२ पत्रुस 2
2
दूली शेंबपुकी
यहूदा ३-१९
1साइ ङोंइती परमप्रभु यावे आ लोव़ जोल पा दूली शेंबपुकी बाक्मा बाक्त। मुल मोदेंशो जोल पा शेंबपुकी इन ग्रुम्तीक खिंमी यो जाक्नीमी। मेकोपुकीमी ख्रुइश्शोमी खतम सेल्ब शेंतीके शेंनीमी। प्रभुमी मेको आन कली ग्याप्शा यो, मेकोपुकी “गो मेको कली मतुइक्नुङ” दे जाम्शा लाइब बाक्नीम। मत्ती २४:११; १तिमोथी ४:१ 2शुशेमी आन शेंशो नेंशा, हेंथे पा दला दाक्स यो पाइनीम। मुरपुकीमी मेको आन कली तशा थमा लां कली शुक्शी लोव़ पाइनीम। 3मेको आन शीम पतीकेमी इन कली दूली लोव़ पा, इन क्येट योल्नीम। मेकोपुकी ङोंइती रे नरक लचा चिक्शो बाक्नीम।
4का निक्शी परमप्रभु यावे आ स्वर्ग ङा गेय पाइबपुकी यो पाप पतीके शिशी मतामे। परमप्रभु यावेमी मेको आन कली नरकमी ताइश्शा, नेल्ल क्येङा मरिम्शो बाक्तीकेमी सोइक्ताक्मी। मिनु निसाफ पची नाक्त सम्म छिङछिङमी चोक्शा वोइक्तीमी। 5मिनु परमप्रभु यावेमी साइ ङा मुर आन कली शिशी मपथु, नोआह ला ठीक पाइब बाक्तीके मेको नु अरु ७ जना आन कली ला श्येत रे प्रोंइतीमी। मेना परमप्रभु यावेमी रागी नेल्ल ब्वाक्कुमी ब्रीपाइश्शा, आ कली मटीब आन कली साइश्शो बाक्त। उत्पत्ती ८:१८; १पत्रुस ३:२०; २पत्रुस ३:६ 6परमप्रभु यावेमी सोदोम नु गोमोररा माइश्शो सहर निक्शी कली मीम क्रोइश्शा, पुलु सेल्शो बाक्त। मेको मटीब आन कली कोंइतीक चिनु बाक्त। उत्पत्ती १९:२४-२५ 7परमप्रभु यावेमी ठीक पाइब लोत माइश्शो मुर कली श्येत रे प्रोंइशो बाक्त। लोतमी पाप पाइब आन कली तशा, आ थुं शुश मनुशो बाक्त। 8मारदे हना मेको ठीक पाइबमी नाक्त किंत किंत आन ग्रांग्रा दिचा ङा गेय तशा नु नेंशा, आ ठीक मिम्तीक थुं शुश खाइश्शो बाक्त। 9परमप्रभु यावेमी चहिं आंम कली टीब मुर आन कली “दोपा थुं थाम्चा ङा श्येत रे ग्रुंइनुङा” दे तुइक्ब। मिनु ठीक मपाइब आन कली सजाइ गेचा कली निसाफ पची नाक्त सम्म वोइक्ब। १कोरिन्थी १०:१३ 10मिनु सु सु आन दला दाक्स नु ग्रांग्रा दिचा ङा गेय पाइनीमी नु अधिकार गेशो आन कली मटीनीमी, मेकोपुकीमी नेल्ल क्येङा शुश सजाइ ताइनीम। मोदेंशो जोल पा शेंब काइ महिंब दुम्शा, ठेयब लेश्शा, थमा सुइक्ब आन कली शुक्शी पचा महिंनीम। 11तन्न परमप्रभु यावे आ स्वर्ग ङा गेय पाइबपुकी मेको आन क्येङा ठेयब नु सक्ति पाइश्शो बाक्तेक्म हना यो, मेको जोल पा शेंब आन कली प्रभु आ ङोंइती दोस मगेनीम। 