Pe eya 24
24
San ta ge Isaku ma ne Rebeka ne
1Abraham hat sabar gwagwa, Bage ɗiŋnedin e na wak busu kaŋ ge na sḛ ne ke ma pal mwaɗak. 2Abraham jan na mo̰r ge ga̰l na ge ne dó na ndwara ne na kaŋ ma pal pet go: «Mbo ya, pá mo tok mbi luwar pe zi. 3Guni tene ne dḭl ge Bage ɗiŋnedin, Dok ge digi digi ya ma ne ge suwar ne go, mo mbo san mbi vya gwale ne vya kale ge suwal Kanan, na ge mbi ne ká ne go, ma buwal zi to. 4Mo mbo mbo mbi suwal ya, mbi sele ma buwal zi ya, mo ba san mbi vya Isaku gwale ya.» 5Na mo̰r jan na go: «Tamekyala, gwale mbe mbo kuri go na mbo ya suwal mbe no go to. Kadɗa na go ɗe, ago mbi gwa̰ ne mo vya mbo suwal ge mo ne ɗage ne ya̰ ɗaa?» 6Abraham jan na go: «Ke haŋgal, gwa̰ ne mbi vya mbo ya go ɓaca. 7Bage ɗiŋnedin Dok ge digi digi ya, ge ne e mbi ya̰ mbi naa ma, ne mbi suwal ge tolla, na ge ne guni tene janna go na mbo hon suwal mbe no mbi pehir ma, na sḛ mbo teme na maleka mo ndwara zḛ, mbo hon mo vya gwale ne ya go, ne mbi vya pe. 8Kadɗa gwale mbe kuri ya go na mbo ya mo pe go to ɗe, mo mbo ben uzi ne guniya ge mo ne guni tene mbi ndwara se pal. Amma kaage mo mbo ne mbi vya ya go to bat.» 9Mo̰r mbe par na tok Abraham luwar pe zi, guni tene na fare janna pal.
10Mo̰r mbe abe na bageyal jambal ma wol, abe na kaŋ kwaɗa ma na tok go me, dol tene viya̰ go mbo suwal Aram, ge suwal ge Nahor ne ya. 11Gyala tok, swaga ge naa zaab ne mbo ya zal mam go, na sḛ det ya tub ge ne suwal go̰r zum wak go, é jambal ma fiya se. 12Kaɗe go: «Bage ɗiŋnedin, Dok ge mbi bageyal Abraham ne, mbi kaɗe mo, e mbi kwa kaŋ ge mbi ne ɓyare ma̰ no, ŋgay kwaɗa kerra ge mo ne mbi bageyal Abraham ta! 13Ndi mbi ne mḛ́ ne tub wak go no, ago naa ge ne suwal diŋ ma vya kale ma, a ma̰ wat ya zum zal mam. 14Swaga ge mbi ma̰ kaɗe a̰me ya go na ka̰ mbi mam ne na tool zi njotɗa nde ɗo, na sḛ vin, hon mbi mam, hon mbi jambal ma mam me, mbi ma̰ kwa go, na na ge mo ne tá na ne mo dore Isaku pe ne. Go no me, mbi ma̰ kwa tyatyat go, mo ŋgay kwaɗa kerra ge mo ne mbi bageyal ta.» 15Na sḛ gale ne be á na fare janna ɗe, ndi Rebeka ge Betuwel vya, na ge Milka ma ne Nahor ge Abraham ná vya vya, yan’a, ne na tool na ka̰l pal. 16Na sḛ ká kale ge be to, be kwa ndu son to gale. Mbo tub wak se ya, wi na tool, ndé ya digi. 17Abraham mo̰r mbo na ta ya, jan na go: «Ho̰ mbi mam ne mo tool zi nde njotɗa!» 18Na sḛ vin, jan na go: «Njó, mbi bageyal!» Har tene soole na tool wak se hon na mam njotɗa. 19Swaga ge na sḛ ne ho̰ na mam njotɗa go ɗe, gwan jan na go: «Ya̰ mbi zá mam hon mo jambal ma njotɗa, ɗiŋ nama njó mbyatɗa me.» 20Kan mam ge ne na tool zi ge kavaar ma swaga njot mam go. Gwan har tene mbo zal mam ya, ke go no ɗiŋ hon jambal ma mam mwaɗak. 21Ndu son mbe ka ndil na kaŋ kerra ma wak ɗamal, ka ele tene go, Bage ɗiŋnedin e na swaga mborra det son, ko to de!
