SAN MARCOS 4
4
Ejemploe tti joiquenga trigo ngataon jngui
(Mt. 13.1‑9; Lc. 8.4‑8)
1Iná nchanho Jesús coexinhi cjoagoe chojni de ixin Dios ngandehe lago de Galilea, co ẍatte anto tsje chojni ngain Jesús nttiha. Mexinxin Jesús vengá ná barco que vehe nttiha ngataonhe jinda. Co cainxin chojni vittohe na ngandehe jinda. 2Cottimeja Jesús cjoagoe na anto tsje cosa de ixin ejemplo co cai ndac̈ho janhi ngain na:
3―Ttinhi ra tti rrondac̈hjan janha. Ná xí cjoi xa joiquenga xa trigo ngataon jngui. 4Pero are jitja xa trigo ngataon jngui ttoha noanchjan de trigo vinttji ngá nttiha co joí conttoa co ndajoine va trigo mé. 5Co icha noanchjan de trigo vinttji ngataha tti jí ttjao tti ttjinha jinche jí. Co trigo mé anto daca c̈hinhi ixin ttjinha jinche ẍanotaon. 6Pero nchanho toin ndajoinchexema catrigo mé ixin tsjeha noehe ca vechonda ca. 7Co icha noanchjan de trigo vinttji ngagaha canchaha. Co canchaha icha daca vangui ca co coanc̈hjandaha ca trigo vangui, co cain catrigo mé ẍonhi joinchechjian ca. 8Pero icha noanchjan de trigo vinttji tti jian jinche, co trigo mé nchoe joanjo noa. Canxion nihi trigo mé joinchechjian de treinta noanchjan cada ninchjan, co icanxin trigo joinchechjian hasta sesenta noanchjan cada ninchjan, co icanxin trigo joinchechjian hasta cien noanchjan cada ninchjan.
9Co ndac̈ho Jesús ngain na cai:
―Ẍo nchao ttinxin ra, ttinhi ra jian.
Quedonda Jesús joinchegonda tsje ejemplo
(Mt. 13.10‑17; Lc. 8.9‑10)
10Cottimeja are sacjoi cainxin chojni co jeho Jesús conixin tti tteyó chojni que vacao co icanxin ni ẍa vittohe nttiha, joanchiangui na ngain Jesús ixin quehe rroc̈ho ejemplo mé. 11Co Jesús ndac̈ho ngain na:
―Jaha ra Dios ndac̈ho ixin tsonoha ra tti jima de ixin queẍén ttetonha jehe. Pero janha nichja ngain chojni que c̈hjioha na jeho de ixin ejemplo. 12Jamé para que masqui dicon na tti nttaha pero inchin rroguiconha na, co masqui ttinhi na tti ndac̈hjan pero ttinxinha na, co para tsentoxinha vidé na ni sitjañeha na cain cosa jianha que nchehe na.
Jesús ndac̈ho quehe rroc̈ho ejemploe tti joiquenga trigo
(Mt. 13.18‑23; Lc. 8.11‑15)
13Ndac̈ho Jesús ngain na cai:
―¿Attinxinha jaha ra quehe rroc̈ho ejemplo jihi? ¿Mexinxin queẍén tsinxin jaha ra icha ejemplo que janha rrondac̈hjan? 14Tti coenga trigo, mé inchin tti ndac̈ho joajné Dios ngain icha chojni. 15Canxion chojni inchin tti trigo que vetsinga ngá nttiha, rroc̈ho ixin ttinhi na joajné Dios, pero Satanás ttí co ndanchetjañehe na palabra que coinhi na. 16Icanxin chojni inchin tti trigo que vetsinga ngataha tti jí ttjao ixin are ttinhi na joajné Dios, anto c̈hjoin tonohe na dayé na joajna mé. 17Pero inchin trigo que chondaha tsje noehe seha tonc̈hjenhe trigo, jamé jehe chojni mé cai; cottimeja are tangui tonhe na co icha chojni feo nchehe ngain na ixin ditticaon na joajné Dios, jehe na ndadoan na desanimado. 18Co icanxin chojni inchin tti trigo que vinttji ngagaha canchaha. Rroc̈ho que jehe na ttinhi na joajné Dios 19pero icha ẍaxaon na cain problema que jehe na chonda na nttihi ngataha nontte, co tomi ncheyehe na para icha ncheẍoxinhi na cosa que jí ngataha nontte. Co cain yá ndanchetjanji joajna mé, co incheha na inchin ttetonha joajna jihi. 20Pero te icanxin chojni que ttinhi na joajné Dios co dayé na ngain ansén na co nchehe na inchin ttetonha joajna mé. Co cain chojni mé inchin tti trigo que vinttji tti jian jinche co joanjo tsje noatrigo. Canxion chojni mé inchin tti trigo que joinchechjian de treinta noa ngain nacoa ninchjan, co icanxin na inchin tti trigo que joinchechjian de sesenta co de cien noatrigo ngain nacoa ninchjan.
