SAN MARCOS 8

Are Jesús joanjo joine nó mil chojni

(Mt. 15.32‑39)

1Co tiempo mé ẍatte anto tsje chojni ngain Jesús iná co vechondaha na tti vane na nttiha. Mexinxin Jesús nichjé chojni que vacao co ndac̈ho ngain na:

2―Janha nchenina chojni tehe, ixin ochonda ní nchanho te na nttihi nganji na co ẍonhi chonda na para sine na. 3Si rrondattjan na ixin satsji na para nchiandoha na co sineha na icha saho, ndatsonc̈hjenxin na jintta co ndatsonttiehe na ngatja nttiha, ixin canxion na joixin na cjin.

4Co chojni que vacao Jesús ndac̈ho na:

―¿Pero queẍén rrochjé na cain chojni yá sine na? Nttihi ẍonhi jí.

5Jesús joanchiangui ngain na co ndac̈ho:

―¿Quejanhi niottja chonda jaha ra?

Co jehe na ndac̈ho na:

―Yáto niottja.

6Cottimeja Jesús coetonhe cainxin chojni tavintte na ngataha nontte. Cottimeja coá tti yáto niottja mé co chjé gracias ngain Dios. Cottimeja váña Jesús nio co chjé chojni que vacao nio para que jehe na conchjea na nio ngain icha chojni. 7Cai vechonda na icanxin copescadochjan, co Jesús chjé gracias ngain Dios co chjé chojni que vacao para que jehe na conchjeyehe na chojni para joine na. 8Cainxin na joine na co cojehe na jian. Cottimeja ẍa joinchecaon na yáto nttaẍa de tti xexin joine na. 9Co cain chojni que joine mé, chian nó mil chojni. Cottimeja Jesús goan despedido de ngain cain chojni mé, 10co jehe conixin chojni que vacao vinttengá na barco co sacjoi na para nonttehe Dalmanuta.

Xifariseo joanchia xa ixin Jesús rrojinchehe ná milagro

(Mt. 16.1‑4; Lc. 12.54‑56)

11Co are joiji na nttiha, conchienhe canxion xifariseo ngain Jesús co joinchediscutihi xa Jesús. Co ndac̈ho xa ixin Jesús rrojinchehe ná cosa para rrocjago ixin joachaxin que jehe chonda joixin de ngajni. 12Cottimeja Jesús váva soji co ndac̈ho:

―¿Quedonda chojni que techon jai rinao sicon ná señal de milagro? Janha seguro rrondac̈hjan que ni ná señal tsjagoaha na.

13Cottimeja nttiha cointtohe xa co Jesús cjan vengá barco co sacjoi conixin chojni que vacao para toenxin lago.

Levaduré xifariseo

(Mt. 16.5‑12)

14Co chojni que vacao Jesús ndatjañehe na joicaoha na niottja para rrojine na. Co are ongá barco jeho nacoa niottja techonda na. 15Cottimeja Jesús coetonhe na co ndac̈ho:

―Ttjiho ra cuidado de ixin levaduré xifariseo, co levaduré Herodes.

16Co cain chojni que vacao Jesús ndache chó na:

―Jehe ndac̈ho jañá ixin ẍonhi niottja chonda na.

17Pero Jesús chonxin quehe ndache chó na co ndac̈ho ngain na:

―¿Quedonda tendac̈ho ra ixin ẍonhi niottja chonda ra? ¿Aẍa ttinxinha ra, ni ẍa noaha ra? ¿Achonda ra ansean ra anto cha? 18Masqui dicon ra co ttinhi ra, pero ẍa ttinxinha ra. ¿Ac̈hoha ẍaxaon ra de ixin tti naho niottja? 19Are janha váña tti naho niottja para joine tti naho mil xí, ¿quejanhi nttaẍa joinchecaon ra de tti xexin joine na?

Cottimeja chojni que vacao Jesús ndac̈ho na:

―Tteyó nttaẍa.

20Cottimeja ndac̈ho Jesús iná:

―Co are janha váña tti yáto niottja para joine tti nó mil chojni, ¿quejanhi nttaẍa joinchecaon ra de tti xexin joine na?

Co chojni que vacao Jesús ndac̈ho na:

―Yáto nttaẍa.

21Cottimeja Jesús ndac̈ho ngain na:

―¿Aco ẍa ttinxinha ra ni ẍa noaha ra tti janha ndattjo ra?

