SAN JUAN 14
14
Nclyu'u Jesús chaca tyucui̱i̱ cucui ji'na
1’Ná quiña'a̱ tsa cha' culacua ti' ma̱ cuentya 'na ―nacui̱ Jesús ji'i̱ ngu' li'―. Cua ngusñi ma̱ cha' ji'i̱ ycui' Ndyosi, jua'a̱ xñi tso'o ma̱ cha' jna' li'. 2Quiña'a̱ tsa su tso'o ntsu'u su tyi'i̱ ma̱ ca slo ycui' Ndyosi Sti na'. Tsa'a na' ca bi' cha' cua'ni cho'o na' su tyi'i̱ ma̱. Ná nchcui' na' lo'o cu'ma̱ jua'a̱, si si'i cha' liñi nu nchcui' na' lo'o ma̱ ―nacui̱ Jesús―. 3Lo'o jua'a̱ tsa'a na' cha' cua'ni cho'o na' su tyi'i̱ ma̱, li' ca̱a̱ na' lo yuu chaca quiya', ca̱qui'ya na' ji'i̱ ma̱ cha' tyi'i̱ ma̱ lo'o na'. 4Cua jlo ti' ma̱ macala su tsa'a na', jlo ti' ma̱ ñi'ya̱ nu cua'ni na' cha' tsa'a̱ ca jua.
5―Cusu' ―nacui̱ Tomás―, ná jlo ti' ya macala tsaa nu'u̱. ¿Ñi'ya̱ cua'ni ya cha' quije tyucui̱i̱ bi' ji'i̱ ya? ―nacui̱ ji'i̱ Jesús.
6―Na' laca̱ nu nclyu'u̱ tyucui̱i̱ ―nacui̱ Jesús li'―, na' nclyu'u̱ lcaa cha' nu liñi ca; na' nda̱ chalyuu tso'o ji'i̱ ngu', chalyuu nu ná nga'a̱ cha' tye. Ná taca ji'i̱ ngu' tyalaa ngu' ca slo ycui' Ndyosi si ná lo'o na' ―nacui̱ Jesús―. 7Ndyuloo ma̱ 'na, bi' cha' jua'a̱ cua ndyuloo ma̱ ji'i̱ Sti na' li'; cua ndyuloo ma̱ ji'i̱ Ni juani, cha' cua na'a̱ ma̱ ji'i̱ ycui' Ni nu lo'o cua na'a̱ ma̱ jna'.
8Li' nchcuane Felipe ji'i̱ Jesús:
―Cusu' ―nacui̱―, culu'u nu'u̱ ji'i̱ Sti nu'u̱ ji'i̱ ya, tsa bi' ti cha' nti' ya.
9―Felipe ―nacui̱ Jesús ji'i̱―, cua tyu̱u̱ tsa tsa̱ ndi'i̱ na' lo'o cu'ma̱, ¿ha tya lyiji tyuloo ma̱ jna'? ―nacui̱―. Cua na'a̱ ma̱ 'na, bi' cha' jua'a̱ ji'i̱ Sti na' cua na'a̱ ma̱ li'. ¿Na laca nti' nu'u̱ lo'o ndi'ya̱ nchcui' nu'u̱ lo'o na': Culu'u nu'u̱ ji'i̱ Sti nu'u̱ ji'i̱ ya? ―nacui̱ Jesús ji'i̱ Felipe―. 10¿Ha ná jlya ti' ma̱ cha' stu'ba ntsu'u cha' 'na lo'o ycui' Ndyosi Sti' na'? Lo'o jua'a̱ lcaa hora ndi'i̱ ycui' Ndyosi Sti na' lo'o na' ―nacui̱―. Si'i cha' nu ngulo hique ti na' nu nchcui' na' lo'o ma̱; stu'ba ntsu'u cha' ji'i̱ Sti na' lo'o na', lo'o ycui' Ni laca nu nclyo cña 'na, ñi'ya̱ nu cua'ni na'. 11Xñi ma̱ cha' jna' lacua, cha' nu nacui̱ na' ji'i̱ ma̱ cha' stu'ba ntsu'u cha' 'na lo'o ycui' Ndyosi Sti na'. Si ná caca jlya ti' ma̱ 'na jua'a̱, li' tso'o masi xqui'ya cña tonu nu ndu'ni na', bi' cha' jlya ti' ma̱ jna' ―nacui̱ Jesús―. 12Liñi tsa cha' nu ta na' lo'o ma̱ juani, cha' lcaa ñati̱ nu xñi cha' jna', taca cua'ni ngu' la cui' ña'a̱ cña tonu nu ndu'ni ycui' na'; lo'o jua'a̱ tlyu la cña caca cua'ni ngu' bi' li', cha' cua tya'a ti na' ca su ndi'i̱ ycui' Ndyosi Sti na' ―nacui̱ Jesús―. 13Bi' cha' juani lcaa cha' nu jña ma̱ ji'i̱ ycui' Ndyosi chacuayá' jna', cua'ni na' cha' bi' ―nacui̱―. Jua'a̱ ji'i̱ ycui' Ndyosi Sti na' cua'ni tlyu ngu', nu lo'o cua'ni tlyu ngu' 'na nu laca̱ Sñi' ycui' Ni. 14Lcaa cha' nu jña ma̱ ji'i̱ Sti na' chacuayá' jna', cua'ni na' cha' bi' li'.
