San Juan 13

Jesús dxibe̱' ni'a benne' ca' dxusé̱dene̱'

1Naca na zra nedxu gate za chu'u Laní Pascua chee̱ judío ca'. Jesús ba nézene̱' ba bzrin zra xezé̱'e̱ lu xe̱zr la xu nigá chee̱ xexíaje̱' naga zua Xre̱'. Nazrí'iquezne̱' benne' zaj naca chee̱', benne' zaj zre̱'e̱ xe̱zr la xu, na' na'a ba zua gulé'ene̱' benne' ca' tu da zrendxa da gulé'e na nazrí'ine̱' le̱'.

2-4Da xriwe̱' ba nagú'u na xichaj lázxdau Judas Iscariote, zri'ine Simón, ca dxal-la' gune̱' chee̱ gudée̱' Jesús lu na' benne' guledábague̱' Le̱'. Nézqueze Jesús ze̱'e̱ naga zua Dios, ne dxal-la' xezrine̱' naga zua Dios, na' Xre̱' ba bnézruje̱' Le̱' dute̱ xel-la' dxenná bea. Chee̱ le̱ na', gate dxelawe̱' xrche', guxasa Jesús, na' gudúe̱' ladxe' naxrúa cuzre̱', ne bnase̱' tu ladxe' dxu'a le̱'e̱. 5Nadxa gudé̱'e̱ nisa tu zriga xia zren, ne guzú lawe̱' dxibe̱' ni'a benne' ca' dxusé̱dene̱', na' bsebizre̱' ni'e̱ nen ladxe' na' da nunase̱' dxu'a le̱'e̱.

6Ca bzrine̱' chee̱ quibe̱' ni'a Simón Pedro, le̱' guzre̱' Jesús:

―Xran, ¿Lue' quíbequezu' ni'a?

7Jesús beche̱be̱':

―Na'a quebe dxéajni'inu' da dxuna'. Te na'a chéajni'inu' na.

8Pedro guzre̱' Le̱':

―Cabata' quibu' ni'a.

Jesús guzre̱' le̱':

―Che quebe quiba' ni'u, quebe gaca gacu' neda' tuze.

9Na' Simón Pedro guzre̱' Jesús:

―Xran, quegá tuze ni'a quibu'. Cá'anqueze na'a, ne xíchaja'.

10Jesús guzre̱' le̱':

―Benne' ba bexuzrte̱ guzje̱', tuze ni'e̱ dxal-la' chadxe lawe' da ba naxádxequeze̱'. Le'e ba naxádxele, san quegá xúgute̱le.

11Gunná Jesús: “Quegá xúgute̱le”, lawe' da nézene̱' nu na' gudée̱' Le̱' lu na' benne' dxeledábague̱' Le̱'.

12Ca gudé gudibe Jesús ni'a benne' ca', na' bexrúe̱' ladxe' chee̱' cuzre', ne bebe'e̱ ga dxelawe̱', na' guzre̱' benne' ca':

―¿Dxéajni'ile le'e da ba be̱na'? 13Le'e dxe̱le neda': Benne' Wese̱de, ne: Xran, na' caní dxal-la' nnale lawe' da caní naca'. 14Che neda', Benne' Weséde chee̱le, ne Xránale, ba gudiba' ní'ale, cá'anqueze le'e dxal-la' quíbele ni'a ljwézrele tule xetule. 15Neda' ba ble'eda' le'e tu da dxulé'e na, chee̱ gunle le'e ca da be̱na' neda'. 16Da li dxapa' le'e, tu benne' we̱n zrin quebe nácadxe̱' szren ca xrane̱', na' tu benne' gubáz quebe nácadxe̱' szren ca benne' nasel-le̱' le̱'. 17Che dxéajni'ile da caní, ne dxunle ca zaj naca na, gaca chee̱le tu da ba neza.

18’Quebe dxuchálaja' chee̱ xúgute̱le le'e. Neda' núnbe'a benne' ca' gucá'a, san dxal-la' gaca ca naxúaj na lu xiche chee̱ Dios, dxenná na: Benne' dxágule̱ neda' ba gudábague̱' neda' chee̱ gudée̱' neda'. 19Dxapa' le'e da nigá na'a, nédxula gate quebe ne gaca na, chee̱ gate gaca na, na' chéajle̱le le'e zúaqueza' neda'. 20Da li dxapa' le'e: Benne' dxezí' lu ne̱'e̱ Bénnea' dxusel-le̱' neda', neda' na' dxezí' lu ne̱'e̱, na' benne' dxezí' lu ne̱'e̱ neda', dxezí' lu ne̱'e̱ Xra' nasel-le̱' neda'.

