Mal 3
3
Yesu watsinikisa ngaa-kooko kwasika mu kiluumbu kya mpuumunu
(Mat 12.9-14; Luk 6.6-11)
1Yesu wabweese kukoto mu nzo-nkutukunu. Munumwo, mwaba muutu mosi waba na kooko kwasika. 2Baatu baba ketaana Yesu, mu kumono kari lo wumutsinikisi mu kiluumbu kya mpuumunu, mpisi heki bamufuunda. 3Yesu waleele kuri muutu waba na kooko kwasika ti: «Teleme ha kakati hamaha.» 4Yesu wafuula kuri baatu ti: «Buri kuri miswa mu kuyirika mamabwe bunu pe mamabi, mu kubvuukisa bunu pe mu kudzusa muutu, mu kiluumbu kya mpuumunu?» Ngo kasi bo baba bawura. 5Yesu wabatala mu nkesi, na wamono ngebe, mu ntoono nkubusulu mitima mya bo. Nde waleele kuri mubeeru ti: «Laambula kooko!» Nde walaambula, na kooko kwaandi kyatsiinika. 6Bamanaa kupala, Bafarisi mu kilookolo kinikyo, basa mamfuundu na baatu ba Erode mu kusaka bwa kudzusila Yesu.
Mampuumbu ma baatu mayisa kuri Yesu
7Yesu na bayiki baandi bayende mu teke mubu, na mpuumbu baatu ya bu fundu-fundu yafumuna ku Ngalili, [yanama] nde ku Yudaya, 8ku Yerusalemi, ku Idumaya, ku simu dya nyari ya Yorodani, na ku nkoonsi ya Tiro na ya Sidoni, mpuumbu ya bu fundu-fundu yayukiri momanso ma bayirikaa Yesu yayisa kuri nde. 9Yesu waleele kuri bayiki baandi mu kumuwungikila bwaatu, mu ntoono mpuumbu, mpisi heki baatu bahele kumusiila mfina. 10Mukwongo, nde watsinikisa babeeru balaka, kuri bobanso baba mu mpasi bamubwiilila, mpisi bamubelemene. 11Na mampeeve mamabi, bu mamumono, mabwa ha busu bwaandi, na mabikisa ti: «Ye ngo Mwaana Nzaambi.» 12Ngo Yesu wamaŋaŋina mu kibakala, mpisi mahele kuyaabisa nde na kari.
Yesu wasoolo bantumu kuumi na boolo
(Mat 10.1-4; Luk 6.12-16)
13Nde wanwaata ku yulu mulaandu, na wateele babo ba katiiri, na bo bayende kuri nde. 14Nde wasuusa kuumi na boolo [ba kaluka bantumu], mpisi beba kintwaari na nde, na mpisi kabaheeke mu kwebikisa, 15na babaka lutumu lwa kwebingisa mampeeve mamabi. 16[Nde wasuusa kuumi na boolo]: Simoni wukaha nkuumbu ya Petelo, 17Yakobo bo na Yowane, mpaangi yaandi, bo boolo baala ba Dzebedayi, nde wabaha nkuumbu ya Bwanerengese, mbangukulu ti: «Baala ba nzasi», 18Andere, Filipo, Bartelemi, Matayi, Toma, Yakobo, mwaana Alafayi, Tade na Simoni, wa ku Kana, 19na Yuda Iskaryote, waba muyekele.
Kaanda dya Yesu ditiiri kumunata
20Yesu wabvutuka ku nzo, na mpuumbu baatu yabweese kukutukina kuri, Yesu na bayiki baandi beki ti byandya bwakudiila pe. 21Bari mu kaanda dyaandi bayukaa bubwo, bayende mu kumuholo, bukuri baatu baba kweleele ti: «Weki kilawuku.»
Yesu waha mvutu kuri bari mu kumusaana
(Mat 12.22-32; Luk 11.14-23, 12.10)
22Batini ba mangisi bafuma ku Yerusalemi, baleele ti: «Wuri na Beledzebule, na mu lutumu lwa mfumu mampeeve mamabi, nde kari mu kwebingisa mampeeve mamabi!» 23Yesu, kabateelaana, wubadzoonsiri mu mankuma ti: «Dyaburi Satana katsiitsa kubinga Satana? 24Mbuti baatu bari na kimfumu bakwenwaana bo na bo, lo kimfumu kikyo kudziingula pe; 25mbuti baatu bari kaanda dimosi, bakwenwaana bo na bo, lo kaanda didyo kudziingula pe; 26na mbuti Satana wunwaanisa nde-meene, na watelemise kitaatu mu nde-meene, lo kadziingula ko, lutumu lwaandi lo luwiiri.»
27«Kuri muutu ti mosi ko, wuri lo kotiri mu nzo ngaa-makwa, mu kumuholo na bitotolo, mbuti wahele kutekesele kukaanga ngaa-makwa wunde mu bikonyi, tumi lo horiri biri mu nzo yaandi. 28Ngwanwa me nyiluleele ti: myominso sa myaba myahemesunu kuri baala ba baatu, masumu na nsaanunu, bwooso dzibeele. 29Ngo kasi, mpisi wunde wusaana Mpeeve Yangisi, lo kataambula mpemisi ko mu mantaangu momanso, bukuri lo bakiri kibila mu sumu dya bibvu ngo bibvu.»
30Mimyo kubaleele, bukuri bo baba muleele ti: «Wuri na mpeeve yayibi.»
Kaanda dyangwanwa dya Yesu
(Mat 12.46-50; Luk 8.19-21)
31Nguri na bampaangi ba Yesu, bayisa, bateleme ku mbasi, na baheeke muutu munsa nzo mu kwemuteele. 32Mpuumbu baatu yaba yadzakala ha teke Yesu, na bamuleele ti: «Mono, nguri ye, bampaangi na [bibusi] bya ye bari mu kukusaka ku mbasi.» 33Yesu wabvutula kuri bo ti: «Na wuri nguri me, na ba na bari bampaangi ba me?» 34Nde wadyeengese kisooso ha yulu lukaangu lwa baatu baba badzakala mu teke nde, waleele ti: «Mono, nguri me na bampaangi ba me ngo bamaba. 35[Mukwongo] mpisi wunde wuyirika kutya kwa Nzaambi, lo nde ngo mpaangi me, kibusi kya me na nguri me.»
Currently Selected:
Mal 3: MW2013
Highlight
Share
Copy
Want to have your highlights saved across all your devices? Sign up or sign in
Nouveau Testament Beembe © Bible Society of the Republic of Congo, 2013.
