Hechos 2

Jena ruwimela 'ma sébaligo Onorúgame Alawala

1Napu'lige sébale piesta ri'ligó 'wílichi (napu Pentekostesi anilime nile yolí ra'íchaga), napuíle suwábaga napu ekí alué Esukristo oyérame nile. 2'Lige alé mochiga akele napurigá iwégame ekame. Alarigá aníchane 'pa rewagáchikana. Sébale 'lige alé galírale napu mochílige alué ralámuli. Bochígimi alé pachami bajkile alué napurigá eká anime 'pákana. 3'Lige napuyeri na'í alieri re'kínale alé mo'ochíkana a'pili ralámuli mo'ólachi, napurigá na'í rajame cha'mélome niraga. 4Pe Onorúgame Alawala kéréle alué na'í. Alarigá narele Onorúgame Alawala alué Esukristo oyérame. A'lige o'wínale ra'icha we'ká se'wináriga ra'icha, a'bópika tabilé siné benile alué ra'íchali. Onorúgame Alawala gu'írile. Sineko tabilé alarigá ra'íchame nile.

5We'ká ralámuli jurío simíbale Rusaleni anilichi piesta olamia, ichúrimi mochígame ralámuli jsile alé. 'Nátale piesta newalime, alarigá nakió mayele Onorúgame. 'We a'lá oyérame nile Onorúgame alué ralámuli. Ra'íchale we'ká ra'íchili se'wináriga. Onorúgame Alawala gu'írile alué ralámuli Esukristo oyérame napurigá 'la gainámala ra'icha se'winátiri ra'íchali napu ra'íchame nile alué ichúrimi e'megá mochígame ralámuli napu sébale alé. 6Napu'lige akisá alué ichúrimi mochígame, we'ká napuíle ralámuli alé. 'We 'nata jale. Anile:

7―¿Churigá 'la alarigá ra'íchabaché alué ralámuli Esukristo oyérame? Pe Galiléachi ejperégame káwé alué ralámuli, tabilé ramué ejperélachi mochígame káwé alué ralámuli. 8¿Aka abalieri ra'íchame júpaché? ¿Churigá júpaché? Ramueka wanáchigo ejperégame niru. 9Jaré Partia ejperégame ralámuli ju ramué. Uché jaré chéchigo bilena ejperégame Melia anilichi ejperégame ju jaré. Uché jaré Elami ejperégame ju. Uché jaré Jurea ejperégame ju. Uché jaré Mesopotamia ejperégame ju. Uché jaré Kaparosia ejperégame ju. Uché jaré Ponto ejperégame ju. Uché jaré Asia ejperégame ju. 10Uché jaré Pirigia ejperégame ju. Uché jaré Pampilia ejperégame ju. Uché jaré Ejipto ejperégame ju. Uché jaré Libia anilichi ejperégame ju, pe a'bé ju Sirene anilichi. Jaré Roma anilichi mochígame ju. 11Jaré ralámuli jurío ju. Uché jaré tabilé jurío ju, 'ma jurío gayénale jípeko. Abiena mochí ralámuli Kreta ejperégame, alé Arabia ejperégame abiénachigó. 'We 'la ra'íchame ju alué ralámuli Esukristo oyérame ramué ra'ichálila, we'ká se'wináriga ra'íchali. Ra'íchame ju napurigá Onorúgame newale e'karúgame 'we semátiri ―alarigá anile.

12Suwábaga alé jale e'negá. Tabilé machiá alarigá ko. Jaré rukele machináliga:

―¿Chonigá alieri ra'icháliché? ―anile.

13Uché jaré gawélele. Anile:

―Wa'lú bajile alué i'wilí ('uba) ba'wila rekútame nokogá aniá ―anile.

Jena ruwimela Pegro 'we beníraligo we'ká ra'íchali

14'Lige Pegro, uché jaré makué bilé rió napu Esusi 'yálige nóchali, alué suwábaga o'weti jásele, e'wele ra'íchaga anele Pegro alué ralámuli napu napuíle alé:

―'Emi Jurea ejperégame, suwábaga ralámuli napu ekí mochí jena Rusaleni ejperégame abiénachigó, 'we 'la gepúsigobá ne ra'ichálila. 15Tabilé tégili niru ramué, pecha bajilia. 'We be'á ju bijí. 16'We 'yako osale bilé rió napu ruwime nile napu anele Onorúgame, Joeli anilime. Osale napu ruyele Onorúgame. Onorúgame ruyele alué rió churigá nimio jipe. Anele Onorúgame:

17Napu'lige gawí amulí gajuchi,

a'lige julámala ne ne Alawala.

Napu'lige naresa 'emi 'kúchila ne Alawala,

a'lige alueka ra'ichámala ne ra'ichálila.

Ne Alawálate etérimala alué ejtemali 'lige umugí i'wé

napurigá we'ká tábiri etémala.

