Mal 6

Yesu bamunyaafuna ku bula bwaandi bwa Nadzareti

(Mat 13.53-58; Luk 4.16-30)

1Yesu wayisika haho, wayende ku bula bwaandi, na bayiki baandi bamunama. 2Kiluumbu kya mpuumunu bu kyatubuka, nde wabaandika mu kuyikisa mu nzo-nkutukuna. Baatu balaka bu bayuka bakimuka na baleele ti: «Kuri kabakiri mamama? Nkya madyeele bari bamuha mamama, na buri bimaangu biri mu kweyirimina mu myooko mya nde? 3Buri wu kari mukomono-manzo, mwaana Mariya, mpaangi Yakobo, Yose, Yuda na Simoni ko? Buri bibusi bwaandi byahele nkati-nsi na beetu hamaha?» Baatu nkati babumina makya mu ntoono nde. 4Yesu waleele kuri bo ti: «Mubikiri kabakaa lukiinsu ku bula bwa nde-meene ko, mu kaanda dya nde-meene ko, na mu nzo ya nde-meene ko.» 5Nde kasii yirika kimangu ti kimosi haho ko, ha yulu bani babeeru babamosi katsinikisi, mu kwebatetekele myooko. 6Nde wakimuka mu ntoono kuhele kwa kanyi kwa bo.

Yesu wasindika bayiki kuumi na boolo

(Mat 10.5-15; Luk 9.1-6)

Yesu waba kweyendaa mu mabula mari ku lumperi mu kweyikisa. 7Yesu wateele bo kuumi na boolo mbila, wabaandika mu kubasindika boolo-boolo, na wabaha lutumu ha yulu mampeeve mamabi. 8Nde wabaha ntumunu kuri ti: «Mu budyeengi bweenu, yaa luholo kitotolo ti kimosi, ha yulu lunu luboto: byandya pe, nkangala pe, mipata mu kimpokoro pe. 9Ngo lwaateenu masapaatu, na yaa lunata binkuta byoolo ko.»

10Nde wabaleele se ti: «Mu nzo yi balutaambiri, dzakaleenu mumwo natee mu ntaangu yi lupala mu bula bubwo. 11Ha bula bu babisiri kulutaambula na kuluywiila, bu luri mu kweende, lo kubulee fuunda diri mu miilu myeenu, mpisi kiba kimbaangi kuri bo.» 12Bo bayende na bayikisa, mpisi heki baatu bayiinga madyeele! 13Bo babingisa mampeeve malaka mamabi, na bakila maasi kuri babeeru balaka na babatsinikisa.

Lufwa lwa Yowane Mubotiki

(Mat 14.1-12; Luk 9.7-9)

14Mbyaasi Erode wayuka badzoonsolo mu Yesu, bukuri nkuumbu yaandi yaba yeki mvuumfu, na baatu baba kweleele ti: «Yowane Mubotiki wafulukiri mu bafwa; hango nkuumbu, kari mu kweyirika bimaangu.» 15Bakaka baba bakweleele ti: «Wunde Eliya.» Bakimi ti: «Wunde mubikiri wuri bunu mosi mu babikiri.» 16Erode, bu kayuka mamo waleele ti: «Wunde Yowane, wu nyatabiri me mutu wafulukiri mu bafwa.»

17Mukwongo, Erode waheeri lutumu luri ti basiimba Yowane, na bamukaanga bikonyi mu boroko, mu ntoono Erodyade waba mukasi mpaangi yaandi, Filipo wukakweeriri. 18Bukuri Yowane wabaleelaa kuri Erode ti: «Ye wuri na miswa ko, mu kuholo mukasi mpaangi yaaku.» 19Mu didyo, Erodyade waba wakebele Yowane kooti, na waba watya kumudzusa, ngo waba wahele kubangisina; 20bukuri Erode waba kwebataa Yowane, bu kaba kayaari ti nde muutu wasuunguma na wangisi, na waba kwemukalaana. Erode haba bu kayuka ma leele Yowane, lo weki dunga kwalaka; ngo waba na kiminu mu kuyuka ma kaleele.

21Ngo kiluumbu kimosi mpwaani yabakama. Erode kabaana wukeembele kiluumbu kya mbutukulu yaandi, nde wayirikisa mubuluku, mu kuha kuri baatu baandi balukiinsu, bamfumu ba bayongolo na bakuutu ba Ngalili. 22Mwaana waandi, mwaana Erodyade wa mukyeetu wakoto na wakina, waha kiminu kuri Erode na kuri baba dyaanaana kintwaari na nde. Mbyaasi Erode waleele kuri mwaana mukyeetu ti: «Loombo kuri me mpisi kitiiri na me sa nyakuha.» 23Erode walaba maalu [kwalaka] kuri nde ti: «Me sa nyakuha kyo ngo kyo ki wundoombo, ti hayuku kibari kya nsi kya kimfumu kyaami.» 24Mwaana kapalaa weefuula kuri nguri ti: «Nki me nyiloombo?» Nguri wamubvutula ti: «Mutu Yowane Mubotiki.»

