San Mateo 4

Dxaca lazre' da xriwe̱' gun na baga Jesús zria

(Mr. 1.12-13; Lc. 4.1-13)

1Nadxa Be' Lá'azxa chee̱ Dios la guché̱'te̱' Jesús le̱'e̱ xixre' lawe' lataj naga gúe lazre' da xriwe̱' gun zréaje na Le̱'. 2Quebe bi gudagu Jesús chua zra chua xe̱la, na' ca gudé na' gudune̱'. 3Nadxa da xriwe̱' bzrin na naga zua Jesús chee̱ gun zréaje na Le̱', na' dxe̱ na Le̱':

―Che Lue' nacu' Zri'ine Dios, gunná be'e xiaj caní xelexaca na xeta xtila.

4Jesús beche̱be̱':

―Lu xiche chee̱ Dios dxenné̱': “Quebe gaca ban nu benne' gawe̱' xétaze, san nen xúgute̱ dizra' chee̱ Dios gaca bane̱'.”

5Nadxa da xriwe̱' guché̱ na Jesús lu xe̱zre lá'azxa Jerusalén, na' bzua na Le̱' xíchajte̱ xudau', 6na' guzre na Le̱':

―Che Lue' nacu' Zri'ine Dios, guxrite' nigá, lawe' da dxenná lu xiche chee̱ Dios:

Dios nna bé'ene̱' gubáz chee̱ xabáa chee̱' ca'

chee̱ xelácale̱ne̱' Lue'.

Welexechise̱' Lue' nen ne̱'e̱

chee̱ quebe gunu' zi' ni'u lu xiaj ca'.

7Na' gunná Jesús:

―Cá'anqueze dxenná lu xiche chee̱ Dios, dxe̱'e̱ bénneache: “Quebe guchínenu' Xranu' Dios cáte̱ze dxaca lazru'.”

8Nadxa da xriwe̱' guché̱ na Le̱' tu lu xi'a sibe, na' ble'e na Le̱' ca naca xúgute̱ cue' xe̱zr la xu zaj nnita lu xe̱zr la xu, ne ca naca xel-la' guni'a chee̱ na. 9Na' gunná da xriwe̱', dxe̱ na Le̱':

―Xúgute̱ da caní gunna' chiu' che guzú zribu' gucá'ana szrenu' neda'.

10Nadxa Jesús guzre̱' na:

―Bexíaj, da xriwe̱', lawe' da dxenná Dios lu xiche chee̱', dxe̱'e̱ bénneache: “Bca'ana szren Xranu' Dios, ne be lá'ana tuze Le̱'.”

11Nadxa da xriwe̱' becuasa na lau Jesús, na' belezrín gubáz chee̱ xabáa chee̱ Dios, ne bulunézruje̱' da dxechine Jesús.

Dxuzú lau Jesús dxuchálaje̱' xrtizra' Dios naga nababa Galilea

(Mr. 1.14-15; Lc. 4.14-15)

12Gate ben Jesús xu'u Juan lizre xia, na' bezé̱'e̱ zexíaje̱' naga nababa Galilea. 13Quebe bga'ana Jesús xe̱zre Nazaret. Xeajsúe̱' lu xe̱zre Capernaum da zua na dxu'a nísadau' naga zaj zra' xrtia Zabulón, ne xrtia Neftalí. 14Caní guca ca da bzuaj Isaías, benne' bchálaje̱' waláz chee̱ Dios, gunné̱':

15Lu xe̱zr la xu chee̱ Zabulón, ne chee̱ Neftalí,

naga zrua neza da zeaj na dxu'a nísadau',

chalá'a naga dxalaj gubizra xechalá'a xe̱gu Jordán.

Naga nababa Galilea,

naga zaj zra' benne' quebe zaj naque̱' judío.

16Bénneache zaj zra' lu da chul-la belelé'ene̱' tu da dxusaníle̱'e̱ na,

na' benne' zaj zra' naga xu'u zrul-la chee̱ xel-la' gute

ba bsaní' tu xi' naga zaj zre̱'e̱.

17Ca lu zra na' guzú lau Jesús dxegu'e̱ lban, dxenné̱':

―Le xebí'i lázrele, lawe' da ba zua gáguze zra nna bea Dios lu xe̱zr la xu nigá.

Jesús dxuláwizre̱' tapa benne' wezén bela

(Mr. 1.16-20; Lc. 5.1-11)

18Gate na' zeaj Jesús dxu'a nísadau' ga nababa Galilea, na' blé'ene̱' chupa benne'. Tue̱' le̱' Simón, ne zua xetú le̱' Pedro, na' xetúe̱' le̱' Andrés, biche Simón na'. Benne' caní zaj naque̱' benne' wezén bela, na' dxuluzale̱' xixruj bela chee̱' lu nisa. 19Nadxa Jesús dxe̱'e̱ benne' caní:

―Le gun neda' tuze, na' guna' le'e benne' gutúpale chia' bénneache ca dxunle dxezenle bela.

20La bulucá'anate̱' xixruj chee̱' ca', na' zjácale̱ne̱' Jesús.

21Xelátedauze gusá'aque̱', na' ble'e Jesús xechupa benne'. Tue̱' le̱' Jacobo, ne xetúe̱' le̱' Juan, biche Jacobo nigá. Zaj naque̱' zri'ine Zebedeo, ne zaj xu'e̱ tu lu da dxedá lawe' nísadau' nen xre̱', dxelexún chawe̱' xixruj chee̱'. Jesús bláwizre̱' le̱', 22na' la bulucá'anate̱' da dxedá lawe' nísadau' na', ne xre̱', na' zjácale̱ne̱' Jesús.

Jesús dxusé̱dene̱' bénneache naga nababa Galilea

(Lc. 6.17-19)

23Zeaj Jesús xúgute̱ xe̱zre zaj nababa Galilea, na' tu tu xe̱zre ca' dxuzéajni'ine̱' bénneache lu xu'u ca' naga dxulucá'ana szren benne' judío ca' Dios. Na' dxegu'e̱ lban ca nna bea Dios, ne dxexune̱' xúgute̱ benne' ca' ca zaj naca xízrawe̱' cha chee̱'. 24Ca'an guca, xúgute̱ benne' chee̱ xe̱zr la xu Siria belenne̱' ca da dxun Jesús, na' belezrine̱' lau Jesús, zaj naché̱'e̱ benne' we̱' ca', benne' zaj xu'e̱ xízrawe̱', ne benne' zaj zue̱' lu xel-la' dxudía, ne benne' zaj xu'e̱ be' xriwe̱', ne benne' zaj xu'e̱ chuna', ne benne' zaj naxrú'unie̱' bine, na' bexún Jesús xúgute̱ benne' caní. 25Zjácale̱ benne' zan Le̱', benne' zaj nababe̱' xe̱zre ca' zaj nababa Galilea, ne benne' zá'aque̱' xe̱zre Decápolis ca', ne benne' Jerusalén, ne benne' zaj nababe̱' xe̱zre ca' zaj nababa Judea, ne benne' zá'aque̱' xechalá'ala xe̱gu Jordán naga dxalaj gubizra.

Currently Selected:

San Mateo 4: zat

Highlight

Copy