San Lucas 19

Jesús dxuchálajle̱ne̱' Zaqueo

1Nadxa Jesús guxú'e̱ xe̱zre Jericó, ne dxedée̱' xe̱zre na'. 2Lu xe̱zre na' zua tu benne' gunní'a le̱' Zaqueo. Naque̱' xíchaje̱ chee̱ benne' wechizruj ca'. 3Benne' nigá dxaca lazre̱' gúnbe'e̱ Jesús, san quebe guca lé'ene̱' Le̱' lawe' da zaj zra' benne' zante̱ na', na' Zaqueo na' quebe naque̱' benne' tunna. 4Nadxa guxíaj chégüe̱' guzría lawe̱', ne chee̱ gaca lé'ene̱' guluéne̱' tu lu xaga zren da zua gagu naga dxal-la' te Jesús. 5Gate gudé Jesús na', gunné̱'e̱ lu xaga na', ne guzre̱' le̱':

―Zaqueo, bexétajche, lawe' da na'a dxun na ba xen xegá'ana' lizru'.

6Nadxa Zaqueo na' bexétaje̱' chadí, na' nen dute̱ xel-la dxebé guzí' lu ne̱'e̱ Jesús. 7Gate belelé'e benne' ca' da nigá, xúgute̱' gulezú lawe̱' dxelezí tizre̱' Jesús, dxelenné̱':

―Jesús bzrine̱' begá'ane̱' lizre tu benne' dul-la.

8Nadxa Zaqueo na' guzé̱', na' guzre̱' Xránadxu:

―Gunná'xque, Xran, gunézruja' benne' xache' ca' gáchajte̱ ca da de̱ chia', na' che nu benne' bsaca zia' le̱', xunézruja' tapa cue'la chee̱'.

9Na' Jesús guzre̱' le̱':

―Na'a bla' xel-la weselá lu xu'u nigá, lawe' da nácaqueze benne' nigá xrtia Abraham. 10Ca' naca na lawe' da bla' neda', Benne' Gulje̱' Bénneache, chee̱ xexílaja', ne guselá' benne' ca' zaj nanítie̱'.

Da dxulé'e na ca naca chee̱ chi dumí zaca

11Dxácate̱ na' dxuluzé̱ naga benne' ca' dxenná Jesús da caní, na' bchálaje̱' tu da dxulé'e na lawe' da ba zue̱' gáguze xe̱zre Jerusalén, na' benne' ca' dxeléquene̱' zra ná'queze nna bea Dios lu xe̱zr la xu nigá. 12Nadxa guzre̱' benne' ca':

―Guzúa tu benne' gunní'a xrlátaje, na' dxal-la' chéaje̱' zitu' chee̱ xuluzúe̱' le̱' gaque̱' wenná bea, na' te na' xezrine̱' lazrie̱'. 13Gate za se̱'e̱, gunné̱' chi benne' we̱n zrin chee̱', na' bnézruje̱' tu tu benne' ca' tuwéaj dumí zácale̱'e̱, ne guzre̱' benne' ca': “Le guchine dumí nigá cadxa xelá'a.” 14Benne' zaj zre̱'e̱ lázrie̱' dxelecuídene̱' le̱', na' gulesel-le̱' bal-la benne' gubáz chee̱' naga zéaje̱' chee̱ cheajlegue̱zre̱' benne' zaj zre̱'e̱ na': “Quebe dxaca lázrentu' gaca benne' nigá wenná bea chee̱ntu'.” 15Buluzúe̱' le̱' gaque̱' wenná bea, na' bezrine̱' lázrie̱'. Gate bezrine̱' gunné̱' benne' we̱n zrin ca' bnézruje̱' dumí, chee̱ nézene̱' ájate̱ bezí' tu tu benne' ca'. 16Benne' nedxu bzrine̱' lawe̱', na' gunné̱': “Xran, dumí chiu' ba bezí na chi cue'la.” 17Wenná bea na' beche̱be̱': “Chawe' be̱nu'. Nacu' we̱n zrin xrlátaje. Lawe' da gucu' li lazre' lu late' da be̱nna' lue', na'a guna' lue' benne' nna be'ene̱' chi xe̱zre ca'.” 18Na' bzrin xetúe̱' lawe̱', na' gunné̱': “Xran, dumí chiu' ba bezí na gazxu' cue'la.” 19Cá'anqueze guzre̱' benne' nigá: “Lue' gacu' benne' nna be'ene̱' gazxu' xe̱zre ca'.” 20Nadxa xetúe̱' bzrine̱', na' gunné̱': “Xran, nigá de̱ dumí chiu'. Bcache chawa'a na tu lu bazxu, 21lawe' da bzreba' lue'. Nacu' tu benne' dxuzúa xuzre. Dxexeca'u da quebe guxru', ne dxexelapu' naga quebe guzu'.” 22Nadxa wenná bea na' guzre̱' le̱': “We̱n zrin cale̱la. Ca dizra' da gunnéu' chuga' ca gaca chiu'. Che nézquezenu' naca' benne' dxuzúa xuzre, ne xecá'a da quebe guxrúa', ne dxelapa' naga quebe guza', 23¿bizr chee̱ na' quebe xju'u dumí chia' lu na' benne' xuluchínene̱' na, chee̱ xezí' lu na'a neda' dumí chia' nen da gun xíchaje̱ na, gate xezrina' neda' lizra'?” 24Nadxa guzre̱' benne' ca' zaj zre̱'e̱ na': “Le xecá'a dumí na' lu ne̱'e̱, na' le gunezruj na benne' nape̱' chi dumí ca'.” 25Benne' ca' gulé̱'e̱ le̱': “Xran, ba nape̱' chi dumí.” 26Na' beche̱be̱' wenná bea na': “Dxapa' le'e, benne' nape̱' wazidxe̱' da zrendxa, na benne' quebe nape̱', wecá'a ca da du nape̱'. 27Na'a, ca naca chee̱ benne' ca' quebe gulaca lazre̱' gaca' neda' wenná bea chee̱', le cheajxri'e̱ nigá, ne le gutie̱' lawa' neda'.”

