San Marcos 5

Tu benne' xe̱zre Gadara, benne' xu'e̱ be' xriwe̱'

(Mt. 8.28-34; Lc. 8.26-39)

1Bezrín Jesús, tu zren nen benne' ca' dxusé̱dene̱' xecha la'a nísadau' lu xe̱zr la xu chee̱ benne' Gadara ca'. 2Ca bedxúaj Jesús lu da dxedá lawe' nísadau', na' bzrin tu benne' xu'e̱ be' xriwe̱' naga zua Jesús. Bedxúaje̱' lu bluaj naga zaj nagache benne' gate ca'. 3Benne' biu nigá zúaqueze̱' lu bluaj na'. Quebe nu dxezúe guchéaj le̱be' chalásaze, lácala nu guchéaj le̱be' nen du xia. 4Zane' lasa buluchéaje̱' le̱be' nen du xia na'abe', ne ní'abe'. Bzúzrujbe' du xia ca', na' quegá nu guzeque nna bé'ene̱' le̱be'. 5Dxedáquezebe' te zra chizrela lu xi'a ca', ne lu bluaj ca' naga zaj nagache benne' gate. Dxebezre xa'abe', ne dxeajcházebe' lu xiaj ca', dxun we̱' cuínabe'. 6Gate ble'ebe' zítu'la ba za Jesús, na' guzá chégube', xeajzú zríbebe' lau Le̱'. 7Gunné̱ zizraj be' xriwe̱' xu'ube', dxe̱ na Jesús:

―¿Bizra dxaca chiu' nen neda', Jesús, Zri'ine Dios szrente̱? Lu La Xránadxu Dios, dxata' xueda' Lue', quebe gudéu' neda' xel-la zi'.

8Caní gunná na lawe' da gunná Jesús, dxe̱'e̱ na:

―Lue', da xriwe̱', bedxúaj lu be̱l-la' dxen chee̱ benne' nigá.

9Nadxa gunaba Jesús, dxe̱'e̱ na:

―¿Bi leu'?

Na' beche̱be na:

―Da Zan lea', lawe' da naxantu'.

10Guta' xue na Jesús chee̱ quebe xesel-le̱' na, ne quebe gucuase̱' na zitu' lu xe̱zr la xu na'. 11Zaj zra' gagu lu xi'a na' tu cue' cuche zaj zraba' dxeláguba'. 12Gulata' xue be' xriwe̱' ca' Jesús, gulenná na:

―Besel-la netu' lu cuche ca'. Be̱nna lataj chú'untu' le̱ba'.

13Nadxa Jesús be̱'e̱ na lataj. Na' be' xriwe̱' ca' beledxúaj na lu bénnea', na' gulú'u na cuche ca'. Zaj nácaba' ca galaj gaxúa cuche ca', na' buludxixre cuínaba' tu chejéa. Xeajlecháste̱ba' lu nísadau', ne gulátete̱ba' lu nisa na'.

14Benne' ca' dxuluxúe̱' cuche ca' buluxuzrúnnuje̱', na' xeajlezenne̱' benne' zaj zre̱'e̱ lu xe̱zre, ne benne' zaj zre̱'e̱ le̱'e̱ xixre'. Na' belezrín benne' ca' naga zua Jesús, benne' ca' belenne̱' ca da ba guca. 15Gate belezrín benne' ca' naga zua Jesús, na' belelé'ene̱' bénnea' guxú'ube' be' xriwe̱' ca', dxe'ebe' ga zua Jesús, nácube' tu ladze', ne ba bezúa xrlátaje lu xichaj lázrdaube', na' gulezrebe̱'. 16Benne' ca' belelé'e ca naca da guca chee̱ benne' guxú'ube' be' xriwe̱' ca', ne ca guca chee̱ cuche ca' buluchálaje̱' chee̱ da ba guca. 17Nadxa benne' xe̱zre ca' gulata' xuene̱' Jesús xedxúaje̱' lu xe̱zr la xu chee̱'.

18Ca bexú'u Jesús lu da dxedá lawe' nísadau', na' bénnea' guxú'ube' be' xriwe̱' ca' guta' xuebe' Jesús gu'e̱ lataj chéajle̱be' Le̱'. 19Quebe be̱' Jesús le̱be' lataj, san dxe̱'e̱ le̱be', gunné̱':

―Bexiaj lizru', ne xeajchálajle̱ xrtiu' ca' ca naca da zren ca' da be̱n Xranu' nen lue', ne ca bexache lazre̱' lue'.

20Nadxa bezá'abe' zexíajbe', ne guzú laube' dxuchálajbe' lu xe̱zre ca' zaj nababa Decápolis ca naca da zren da be̱n Jesús nen le̱be'. Belexebánele̱'e̱ xúgute̱ benne' zaj zre̱'e̱ xe̱zre ca'.

