Proverbionan 22
22
1Bon fama i bon reputashon
ta bal mas ku abundansia di oro i plata.
2Riku i pober tin ún kos komun,
esta, ta SEÑOR a krea tur dos.#Proverbionan 29:13; Sabiduria 6:7
3Hende sabí ta mira peliger i ta evit'é,
esun sin eksperensia ta dal bai i haña su kastigu.#Proverbionan 27:12
4Hende ku tin rèspèt di SEÑOR i humildat,
ta haña komo rekompensa: bida, rikesa i honor.
5Kaminda di mal hende ta yen di sumpiña i trampa;
es ku stima su bida ta evitá nan.
6Siña un mucha fo'i chikitu pa e sigui e bon kaminda,
ya ora e bira mas grandi, e n' ta kita fo'i dje.
7Hende riku tin hende pober den nan gara;
es ku fia, ta bira katibu di esun ku a fi'é.
8Es ku sembra inhustisia ta kosechá desaster,
e sèpter ku e tabata bati asina furioso kuné ta kibra.
9Hende ku ke otro hende bon lo ta bendishoná,
pasobra e ta kompartí kuminda ku hende pober.
10Kore k'esun ku ta buska kestion, i pleitu ta kaba,
pleitamentu i zundramentu ta stòp.
11Rei tin dos amigu: hende kurason puru
i hende ku palabra amabel.
12SEÑOR ta perkurá pa bèrdat keda rekonosé;
E ta desmentí loke mentirosonan afirmá.
13E floho ta bisa komo preteksto: ‘Mi n' por sali pafó.
Tin un leon den kaya, e por kome mi.’#Proverbionan 26:13
14Trasteria di e muhé di bida ta un pos hundu,
esnan ku SEÑOR maldishoná ta kai den dje.
15Mucha tin tendensia di hasi ko'i bobo,
pero e ta stòp ora e haña un halá 'i sota.
16Hende ku eksplotá hende pober pa enrikesé su mes
i esun ku ta generoso ku hende riku, tur dos ta kaba den pobresa.
17Skucha palabra di hende sabí ku atenshon
i paga tinu na loke mi ke siña bo.
18Pasobra lo t'un goso pa bo warda e palabranan akí den bo kurason,
ya lo bo por usa nan ora di mester.
19Abo, sí abo, mi ke pa tende nan,
pa bo konfia den SEÑOR.
20Mi n' skibi kos importante#22:20 kos importante: tradukshon probabel; hebreo no ta kla. Hopi tradukshon moderno ta bisa: trinta proverbio. pa bo?
Konseho korekto i práktiko,
21pa siña bo konosé e bèrdat,
pa bo por duna esnan ku mi manda pa bo un bon kontesta.
— 1 —
22No abusá di hende pober pasobra e ta pober, ni oprimí esun sin defensa dilanti di hues. 23Pasobra SEÑOR lo sali na nan defensa i mata esnan ku ker a mata nan.
— 2 —
24No anda ku hende ku ta rabia lihé, ni sera amistat kuné. 25Sino bo ta bai komportá meskos i hasi bo mes daño.
— 3 —
26No primintí di para bòrg pa debe di otro hende. 27Lo bo ke pa nan hisa bo kama bai kuné, si bo no por kumpli?
— 4 —
28No perhudiká otro hende kambiando frontera bieu fihá pa bo antepasadonan.#Deuteronomio 19:14; 27:17; Proverbionan 23:10; Hoséas 5:10
— 5 —
29Hende ku ta traha bon lo traha pa rei i no pa ken ku ta.
Currently Selected:
Proverbionan 22: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
