ROMANOS 1

1Pablo laca na' nu nscua̱ quityi re cha' ca̱a̱ nde quichi̱ Roma ca su ndi'i̱ ma̱, cu'ma̱ nu ngusñi ma̱ cha' ji'i̱ Jesucristo. Ndyu'ni na' cña ji'i̱ ycui' Ndyosi, cha' ycui' Ni ngusubi Ni jna' cha' tsa'a na' chcui' na' cha' tso'o ji'i̱ Ni lo'o ñati̱.

2Nu lo'o tya lyiji ca̱a̱ Jesucristo nde chalyuu, tya li' cua nchcui' liñi ycui' Ndyosi ñi'ya̱ nu caca cha' bi' tyempo nu lijya̱ nde loo la. Cua nda Ni cha' bi' lo'o xi ñati̱ nu ngua tu'ba ji'i̱ ycui' Ni, cha' nchcui' Ni lo'o ñati̱ nu ngua sa'ni la; nguscua ngu' cha' bi' lo quityi li'. 3Cha' tso'o ji'i̱ Jesucristo nu Xu'na na, nu laca Sñi' ycui' Ndyosi, bi' laca cha' nu nscua lo quityi bi'. Ngula Jesús lo yuu ñi'ya̱ nu nclya cua ña'a̱ ca sñi' ñati̱, cha' la cui' tya'a ñati̱ ji'i̱ jyo'o David laca Jesús; 4lo'o jua'a̱ laca Jesús nu sca ti Sñi' nu ntsu'u ji'i̱ ycui' Ndyosi. Ndi'ya̱ caca cuayá' tso'o ti' na cha' bi': chacuayá' ji'i̱ ycui' Ndyosi Sti yu ndyu'ú Jesús chaca quiya' lo'o cua ngujuii yu, tlyu tsa cha' ngua'ni Ni li'. Nu lo'o nda ycui' Ndyosi Xtyi'i ycui' Ni ji'i̱ Jesús, nda Ni cha' lo'o na cha' Sñi' ycui' ca Ni laca nu Jesús bi'. 5Tso'o tsa ngua'ni ycui' Ndyosi lo'o na' xqui'ya Jesucristo. Cua ngulo Ni cña jna' cha' tsa'a na' tyucui ña'a̱ chalyuu mala su ndi'i̱ ñati̱; chacuayá' ji'i̱ ycui' Ni tsa'a na' chcui' na' cha' tso'o ji'i̱ ycui' Ndyosi lo'o ñati̱. Nti' Ni cha' caja ñati̱ ji'i̱ ycui' Ni lcua ti se'i̱, ñati̱ nu xñi cha' ji'i̱ ycui' Ni, ñati̱ nu taquiya' ji'i̱ cha' nu nchcui' Ni. 6Lo'o cu'ma̱ ni, cua ngusubi Ni ji'i̱ ma̱ cha' caca ma̱ ñati̱ ji'i̱ Jesucristo.

7Nscua na' quityi re cha' ca̱a̱ nde quichi̱ Roma ca su ndi'i̱ ma̱. Nda na' xlyo ni'i̱ ji'i̱ ma̱ cuentya ji'i̱ ycui' Ndyosi Sti na, cuentya ji'i̱ Jesucristo nu Xu'na na, cha' ntsu'u tsa tyiquee ycui' Ndyosi ña'a̱ Ni ji'i̱ ma̱. Cua ngusubi Ni ji'i̱ ma̱ cha' tyucui tyiquee ma̱ taca caca ma̱ ñati̱ ji'i̱ Ni. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na.

Nti' tsa Pablo tsaa na'a̱ xi ji'i̱ ngu' bi'