Jesús ngain rajna Betsaida joinchexingamehe ná tti vaguiconha

22Cottimeja joiji na ngain rajna Betsaida. Co canxion chojni nttiha joiaho na ngain Jesús ná xí que c̈hoha vaguicon. Co joinchetsenhe na ñao Jesús para rrocatte co rrojinchexingamehe. 23Mexinxin Jesús tsehe rá xí mé co sajoicao para ngandehe rajna mé. Co nttiha Jesús cjoatjo nttatté ngain jmacon xa co vaquehe rá ngataha xa, co joanchianguihi xa si aonchao dicon xa. 24Co jehe xa tsjehe xa co ndac̈ho xa:

―Dicon canxion xí satettji co xí yá inchin canxion nttá.

25Cottimeja vaquehe rá Jesús ngain jmacon xa iná. Co rato mé jehe xa tsjehe xa jian co jmacon xa ndaxingamehe. Co xí mé onchao vicon cain cosa jian. 26Cottimeja Jesús coetonhe xa para sacjoi xa nchiandoha xa, co ndache xa:

―Ttjiha ngagaha rajna co ẍonhi chojni ndache ixin quehe conha.

Pedro ndac̈ho que ixin Jesús, mé tti Cristo

(Mt. 16.13‑20; Lc. 9.18‑21)

27Cottimeja Jesús conixin chojni que vacao sacjoi na para ngain rajna que te ngain nonttehe Cesarea de Filipo. Co are tettji na ngatja nttiha Jesús joanchiangui ngain chojni que vacao co ndac̈ho:

―¿Quehe ndac̈ho chojni ixin quensen na janha?

28Co jehe na ndac̈ho na:

―Canxion chojni ndac̈ho ixin jaha Juan, tti vancheguitte chojni, co icanxin na ndac̈ho na ixin jaha profeta Elías, co icanxin na ndac̈ho na ixin jaha iná de tti profeta que vacji are saho.

29Cottimeja joanchiangui Jesús ngain chojni que vacao co ndac̈ho:

―Co jaha ra, ¿quehe ndac̈ho ra ixin quensen na janha?

Cottimeja ndac̈ho Pedro ngain Jesús:

―Soixin tti Cristo. ―co Cristo rroc̈ho: tti Dios Coinchiehe.

30Pero Jesús coetonhe na ixin ẍonhi chojni rrondache na jihi.

Jesús ndac̈ho ixin jehe ndasenhe

(Mt. 16.21‑28; Lc. 9.22‑27)

31Cottimeja Jesús coexinhi ndac̈ho ngain chojni que vacao ixin jehe, tti Xí que joixin de ngajni, chonda que anto tangui tsonhe. Co cain xittetonha ngain nihngo co cain xidána que ttetonha ngain icha xidána co cain ximaestroe ley anto rroningaconhe na. Co cain chojni mé nasoenxon na jehe pero nchanho ninxin jehe rroxechon. 32Cain yá nao ndac̈ho Jesús. Cottimeja Pedro joantsjenda Jesús para joinchesattehe Jesús. 33Pero Jesús ngaria co tsjehe ngain chojni que vacao, co joinchesattehe Pedro co ndac̈ho Jesús:

―¡Sattjixin de nganji na janha, Satanás! Jaha ẍaxaonha inchin ẍaxaon Dios, sino que jaha jeho ẍaxaon inchin ẍaxaon chojni.

34Cottimeja Jesús nichjé chojni que vacao co icha chojni cai co ndac̈ho ngain na:

―Si c̈honja chojni rinao sacjinha na, pero chonda que rrotjañehe cain tti jeho jehe rinao co sacjinha masqui anto tangui tsonhe co hasta nasenxon. 35Ixin tti rinao que ẍonhi tsonhe vidé, mé sinchetján vidé. Pero tti sinchetján vidé de ixin causananxin janha o de ixin causexin tti jian joajna que janha joiquian, mé sechon para cainxin tiempo. 36Ixin ẍonhi ẍé masqui ná chojni sacha cainxin cosa ngataha nontte, si ndasinchetján almé. 37Ixin ¿quejanhi tsenanxin chojni almé are jehe ndasinchetján? 38Ixin si c̈honja chojni tiempo jai tosoé de nichja jian de ixin janha co de ixin joajnana, cai janha, tti Xí que joixin de ngajni, tsosoahna de ixin chojni mé are sihi conixin ángel co gloria que rrochjana Ndodana que jí ngajni.

Currently Selected:

SAN MARCOS 8: plsNT

Highlight

Copy