Jesús dxexu'e̱ Jerusalén

(Mt. 21.1-11; Mr. 11.1-11; Jn. 12.12-19)

28Ca gudé gunné̱' da nigá, na' bexú'u Jesús neza zexíaje̱' Jerusalén. 29Gate ba zua xezrine̱' xe̱zre Betfagé, ne xe̱zre Betania, ne zue̱' gáguze naga zua Xi'a Xaga Olivo, na' gusel-le̱' chupa benne' ca' dxusé̱dene̱'. 30Guzre̱' le̱':

―Le chjaca xé̱zredu na' zua gáguze, na' ca zrinle na' lé'ele tu burru da'ba' xaga, be̱ netú quebe nu ne cuía le̱ba'. Le se̱zre-ba', na' le che̱'-ba' nigá. 31Che nu naba le'e bizr chee̱ na' dxesé̱zrele-ba', le xe̱'e̱ Xránadxu nachínene̱'-ba'.

32Na' gusiá'ca benne' ca', na' belelé'ene̱' xúgute̱ naca na ca ba guzre Jesús le̱'. 33Na' gate dxelese̱zre̱' búrrua', na' xránaba' buluche̱be̱' le̱':

―¿Bizr chee̱ na' dxesé̱zrele búrrua'?

34Benne' chupa ca' belexeche̱be̱':

―Lawe' da nachine Xránadxu le̱ba'.

35Na' beleché̱'e̱-ba' lau Jesús, na' belexrúe̱' xicha chee̱' cúzruba', na' buluzríe̱' Jesús cúzruba'. 36Ca zeaj Jesús, xu'e̱ neza zrie̱' búrrudu na', na' dxelechiluj benne' ca' xicha chee̱' la neza naga tée̱'. 37Gate bzrine̱' gagu naga naca létajla chee̱ Xi'a Xaga Olivo, xúgute̱ benne' ca' zaj de̱'e̱ Le̱' gulezú lawe̱' dxelebezre xe̱'e̱ lu xel-la dxelebé, ne dxelúe lá'ane̱' Dios ca naca xúgute̱ xel-la waca chee̱ xabáa da belelé'ene̱'. 38Gulenné̱':

―La'azxa naca wenná bea, benne' za' waláz chee̱ Xránadxu Dios. Gaca xel-la dxebeza zri lazre' da za xabáa, ne gaca ba Dios.

39Nadxa bal-la benne' fariseo ca' zaj zra' ládujla benne' ca' gulé̱'e̱ Jesús:

―Benne' Wese̱de, gudil-la benne' caní zaj de̱'e̱ Lue'.

40Jesús beche̱be̱':

―Dxapa' le'e, che benne' caní xelezúa zrie̱', xiaj caní xelebezre xa'a na.

41Gate bzrine̱' gagu xe̱zre Jerusalén, ne ca blé'ene̱' na, na' gudxezre Jesús ca naca chee̱ na. 42Na' gunné̱':

―La chéajni'ile lu zra chee̱le nigá da gaca gunna chee̱le xel-la dxebeza zri lazre'. Na'a da na' nagache na, na' quebe gaca lé'ele na. 43Welezrín zra gaca chee̱le da zrinnaj, gate benne' dxelecuídene̱' le'e xeléchaje̱' ze'e dxu'a xe̱zre chee̱le, ne xuluzague̱' le'e gátete̱ze na', 44na' xuluchínnaje̱' xe̱zre chee̱le. Na' xelútie̱' ca naca benne' zaj zre̱'e̱ nigá, na' quebe xuluxucá'ane̱' tu xiaj cuzru ljwezre na. Caní gaca chee̱le lawe' da quebe gúquebe'ele zra bla' Dios chee̱ gácale̱ne̱' le'e.

Jesús dxucá'ana chawe̱' chale'aj xudau'

(Mt. 21.12-17; Mr. 11.15-19; Jn. 2.13-22)

45Nadxa guxú'u Jesús chale'aj xudau', na' guzú lawe̱' dxebéaje̱' na' benne' ca' dxelutie̱', ne dxelá'awe̱' na'. 46Na' guzre̱' benne' ca':

―Lu xiche chee̱ Dios dxenné̱': “Lizra' naca na xu'u naga guchálajle̱le neda',” na' le'e nunle na ca tu lizre gubán ca'.

47Tu zra tu zra Jesús dxusé̱dene̱' benne' ca' zaj zra' chale'aj xudau'. Benne' xíchaje̱ ca' chee̱ bxruze, ne benne' dxuluxuzájle̱'e̱ da nadxixruj bea na, ne benne' xu'u lawe' chee̱ xe̱zre na' dxelílaje̱' ájala xelune̱' xelútie̱' Le̱'. 48Quebe belezrélene̱' ájala xelune̱', lawe' da dxuluzé̱ naga xanne' xúgute̱ benne' ca' Jesús, chee̱ xelenne̱' ca da dxenné̱'.

Currently Selected:

San Lucas 19: zat

Highlight

Copy