SAN MATEO 18

Nchcui' ngu' cha' ndulo la cha' ji'i̱ ycui' ca ngu'

1La cui' tyempo bi' ndyalaa lcaa ngu' nu ndyaca tsa'a̱ ji'i̱ slo Jesús cha' chcui' ngu' lo'o:

―¿Tilaca laca nu ndulo la cha' ji'i̱ ca su laca ycui' Ndyosi loo? ―nacui̱ ngu' ji'i̱ Jesús.

2Li' ngusi'ya Jesús ji'i̱ sca nu piti cha' ca̱a̱ slo yu, cha' tyatu̱ nu piti slo ngu' nu ndyaca tsa'a̱ ji'i̱.

3―Cha' liñi nchcui' na' lo'o ma̱ ―nacui̱ Jesús ji'i̱ ngu' bi'―, cha' ná caca tyatí̱ ma̱ cha' ji'i̱ ycui' Ndyosi cha' caca Ni loo ne' cresiya ji'i̱ ma̱ si ná cha'a̱ cha' tyiquee ma̱; nga'a̱ cha' caca tyiquee ma̱ ñi'ya̱ laca tyiquee nu piti re, cha' ná tyixi ndu'ni ngu' sube. 4Sca ñati̱ nu laca ñi'ya̱ laca nu piti re, sca ñati̱ nu ná tyixi tyiquee, nu ná nti' tyiji̱loo ji'i̱ tya'a cha' caca ycui' sca ñati̱ tlyu, bi' laca nu ndulo la cha' ji'i̱ ca su laca ycui' Ndyosi loo. 5Nu lo'o xtyucua ma̱ ji'i̱ sca ñati̱ ñi'ya̱ nti' nu piti re xqui'ya cha' ngusñi tso'o ma̱ cha' jna', la cui' jua'a̱ na nxtyucua ma̱ 'na laca.

Cuxi tsa caca ji'na si ntsu'u sca qui'ya nu ndiya la ti' na

6’Si ntsu'u ñati̱ nu ndatsaa ji'i̱ xa' ñati̱ cha' cua'ni ngu' cha' cuxi', masi tatsaa ñati̱ bi' ji'i̱ nu piti re cha' cua'ni yu cha' cuxi, tso'o la masi tyaaca̱' sca quichi tonu yane ñati̱ cuxi bi', lo'o li' xtyú ngu' ji'i̱ ñati̱ bi' lo hitya tyujo'o cha' tye cha' ji'i̱ tsiya' ti; tso'o la si cajaa ñati̱ nu jua'a̱ ndu'ni, cha' nga'aa tatsaa ji'i̱ xa' la ngu' sube cha' cua'ni ngu' cha' cuxi. 7¡Tya'na tsa ñati̱ chalyuu re! Ntsu'u tsa cha' cuxi nu ndu'ni ñu'u̱ ji'i̱ tyiquee ñati̱. Lcaa hora ntsu'u cha' cuxi jua'a̱ nde chalyuu, pana tlyu tsa cha' caca ji'i̱ ñati̱ nu ndatsaa ji'i̱ tya'a cha' cua'ni ngu' cha' cuxi; tlyu tsa cha' ti'í tyacua ji'i̱ ñati̱ bi' nde loo la.

8’Nga'a̱ cha' xtyanu ma̱ tsiya' ti lcaa cha' cuxi nu ndiya tsa ti' ma̱ ji'i̱, masi tiji̱' tsa ti' ma̱ ji'i̱ sca cha' bi' ñi'ya̱ laca si ya' ma̱ laca, ñi'ya̱ laca si quiya' ma̱ laca. Tso'o la xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi bi' nu tiji̱' tsa ti' ma̱ ji'i̱, lo'o li' ná tyalaa ma̱ su nga'aa tye tsiya' ti cha' tyaqui̱ quii'. 9La cui' ti cha', masi ndiya tsa ti' ma̱ sca cha' cuxi nu ña'a̱ ma̱ ji'i̱, nga'a̱ cha' xtyanu ma̱ cha' bi' tsiya' ti, ñi'ya̱ si culo ma̱ ji'i̱ ycui' cloo ma̱ cha' nga'aa taquiya' ma̱ ji'i̱ cha' cuxi bi' tsiya' ti. Tso'o la xana chalyuu nu ná nga'a̱ cha' tye ji'i̱ ma̱, masi ná lo'o cha' cuxi bi' nu tiji̱' tsa ti' ma̱ ji'i̱, cha' li' ná tsaa ma̱ nde ca bilyaa su ná tye tsiya' ti cha' tyaqui̱ quii'.

