Proverbionan 23
23
— 6 —
1Ora bo sinta na mesa pa kome ku un hende ku tin poder, no lubidá niun momento so den kompania di ken bo ta. 2Si bo ta un gran komedó, sòru pa bo n' hasi kos di golos. 3No laga tur loke e sirbi bo na mesa hinka bo den tentashon, pasobra bo ta sali engañá.#Sirag 31:13-21
— 7 —
4No mata kurpa pa bira riku, usa bo sintí. 5Pasobra plaka tin ala, e ta disparsé for di bo bista manera un makuaku ta subi bai laria.
— 8 —
6No laga un hende pichiri kombidá bo bin kome kuné, no laga loke e sirbi bo hinka bo den tentashon. 7Miéntras e ta sinta saka sòm, e ta bisa: ‘Kome, no! Bebe poko mas!’ Pero no ta di kurason. 8Lo bo arohá e tiki ku bo a kome i bo komplimèntnan tabata pòrnada.#Sirag 31:12-21
— 9 —
9No trata di splika un bobo nada na plaka chikí, pasobra tòg e n' ta apresiá loke bo ta bisa.
— 10 —
10No kambia frontera bieu, ni subi tereno di wérfanonan ku mal intenshon, 11pasobra nan tin un defensor poderoso, Dios mes, lo E entamá un kaso kontra bo.
— 11 —
12Skucha ora ku ke papia ku bo pa bo bon.
— 12 —
13No keda sin koregí un mucha, e n' ta muri si bo sut'é; 14al kontrario si bo koregié, bo ta libr'é di morto.
— 13 —
15Mi yu, dia bo bira sabí, lo no tin niun hende mas felis ku mi; 16lo mi sinti un legria profundo, ora mi tende bo papia manera mester papia.
— 14 —
17No envidiá esnan ku n' ta wòri ku Dios,#Salmo 37:1-4; Sirag 9:11-12 mihó bo sòru pa semper abo tin rèspèt di SEÑOR. 18E ora ei bo por warda un futuro yen di speransa yega, i lo bo n' keda desapuntá den loke bo ta spera.#Proverbionan 24:14
— 15 —
19Skucha i bira sabí, mi yu, skohe e kaminda rekto ku bo alma i kurpa. 20No anda k'esnan ku ta yena nan kurpa ku biña òf ta pròp nan stoma ku karni. 21Pasobra un buraché òf un haragan golos ta kaba den pobresa. Es ku dia den dia afó ta drumi fuma lanta burachi, ta hañ'é ta bisti paña bieu.
— 16 —
22Tende di bo tata ku a engendrá bo; no despresiá bo mama dia e bira bieu. 23Kumpra bèrdat i sabiduria, siñansa i komprenshon. No bende nan pa nada di mundu! 24Tata di un yu hustu i sabí, tin rason di sintié felis i orguyoso. 25Hasi pa bo mama i bo ta tata ta kontentu; hasi pa esun ku a karga bo den su seno sintié alegre.
— 17 —
26Mi yu, duna mi tur bo atenshon i sigui mi ehèmpel ku plaser; 27pasobra e muhé straño, e prostituta, ta manera un pos hundu i smal. 28E ta drumi warda manera un atrakadó i hasi e kantidat di hòmber ku ta kibra nan palabra, mas grandi.
— 18 —
29Ken ta esnan ku ta yora malai? Ken ta pleita? Ken ta keha? Ken tin herida sin tabatin nodi? Ken tin wowo trubel? 30Ta esnan ku no ta skit for di bibida, esnan ku ta bai eksperimentá traha bibida nobo. 31No laga e biña kòrá ku ta lombra den e beker i ku ta baha bon, hinka bo den tentashon. 32Na final e ta manera un kolebra ku ta morde i kousa doló. 33Bo ta kuminsá mira kosnan straño i papia i pensa kosnan perverso. 34Bo ta sinti bo riba laman, sintá te ariba ayá den un master. 35I lo bo bisa: ‘Nan a dal mi, pero mi no a sinti; gòlpia mi i mi n' tabata sa mes; pero asina mi spièrta mi ta bolbe buska mas bibida.’
Currently Selected:
Proverbionan 23: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
