हिब्रू 12
12
येसु कली थमा सुइश्शो
1साइ थमा सुइक्बपुकी शुश बाक्मा बाक्त। मेकोपुकीमी इं कली कोव़ना कोव़न बाक्नीम। मोपतीके दोरब मुर खोदेंशो पा, इं कली तेक्ब नु खोल्ने चाप्बपुकी तिल्शा, पापमी इं खोइली फ्रेंचा मगेथु, दोरय। १कोरिन्थी ९:२४ 2थमा सुइक्तीक लां कोंइशा, पाको सेल्ब येसु कली मिम्तय। मेकोमी शीम केप्शा कांटी थोक्शा क्याइश्शा साइक्चा पुंइसीचा आ पर्बम, मुने आ पर्बम मारेइ ममिम्ता बाक्त। नोले मान पा ग्येरसीशा बाक्चा ताइनुङ, दे मिम्ता बाक्त। मिनु मुल परमप्रभु यावे आ ग्युरा गे निश्शो बाक्ब। हिब्रू ५:८-९; फिलिप्पी २:८-१० 3येसु रागीम बाक्मेनु, पापीपुकीमी शुक्शी पा खेदा पा शुश मरिम्शो पाम्तेक्म हना यो, मेको नेल्ल फाल्तु। मेको आ श्येत फाल्शो मिम्तीने। मेको मिम्ताक्नी हना, इन थुं बारनीनी। लांमी गाक्शा दशो खोदेंशो मदुम्नीनी। मत्ती २६:६७; लूका २:३४ 4पाप नु लडाइ पा मुल सम्म हुश जुइक्थ्री मदुम्नी।
परमप्रभुमी इं कली कोव़ब
5तमी तौ आन कली अर्ती गेशो खोदेंशो पा इन कली ङोंइती गेशो अर्ती प्रेंदीनी माइ, दे मिम्पाइक्नन्नी। ओदें ब्रेक्शो बाक्ब “आं तौ, परमप्रभुमी इ कली शेंदानु, शेंसो। इ कली श्येत जपदानु ‘फाल्ने मचबु’ मदेनो। मेको कली सोपी ममिम्तो। 6परमप्रभुमी सु कली दाक्बा, मेको कली सजाइ गेब। सु कली आ तौ मिम्बा, मेको कली तुप्ब” दे ब्रेक्शो बाक्ब। हितोपदेस ३:११-१२; प्रकाश ३:१९ 7श्येत गेचा पुंइसीनीनु, परमप्रभु यावेमी शेंताक्की, दे मिम्तीने। आफोमी आल कली पशो खोदेंशो पा, परमप्रभु यावेमी इन कली पाइब। आफोमी शेंचा मपुंइसीब तौ बाक्बा ङा? 8आल नेल्ले शेंचा पुंइसीनीम। परमप्रभु यावेमी इन कली मशेंताक्व हना, आ तमी तौ मननी। आफ मपाइश्शो बाक्नीनी। 9एको रागी ङा इं आफोमी इं कली तुप्तेक्म हना यो, मेको आन कली मान पा आन लोव़ टीतय। मिनु गेना हना यो आ नु काथा बाक्चा कली स्वर्ग ङा आफ आ देंशो टिचा ममाल्नया ङा? 10इं आफपुकीमी इं कली आन मिम्स पा नाक्ती का निक्शी सम्म शेंताक्म। स्वर्ग ङा आफोमी चहिं इं कली रिम्शो थुं पाइश्शो सेल्चा दाक्ब। पाप रे ङोन बाक्शो आ खोदेंशो दुम्शो तचा दाक्ब। मोपतीके इं कली शेंब। 11मोदेंशो पा शेंचा पुंइसीयानु, मग्येरनय। श्येत जाइनय। श्येत फाल्ने चाप्बपुकी ठीक दुम्नीम, आन थुं नाइक्चा ताइनीम, दे रुब्य। २कोरिन्थी ४:१७-१८
12मोपतीके श्येत जाइतीनी हना यो, लांमी गाक्शा दशो खोदेंशो मदुमीन, इन गुइ खोइल सेस दुम्शा गाक्कीन। 13लां ब्रेम्शो सेल्शा, रिम्शो पा थेक्शा गाक्कीन। सुइ दशा, खोइली खाइश्शा, आन पोक्च मबुइक्ल। रिम्शो पा गाक्शा, आन दशो सामल। हितोपदेस ४:२६-२७ 14मुर नेल्ल नु दुशा गारशा बाक्कीने। पाप रे ङोन बाक्शा, रिम्शो थुं पशा गेय पा कोंइदीने। मो पाइतीनी हना, प्रभु नु काथा बाक्चा ताइनीनी। रोमी १२:१८; २तिमोथी २:२२ 15अर्ती गेमुशा वारच पमुशा बाक्कीने। सुइ परमप्रभु यावे आ शिशी मताइब मदुम्ल। सुइमी थुं चोशा दुशा बाक्ब आन कली फ्राशा, मुर आन कली मरिम्शो मसेलल। ब्यवस्था २९:१७ 16सुइ एसाव खोदेंशो मरिम्शो मदुम्ल। एसावमी काले आ कोव़ज प्रिंचा कली ङोंइती जरमेशो तौमी तचा ङा शोंप नु आसीक आ लोक्ब कली प्रोना बाक्त। उत्पत्ती २५:३३-३४ 17नोले आस आफोमी अङस योक्गानु, एसावमी ङोंइती जरमेशो तौ आ तचा ङा अङस गेयीनी, दे ङाक्ना ङाक्न पुंइशा यो आ आफ आ थुं लेप्पाइक्ने मचबा बाक्त। मिनु परमप्रभु यावे आ ङोंइती आ नें मलीमाक्त, दे नेल्लेमी तुइक्नीनी। उत्पत्ती २७:३०-४०