Dxenná Jesús gudé Judas Le̱' lu na' benne' dxeledábague̱' Le̱'

(Mt. 26.20-25; Mr. 14.17-21; Lc. 22.21-23)

21Ca gudé gunná Jesús da nigá, na' guzúe̱' ste̱be lu xichaj lázrdawe̱', na' bzéajni'ine̱' benne' ca', gunné̱':

―Da li dxapa' le'e, tu benne' ládujla le'e gudée̱' neda' lu na' benne' ca' dxeledábague̱' neda'.

22Nadxa benne' ca' dxuse̱de Jesús gulezú lawe̱' dxelenná' ljwezre̱', ne quebe zaj nézene̱' nu chee̱ na' dxuchalaj Jesús. 23Tu benne' ca' dxuse̱de Jesús, bénnea' nazrí'ile̱'e̱ Jesús le̱', zue̱' cuita Jesús naga dxelawe̱' xrche', 24na' Simón Pedro be̱ne̱' tu da dxunna bea lau bénnea' chee̱ guche̱be̱' Jesús nu chee̱ na' dxenné̱' caní. 25Nadxa bénnea' de̱'e̱ cuita Jesús bche̱be̱' Le̱':

―Xran, ¿nuzra na'?

26Beche̱be Jesús:

―Gusebisa' late' xeta xtila, na' bénnea' gunézruja' na, benne' ná'queze̱'.

Nadxa Jesús bsebise̱' late' xeta xtila, na' bnézruje̱' na chee̱ Judas Iscariote, zri'ine Simón. 27Ca gucá'a Judas xeta xtila na', na' da xriwe̱' guxú'ute̱ na lu xichaj lázrdawe̱'. Nadxa Jesús guzre̱' le̱':

―Da dxal-la' gunu', bé̱ntega na.

28Benne' ca' zaj zre̱'e̱ dxelawe̱' na' quebe guléajni'ine̱' bizr chee̱ na' guzre̱' Judas na' caní. 29Lawe' da nua Judas bzude' dumí, bal-le̱' guléquene̱' Jesús guzre̱' le̱' bi si'e̱ chee̱ laní na', u bi gunézruje̱' benne' xache' ca'. 30Ca gudé gudagu Judas xeta xtila na', na' bdxúaje̱'. Ba guxrinne.

Da nadxixruj bea cube

31Ca gudé bdxuaj Judas, gunná Jesús:

―Na'a gulé'e lau xel-la' szren chia' neda', Benne' Gulje̱' Bénneache, na' xegá'ana szren Dios ne̱ chia' neda'. 32Che neda', Benne' Gulje̱' Bénneache, dxulé'eda' ca naca xel-la' szren chee̱ Dios, na' Dios gulé'ene̱' ca naca xel-la' szren chia' neda', ne la gúnte̱queze̱' na. 33Le'e, bidu chia' ca', québedxa sua' scha' nen le'e. Le'e wexílajle neda', san ca gucha' benne' judío ca', dxapa' le'e na'a, quebe gaca sa'le le'e naga cha'a neda'. 34Tu da cube dxixruj be'eda' le'e. Le zri'i le sa' ljwézrele tule xetule ca neda' nazrí'ida' le'e. Caní dxal-la' zri'i ljwézrele tule xetule. 35Che nazrí'i ljwézrele tule xetule, na' xúgute̱ bénneache xeleque bé'ene̱' nácale neda' tuze.

Jesús dxenné̱' nna Pedro quebe núnbe'e̱ Le̱'

(Mt. 26.31-35; Mr. 14.27-31; Lc. 22.31-34)

36Simón Pedro bche̱be̱' Jesús:

―Xran, ¿gazra chéaju'?

Beche̱be Jesús:

―Naga cha'a neda', quebe gaca sá'le̱nu' neda' na'a. Te na'a wadéquezu' naga tea' neda'.

37Nadxa gunná Pedro:

―Xran, ¿bizr chee̱ na' quebe gaca sá'le̱na' Lue' na'a? Zúaqueza' guzúa' xel-la' nabán chia' chee̱ guna' Lue' tuze.

38Jesús beche̱be̱':

―¿Zúaquezu' guzú' xel-la' nabán chiu' chee̱ gacu' neda' tuze? Da li dxapa' lue', nédxudxa ca cuezre xjeaj, lue' wannáquezu' chunna lasa quebe núnbe'u neda'.

Currently Selected:

San Juan 13: zat

Highlight

Copy