Proverbionan 20
20
1Biña ta pone hende chèrchè,
bibida stèrki ta pon'é borotá,
hende bou di influensia no ta aktua ku sabiduria.
2Un rei furioso ta manera un leon ku ta grita;
ken ku provok'é, ta pone su bida na peliger.
3Hende ta gana rèspèt dor di evitá pleitu,
hende bobo ta kla pa rabia.
4Un hende floho no ke plug den tempu di prepará kunuku;
e ta puntra su mes sí den tempu di kosecha: ‘Ta kon bini mi n' tin kosecha?’
5Intenshon den kurason di hende, ta un awa hundu,
pero un hende ku komprenshon ta sak'é bini ariba kuné.
6Hopi hende ta gaba nan mes bondat,
pero fieldat berdadero, unda por haña esei?
7Hende hustu ta komportá ireprochabel:
felis e yunan ku e laga atras.
8Ora un rei sinta riba su trono pa husga,
e ta sefta tur maldat ku su wowo.
9Ken por bisa: ‘Mi a purifiká mi kurason;
mi a keda limpi sin piká?’#Salmo 51:3-5; 1 Huan 1:8
10Pisa ku dos peso, midi ku dos midí,
SEÑOR tin repudio di e kosnan ei.#Levítiko 19:35-36; Deuteronomio 25:13-16; Proverbionan 11:1; Amos 8:5
11Hende ta ripará asta na un mucha,
si e mucha su kondukta ta puru i bon.
12Ku nos por tende, ku nos por mira,
ta obra di SEÑOR esei.
13No drumi di mas, pa bo no bira pober;
lanta trempan, ya bo por tin di kome.
14‘Esta mal merkansia! Esta un produkto barata!’, e kumpradó ta bisa,
pero unabes ku el a kumpra e kos e ta kana blòf ku su kompra.
15Oro tin hopi, piedra presioso tin na abundansia,
pero boka ku ta papia ku sabiduria ta un hoya skars.
16Tuma su mantel, pasobra el a para bòrg pa un strañero,
sigurá bo mes kontra dje, pasobra e ta responsabel pa strañeronan.#Proverbionan 6:1-5; 27:13
17Pan hòrtá ta smak dushi na prinsipio,
pero despues e ta manera santu den bo boka.
18Bon konseho ta hasi un plan mas firme;
pa bai guera mester di un bon strategia.
19Hasidó di redu no sa warda sekreto;
no drenta ku hende ku ta papia hopi asina.
20Si bo despresiá bo tata i bo mama,
bo ta muri un morto hororoso.#Éksodo 21:17; Proverbionan 19:26
21Un herensia eksigí na prinsipio promé ku tempu,
no ta resultá un bendishon na final.
22No pensa mes di tuma vengansa,
warda riba SEÑOR i E lo libra bo.#Romanonan 12:19
23SEÑOR ta repudiá uso di peso falsu,
balansa ku hende a kònkel kuné no ta bon.
24SEÑOR ta dirigí hende su pasonan,#Salmo 37:23; Proverbionan 16:9
kon hende por sa anto na unda su destino ta kondusí?#Yeremías 10:23
25Es ku primintí Dios algu sin pensa, ta pone trampa p'e mes,
pasobra ora ta lat kaba, e ta puntra su mes si e por kumpli ku e promesa.
26Un rei sabí ta desenmaskará kriminalnan,
l'e kastigá nan sin mizerikòrdia.
27Lampi di SEÑOR ta manera rosea di hende,
e ta penetrá te den bo padennan ayá.
28Amor i fieldat ta protegé un rei;
amor ta hasi su gobernashon mas fuerte.
29Orguyo di hòmber hóben ta nan forsa,
fama di ansiano, nan edat altu.
30Sla ku ta heridá ta purifiká nos di maldat,
halá 'i sota ta limpia e partinan mas skondí di nos kurason.
Currently Selected:
Proverbionan 20: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