Ca̱a̱ Xtyi'i ycui' Ndyosi xtyucua Ni ji'na
15’Taquiya' ma̱ ji'i̱ lcaa cha' nu nchcui' na' lo'o ma̱, si chañi cha' ntsu'u tyiquee ma̱ 'na ―nacui̱ Jesús―. 16Lo'o tya'a na', li' chcui' na' lo'o ycui' Ndyosi Sti na' cha' ta Ni chaca nu xtyucua ji'i̱ ma̱; bi' laca Xtyi'i ycui' Ndyosi nu laca su̱u̱ lcaa cha' liñi. Tyanu nu bi' lo'o ma̱ ña'a̱ cuayá' nu tye chalyuu ―nacui̱―. 17Ná caca tyanu Xtyi'i ycui' Ndyosi ne' cresiya ji'i̱ ñati̱ cuxi, cha' ná nchca ña'a̱ ngu' bi' ji'i̱ Ni, ná nslo ngu' tilaca laca ycui' Ni. Nu cu'ma̱, nslo ma̱ ji'i̱ Ni xqui'ya cha' ndi'i̱ nu bi' lo'o ma̱, lo'o jua'a̱ cua tyanu ti Ni ne' cresiya ji'i̱ ma̱ ―nacui̱ Jesús ji'i̱ ngu'―. 18Ná xtyanu na' ji'i̱ ma̱ ycui' ti ma̱, ñi'ya̱ si laca ma̱ ñati̱ nu ná tucui ntsu'u ji'i̱ ma̱ ―nacui̱―, tya ca̱a̱ na' su ndi'i̱ ma̱ chaca quiya'. 19Ca tiya' la xi, li' nga'aa ña'a̱ ñati̱ chalyuu jna'; pana cu'ma̱, tya ña'a̱ ma̱ jna'. Li' caca tso'o tyiquee ma̱, xqui'ya cha' lu'ú na'. 20Lo'o jua'a̱ caca cuayá' ti' ma̱ cha' stu'ba ntsu'u cha' jna' lo'o Sti na', cha' ntsu'u cha' ji'i̱ ma̱ lo'o na' ―nacui̱ Jesús―, lo'o jua'a̱ ntsu'u cha' jna' lo'o cu'ma̱. 21Lcaa ñati̱ nu chañi cha' ntsu'u tyiquee ngu' ña'a̱ ngu' jna', bi' laca ñati̱ nu cua'a̱ jyaca̱ ji'i̱ lcaa cha' nu chcui' na' lo'o ngu'; taquiya' ngu' bi' ji'i̱ cha' bi' ―nacui̱―. Lo'o ntsu'u tsa tyiquee ngu' ña'a̱ ngu' jna', jua'a̱ Sti na' ntsu'u tyiquee Ni ña'a̱ Ni ji'i̱ ngu' bi' li'. Lo'o na', tso'o tsa caca tyiquee na' ña'a̱ na' ji'i̱ ngu' bi', cuati culu'u na' ji'i̱ ngu' bi' lcaa cha' ñi'ya̱ nu laca ycui' Na'.
