LOS HECHOS 8

Tyaala tsa Saulo ji'i̱ ñati̱ ji'i̱ Jesucristo

1Tso'o tsa ngua ti' nu Saulo bi', cha' cua ndyujuii ngu' ji'i̱ Esteban. La cui' tsa̱ bi' nguxana yu, ti'í tsa nchcube' yu ji'i̱ ngu' nu ntsu'u cha' ji'i̱ lo'o Jesucristo ca quichi̱ Jerusalén. Lya' tsa ti' yu ji'i̱ ngu' bi'; bi' cha' ngusñi ngu' tyucui̱i̱, ndyaa ngu' xa' la quichi̱ nde loyuu su cuentya Judea, lo'o jua'a̱ loyuu su cuentya Samaria. Pana nu tii tyucuaa tya'a ngu' nu ngua tsa'a̱ ji'i̱ Jesucristo tya clyo ni, ndyanu ngu' bi' nde Jerusalén. 2Lo'o jua'a̱ ntsu'u ngu' nu xñi'i̱ tsa ti' xqui'ya cha' ngujuii Esteban. Tyu̱u̱ tya'a ngu' bi', ngu' nu tyucui tyiquee ngu' ndyu'ni tlyu ngu' ji'i̱ ycui' Ndyosi ni, ndyaa lo'o ngu' bi' ji'i̱ jyo'o Esteban ca su nguatsi'; jua'a̱ nxi'ya tsa ngu' nu ndyaa lo'o ji'i̱ bi'. 3Lo'o nu Saulo bi' ni, ngua ti' yu cha' lye tsa xcube' yu ji'i̱ lcaa ñati̱ ji'i̱ Jesucristo li'. Ndyatí̱ yu ca ni'i̱ ji'i̱ ngu', ntejeya' yu ji'i̱ ngu' qui'yu bi', ntejeya' yu ji'i̱ ngu' cuna'a̱ bi', cha' tyaa lo'o yu ji'i̱ ngu' ne' chcua̱.

Ndyalaa cha' ji'i̱ Jesús loyuu su cuentya Samaria

4Lo'o nu ngu' nu ndyaa xa' quichi̱ bi' ni, nda ngu' cha' ji'i̱ Cristo nu Xu'na na lo'o ngu' lcaa quichi̱ ca su ndyaa ngu'. 5La cui' jua'a̱ ndya'a̱ sca ñati̱ nu naa Felipe, ndyaa yu nde loyuu su cuentya Samaria; li' ndyalaa yu sca quichi̱ ca bi', nda yu cha' ji'i̱ Jesucristo lo'o ngu' quichi̱ bi'. 6Tso'o tsa ndyuna lcaa ngu' quichi̱ cha' bi', lo'o jua'a̱ na'a̱ ngu' cña tonu cuentya ji'i̱ ycui' Ndyosi nu ngua'ni Felipe slo ngu'. 7Ngua'ni yu cha' ndyaca tso'o tyu̱u̱ tya'a ngu' quicha, jua'a̱ ngua'ni yu cha' ndyaca tso'o ngu' nu ngusñi cui'i̱ cuxi ji'i̱. Cui̱i̱ nxi'ya ngu' nu ntsu'u cui'i̱ cuxi ji'i̱, cuati ndu'u nu cui'i̱ cuxi nu ntsu'u ji'i̱ ngu' bi' ndyaa. Lo'o jua'a̱ ngua tso'o ngu' nu quicha quiya', ngua tso'o ngu' nu nchcu̱' tyijya̱. 8Tso'o tsa ntsu'u tyiquee lcaa ngu' quichi̱ bi' li'.

9Quichi̱ bi' ndi'i̱ sca nu qui'yu nu naa Simón, ngu' cucha'a̱ laca bi'. Nchcui' nu Simón bi' cha' ngu' tlyu laca ycui' ca; lo'o jua'a̱ ngusñi ngu' quichi̱ cha' nu nchcui', jlya ti' ngu' cha' laca nu Simón bi' sca ñati̱ tlyu. 10Ndaquiya' ngu' culiya' ji'i̱; lo'o jua'a̱ ngu' ti'i, lo'o ngu' nu laca loo ji'i̱ quichi̱, lo'o nu sube, lcaa ngu' lo'o tya'a ngu' ndyuna tso'o ngu' lcaa cha' nu nchcui' nu Simón bi'.