8Su nguxana ti quityi re, ndyu'ni tlyu na' ji'i̱ ycui' Ndyosi xqui'ya Jesucristo. Tso'o tsa nti' na' cha' cua ngusñi lcaa tya'a ma̱ cha' ji'i̱ Jesús, ca lcaa quichi̱ ndañi cha' jlya ti' ma̱ cha' bi'. 9Lo'o na' ni, cua ngujui cña jna' cha' chcui' na' cha' tso'o ji'i̱ Jesucristo Sñi' ycui' Ndyosi lo'o xa' ñati̱; tyucui tyiquee na' ndyu'ni na' cña bi' cuentya ji'i̱ Ni. Jlo ti' ycui' Ndyosi cha' lu'ba ti ndyi'u ti' na' ji'i̱ ma̱ laja lo'o nchcui' na' lo'o ycui' Ni. 10Lo'o jua'a̱ lcaa tsa̱ ndijña na' chacuayá' ji'i̱ Ni cha' tsa'a na' slo cu'ma̱, cha' tyi'i̱ na' xi lo'o ma̱, cua ña'a̱ ca hora nu nti' ycui' Ni. 11Nti' tsa na' tyacua tya'a na' xi lo'o cu'ma̱, cha' cua nti' na' ta̱ sca cui̱i̱ lo'o ma̱; Xtyi'i ycui' Ndyosi laca nu xtyucua 'na, cha' taca jlya la ti' ma̱ ji'i̱ Jesús. Li' tyatí̱ la ti' tyiquee ma̱. 12Tso'o si caca cua'ni na cha' caca tyatí̱ la ti' tyiquee tya'a na, cha' stu'ba ti xñi tso'o la na cha' ji'i̱ Jesús li'.

13Cu'ma̱ tya'a ngusñi na cha' ji'i̱ Jesús, nti' na' cha' caca cuayá' ti' ma̱ ñi'ya̱ nu ntsu'u tyiquee na' ña'a̱ na' ji'i̱ cu'ma̱. Tyu̱u̱ quiya' ngua ti' na' ca̱a̱ na' ca su ndi'i̱ ma̱, pana hasta juani bilya caja ñi'ya̱ caca nu ca̱a̱ na'. Ñi'ya̱ nu ngua'ni na' ca xa' loyuu chalyuu, jua'a̱ cua nti' na' cha' caca su ndi'i̱ cu'ma̱; nti' na' cha' taquiya' xa' la ñati̱ cha' ji'i̱ Jesús, lo'o jua'a̱ nti' na' cha' tya culu'u la na' cha' bi' ji'i̱ ma̱. 14Cua ngulo Ni cña 'na cha' tsa'a̱ chcui̱' lo'o ngu' xa' tsu', masi ndi'i̱ ngu' bi' quichi̱ tonu, masi ndi'i̱ ngu' tyijyu' la ca ne' quixi̱'; ngulo Ni cña jna' cha' sca ti cha' chcui' na' lo'o ngu', masi lo'o ngu' nu nchca tsa ji'i̱, masi lo'o ngu' nu ná ndyi'ya cuentya tsiya' ti. 15Bi' cha' nti' na' tsa'a̱ cha' chcui' na' cha' tso'o ji'i̱ ycui' Ndyosi lo'o cu'ma̱ ngu' Roma, ñi'ya̱ lo'o cua nda na' cha' bi' lo'o xa' ñati̱.

Tlyu tsa cha' tso'o nu ntsu'u ji'i̱ cha' nu nda Jesús cha' chcui' na lo'o ñati̱

16Ná ntyuju'u ti' na' tsiya' ti cha' culu'u na' cha' tso'o nu ntsu'u ji'i̱ Jesús ji'i̱ ñati̱. Lijya̱ cha' bi' lo'o lcaa chacuayá' ji'i̱ ycui' Ndyosi, cha' cua'ni lyaá Ni ji'i̱ lcaa ñati̱ nu xñi cha' ji'i̱ ycui' Ni. Tya clyo nda Ni cha' tso'o bi' lo'o ngu' judío ti, li' lo'o nda Ni cha' tso'o bi' lo'o ngu' xa' tsu'. 17Lo'o cuna na cha' tso'o ji'i̱ Jesús bi', li' caca cuayá' ti' na ñi'ya̱ ndu'ni ycui' Ndyosi cha' ca tso'o cresiya ji'i̱ ñati̱ cuxi; xqui'ya cha' nu jlya ti' na ji'i̱ cña nu ngua'ni Jesús, bi' cha' taca caca tso'o cresiya ji'i̱ ñati̱ cuxi na, sca ti si xñi na cha' ji'i̱ ycui' Ni. Ndi'ya̱ ndyu'u sca cha' nu nscua lo quityi cusu': “Nu lo'o jlya ti' na ji'i̱ ycui' Ni cha' taca cua'ni Ni cha' caca tso'o cresiya ji'na, li' caja sca chalyuu nu ná nga'a̱ cha' tye ji'na”.

