Los Hechos 2

Ca guca gate bla' Be' Lá'azxa

1Ca bzrin zra Pentecostés, xúgute̱ benne' ca' dxeléajle̱'e̱ chee̱ Jesús zaj nazrague̱' tuze lataj. 2Ca' guca, belenne̱' tu schaga da za' lu be' zran xabáa, ca dxun tu be' bdunu', na' belén na xúgute̱ benne' zaj zre̱'e̱ lu xu'u naga zaj dxe'e̱. 3Nadxa belelé'ene̱' lu be' xi' ca', da dxelala, na' xeajlezúa na xíchaj tu tu benne' ca'. 4Nadxa guzúale̱tequeze Be' Lá'azxa xúgute̱ benne' ca', na' tu tue̱' gulezú lawe̱' dxuluchálaje̱' dizra' nazrala cáte̱ze dxuchine Be' Lá'azxa le̱'.

5Ca lu zra ca' zaj zra' xe̱zre Jerusalén benne' judío ca' dxulucá'ana szrénqueze̱' Dios. Benne' caní zá'aque̱' xúgute̱ xe̱zr la xu zaj dxe' lu xe̱zr la xu nigá. 6Ca belenne̱' bénneache ca naca schaga na' da dxaca na, na' belexezrague̱', ne quebe zaj nézene̱' bi na', lawe' da dxelén tu tu benne' ca' dizra' cha chee̱' da dxuluchalaj benne' ca' dxeléajle̱'e̱ chee̱ Jesús. 7Na' belexebánele̱'e̱ne̱', ne belexruse̱', ne gulé̱ ljwezre̱' tue̱' xetúe̱':

―Zaj naca benne' Galilea xúgute̱ benne' caní dxuluchálaje̱'. 8¿Ájazra na' dxendxu dxuluchálaje̱' dizra' cha chee̱dxu dxi'u? 9Zradxu dxi'u nigá, nácadxu benne' xe̱zr la xu Partia, ne benne' xe̱zr la xu Media, ne benne' xe̱zr la xu Elam, ne benne' xe̱zr la xu Mesopotamia, ne benne' chee̱ xe̱zre ca' zaj nababa Judea, ne benne' chee̱ naga nababa Capadocia, ne benne' chee̱ naga nababa Ponto, ne benne' chee̱ naga nababa Asia, 10ne benne' chee̱ naga nababa Frigia, ne benne' chee̱ naga nababa Panfilia, ne benne' xe̱zr la xu Egipto, ne benne' chee̱ xe̱zr la xu Africa da zua dédedxa chee̱ xe̱zre Cirene. Cá'anqueze zaj zra' benne' xe̱zr la xu Roma nigá. Bal-la benne' Roma ca' zaj naque̱' benne' judío, benne' gulálaje̱' ca', ne benne' zaj nazi'e̱ ca naca da nadxixruj bea chee̱ benne' judío ca'. 11Cá'anqueze nácadxu benne' xe̱zr la xu Creta, ne benne' xe̱zr la xu Arabia. Xúgute̱dxu dxendxu lu dizra' cha chee̱dxu dxuluchalaj benne' caní ca naca da zren ca' da dxun Dios.

12Xúgute̱' belexebánene̱', ne quebe zaj nézene̱' bi da dxaca na', na' gulenaba ljwezre̱' tue̱' xetúe̱':

―¿Bizra zéaje̱ da nigá?

13Benne' xula ca' belún le̱', gulenné̱':

―Dxelezuzre benne' caní.

Da bchalaj Pedro lau benne' ca'

14Nadxa guxasa Pedro nen benne' chinéaj gubáz chee̱ Cristo, na' zizraj bchálajle̱ne̱' bénneache zaj zra' na'. Dxe̱'e̱ le̱':

―Le'e, benne' Judea, ne xúgute̱le le'e nazrágale xe̱zre Jerusalén. Dxal-la' nézele le'e da nigá. Le xen xanne' ca naca da xapa' le'e. 15Netu' quebe dxezúzrentu' ca dxéquele le'e. Za gudete̱ xrsila na'a. Netú benne' quebe dxezúzrene̱' ca ná'queze. 16Da nigá naca da gunnáqueze Joel, bénnea' bchálaje̱' waláz chee̱ Dios gate na' gunné̱':

17Caní dxenná Dios: “Lu zra bze̱be wasél-laqueza'

Be' Lá'azxa chia' chee̱ súale̱ne̱' xúgute̱ bénneache.