―Cua nda ycui' Ndyosi chacuayá' ji'i̱ nu qui'yu re cha' cua'ni cua ña'a̱ ca cña tonu nu nti' yu cua'ni yu ―nacui̱ ngu' quichi̱ bi' li'.

11Cua tyu̱u̱ yija̱ ngua'ni cucha'a̱ nu Simón bi' ji'i̱ lcaa ñati̱ quicha, bi' cha' jlya ti' ngu' lcaa cha' nu nchcui' yu cucha'a̱ bi', nu lo'o bilya tyalaa Felipe quichi̱ bi'. 12Li' ndyalaa Felipe ca bi', nda yu cha' ji'i̱ Jesucristo lo'o lcaa ngu' quichi̱; ndacha' yu ji'i̱ ngu' ñi'ya̱ caca si laca ycui' Ni loo ne' cresiya ji'i̱ ngu'. Ndyuna ngu' cha' nu nchcui' Felipe li', ngusñi ngu' cha' bi'; bi' cha' ntyucuatya yu ji'i̱ lcaa ñati̱ nu ngusñi cha' bi', masi ngu' qui'yu, masi ngu' cuna'a̱. 13Lo'o ycui' Simón ni, ngusñi cha' bi' li', jua'a̱ ntyucuatya Felipe ji'i̱. Li' lcaa tsa̱ ndya'a̱ lca'a̱ ji'i̱ Felipe, cha' ndube tsa ti' Simón lo'o na'a̱ lcaa cña tonu nu ngua'ni nu Felipe bi'.

14Li' ndyuna ngu' nu ngua tsa'a̱ ji'i̱ Jesucristo nu ndyanu ca Jerusalén cha' lo'o ngu' Samaria bi', cua ngusñi ngu' cha' ji'i̱ ycui' Ndyosi. Cuati ngulo ngu' bi' cña ji'i̱ Pedro lo'o Juan cha' tsaa ngu' ca loyuu su cuentya Samaria bi'. 15Ndyalaa ngu' ca bi', li' nchcui' ngu' lo'o ycui' Ndyosi cuentya ji'i̱ lcaa ngu' quichi̱ nu cua ngusñi cha' ji'i̱ Jesucristo ca bi', ngüijña ngu' ji'i̱ ycui' Ndyosi cha' ta Ni Xtyi'i ycui' Ni, cha' tyanu Ni ne' cresiya ji'i̱ ngu' bi'. 16Bilya tyanu Xtyi'i ycui' Ndyosi ne' cresiya ji'i̱ ngu' bi', masi cua ntyucuatya Felipe ji'i̱ ngu' nu lo'o ngua ti' ngu' caca ngu' ñati̱ ji'i̱ Jesucristo. 17Ngusta ya' Pedro lo'o Juan hique ngu', li' ndyanu Xtyi'i ycui' Ndyosi ne' cresiya ji'i̱ ngu' bi'.

18-19Na'a̱ Simón cha' nu lo'o ngusta ya' ngu' nu ngua tsa'a̱ ji'i̱ Jesucristo hique ngu', ndyanu Xtyi'i ycui' Ndyosi ne' cresiya ji'i̱ ngu' li'. Nchcui' Simón lo'o ngu' bi' li':

―Ta na' cñi ji'i̱ ma̱ si xtyucua ma̱ jna' cha' jua'a̱ cua'ni na' xi cña jua ―nacui̱ Simón―. Lo'o na' nta̱' cha' sta ya' na' hique ñati̱ cha' tyanu Xtyi'i ycui' Ndyosi ne' cresiya ji'i̱ ngu' ―nacui̱.

20―Stu'ba ti cua'ni tye ycui' Ndyosi jinu'u̱ lo'o lcaa cñi jinu'u̱ ―nacui̱ Pedro ji'i̱ Simón li'―. Nu cha' tso'o nu ntsu'u ji'i̱ ycui' Ndyosi, ná taca ca caya' bi' ―nacui̱―. 21Ná ntsu'u cha' jinu'u̱ lo'o ycui' Ndyosi tsiya' ti, bi' cha' ná ta Ni chacuayá' jinu'u̱ cha' cua'ni nu'u̱ cña lo'o ya. 22Culochu̱' nu'u̱ ji'i̱ cha' cuxi nu ntsu'u ne' cresiya jinu'u̱, cha' caca chcui' nu'u̱ lo'o ycui' Ndyosi cha' cui'ya Ni cha' clyu ti' jinu'u̱ ji'i̱ lcaa cha' cuxi nu ngua'ni nu'u̱. 23Jlo ti' na' lcaa ña'a̱ cha' cuxi nu ntsu'u ne' cresiya jinu'u̱, cha' tyaala tsa nu'u̱; ya' nu xña'a̱ cua ntsu'u nu'u̱, bi' cha' ndacha' na' jinu'u̱ juani cha' culochu̱' nu'u̱ ji'i̱ cha' cuxi nu ntsu'u jinu'u̱.