Cui̱i̱ ji'i̱ sca xlya' nu cua nguna' ji'i̱ ngu'

10’Ná tso'o si ná taquiya' ma̱ ji'i̱ sca ñati̱ 'na, masi ji'i̱ sca nu piti. Cha' liñi nchcui' na' lo'o ma̱, cha' ntsu'u xca̱ ca su ntucua ycui' Ni cuentya ji'i̱ lcaa ngu' sube bi'; lcaa hora ntsu'u chacuayá' chcui' xca̱ bi' lo'o ycui' Ndyosi Sti na' cuentya ji'i̱ nu ngu' sube ji'i̱. 11Cua nda Ni 'na lijya̱a̱ chalyuu chacuayá' ji'i̱ ycui' Ndyosi cha' caca na' ñati̱, cha' cua'ni lyaá na' ji'i̱ ñati̱ nu cua nguna' chalyuu ji'i̱ xqui'ya cha' cuxi.

12’¿Ñi'ya̱ nti' ma̱ ni? Cua ntsu'u sca siyento tya'a xlya' ji'i̱ sca ñati̱, lo'o li' nguna' tsaca ji'i̱ yu. ¿Ñi'ya̱ cua'ni yu li'? Ndi'ya̱ cua'ni yu ñacui̱ na': xtyanu yu ji'i̱ taju xlya' quiña'a̱ bi' sii' ca'ya su tso'o ti ndi'i̱ ni', cha' tsaa yu tsaana yu ji'i̱ xlya' nu nguna' ji'i̱ yu bi'. 13Lo'o quije bi' ji'i̱ yu, ca chaa tsa ti' yu li', cha' tso'o tsa ntsu'u tyiquee yu ña'a̱ yu ji'i̱ nu sca ca xlya' nu cua nguna' ji'i̱ yu; pana ná ntsu'u cha' culacua ti' yu ji'i̱ nu jacuayala tyii ntucua caa tya'a xlya' nu ndyanu tso'o ti. 14Ñi'ya̱ nu ndu'ni nu xu'na xlya' bi', cha' ná chcuna' ni sca xlya' ji'i̱ yu, la cui' jua'a̱ ndu'ni ycui' Ndyosi Sti ma̱ nu ntucua nde cua̱, cha' ná nti' Ni cha' chcuna' chalyuu ji'i̱ ni tsaca ñati̱ xqui'ya cha' cuxi nu ntsu'u ji'i̱. Ná nti' ycui' Ni tsiya' ti cha' tye cha' ji'i̱ ngu', masi sube tsa ngu' nti' ma̱.

Ntsu'u cha' cua'ni clyu ti' na ji'i̱ tya'a na

15’Nu lo'o ntsu'u ngu' tya'a ma̱ nu ngua'ni sca cha' cuxi lo'o ma̱, li' tsaa ma̱ slo ngu' tya'a ma̱ bi', cha' cuaana ti cacha' ma̱ ji'i̱ ngu' bi' ñi'ya̱ laca cha' cuxi nu ngua'ni ngu' lo'o ma̱. Tso'o tsa li' si tyaja'a̱ ngu' tya'a ma̱ bi' cuna ngu' cha' nu chcui' ma̱ lo'o ngu'; ca xñi'i̱ ti' ngu' li', xqui'ya cha' cua ngua'ni ngu' cha' cuxi bi'. Li' xa' caca stu'ba cha' ji'i̱ ma̱ lo'o ngu' tya'a ma̱ bi'. 16Pana si ná tyaja'a̱ ngu' tya'a ma̱ bi' cuna ngu' cha' nu nchcui' ma̱ lo'o ngu', tso'o la si tsaa ma̱ slo ngu' bi' chaca quiya'; pana lo'o xi xa' la ngu' tya'a ma̱ tsaa ma̱ li', cha' lo'o ngu' bi' cuna ngu' cha' nu chcui' tyucuaa ma̱, cha' caca ngu' bi' testigo. 17Lo'o li', si ná tyaja'a̱ ngu' tya'a ma̱ bi' taquiya' ngu' tsiya' ti ji'i̱ tucua sna tya'a ma̱, li' cacha' ma̱ cha' bi' ji'i̱ taju ñati̱ ji'i̱ cu'ma̱, nu stu'ba ndu'ni tlyu ma̱ ji'i̱ ycui' Ndyosi. Lo'o li' si ña'a̱ ti ná tyaja'a̱ nu ngu' tya'a ma̱ bi' taquiya' ngu' ji'i̱ cha' nu nchcui' ca ta'a taju tya'a ma̱ lo'o ngu', li' nga'aa cua'ni tya'a ma̱ lo'o ngu' bi' lacua. Ñi'ya̱ si cua laca ngu' ñati̱ nu ná ntsu'u cha' ji'i̱ lo'o ycui' Ndyosi tsiya' ti, ñi'ya̱ si laca ngu' msu ji'i̱ ngu' xa' tsu' nu cuiñi ti nxñi quiña'a̱ tsa cñi cña loo ji'i̱ ma̱, jua'a̱ cua'ni ma̱ lo'o ngu' bi' li'.