Zrí'inele bi biu ne bi nu'ula welenné̱quezebe' waláz chia' neda'.

Bi cuide' ca' welelé'equezebe' ca da gulé'eda'-be'.

Na' benne' gula ca' welennéquezene̱' xe̱la.

18Ca lu zra na' guzuáqueza' Be' Lá'azxa chia'

nen bi we̱n zrin chia' ca', benne' biu ne nu'ula ca',

na' guchálajquezebe' waláz chia' neda'.

19Lu be' zran xabáa gulé'equezda' xel-la' waca chia',

na' lu xe̱zr la xu dxe'ela gulé'eda' da xelunna bea na,

dxen, ne xi', ne zren da naca ca beuj gasaj.”

20Gubizra xechul-la na,

na' beu' xexaca na xrna ca dxen

nedxu ca za zrin zra xelá' Xránadxu.

Zra na' gaca na tu zra chee̱ da xebánedxu

ne zra na' walé'equezdxu xel-la' szren chee̱ Dios.

21Nadxa xelelá xúgute̱ benne' ca'

xelenné̱' Xránadxu lu xel-la' dxeleajlí lazre' chee̱'.

22’Chee̱ le̱ na', le'e, benne' Israel, le xen ca da xapa' le'e. Jesús, benne' Nazaret, guque̱' tu benne' bedxúaje̱' xrlátaje lau xúgute̱le le'e ne̱ chee̱ da be̱n Dios laule le'e. Lu na' Jesús Dios blé'ene̱' da zan da dxebánedxu, ne xel-la' waca ca', ne da dxelunna bea na ca ba nézquezle le'e. 23Gate Dios be̱'e̱ lataj tu benne' bdee̱' Le̱' lu na'le le'e cáte̱ze bache núnqueze̱' nedxu, nadxa le'e gudé̱l-lale Le̱', na' bé̱tele Le̱' gate na' bdele Le̱' lu na' benne' ca' dxelune̱' da cale̱la, benne' ca' buludé̱'e̱ Le̱' xaga béguaj naga gutie̱'. 24Nadxa Dios bsebane̱' Le̱', bebéaje̱' Le̱' lu xel-la' gute. Quebe guxú'u ájala xegá'ane̱' chalásaze lu xel-la' gute na'. 25Ca naca da nigá bchalaj wenná bea David ca naca chee̱ Jesús na', gate gunné̱':

Belé'equezda' Xrana' lawa' nigá.

Le̱' zue̱' cuita' xabe̱la, chee̱ quebe bi guchebe na neda'.

26Chee̱ le̱ na' gubéle̱'e̱da', ne bil-la' lu xel-la' dxebé chia'.

Chee̱ le̱ na' guxrén lázrequeza' Le̱' gate gatia',

27lawe' da quebe xucá'anaquezu' neda' lu lataj chee̱ benne' gate.

Quebe güéquezu' lataj guzru be̱l-la' dxen chia' neda',

naca' benne' we̱n zrin chiu', ne benne' nazrí'inu'.

28Blé'equezenu' neda' ca dxal-la' guna' chee̱ zrué'eda' xel-la' nabán,

na' gúnnale̱'u neda' xel-la' dxebé lawe' da zúale̱nu' neda'.

29’Le'e, bi bícha'dau'. Naca bea na gute xra xrtáudxu David, na' bulucache̱' le̱' lu xe̱dxu ba chee̱' da zúaqueze na na'a nagá zúadxu. 30David na' guque̱' tu benne' bchálaje̱' waláz chee̱ Dios, ne gunézene̱' ca da nache̱be lázrequeze Dios gune̱'. Gunné̱ lie̱' tu benne' zri'ine zre sua David na' gaque̱' Cristo, Bénnea' nna béaqueze̱', xequé̱'e̱ lawe̱' chee̱ David. 31Ca' guca, David nigá belé'equezne̱' nedxu ca naca da dxal-la' gaca chee̱ Cristo, na' bchálaje̱' ca guca gate bebán Cristo, gunné̱': “Benne' nigá quebe xegá'anaqueze̱' lataj chee̱ benne' gate, ne quebe gúzruqueze be̱l-la' dxen chee̱'.” 32Caní guca, Dios bsebane̱' Jesús nigá, na' netu' dxexeché̱bentu' da li ca guca da nigá. 33Ca' guca, Dios bzue̱' Jesús lu xabáa chee̱' nen xel-la' waca chee̱', na' be̱'e̱ Le̱' lataj gusel-le̱' Be' Lá'azxa chee̱' nigá ca nache̱be lázrequeze̱' nedxu gune̱', na' xúgute̱ da caní dxelé'ele le'e, ne dxenle zaj naca na da dxun Be' Lá'azxa na'. 34David na' quebe begüéne̱' xabáa, san lé̱queze̱' gune̱':