22Swaga ge jambal ma ne á mam njotɗa ɗe, ndu son mbe her kyaɗa ge dinar, na dṵṵl mbo kaŋ ge gram myanaŋgal go, hon na fool ge dinar ma azi na tok zi, nama dṵṵl waɗe gram kis. 23Ele na go: «Mo wuɗi vya ne ɗaa? I ne mbi naa ge ne mbi pe go ma, i ma̰ ɓol swaga dwamma mo bá yadiŋ ko ɓaa?» 24Jan na go: «Mbi Betuwel vya ne, na ge Milka ma ne Nahor vya.» 25Gwan jan na uwale: «Ge mbi bá yadiŋ, gyaɗa kal ma ne zám batwa fiya̰l ya go zuliya bindik ne kavaar ma pe, swaga dwamma ya go me.» 26Swaga mbe go no, ndu mbe gur na koo Bage ɗiŋnedin ndwara se, uware na. 27Jan go: «Uwareya hon Bage ɗiŋnedin, Dok ge mbi bageyal Abraham ne, na ge ne ŋgay kwa a̰se ne kwaɗa kerra ge na ne mbi bageyal ta! Bage ɗiŋnedin ɗame mbi ya ne, ɗiŋ mbi dé ya mbi bageyal pehir ma diŋ no.»
28Vya kale mbe sya, mbo na ná ta yadiŋ, wan na fare mbe ma pe mwaɗak. 29Rebeka ná vya ge son a̰me ka, na dḭl Laban. Sya mbo ɓol ndu son mbe tub wak ya. 30Ago na sḛ kwa kyaɗa ma ne fool ma ge na ná vya ge gwale tok zi, za̰ fare ge na ná vya ne jya̰, ge ndu son mbe ne jya̰ na ma me. Mbo ɓol ndu son mbe ma ne na jambal ma tub wak ya. 31Jan na go: «Mbo ya, mo ge Bage ɗiŋnedin ne é mo wak busu. Kyaɗa mo ba mḛ zum ya go baba ɗaa? Mbi nṵsi zok dwamma ya go ne mo pe, swaga ya go ne jambal ma pe me.»
32Ndu mbe wat yadiŋ. Laban sá kaŋ ma ne jambal ma go̰r go se, hon jambal ma gyaɗa kal ma ne zám batwa fiya̰l, hon ndu son mbe ma ne naa ge ne na pe go ma mam usi bama koo ma me. 33Go̰r go, a hon na kaŋzam, amma na sḛ jan nama go: «Tek ge mbi gale be jan mbi fare ge mbi ne mbo ya ne na pe to, mbi ne pool ge zam kaŋzam to.» Laban jan na go: «Jya̰ mo fare.» 34Jan nama go: «Mbi Abraham mo̰r ne. 35Bage ɗiŋnedin é wak busu mbi bageyal pal, na sḛ saŋge gan njwanjway. Ho̰ na gii ma, ne nday ma, ne fool kaal ma, ne dinar ma, ne dore ma, ne kale ma, ne jambal ma, ne kwara ma me. 36Na gwale Sara, sabar ge na ne zi puy ɗe, tó na vya son, na sḛ ho̰ vya mbe na joo mwaɗak. 37Mbi bageyal é mbi guni tene go, na kaage mbi sá̰ na vya gwale ne vya kale ge Kanan ma ne ma buwal zi to, nama ge mbi ne ka ne nama buwal zi no. 38Jya̰ mbi go, mbi mbo na pehir ma buwal zi ya, bama vuwal pe go, mbi ba san gwale ya hon na vya. 39Mbi jya̰ mbi bageyal go: ‹Tamekyala gwale mbe ma̰ kuri go na mbo ya mbi pe go to!› 40Na sḛ jya̰ mbi go: ‹Bage ɗiŋnedin na ge mbi ne ke mborra ne na ndwara se, mbo teme na maleka poseya ne mo, ge mo swaga mborra ba det son. Mbo san mbi vya gwale ne mbi pehir ma buwal zi ya, ne i vuwal pe zi ya. 41Kadɗa mo mbo ya mbi pehir ma buwal zi ya ɗo, a kuri mo ne vya gwale ɗe, go no mo ba ben uzi ne guniya ge mo ne guni tene mbi ndwara se go.› 42Ma̰ no, swaga ge mbi dé ya tub wak go, mbi kaɗe go: O! Bage ɗiŋnedin, Dok ge mbi bageyal Abraham ne, é mbi swaga mborra det son. 43Ndi, mbi ne mḛ́ ne tub wak go no, vya kale ge ma mbo ja gan mam, ge mbi ya jan na ya go, na ho̰ mbi mam ne na tool zi nde njotɗa ɗo, 44vin hon mbi mam njotɗa, zal mam hon mbi jambal ma me ɗe, na mbe no, na ká gwale ge Bage ɗiŋnedin ne ho̰ mbi na ne mbi bageyal vya pe. 45Swaga ge mbi gale ne be á mbi fare janna ɗe, ndi Rebeka zú ya ne tool na ka̰l pal no. Mbo ya tub wak go no, gá̰ mam ya no. Swaga ge mbi ne jya̰ na go, na ho̰ mbi mam njotɗa nde ɗe, 46na sḛ há tene, é tool ne na ka̰l pal se no, jya̰ mbi no go: ‹Njó, mbi ma̰ hon mo jambal ma mam njotɗa me›. Mbi njó mam no, ho̰ mbi jambal ma mam njotɗa no me. 47Swaga ge mbi ne ele na go: ‹Mo wuɗi vya ne ɗaa?› Jya̰ mbi no go: ‹Mbi Betuwel vya ne, na ge Milka ma ne Nahor vya›. Mbi me, mbi pá kyaɗa na vo̰r zi no, ne fool ma na tok zi no me. 48Go̰r go, mbi gu mbi koo Bage ɗiŋnedin ndwara se no, mbi uware Bage ɗiŋnedin, Dok ge mbi bageyal Abraham ne no, na ge ne ɗame mbi ya, mbo ya ɓol mbi bageyal baŋ, ndwara go mbi sá̰ na, mbo hon mbi bageyal vya. 49Se no ɗe, kadɗa aŋ kwa mbi bageyal a̰se, aŋ ke na kwaɗa ɗe, jya̰ me mbi, kadɗa aŋ vin to, mbi ba mbo swaga ge ɗogle go.»