Yabe' nu ndyanu hichu̱' ñati̱ chalyuu

18Lo'o cuna na cha' ji'i̱ Jesús bi', li' ca cuayá' ti' na cha' ñasi̱' tsa ycui' Ndyosi ca su ntucua Ni nde cua̱; xcube' tsa ycui' Ni ji'i̱ cua ña'a̱ ca ñati̱ cuxi. Na ñasi̱' Ni ji'i̱ ngu' bi', cha' cuxi tsa ndu'ni ngu'; cuxi tsa ngu' bi', lo'o jua'a̱ ná nda ngu' chacuayá' cuna xa' ñati̱ lcaa ña'a̱ cha' liñi nu cua nda ycui' Ndyosi lo'o ñati̱ chalyuu. 19Nchca cuayá' ti' ngu' cuxi bi' lcaa lo cha' nu caca cuayá' ti' ñati̱ nquicha', cha' ji'i̱ ycui' Ndyosi, cha' cua ngulu'u ycui' Ni cha' bi' ji'i̱ ngu'. 20Ycui' Ndyosi ni, ná nchca ji'na ña'a̱ na ji'i̱ Ni ca su ntucua Ni nde cua̱, ni ná taca ca cuayá' ti' na ñi'ya̱ laca cha' ná tye chca cha' tlyu nu ndu'ni Ni. Pana tya lo'o nguxana chalyuu tya clyo, tya li' taca tyuloo na ji'i̱ ycui' Ni; tya li' ngujui ñi'ya̱ caca cuayá' ti' na tilaca laca ycui' Ni, si clyana na ji'i̱ Ni. Taca tyuloo ñati̱ ji'i̱ Ni lo'o ña'a̱ ngu' ji'i̱ lcaa lo na nu ngüiñá Ni. Bi' cha' ná ntsu'u cha' clyu ti' ji'i̱ ycui' Ndyosi lo'o ñati̱ cuxi bi'. 21Masi nslo ngu' cuxi bi' tilaca laca ycui' Ni, ná ntaja'a̱ ngu' bi' cua'ni tlyu ngu' ji'i̱ Ni; masi ycui' Ndyosi laca Ni, ná ndya ngu' bi' xlya'be ji'i̱ Ni. Xcui' cha' cuxi ti ntsu'u tyiquee ngu'. Ngüichi̱ yaa cha' hique ngu' cha' ná ntaja'a̱ ngu' xñi ngu' cha' liñi bi'. 22Nacui̱ ngu' cha' nchca tsa ji'i̱ ycui' ca ngu', pana lye tsa ndyu'ni tyucuaa ti' ngu' lo'o nchcui' ngu' jua'a̱; ple tsa ngu' xqui'ya cha' cuxi nu ndu'ni ngu'. 23Ná nti' ngu' cua'ni tlyu ngu' ji'i̱ ycui' Ndyosi nu laca loo la, la cui' Ni laca nu ná tye chalyuu ji'i̱ tsiya' ti; ndiya la ti' ngu' cua'ni tlyu ngu' ji'i̱ lcui̱ ñati̱ nu ndyijii ti. Lo'o jua'a̱ ndu'ni tlyu ngu' ji'i̱ lcui̱ quiñi nu ndacui nde cua̱, lo'o ji'i̱ lcui̱ na'ni nu ntucua quiya', lo'o ji'i̱ lcui̱ na'ni nu nsube' ne' ni' lo yuu; bi' laca cha' nu ndu'ni tlyu ngu' ji'i̱.

24Bi' cha' cua ngulaya' Ni ji'i̱ ngu' cuxi bi'; juani cua nda Ni tyempo ji'i̱ ngu' cha' caca suba' ngu', cha' cua'ni suba' ngu' lo'o tya'a ngu', sca lo cha' cuxi nu ntyuju'u tsa ti' na cha' chcui' na ji'i̱. 25Cua nguxtyanu ngu' bi' lcaa cha' liñi nu ngulu'u ycui' Ndyosi ji'i̱ ngu', ndiya la ti' ngu' cha' xñi ngu' lcua ti lo cha' cuiñi; ndu'ni tlyu ngu' ji'i̱ jo'ó cuiñi, ndaquiya' ngu' ji'i̱ lcui̱ scaa na nu cua ngüiñá ti ycui' Ndyosi, nga'aa si'i ji'i̱ ycui' Ni nu ngüiñá cha' bi' ndu'ni tlyu ngu'. La cui' ycui' Ndyosi nu ntsu'u tsa tyiquee na ña'a̱ na ji'i̱, cha' xcui' tso'o ti ndu'ni Ni lo'o na laca Ni. Jua'a̱ laca cha' tu'ni.