18’Cha' liñi laca nu nchcui' na' re, cha' lo'o ná cua'ni clyu ti' ma̱ ji'i̱ ñati̱ xqui'ya sca cha' cuxi nu ndyu'ni ñati̱ bi', la cui' jua'a̱ ná cua'ni clyu ti' ycui' Ndyosi ji'i̱ ñati̱ bi' nde loo la; pana lo'o cua'ni clyu ti' ma̱ ji'i̱ ñati̱, la cui' jua'a̱ cua'ni clyu ti' Ni ji'i̱ ñati̱ bi'.

19’Chaca quiya' cacha̱' ji'i̱ ma̱ cha' chañi cha' cua'ni Sti na' nu ntucua nde cua̱ lcaa cha' nu ndijña ma̱ ji'i̱ Ni, masi tucua tya'a ti ma̱ ndu̱ ma̱, si stu'ba cha' nu ntsu'u tyiquee tyucuaa ma̱. 20Lo'o na' nga'a̱ na' lo'o ma̱ macala su ndyu'u ti'i̱ tucua sna tya'a ti ma̱ chacuaya' 'na.

21Li' ñaa Pedro cacua la cha' cacha' ji'i̱ Jesús:

―Xu'na ―nacui̱ ji'i̱ Jesús―, ¿ni lcua quiya' cui'ya na' cha' clyu ti' ji'i̱ yu tya'a na' lo'o ndyu'ni yu cha' cuxi lo'o na'? ―nacui̱―. ¿Ha tso'o cati quiya' cua'ni clyu ti' na' ji'i̱ yu?

22Li' nguxacui̱ Jesús cha' ji'i̱ Pedro:

―Ná chcui' na cha' cati ti quiya' ―nacui̱ Jesús―. Tso'o cua'ni clyu ti' na ji'i̱ tya'a na masi snayala tyii ntucua cati quiya' ―nacui̱.