50Laban ma ne Betuwel jan na go: «Kaŋ mbe no, mbo da ne Bage ɗiŋnedin ta ya, i ne pool ge jan mo a̰me na pal to, ko kwaɗa, ko sone. 51Ndi Rebeka ne mo ndwara se no, wa̰ na, mo mbo ne na, na gá mo bageyal vya gwale, dimma ne Bage ɗiŋnedin ne jya̰ go.» 52Swaga ge Abraham dore ne za̰ nama fare janna ma ɗe, gur na koo Bage ɗiŋnedin ndwara se, uware na. 53Swaga mbe go no, dore mbe abe fool kaal ma, ne dinar ma, ne ba̰r ma hon Rebeka. Uwale, hon na ná vya ma ne na ná bobo ma gḛ me. 54Go̰r go gale, a ne naa ge ne mbo ya poseya ne na ma a ba ɗage zam kaŋzam ne njotɗa me, a dwam se.
Dam ge kwap go cya̰wak, swaga ge a ne ɗage digi ɗe, Abraham dore jan go: «Ya̰ me mbi gwan mbi bageyal ndwara zi.» 55Rebeka ná vya ma ne na ná gwan ne na janna go: «Ya̰ na ne i swak gale, mbo kaŋ ge dam wol go, go no aŋ ne nama ba gá mborra.» 56Dore mbe gwan ne nama janna go: «Kaage aŋ kale mbi swaga to. Tek ge Bage ɗiŋnedin ne é mbi swaga mborra det son ɗe, ya̰ me mbi gwan mbi bageyal ta ya.» 57Swaga mbe go no, a jan go: «Tó me nee vya kale ya, nee ba za̰ fare ne na wak zi.» 58Nama sḛ ma tol Rebeka ya, a jan na go: «Mo ɓyare mbo da ne ndu mbe no’a?» Rebeka vin: «Mbi mbo mbo!» 59A ya̰ bama ná vya ge gwale Rebeka ma ne na mbeel mborra dagre ne Abraham dore ma ne naa ge ne na pe go ma. 60A é wak busu Rebeka pal go:
«I ná vya ge gwale,
Saŋge naa ge dubu, ne dubu ma ná,
Mo pehir ma, nama ke muluk,
bama naa ge ho̰l ma pal.»
61Rebeka ma ne na kale ma ndwar jambal ma pal, a ne Abraham dore ma mbo.
62Isaku ɗage ne tub Lahay-Roy wak ya, ago na sḛ ka suwal le ge mbii ge go. 63Isaku ɗage gyala tok le gasamal mbo anna ful zi, her na pala digi, kwar jambal ma ne mborra ya. 64Swaga ge Rebeka ne zwa na pala digi ɗe, kwar Isaku, kan na koo ne jambal pala digi ya se. 65Ele dore mbe go: «Ndu ge ne mbo ne gaaso zi ya nee ndwara zi mbe no, a wuɗi ne ɗaa?» Dore mbe jan na go: «A mbi bageyal ne.» Rebeka abe na ba̰r, kulbi na pala se. 66Dore mbe wan Isaku kaŋ ge na ne ke ma pe mwaɗak. 67Isaku gene Rebeka na ná yadiŋ ya. Go̰r go, ame Rebeka, kat yàl ne na, na laar wan na. A go no, ge Isaku ne ɓó laar iyalla, go̰r siya ge na ná ne go.
Currently Selected:
Pe eya 24: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