12मेको दूली शेंब ममिम्ब ग्याइक्चा नु साइक्चा पुंइसीचा कली जरमेशो बस्तु भाव खोदेंशो पा, आन तुइश्शो ला पाइनीम। मेकोपुकीम काइ मरुप्नीम। तन्न शुक्शी पाइनीम। मिनु बस्तु भाव खोदेंशो पा खतम दुम्नीम। 13आन मरिम्शो पशो आ पर्बम मरिम्शो पाइक्चा पुंइसीनीम। नाक्तीम आन दला दाक्स पशा ग्येरशा बाक्नीमी। गेपुकी नु भोज जशा, मुने दोक्चा ङा पा इन ग्रुम्तीक खिं मरिम्शो लुम्सीशो सेल्ब बाक्नीम। 14मेकोपुकीमी मुर आन मीश तशा वाल्नीम। पाप पचा गेनायो “मोक्ल” मदेंनीम। सक्ति मपाइश्शो थमा सुइक्ब आन कली लेम्शा, आंम दूली लां खोइक्पाइक्नीमी। मेकोपुकी शीम बाक्नीम। मिनु सराप रशो मुर बाक्नीम। 15ठीक लां प्रोंइशा, हेंथे गाक्शा, बेओर आ तौ बालाम माइश्शो मुर खोदेंशो दुम्तेक्म। बालाममी मार पशो बाक्त देंशा हना, मरिम्शो गेय पतीके रे ताक्शो क्येट शुश दाक्शो बाक्त। गन्ती २२:७-३५ 16मेकोमी मरिम्शो मिम्शा पचा चिक्तानु, हुइक्चा पुंइसे बाक्त। दोपा हुइक्चा पुंइसे बाक्त देंशा हना, मब्वाक्ब गधामी मुर आ सेंदामी लोव़ पवा बाक्त। मिनु परमप्रभु यावे आ लोव़ पाइब कली मेको आ मरिम्शो गेय रे तेक्गा बाक्त। 17मेको दूली शेंबपुकी ब्वाक्कु मयीब धारा नु फशेम बेरपाइश्शो गोस्स खोदेंशो बाक्नीम। मेको नेल्ल क्येङा छिङछिङ ङा बाक्तीकेमी वोइक्चा पुंइसीनीम। 18मेकोपुकीमी हेंथे लोव़ पा पाप रे प्रोंइचा पुंइसीशो नक थमा सुइक्ब दुम्शो मुर आन कली आन हेंथे पतीके ग्रांग्रा दिचा ङा गेय पपाइक्नीम। 19मेकोपुकीमी “गे पाप रे प्रोंइशो मुर बाक्नीनी” दे लोव़ पाइनीम। तन्न ग्रांग्रा दिचा ङा गेय आन वाइल बाक्नीम। मार मारमी मुर आन कली ग्राबा, मेको आन वाइल दुम्नीम। गलाती ५:१३; १पत्रुस २:१६ 20मुरपुकी इं प्रभु येसु ख्रीस्त कली तुइक्तीकेमी रागी रागी ङा मुर आन पाप रे ब्रोंइशो बाक्तेक्म हना, मेको लेंशा पापमी मुर कली ग्रात हना, मेको पाप आ वाइल दुम्नीम। मेको आन कली ङोंइती ङा दुम्तीके क्येङा नोले शुश मरिम्शो दुम वा। मत्ती १२:४५ 21मुरपुकीमी ठीक लां गाक्चा तुइश्शा यो, मेको ङोंइती रे पाप रे ङोन बाक्चा, दे परमप्रभु यावे आ अरेशो लोव़ प्रोंइशा, पापम लेत्तेक्म हना, मेको तुइक्चा क्येङा गेनायो मतुइश्शो हना रिम्शो दुम वा। लूका १२:४७-४८ 22मिनु मुर आन देंतीक लोव़ “कुचुममी आ मेशो लेंशा जाइब।” मिनु “पोव़ कली गिश चिक्शा हना यो, लेंशा ग्रांग्रामी ग्रुम्दीब” देंशो लोव़ थमा बाक्ब। हितोपदेस २६:११
Currently Selected:
२ पत्रुस 2: susz
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