Ejemploe lámpara
(Lc. 8.16‑18)
21Cai ndac̈ho Jesús:
―¿Apoco ná chojni sinchegacaon ná lámpara cottimeja tsema lámpara mé ngaxinhi ná cajón o ngangui saoen? Nahi, chonda que tsín lámpara ngataha ná cosa noi para nchao sinchengasán ngaxinhi nchia. 22ẍonhi cosa jima que tsononxinha, co ẍonhi cosa jima que teẍaxaon ni ngain ansén ni que chojni tsonoeha; cain cosa chonda que tsononxin cosa. 23Jaha ra que ttinxin ra, ttinhi ra jian.
24Cai ndac̈ho Jesús:
―Ttjiho ra cuidado tti tsinhi ra. Inchin medida que jaha ra dattechoaxin ra, Dios jamé sattechoha jaha ra cai. Co Dios rrochjá ra icha, jaha ra ẍo ttinxin ra. 25Ixin chojni que chonda, Dios tsjenguijna na para rrochonda na icha, pero chojni que ẍonhi chonda, Dios santsjehe cainxin tti jehe na chonda na masqui tsjeha chonda na.
Ejemplo de queẍén dangui jino
26Ndac̈ho Jesús cai:
―Tti ttetonha Dios inchin noa que ttenga chojni ngataon jngui. 27Chojni ttenga co sacjan dinttejoa, cottimeja dingattjen co jamé datto ttie co datto nchanho. Co noa c̈hintaon noa co c̈hinhi jino pero tti jnguihi noeha queẍén dangui jino mé. 28Ixin nontte nchegangui jino mé. Saho c̈hinhi chán jino cottimeja ntté, cottimeja noa. 29Co are ocha noa mé ngain ní co ndaxema ní jian, ovittja tiempo para tsanda na ní mé.
Ejemploe ná tsé que dinhi mostaza
(Mt. 13.31‑32; Lc. 13.18‑19)
30Cai ndac̈ho Jesús:
―¿Quehe cosa nchao sinttacaninxin tti ttetonha Dios? 31Mé inchin ná tsé icha nchín de cainxin tsehe ca co tsé mé dinhi mostaza. 32Pero are dinga tsé mé, dangui qué tse icha que cainxin ca hasta conttoa nchao nchejogaha va ngagaha ntté ca mé.
Queẍén vanchegonda Jesús cain ejemplo
(Mt. 13.34‑35)
33Jañá vacjago Jesús joajné Dios conixin tsje ejemplo inchin cain ejemplo yá, hasta tti, chojni nchao coinxin jian. 34Jesús jeho nichjé chojni de ixin ejemplo, pero después, vandache chojni que vacao tti rroc̈ho cainxin ejemplo yá.
Jesús tajoaquehe c̈hintto conixin olé lago
(Mt. 8.23‑27; Lc. 8.22‑25)
35Nchanho mé are ndaconttie, Jesús ndache chojni que vacao:
―Sachjin na toenxin lago jihi.
36Cottimeja nttiha cointtohe na cainxin chojni co sajoicao na Jesús ngá barco tti vengá. Co rroé icanxin barco cai. 37Co joí ná c̈hintto anto soji ngataon jinda; anto soji coeto nda co viquia nda barco tti jidicao Jesús. 38Co are mé Jesús tajicjon ná almohada tajijoa ngá barco ngain ná lugar noton barco, co chojni que vacao Jesús joinchexingamehe na co ndac̈ho na ngain jehe:
―¡Maestro! ¿Andosanha ixin ndatexincanjingui na jinda?
39Cottimeja vingattjen Jesús, co joinchesattehe c̈hintto co jinda co ndac̈ho ngain:
―¡Tencoa! ¡Co tadarihi ndacoa!
Co rato mé tavehe c̈hintto ndacoa co tavehe jinda ndacoa. 40Cottimeja ndac̈ho Jesús ngain chojni que vacao:
―¿Quedonda anto ẍaon ra? ¿Quedonda ẍa chondaha ra confianza ngain Dios?
41Pero jehe na anto ẍaon na, co jeho na ndache chó na:
―¿Quensen jihi que hasta c̈hintto co jinda ditticaon tti jehe ndac̈ho?
Currently Selected:
SAN MARCOS 4: plsNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.