22Li' nchcui' nu chaca Judas bi', si'i nu naa Judas Iscariote:
―Nu lo'o nacui̱ nu'u̱ cha' culu'u nu'u̱ ñi'ya̱ nu laca ycui' ca nu'u̱ ji'i̱ cuare ti, ná lo'o ji'i̱ xa' ñati̱, ¿ñi'ya̱ ta nti' nu'u̱, Xu'na? ―nacui̱ nu Judas bi' ji'i̱ Jesús.
23―Ñati̱ nu chañi cha' ntsu'u tsa tyiquee jna', taquiya' ngu' ji'i̱ lcaa cha' nu nchcui' na' lo'o ngu' ―nacui̱ Jesús―. Lo'o li' tso'o tsa caca tyiquee ycui' Ndyosi Sti na' ña'a̱ Ni ji'i̱ ngu' bi'. Cuati ca̱a̱ ya lo'o Sti na' cha' tyanu ya lo'o ngu' bi' ―nacui̱ Jesús―. 24Pana ñati̱ nu ná ntsu'u tyiquee jna', ná ndaquiya' ngu' tsiya' ti ji'i̱ cha' nu nchcui' na' lo'o ngu'. Cua ndyuna cu'ma̱ cha' nu nda Sti na' 'na cha' culu'u̱ ji'i̱ ma̱, cha' si'i sca cha' nu nda'ya hique ti na' laca cha' nu nda na' lo'o ma̱.
25’Cua nchcui' na' lcaa cha' bi' lo'o tya ndi'i̱ ti na' lo'o ma̱. 26Tiya' la li' caca cuayá' la ti' ma̱ lcaa cha', nu lo'o culu'u Xtyi'i ycui' Ndyosi cha' bi' ji'i̱ ma̱ ―nacui̱ Jesús―. Na cua ta ti ycui' Ndyosi Sti na' ji'i̱ Xtyi'i ycui' Ni cha' ca̱a̱ Ni chalyuu cha' xtyucua Ni ji'i̱ ma̱ lcaa hora chacuayá' jna'. Lo'o jua'a̱ cua'ni nu bi' cha' tyi'u ti' ma̱ lcaa cha' nu cua nchcui' na' lo'o ma̱.
27’Ndi'ya̱ cua'ni na' lo'o ma̱ cha' cua tya'a ti na': cua'ni na' cha' ti̱ ti tyi'i̱ tyiquee ma̱. Ná nchca ji'i̱ ñati̱ chalyuu tyi'i̱ ti̱ ti ngu', pana ycui' na' cua'ni na' cha' ti̱ ti tyi'i̱ ma̱ ―nacui̱ Jesús―. Nga'aa culacua tsa ti' ma̱, nga'aa cutsi̱i̱ ma̱ ―nacui̱―. 28Cua ndyuna ma̱ lo'o nchcui' na' ndi'ya̱: “Tya'a na', pana ca tiya' la li' ca̱a̱ na' su ndi'i̱ ma̱ chaca quiya'”. Bi' cha' taca ca chaa ti' ma̱ lo'o cuna ma̱ cha' cua tya'a ti na' slo ycui' Ndyosi Sti na', si chañi cha' ntsu'u tyiquee ma̱ ña'a̱ ma̱ jna'. Cua tlyu la cha' nu ntsu'u ji'i̱ ycui' Ndyosi Sti na', sube la cha' jna' ―nacui̱ Jesús―. 29Jua'a̱ ni na' ji'i̱ ma̱ lo'o tya lyiji caca cha' bi'; pana lo'o cua ndya'a na', li' taca jlya ti' ma̱ cha' bi'.
30’Nga'aa quiña'a̱ tsa cha' chcui' na' lo'o ma̱ juani ―nacui̱ Jesús li'―. Cua lijya̱ nu xña'a̱ nu laca loo nde chalyuu, cua lijya̱ nu bi' ca su ndi'i̱ na re. Ná ntsu'u chacuayá' ji'i̱ nu bi' cha' caca loo jna'. 31Pana nga'a̱ cha' caca cuayá' ti' ngu' cha' ntsu'u tsa tyiquee na' ña'a̱ na' ji'i̱ ycui' Ndyosi Sti na', bi' cha' ndu'ni na' lcaa cña nu nclyo ycui' Ni 'na ―nacui̱ Jesús―. Pana juani tyatu̱ clya ma̱, ya'a clya ma̱ lo'o na'.
Currently Selected:
SAN JUAN 14: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.