Ne Alawala gu'írimala alué o'chérame

napurigá remúmala ne'chí.

18Alué ralámuli napu ekí ne'chí 'yuga nóchame ju,

ne 'yámala ne Alawala.

A'liko 'la ruwimela napurigá aní ne.

19-20'We e'karúriga 'símala rewagá.

Rayénali mukumela.

Mechá sejtákame nílimala napuyeri elá.

Jena wijchimoba we'ká e'karúriga 'símalachigó.

Pe neka 'la gainámala alarigá nocha.

'We nerúmala elá, na'ítiri, molítiri.

Napu'lige 'ma simarsa alué we'ká e'karúgame,

a'lige nawámala Wa'lula Onorúgame ralámuli gu'írimia.

Alué rawé nímala wa'lú rawé 'we semati.

21Napu ekí 'la taní e'kali alué wa'lula Onorúgame,

'liko 'la buyásamala alué ralámuli chátiri bowechi e'yéname.

Alarigá anele Onorúgame alué Joeli 'we 'ya.

22'Lige aminabi ra'íchale Pegro. Anile:

―'Emi ralámuli jurío napurigá ne, 'we 'la gepusi ne ra'ichálila. Alué Esusi Nasareta bejtégame napu Rabí rijimala nile,#2:22 E'nesi glosario «ancestor». we'ká e'karúgame 'we semátiri 'sile napu tabilé gayéname ju ralámuli alarigá noká. 'Émika 'la etele alarigá 'sichi. Alekeri 'we 'la machí 'emi Onorúgame nuléligo alué Esusi. Onorúgame gu'írile alué Esusi. 23'Emi nokale Esusi cha'piá. 'Lige 'yale 'emi Esusi alué ralámuli 'we cha nokame. Gulusichi ujchagá me'ale. Onorúgame 'we 'la machile 'ya siné alarigá nokimeo 'emi. Alekeri 'we 'la e'negá asale Onorúgame. 24Napu a'lige mukusá Esusi, Onorúgame 'yale cherajpé iwérali 'lige a'walí. Yati ku ajánale. Onorúgame tabilé a'rele napurigá we'lisi mukugá bo'mela. 25Alué rió Rabí anilime 'ya bejtégame 'la ruwile Esusi tabilé we'lisi mukumeo. Anile:

Onorúgameka 'la ne'chí 'yuga eyéname ju.

Tabilé siné a'reme ju.

Ne'chí 'yuga eyéname ju napurigá tajché ikimela ne.

26Alekeri 'we 'la ganíliga ajtí ne.

'We ganíliga ra'íchame ju ne.

Rekó mukugé 'la machí ne ku ajánamio.

27Onorúgame tabilé a'rémala ne alawala napu mukúgame bi'tí.

'Lige aminami tabilé a'rémala ne sa'pala napurigá bikámala.

28Onorúgame benírituru ne'chí

napurigá 'la sebámala ne rewagachi.

Alé sebásaká 'we ganíliga asimela ne Onorúgame 'yuga.

'We 'yako alarigá anile Rabí.

29'Lige aminabi ra'íchale Pegro. Anile:

―'Emi ralámuli jurío napurigá ne, 'we 'la námatame ra'ichámala ne. Ramué 'la machiá'é Rabí ramué rijimala níligo. 'We 'ya mukule. Bilena resochí gatéliru. Alué resoka pe joka newárigime nile. Abalé ilí bijí alué resó. Ramué 'la machiáa alé gatélirigo. 30Alué Rabí ruwime nile napu anele Onorúgame. Onorúgame gu'írile napurigá machimela alarigá nímio a'kinana. Onorúgame ruyele Rabí bilé bo'né rijimala ralámuli wa'lula nimio, alué wa'lula nimio napurigá Rabí. 31'We 'la bijchiá aní Onorúgame. Alekeri Rabí 'la machile Onorúgame 'yamio uché rajpé iwérali mukusá alué rió napu Onorúgame julámorílige napu Kristo anilime nílige. Alekeri 'la ruyele Rabí Onorúgame tabilé we'lisi a'remio alué Kristo alawala mukugá bo'ígichi. 'La machile tabilé bikimeo alué Kristo sa'pala. Ta'chó mukiá Rabí suwábaga 'la machile suwábaga alieti. 32Esusi ju alué Kristo. Napu a'lige mukusá, Onorúgame 'yale uché rajpé ajalí. Ramué 'la machiáguru bijí bejtego, ramueka 'la eteru. 33Onorúgame bayele ku rewagachi. A'lige rewagachi sebasa wa'lula newáliru Onorúgamete. A'lige Onorúgame 'yale bo'né Alawala alué Esusi. 'Liko Esúsika júlale alué Alawala 'pákana. Naréturu ramué alué Alawá. Alekeri 'la we'ká se'wináriga ra'icharu ramué Onorúgame Alawala gite. 'Emi etele suwábaga alieti aminami akele. Alué Esukristo nejkúrile napurigá alarigá ra'ichawa ramué. 34Alué Rabí tabilé gu'írile. Alué Rabika tase alarigá simile rewagachi napurigá simile Esusi. 'We 'ya alarigá osale Rabí:

Onorúgame anele ne Wa'lúlala:

«Asagá jena a'bé wajtoná.