Xránadxu Dios guzre̱' Xrana':

“Gudxe'e cuita' xabe̱la nigá

35ca zrindxa zra guzúa' benne' dxedábague̱' lue' chee̱ nna be'enu le̱'.”

36’Xúgute̱le le'e, benne' Israel, dxal-la' nézquezle da nigá: Jesús nigá, bénnea' bda'le le'e xaga béguaj, Dios ba nune̱' Le̱' Xránale ne Cristo chee̱le, Benne' guselé̱' le'e.

37Gate benne' ca' belenne̱' da nigá, na' belexewí'ine lazre̱', na' buluche̱be̱' Pedro, ne benne' gubáz ca' chee̱ Jesús, dxelé̱'e̱ le̱':

―Benne' bíchentu', ¿ájazra dxal-la' guntu' xca'?

38Nadxa gunná Pedro:

―Le xebí'i lazre' lau Dios, ne le chua nisa tu tule chee̱ gácale Jesucristo tuze, chee̱ gunite lau Le̱' chee̱le le'e ca naca dul-la da nabágale. Ca' gaca, nadxa Dios sél-laqueze̱' Be' Lá'azxa chee̱' chee̱ súale̱ne̱' le'e. 39Da nigá nache̱be lazre' Dios naca na chee̱le le'e, ne chee̱ zrí'inele, ne chee̱ xúgute̱ benne' zaj zre̱'e̱ zitu', xúgute̱ benne' ca' dxaca lazre' Dios nne̱'.

40Ca naca dizra' nigá, ne xezícaladxa dizra' da bchalaj Pedro, bzéajni'ine̱' benne' ca', na' gunné̱':

―Le la ládujla benne' we̱n da cale̱la caní.

41Ca'an guca, benne' ca' guléajle̱'e̱ chee̱ da bchalaj Pedro belexedxúe̱' nisa, na' lu zra na' belaca tuze ca chi dxua gaxúa benne' nen benne' ca' ba dxeléajle̱'e̱ chee̱ Jesús. 42Na' xúgute̱ benne' ca' gulezúa típaqueze̱' ca da dxuluse̱de benne' gubáz chee̱ Jesús le̱', na' gulezúe̱' tuze nen le sa' ljwezre̱' chee̱ bululáwizre̱' Dios, ne buluzrague̱' chee̱ xelawe̱' da dxusá lázredxu ca guca gate gute Cristo.

Ca belún benne' nedxu ca', benne' guleajlí lazre̱' Cristo

43Xúgute̱ benne' ca' gulezrebe̱' gate belelé'ene̱' xel-la' waca zante̱, ne da dxelunna bea na da dxelún benne' gubáz chee̱ Jesús. 44Xúgute̱ benne' ca' dxeléajle̱'e̱ chee̱ Jesús gulaque̱' tuze, ne bulunézruje̱' da de̱ chee̱' tue̱' xetúe̱'. 45Belutie̱' xúgute̱ da zaj nape̱', ne bulunézruje̱' dumí na' chee̱ benne' ca' ca da dxelexázrjene̱'. 46Xugu' zra belexezrague̱' lu xudau', ne cá'anqueze lu lizre cha chee̱', chee̱ xelawe̱' da dxusá lázredxu ca guca gate gute Cristo. Gulawe̱' tu zrente̱ lu xel-la' dxelebé, ne dute̱ xel-la' dxelexruj lazre' chee̱'. 47Belúe lá'ane̱' Dios, na' xúgute̱ bénneache guléquene̱' benne' ca' ba lá'ana. Tu zra tu zra Xránadxu bzane̱' benne' ca' chee̱ Cristo ca dxelezí' lu ne̱'e̱ tu tue̱' Cristo.

Currently Selected:

Los Hechos 2: zat

Highlight

Copy