24Nguxacui̱ Simón cha' ji'i̱ ngu' li':

―Cua'ni ma̱ cha' tso'o chcui' ma̱ lo'o ycui' nu Xu'na na cuentya jna' ―nacui̱ Simón ji'i̱ ngu'―, cha' cui'ya Ni cha' clyu ti' 'na ―nacui̱―, cha' nga'aa cua'ni ycui' Ndyosi ñi'ya̱ nu nacui̱ ma̱ jna'.

25Quiña'a̱ la cha' ji'i̱ ycui' Ndyosi ngulu'u Pedro lo'o Juan ji'i̱ ngu' li', nchcui' ngu' ñi'ya̱ ngua lcaa cha' ji'i̱ Jesús. Lo'o li' ndu'u ngu' ya̱a̱ ngu' nde Jerusalén. Cla'be tyucui̱i̱ nteje tacui ngu' tyu̱u̱ quichi̱ loyuu su cuentya Samaria, ngulu'u ngu' ji'i̱ ngu' lcaa quichi̱ bi' ñi'ya̱ nu ndu'ni lyaá Jesús ji'i̱ ñati̱ chalyuu.

Ndyacua tya'a Felipe lo'o sca ngu' Etiopía

26Lo'o li' nchcui' sca xca̱ ji'i̱ ycui' Ndyosi lo'o Felipe:

―Nslo nu'u̱ tyucui̱i̱ nu ndu'u Jerusalén ndyaa nde quichi̱ Gaza. Tsaa nu'u̱ xi tyucui̱i̱ bi' ―nacui̱ xca̱ bi' ji'i̱ Felipe.

Nscua tyucui̱i̱ bi' nde sca nati̱' btyi su ná ntsu'u hitya. 27Li' ndu'u Felipe ndyaa tyucui̱i̱ bi', lo'o li' na'a̱ ji'i̱ sca nu qui'yu ngu' Etiopía. Sca ñati̱ tlyu laca nu cusu' bi', cha' laca yu loo ji'i̱ lcaa cñi nu ntsu'u ji'i̱ reina nu laca loo ji'i̱ loyuu Etiopía bi'; nu cuna'a̱ reina bi' ngua naa Candace. Cua ndyaa nu qui'yu bi' Jerusalén cha' cua'ni tlyu yu ji'i̱ ycui' Ndyosi. 28Li' nguxtyu̱u̱ tyucui̱i̱ ñaa yu cha' tyaa quichi̱ tyi yu. Ntucua yu ne' carreta nu ntojolaqui cuayu ji'i̱, nchcui' yu lo quityi nu nguscua jyo'o Isaías cuentya ji'i̱ ycui' Ndyosi. 29Nchcui' ycui' Ndyosi lo'o Felipe li'; Xtyi'i ycui' Ni nu ndyanu ne' cresiya ji'i̱ Felipe nchcui' ndi'ya̱:

―Yaa nu'u̱ cha' jyacua ji'i̱ carreta jua ―nacui̱ Ni ji'i̱ Felipe.

30Ngusna tsa Felipe ndyaa lca'a̱ ji'i̱ carreta li'. Sii' ti carreta ndya'a̱ xi, lo'o jua'a̱ ndyuna cha' nu nchcui' nu cusu' bi' lo quityi laja lo'o ntucua ne' carreta; la cui' quityi nu nguscua jyo'o Isaías ngua bi'. Li' nguxana nchcui' Felipe lo'o nu cusu' bi':

―¿Tsaa xi la? ―nacui̱ Felipe ji'i̱.

―Tsa'a̱ xi.

―¿Ha nchca cuayá' ti' nu'u̱ cha' nu nchcui' nu'u̱ lo quityi cua? ―nacui̱ Felipe ji'i̱.

31―Ná nchca jna' cha' ná ntsu'u nu culu'u 'na ―nacui̱ nu cusu' bi' li'―. Tyacuí̱ nu'u̱ ne' carreta re cha' tyaa na stu'ba ti.