25Hanaho nde wabvutuka mu mawasu kuri mbyaasi, waloombo ti: «Me ntiiri ti ye mpa mu mawasu, mutu Yowane Mubotiki munsa lukoombo.» 26Mbyaasi wamono mpasi mu mutima. Ngo mu ntoono maalu ma kalabiri, na mu ntoono baba badzakala na nde mu kudya, nde kasii tya kunyaafuna mwaana ko. 27Mu kilookolo kinikyo, mbyaasi waheeke mukebi mosi mu bayongolo katwaala mutu Yowane. Bu kayende, watabula Yowane mutu mu boroko. 28Nde watwaala mutu Yowane munsa lukoombo, na waha nde kuri mwaana wa mukyeetu, na mwaana wa mukyeetu waha nde kuri nguri yaandi. 29Bayiki ba Yowane bu bayuka, bayende kwee naanguna nyutu Yowane na bayisuusa munsa mukala.

Yesu wadiisila mafuunda mataanu ma babakala

(Mat 14.13-21; Luk 9.10-17; Yow 6.1-14)

30Bantumu bakutukuna bebele na Yesu, na bamuyaabisa momanso maba yirikiri na ma bayikisiri. 31Nde waleele kuri bo ti: «Wasee meti ha lumperi hamaha na wuumeenu mwaa-kwantele.» Mukwongo, baatu balaka baba bakweende, bakwiisa, na bo baba koono kubaka mwaa-ntaangu ya kudya. 32Bo bayende mu bwaatu ku lumperi bo bakaka. 33Baatu bamono ku baba kweende, na balaka babayaabila. Baatu bafumuna mu mabvula momanso, bayende mu miilu na batekesele ku kibeendu kikyo.

34Yesu, bu kapala mu bwaatu, wamono mburi mpuumbu baatu, wabamwiina ngebe, bukuri baba bunu bimeeme byahele na mutari. Nde wabaandika kubayikisa misamu myalaka. 35Ntaangu yaba yimwaaluta kwalaka. Bayiki baandi bakokosolaa kuri Yesu, bamuleele ti: «Kibeendu ki turi kimaki kiri ku lumperi, na ntaangu yimwaaluta. 36Bvutula baatu, mpisi beende mu mabvula na mu mabula mari bebele, basuumba bi badya.» 37Yesu wabvutula kuri bo ti: «Baheene bi badya beenu-meene.» Bo bamuleele ti: «Buri tweendee twetusuumba mampa ma nkama dzoolo dza bidenali mpisi tubaha badya?» 38Yesu wabafuula ti: «Mampa makwe luri na mo? Yendee lwelutala.» Bo batala na babvutula ti: «Mampa mataanu na bansu boolo.» 39Nde wabatuma mu kudzakisa baatu bobanso mu makabu-makabu, ha yulu leenge dya maampa. 40Bo badzakala mu makabu ma nkama, na ma makuumi mataanu. 41Yesu waholo maampa mataanu na bansu boolo, watala ku yulu, wasakumuna, wabukuna mampa, na waha kuri bayiki baandi, mpisi bakabula kuri baatu. Bakabula se bansu bo boolo kuri baatu bobanso. 42Bobanso badya na bayukuta. 43Bayiki batolo mitooto kuumi na myoolo myaluula mu bitsuri bya mampa na bya bansu. 44Baatu badiiri [mampa] baba mafuunda mataanu ma babakala.

Yesu wayende ha yulu mubu

(Mat 14.22-33; Yow 6.15-21)

45Mu kilookolo kinikyo, Yesu wakwiikisa bayiki baandi mu kukoto mu bwaatu, na batekesele ku simu dya mubu bebele dya Betesayida, mu ntaangu yi kabvutula nde mpuumbu baatu. 46Bu kamana kubabvutula, nde wanwaata ku yulu mulaandu mu kweesaambila. 47Nsinsika bu yatubuka, bwaatu bwaba bweki ku kakati dya mubu, na Yesu waba wasaala nde mukaka ku simu. 48Nde watalila ti bayiki baandi baba na mpasi mu kwenata bwaatu, mu ntoono kiteembu kyaba babwaana. Mu kitulu kyabina kya butsuku, Yesu wayende kuri bo mu kwedyaata ha yulu mubu, na waba tiiri kubaluta. 49Bo bu bamumono wuri mu kwedyaata ha yulu mubu maampa, batsima ti kampe kinyumbi, na babeke mu kufula misaakulu. 50Bobanso bamumono na babwilikila kinkuuka. Mu kilookolo kinikyo, Yesu wadzoonso kuri bo na waleele ti: «Lwaatee kibakala, wumawu me, yaa luba na boomo ko.» 51Nde wakoto mu bwaatu bebele na bayiki, na kiteembu kyawa. Bo bamono dyo dyankimukunu [yalaka], 52bukuri basii bakula mayirimini mu mampa ko, mu ntoono nkubusulu mitima mya bo.

Yesu watsinikisa babeeru mu nkoonsi Ngenesareti

(Mat 14.34-36)

53Bamanaa kusabuka, batubukiri mu simu, ha bula bwa Ngenesareti. 54Bu bapala mu bwaatu, hanaho baatu bayaabila Yesu. 55Bo basa budyeengi mu nkoonsi yoyinso yiyo. Baatu babaandika kumutwalikila babeeru, mu yulu mankwaala, kukwo kubayukiri ti weki kumaku. 56Mwomunso mwaba kwekotaa Yesu munsa mabula, munsa mabvula, mwa yende tuunga baatu ku manseke, baba kwesuusaana babeeru mu bibeendu bya bobanso, bamuyingukila kuri ti habee-kwaandi babelemene ti nto kinkuta kyaandi. Bobanso baba mubeleminaana batsiinika.

Currently Selected:

Mal 6: MW2013

Highlight

Copy