26Nguxtyanu Ni ji'i̱ ngu' cuxi lacua, cha' cua'ni suba' ngu' lo'o tya'a ngu'; sca lo cha' cuxi nu ná nti' na chcui' na ji'i̱ lo'o ñati̱, bi' laca cha' cuxi nu ndu'ni ngu' bi'. La cui' ti nu ngu' cuna'a̱ nga'aa ndi'i̱ lo'o ngu' qui'yu ñi'ya̱ nu ndi'i̱ cua ña'a̱ ca ñati̱ tso'o, xcui' lo'o tya'a cuna'a̱ ti ndu'ni ngu' cha' suba'; 27lo'o jua'a̱ nu ngu' qui'yu nga'aa ndi'i̱ lo'o ngu' cuna'a̱ ñi'ya̱ nu ndi'i̱ ñati̱, ndacui tsa ti' ngu' ji'i̱ xa' qui'yu, ndu'ni suba' ngu' lo'o tya'a qui'yu ngu'. Laja cuaña' ti ngu' nda ycui' Ndyosi cha' ti'í ji'i̱ ngu', cha' cuxi tsa cña nu ndyu'ni ngu' bi'.

28Jua'a̱ laca ji'i̱ ngu', cha' ná nti' ngu' tyuloo ngu' ji'i̱ ycui' Ndyosi; bi' cha' nguxtyanu Ni ji'i̱ ngu' cha' cua'ni ngu' cha' cuxi bi', nda Ni xi tyempo cua'ni ngu' ñi'ya̱ nu nti' ti ngu' cua'ni ngu'. 29Ná tso'o tsiya' ti cña nu ndu'ni ngu' lo'o tya'a ñati̱ ngu': xcui' cha' suba' ti ndu'ni ngu', cuxi tsa ndu'ni ngu'; ndacui tsa ti' ngu' ji'i̱ scaa cha' tso'o nu ntsu'u ji'i̱ tya'a ñati̱ ngu', ti'í tsa ti' ngu' ña'a̱ ngu' ji'i̱ tya'a ngu'; nti' ngu' cha' tso'o la caca ji'i̱ ycui' ngu' que ji'i̱ xa' la tya'a ngu', pana nxu̱u̱ tya'a ngu' bi' hasta ndujuii ngu' ji'i̱ tya'a ngu'; ndu'ni ngu' ngana ji'i̱ tya'a ngu'; chiya'a̱ tsa cha' ntsu'u tyiquee ngu' ña'a̱ ngu' ji'i̱ tya'a ñati̱ ngu', hasta nclo que ngu' cuentyu ji'i̱ tya'a ngu', 30hasta nchcui' ngu' cha' ti'í ji'i̱ tya'a ngu'; liye' ti' ngu' ña'a̱ ngu' ji'i̱ ycui' Ndyosi, cha' suba' nchcui' ngu'; tyixi ndu'ni ngu' lo'o tya'a ngu', ndu'ni tyucuaa tsa ti' ngu' lo'o tya'a ñati̱ ngu'. Lo'o jua'a̱ tya nclyana la ngu' cha' cuxi nu cua'ni ngu', ni ná ndaquiya' ngu' ji'i̱ sti ngu', ji'i̱ xtya'a̱ ngu'. 31Ni sca cha' ná ndube ti' ngu' bi' tsiya' ti; ná ndu'ni ngu' ni sca cña nu cua nacui̱ ngu' cha' cua'ni ngu'. Ná ntsu'u tyiquee ngu' ña'a̱ ngu' ji'i̱ tya'a ngu', ñi'ya̱ ndu'ni ñati̱ tso'o; la cui' ti ná ndu'ni tya'na ti' ngu' ji'i̱ tya'a ngu'. 32Nda ngu' bi' cuentya cha' nu cua nchcui' ycui' Ndyosi ji'i̱ ngu', cha' ntsu'u cha' cajaa ngu' bi' xqui'ya cha' cuxi nu ndu'ni ngu'. Masi jlo ti' ngu' cha' bi', ná ndube ti' ngu' bi'; ña'a̱ ti ndu'ni ngu' cha' cuxi bi' ji'i̱ ngu'. Lo'o jua'a̱ tso'o tsa ntsu'u tyiquee ngu' lo'o ña'a̱ ngu' ji'i̱ xa' ñati̱ nu ndyu'ni la cui' tya'a cha' cuxi bi'.

Currently Selected:

ROMANOS 1: cta

Highlight

Copy