Cui̱i̱ ji'i̱ msu nu ná nti' cua'ni clyu ti' ji'i̱ tya'a msu yu

23’Chcui' na' chaca cha' lo'o ma̱, cha' caca cuayá' ti' ma̱ ñi'ya̱ caca lo'o laca ycui' Ni loo ne' cresiya ji'i̱ ñati̱: Chcui' na' cha' ji'i̱ sca rey nu ngua ti' cua'ni tye tane', cha' ndacui tsa msu ji'i̱. 24Lo'o nguxana ca ti nclyacua ti' rey jua'a̱, hora ti ndu'u tucua ngu' slo rey bi', ñaa lo'o ngu' ji'i̱ sca msu nu ndacui tyu̱u̱ tsa miyu̱ paxu ji'i̱. 25Ná ntsu'u cñi tsiya' ti ji'i̱ msu bi', cha' tya tane' bi' ji'i̱ xu'na yu; bi' cha' ngulo xu'na yu cña cha' cujui' ngu' ji'i̱ msu bi', lo'o ji'i̱ clyo'o yu, lo'o ji'i̱ ca ta'a sñi' yu, lo'o lcaa na nu ntsu'u ji'i̱ msu bi' ca caya' cha' tya cñi nu ndacui ji'i̱ xu'na yu li'. 26Ndyutsi̱i̱ tsa msu bi' li', nclyú yu lo yuu su ndu̱ xu'na yu. Li' ndyatu̱ sti̱' slo yu cha' jña xi tyempo ji'i̱ xu'na yu: “Xu'na”, nacui̱ msu bi' ji'i̱ rey, “talo xi 'na. Ta la xi tyempo 'na cha' tya na' lcaa cñi nu ndacui na' jinu'u̱ ca tiya' la.” 27Ngua tya'na ti' xu'na msu bi' ji'i̱ li', ngua'ni clyu ti' ji'i̱ msu ji'i̱ cuentya ji'i̱ tane' bi'. “Cua ndye tane' jinu'u̱ juani. Nga'aa ndacui nu'u̱ jna'”, nacui̱ xu'na yu ji'i̱ yu. Cua ndu'u msu bi' ndyaa li'. 28Tyucui̱i̱ nde su ndyaa yu, li' ndyacua tya'a yu lo'o tya'a msu yu nu ndacui xti ti cñi ji'i̱ yu. Hora ti ngusñi yu yane tya'a, tyaala tsa ngua'ni yu ji'i̱ tya'a msu yu. “¿Ni hora tya nu'u̱ cñi nu ndacui nu'u̱ 'na?” nacui̱ yu ji'i̱ tya'a msu yu. 29Lo'o nu ndacui xti ti cñi bi' ni, ndyatu̱ sti̱' slo msu tyaala bi', ndijña xi cha' clyu ti' ji'i̱ yu tyaala bi', cha' caca tya'na ti' yu ji'i̱: “Talo nu'u̱ xi 'na”, nacui̱ ji'i̱ nu tyaala bi'. “Ta la xi tyempo 'na cha' tya na' lcaa cñi nu ndacui na' jinu'u̱ ca tiya' la xi.” 30Pana nu msu tyaala bi' ni, ná ngua tya'na ti' yu ji'i̱ tya'a msu yu tsiya' ti; hora ti ngusta yu qui'ya ji'i̱ ca toni'i̱ cña, cha' su'ba ngu' ji'i̱ ne' chcua̱ ña'a̱ cuayá' nu tya cñi nu ndacui ji'i̱ yu. 31Lo'o cua na'a̱ lcaa tya'a msu yu ñi'ya̱ ngua cha' cuxi nu ngua'ni yu tyaala bi', xñi'i̱ xi ti' ngu' cuentya ji'i̱ nu nga'a̱ ne' chcua̱ bi' li'. Bi' cha' ndyaa ngu' ca slo xu'na ngu' bi', ndacha' ngu' lcaa cha' bi' ji'i̱ xu'na, ñi'ya̱ nu ngua ji'i̱ nu ndacui cñi bi'. 32Hora ti ngusi'ya xu'na yu ji'i̱ msu tyaala bi' cha' xa' tya̱a̱ yu ca slo. “Cuxi tsa tyiquee nu'u̱”, nacui̱ xu'na ji'i̱ msu tyaala bi'. “Cua ngüijña nu'u̱ cha' clyu ti' 'na, lo'o jua'a̱ ngua'ni clyu ti' na' jinu'u̱ nquicha', masi quiña'a̱ tsa cñi ndacui nu'u̱ 'na. 33Lo'o juani ni, ¿ni cha' ná ngua'ni tya'na ti' nu'u̱ ji'i̱ tya'a msu nu ndacui xti ti cñi hi̱, ñi'ya̱ ngua'ni tya'na ti' na' jinu'u̱?” 34Ngua ñasi̱' tsa xu'na msu bi' ji'i̱ msu tyaala bi' li', ngulo cña cha' xñi policia ji'i̱, cha' su'ba ngu' ji'i̱ ne' chcua̱, cha' xcube' ngu' ji'i̱ ña'a̱ cuayá' nu tya msu tyaala bi' lcaa cñi nu ndacui ji'i̱ xu'na yu. Bi' laca cui̱i̱ ji'i̱ rey lo'o msu ji'i̱.

35’Ñi'ya̱ ngua'ni rey bi' ―nacui̱ Jesús ji'i̱ ngu'―, jua'a̱ cua'ni Sti na' nu ntucua nde cua̱ lo'o lcaa ma̱ nu ná tyucui tyiquee ma̱ ndyi'ya ma̱ cha' clyu ti' ji'i̱ tya'a ma̱.

Currently Selected:

SAN MATEO 18: cta

Highlight

Copy