Li' ndyaa tucua Felipe ne' carreta lo'o nu cusu' bi'. 32Stu'ba ti nchcui' tyucuaa ngu' lo quityi ji'i̱ ycui' Ndyosi nu ntsu'u ya' nu cusu' bi'; la cui' laca' quityi su na'a̱ cui'ya nu cusu' bi', la cui' se'i̱ bi' nchcui' tyucuaa ngu' li'. Ndi'ya̱ nchcui' quityi bi':

Tsaa lo'o ngu' ji'i̱ yu cha' cujuii ngu' ji'i̱, ñi'ya̱ si laca yu sca xlya'.

Lo'o jua'a̱, ñi'ya̱ ndu'ni xlya' nu ná nxi'ya lo'o nsi'yu ngu' quicha̱' hichu̱' ni',

jua'a̱ cua'ni yu nu cala nde loo la;

masi cujuii ngu' ji'i̱ yu, ná sca cha' xacui̱ yu ji'i̱ ngu' bi' li'.

33Lye tsa xcube' ngu' ji'i̱ yu bi', cha' ná liñi cua'ni cuayá' ngu' nu laca loo ji'i̱ yu.

La cui' jua'a̱, ná caca chcui' na cha' tya caja sñi' yu,

xqui'ya cha' cua cujuii ti ngu' ji'i̱ yu bi'; nga'aa tyiquee' tyi'i̱ yu nde chalyuu li'.

Jua'a̱ nscua cha' lo quityi bi'.

34Li' nchcuane nu cusu' Etiopía bi' ji'i̱ Felipe:

―Cua'ni nu'u̱ cha' tso'o culu'u xi jna' lo quityi re ―nacui̱ yu ji'i̱―. ¿Ti ji'i̱ cujuii ngu' nacui̱ quityi re? ―nacui̱ yu―. ¿Ha nguscua ca jyo'o cusu' Isaías cha' ji'i̱ ycui' ca ti? ¿Ha si'i cha' ji'i̱ chaca nu qui'yu nguscua jyo'o cusu' bi'?

35Nguxacui̱ Felipe cha' ji'i̱ nu cusu' bi' li'; ngulu'u Felipe ñi'ya̱ nu ndyu'u cha' nu nscua lo quityi bi' ji'i̱, lcaa cha' ji'i̱ Jesucristo ngulu'u ji'i̱ nu cusu' bi' li'. 36Nu lo'o ndyaa ngu' tyucui̱i̱ bi', li' ndyalaa ngu' ca su ntsu'u hitya. Li' nchcui' nu cusu' bi' lo'o Felipe:

―Nde nscua hitya ―nacui̱ yu―. ¿Ha ná cua'ni cha' tso'o ta chacuayá' tyucuatya nu'u̱ jna'?

37―Tso'o ―nacui̱ Felipe ji'i̱―. Tso'o si chañi cha' tyucui tyiquee nu'u̱ ngusñi nu'u̱ cha' ji'i̱ Jesucristo.

―Cua ngusñi na' cha' bi' tu'ni ―nacui̱ nu cusu' bi'―. Jlya ti' na' cha' sca ti Jesucristo laca Sñi' ycui' Ndyosi.

38Li' nchcui' nu cusu' bi' lo'o msu ji'i̱ cha' tsatu̱ carreta ji'i̱ cha' ca'ya nu cusu' bi' loyuu lo'o Felipe. Ndyaa ngu' lo hitya, ntyucuatya Felipe ji'i̱ nu cusu' bi' li'. 39Ndye ntyucuatya ji'i̱, li' ndu'u ngu' lo hitya bi'. Hora ti ndyaa Felipe, ndyaa lo'o Xtyi'i ycui' Ndyosi ji'i̱ cha' tsaa chaca se'i̱; nga'aa na'a̱ nu cusu' bi' ji'i̱ Felipe li'. Ndyaa nu cusu', nu ngu' Etiopía bi' ni, ndyaa yu ca loyuu quichi̱ tyi yu li'; jua'a̱ tso'o tsa ntsu'u tyiquee nu cusu' bi' li'. 40Nu lo'o ngua tii nu Felipe bi', cua ndyalaa quichi̱ Azoto. Ndyaa nde su ndi'i̱ tyu̱u̱ tya'a quichi̱ cha' culu'u cha' ji'i̱ Jesucristo ji'i̱ ñati̱ bi'. Ca tiya' la, li' ndyalaa Felipe nde quichi̱ Cesarea.

Currently Selected:

LOS HECHOS 8: cta

Highlight

Copy