Mué abiénachigo Wa'lula kame.

35Ne 'la uméromala mué saíla,

re'keka asimela mué alué mué saíla», anele Onorúgame.

Alarigá osale Rabí.

36A'lige anele Pegro uché rajpé:

―'Emi ralámuli Israeli ejperégame, 'we 'la gepuga. 'La bijchiá aní ne. Esusi ju alué rió Wa'lula, alué napu 'emi a'boi ujchale alé gulusichi. Jipe Onorúgame ajchale alué abé wa'lula napurigá ralámuli gu'iria asimela jena wijchimoba. Alueka pe Kristo ju ―alarigá anile Pegro.

37Napu'lige alanichi Pegro, alué ralámuli kilí mochile 'we seweka. A'lige ralámuli rukele Pegro uché jaré makué bilé Esusi 'yuga járome si:

―'Emi ralámuli israelita napurigá ramué, ¿chukiboa jipe?

38'Lige anele Pegro:

―Abisí a'réwaká chátiri 'nátili. Tabilé cha nokiboa aminabi, 'la kilí mochísiga 'nalina 'la nímala. A'lige alarigá rewaráwaká alé ba'ichí bokubuga napurigá 'la machimela ralámuli 'la Esukristo oyérame ko 'emi. Alarigá níriká 'la e'kámala Onorúgame. 'Liko Onorúgame 'la 'yámala bo'né Alawala. 39Onorúgame 'yámala bo'né Alawala 'emi 'kúchilachigó, alué nujubá o'chérigame, 'la bijchígisaká napu Onorúgame 'la sébali olámioríle. Suwábaga napu ekí bayé alué Wa'lula Onorúgame, alué suwábaga 'yámala bo'né Alawala. 'Ya bo'né 'la anile alarigá 'simia ―anile Pegro.

40Pegro ra'íchale we'ká ra'íchili 'we semátiri, we'ká rejcholi ruyele alué ralámuli. Anele:

―Ku 'la na'tawa. Tase oyérawa ralámuli chátiri 'nátame napu jipe nerú ―anele.

41'Lige alué ralámuli napu 'la bijchígale, a'lige rawé rewarárigame gayénale. A'lige rawé bakiá mili ralámuli chojkile Esukristo oyeria napurigá anílige Pegro. 42'Lige alué bakiá mili ralámuli 'we 'la gepule napu benírilige alué makué oká rió napu Esusi 'yale nóchali. 'Lige napuíka ejperele alué ralámuli. 'We ganíliga mochile. Bi'lepi 'nátaga mochile suwábaga. 'We tánele Onorúgame napurigá 'la gu'írimala. Aminami tabé chi'wánale alué baní 'lige go'ale napurigá 'la 'nátaga mochímala Esusi. Alarigá benírale bo'né Esusi 'ya ta'chó mukiá.

Jena ruwimela alarigá ejperégame níligo alué Esukristo oyérame

43Suwábaga alué ralámuli 'we 'la e'negá mochile alanokachi alué makué oká rió. Onorúgame gu'írile alué makué oká rió napurigá we'ká e'karúriga nokimela, 'lige ralámuli sa'wámala. 44Suwábaga alué Esukristo oyérame napuíka mochile. Tabiri napu a'boi nígame nílige, o'maka nachútale, 'yale alué tabilé nígame napurigá 'la niga mochímalachigó. 45Jaré galí ralinele. Aleké enomí 'yale uché jaré ralámuli. Uché jaré we'ká e'karúgame ralinele abiénachigo. Enomí 'yale napurigá 'la niga mochímala suwábaga alué ralámuli. 46Nabí rawé simíbale alé wa'lú re'obachi. (Yolí ra'íchaga «templo» anilime nile.) A'lige simíbale galírale. Chi'wánale alué baní alé pachá galírale, a'bopi a'tabé chi'wánaga nachútale go'mea alué baní napurigá 'nátaga mochímala Esusi. Abiena 'we ganíliga go'ale uché jaré go'ame alé galírale, bi'lepi 'nátaga Onorúgamecho. 47We'ká ra'íchale Onorúgame ra'ichálila 'we semátiri. Wa'lú cheliera 'yale Onorúgame. Suwábaga alué ralámuli Rusaleni ejperégame 'we 'la e'negá mochile alué Esukristo oyérame. Nabí rawé uché rajpé ralámuli bijchígale Onorúgame ra'ichálila napu ra'íchale alué Esukristo oyérame.

Currently Selected:

Hechos 2: tac

Highlight

Copy