Bi nu'ula chee̱ Jairo, ne nu'ula na' xeajté̱' zra lana Jesús

(Mt. 9.18-26; Lc. 8.40-56)

21Begüén Jesús lu da dxedá lawe' nísadau', na' bezrine̱' xecha la'a nísadau'. Belezrín benne' zan naga ze̱', na' Le̱' begá'ane̱' dxu'a nísadau'. 22Ca'an guca bzrin tu benne' xíchaje̱ chee̱ xu'u naga dxelúe lá'ana judío ca' Dios, benne' le̱' Jairo. Gate blé'ene̱' Jesús, na' bzu zribe̱' zran ni'e̱. 23Guta' xuene̱' Jesús, dxe̱'e̱ Le̱':

―¡Bi nu'ula chia' ba dxátebe'! ¡Gudá, bze̱ na'u le̱be' chee̱ xexácabe', ne xaca banbe'!

24Nadxa guxíajle̱ Jesús bénnea', na' bénneache zan xjácale̱ne̱' Le̱', ne dxuluchítee̱' Le̱'. 25Ládujla bénneache ca' za tu nu'ula quebe chawe' zue̱', ba zeaj chazrinnu iza nape̱' we̱' dxen. 26Da zren da bulusaca benne' dxelexún bénneache ca' nu'ula nigá, na' bache be̱n dítaje̱' xúgute̱ da nape̱'. Quegá bi gúcale̱ na le̱', san bzáladxa we̱' chee̱'. 27Gate ben nú'ula' dxuluchalaj bénneache ca naca chee̱ Jesús, na' bzrine̱' cúzrula Jesús ládujla bénneache, na' xeajté̱' zra lana Jesús. 28Caní be̱ne̱' lawe' da gunné̱' lu xichaj lázrdawe̱': Cun cheajtaza' zra lana Jesús, na' xexácatea'. 29La gulézate̱ xel-la we̱' chie̱', ne la guque bé'ete̱ne̱' ba bexaca be̱l-la' dxen chee̱' chee̱ xízrawe̱' na'. 30Gúquebe'e Jesús be̱n zrin xel-la waca chee̱'. Chee̱ le̱ na' bexéchaje̱', dxenné̱'e̱ bénneache ca', na' gunábene̱' le̱':

―¿Nuzra bedajtá zra lana'?

31Nadxa benne' ca' dxuse̱de Jesús gulé̱'e̱ Le̱':

―Dxelé'equeznu' bénneache zan dxuluchíe̱' Lue'. ¿Bizr chee̱ na' dxenabu': “Nuzra bedajtá neda'?”

32Jesús guzúe̱' dxenné̱'e̱ cuite̱' chee̱ lé'ene̱' nua' bedajtá Le̱'.

33Nadxa guxíaj nu'ula nigá, dxezrízie̱' dxezrebe̱' lawe' da nézene̱' ca da ba guca chee̱', na' bzu zribe̱' lau Jesús, na' gunné̱' ca naca da li. 34Nadxa gunná Jesús, dxe̱'e̱ nu'ula':

―Bi nú'uladau', ba bexacu' lawe' da guxeajlí lazru' neda'. Bexíaj, cútudxa zrebu'. Ba bexácate̱quezu' chee̱ xízrawe̱' da guzxacu'.

35Ne dxuchálajte̱ Jesús gate belezrín benne' gusá'aca lizre benne' xíchaje̱ chee̱ xu'u naga dxelúe lá'ana judío ca' Dios, na' gulé̱'e̱ xra nú'uladau' na':

―Bi nú'uladau' chiu' ba gútebe'. ¿Bizr chee̱ na' dxunu' zé̱dedxa benne' dxuse̱de nigá?

36Gate Jesús benne̱' ca da gulenná benne' caní, dxe̱'e̱ benne' xíchaje̱ chee̱ xu'u na', gunné̱':

―Quebe zrebu'. Guxeajlí lazre' neda'.

37Quebe be̱'e̱ lataj chjácale̱ bénneache zan ca' Le̱'. Tuze be̱'e̱ lataj gusá'acale̱ Pedro, ne Jacobo, ne Juan, biche Jacobo nigá, nen Le̱'. 38Ca belezrine̱' lizre benne' xíchaje̱ na', na' ble'e Jesús bénneache dxelún schaga. Dxelebezre benne', ne dxelebezre xa'ate̱'. 39Nadxa guxú'u Jesús lu xu'u, na' dxe̱'e̱ benne' ca', gunné̱':

―¿Bizr chee̱ na' dxunle schaga? ¿Bizr chee̱ na' dxebézrele? Quegá nate bidau' nu'ula. Dxásezebe'.

40Belún lala benne' ca' chee̱'. Nadxa Jesús bebéaje̱' xúgute̱ benne' ca', na' guché̱'e̱ xrabe', ne xrna bidau' nigá, ne benne' ca' zjácale̱ne̱' Le̱', na' guxú'e̱ naga de̱ nú'uladu na'. 41Bé̱xrue̱' na'be', ne guzre̱' le̱be':

―Bi nú'uladau', lue' dxapa': ¡Guxasa!

42La bexásate̱ nú'uladu na', na' guzáte̱be' lawe' da ba zéajbe' chazrinnu iza. Na' benne' ca' zaj zre̱'e̱ lu xu'u na' belezrébele̱'e̱. 43Jesús gunná bé'ene̱' benne' ca' chee̱ quebe nu xelé̱'e̱ ca da be̱ne̱'. Nadxa guzré̱' benne' ca' xulugawe̱' nú'uladu na'.

Currently Selected:

San Marcos 5: zat

Highlight

Copy