रिम्शो राज्य ओव़चा ताइनय
18साइ इं किकी पिपीपुकीमी परमप्रभु यावे कली ग्रुम्शो खोदेंशो पा मग्रुम्नीनी। मेकोपुकीमी गुइमी थिचा ङा डांडामी मी ब्रशा तामे बाक्त। मिनु छिङछिङ दुम्शा क्येर गोस्स बोक्शा, फश गिवार पा बुंबु पवा बाक्त। गे मेक सम्म मजाक्शो बाक्नीनी। प्रस्थान १९:१२,१६,१८; ब्यवस्था ४:११ 19मिनु तुराही ताप्शो ठेयब रेयके खोदेंब पा परमपभु यावे आ लोव़ नेन्मे बाक्त। मेको लोव़ नेंने मचाप्थु “मुल ङा मेरे ओं देंब लोव़ मपचा” दे थम हिंशा पुन्मे बाक्त। प्रस्थान २०:१९ 20मेकोपुकीमी नेंने मचाप्शो लोव़ “एको डांडा थीब बस्तु जन्तु बाक्त हना यो, मेको कली फुल्लु आप्शा साइक्चा माल्ब” देंशो लोव़ बाक्माक्त। प्रस्थान १९:१३ 21मोदेंशो हिंचा ङा दुम्शो तशा, मोसामी “हिंशा ख्रिंख्रि पाता” देंमाक्त। ब्यवस्था ९:१९ 22तन्न गे सियोन डांडाम ब्रोंइशा बाक्ब परमप्रभु यावेमी स्वर्गम सेल्शो यरूसलेम सहर जाक्दीश्शा बाक्चा ताइनीनी। मेकेर परमप्रभु यावे आ स्वर्ग ङा गेय पाइब बाक्नीम। गलाती ४:२६; एफिसी २:६; फिलिप्पी ३:२०; प्रकाश २१:२; प्रकाश ५:११ 23आन नें स्वर्गम ब्रेक्चा पुंइसीशा, इन क्येङा ङोंइती जाक्दीश्शा, पाप रे ब्रोंइशा ग्येरशा बाक्चा ताइबपुकी बाक्नीम। परमप्रभु यावेमी मुर नेल्ल आन कली निसाफ पाइब आ नेक्था बाक्नीम। लूका १०:२० 24नक कबल खाप्ब येसु बाक्ब। मिनु येसु आ जारशो हुश यो बाक्ब। मेको हुश हाबील आ हुश खोदेंशो ममाइ। हाबील आ हुशेमी “आं कली साइक्ब सजाइ गेचा पुंइसमल” देंब। येसु आ हुशेम चहिं “मेको आन पाप नेल्ल क्याम्शा, सजाइ जचा रे प्रोंइतामी” देंब। हिब्रू ९:१५; उत्पत्ती ४:१०
25होस पांइसीने। इन कली लोव़ पाइब कली इन ची मकोंइदीने। इं किकी पिपीपुकीमी मुर आ देंशो मटीमे बाक्त। मिनु सजाइ गेचा पुंइसमा बाक्त। गोपुकी स्वर्ग रे लोव़ पाइब कली इं ची कोंइताक्य हना, सजाइ मतथु ब्रोंइनया ङा? हिब्रू २:२; हिब्रू १०:२८-२९ 26परमप्रभु यावेमी लोव़ पवानु, ख्रिनु कुशो खोदेंब पा रागी नेल्ले हिम्से बाक्त। मुल इं कली मार लोव़ पाइब देंशा हना “मुल यो लेंशा काले रागी ला ममाइ, सरीङ यो हिम्नुङ” देंब। हग्गै २:६ 27“मुल यो लेंशा काले हिम्नुङ” देंशो लोव़ रे मार रुम्सीब देंशा हना, हिम्सीबपुकी सेल्चा पुंइसीशो बाक्नीम। मिनु फाइक्चा पुंइसीनीम। महिम्सीबपुकी चहिं लीनीम, दे रुम्सीब। 28मोपतीके गेनायो महिम्सीब राज्य ओव़चा ताइनय, दे तुइश्शा, परमप्रभु यावे कली मान पा ठेयब सेल्ना सेल्न “गे रिम्शो पाइब बाक्नीनी” देंशा, ग्येरशा आ दाक्शो गेय पना पन बाक्य। 29इं परमप्रभु यावे नेल्ल खतम सेल्ब मी खोदेंशो बाक्ब। हिब्रू १०:३१; ब्यवस्था ४:२४
Currently Selected:
हिब्रू 12: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
