étɛ́wú mi ma ka ɖi nǔ nú Jǎan ǎ?’ ” 32Yě ka ɖo xɛsi ɖi nú togun ɔ́ wɛ, bó nɔ́ ɖɔ: “Mǐ sixú glá din bó ɖɔ gbɛtɔ́ lɛ́ɛ wɛ sɛ́ ɛ dó ǎ, ɖó togun ɔ́ bǐ wɛ sɔ́ Jǎan dó mɔ gbeyíɖɔ Mawu tɔn ná.” 33Bɔ yě gbɔ bo yí gbe nú Jezu ɖɔ: “Mǐ tunwun ǎ.” Bɔ Jezu ɖɔ nú yě ɖɔ: “Hǔn nyɛ lɔ ɖo mɛ e ná acɛ mì, bɔ un nɔ dó wa nǔ énɛ́ lɛ́ɛ ná ɔ́ ná ɖɔ nú mi wɛ ǎ.”

Currently Selected:

Maki 11: Fon13

Highlight

Copy