SAN LUCAS 18
18
Ejemploe tti ná nc̈higanha co ná xijuez jianha
1Jesús ndache tti chojni que vacao ná ejemplo para joinchecoenhe na ixin chonda na que sinchetsenhe na ñao Dios cain tiempo co chondaha na que soan na desanimado. 2Jehe ndac̈ho ngain na:
―Ngain ná rajna vehe ná xijuez que vechondaha xa respeto ngain Dios, ni ndosenha xa de icha chojni. 3Ngain rajna mé vehe ná nc̈higanha cai que vacji nc̈ha ngain xijuez jihi para vaganchia nc̈ha jie para ixin tti chojni que vaquetocaho nc̈ha. 4Anto sé co xijuez jihi c̈hoha xa joinchehe xa jie ngain nc̈hí mé, pero después ẍaxaon xa: “Masqui janha chondaha respeto ngain Dios ni ndosennaha de icha chojni, 5pero ixin nc̈higanha jihi nchehe nc̈ha sigue nchemolestá na nc̈ha, janha tsjenguijna nc̈ha para que isincheha nc̈ha sigue tsí nc̈ha co ndatsjehe nc̈ha pacienciana.”
6Co Jesús ndac̈ho:
―Jihi tti ndac̈ho xijuez jianha. 7Co ¿apoco Dios tsjenguijnaha cain tti chojni que jehe coinchiehe que nchetsenhe na ñao jehe de nchanho co de ttie? ¿Apoco jehe tsonc̈hjenhe para tsjenguijna na? 8Janha rrindattjo ra ixin jehe tsonc̈hjenha de tsjenguijna cain chojni mé. Pero are janha, tti Xí que joixin de ngajni, sihi iná, ¿aẍa sittja chojni que ditticaon na janha nttihi ngataha nontte?
Ejemploe xifariseo co xicobrador de impuesto
9Jesús ndac̈ho iná ejemplo para ixin tti chojni que tonohe ixin jeho tti anto jian, co ẍaxaon na ixin icha chojni ẍonhi rentte. Jesús ndac̈ho:
10―Yó xí cjoi xa ngain nihngo icha importante para joinchecoanxinhi xa Dios. Ná xa fariseo xa, co iná xa cobrador de impuesto xa. 11Xifariseo mé tavengattjen xa joinchecoanxinhi xa Dios, co ndac̈ho xa janhi: “Oh Dios, janha chjaha gracias ixin janha jeha inchin canxion chojni que jehe na chehe na, co nchehe na icha cosa jianha, co chonda na tsje nc̈hí, co janha ni jeha inchin xicobrador de impuesto jihi. 12Janha tocjáño na yó nttiha ngain semana, co janha danjo para ixin soixin ná tti ttexin parte de cain tti janha dacha.” 13Pero xicobrador de impuesto vittohe xa cjinxin, co jehe xa ninchin tsinha con xa para rrotsjehe xa ngajni, sino que ẍanguí xa tton pechoe xa co ndac̈ho xa: “¡Oh Dios, nttatsanha ñao ttiaconoana na ixin janha anto jianha jointtaha!”
14Cottimeja Jesús ndac̈ho:
―Janha rrindattjo ra que are xicobrador de impuesto jihi sacjan xa nchiandoha xa, Dios ojoinchetjañehe xa cain tti jianha que jehe xa joinchehe xa, pero xifariseo nahi. Ixin tti chojni que tonohe que jeho tti icha jian, pero ngain tti nchanho que Dios sinchejuzguehe cain chojni, chojni mé ẍonhi rentte na, co tti chojni que jai tonohe que jehe ẍonhi rentte, are mé Dios sinchesayehe chojni mé.
Jesús joinchenchaon xannchinnchinchjan
(Mt. 19.13‑15; Mr. 10.13‑16)
15Cai tsje chojni vaquiaho na xannchinnchinchjenhe na ngain Jesús para que vacatte xan, pero are tti chojni que vacao Jesús vicon na jihi, coexinhi na joinchesattehe na tti chojni que vaquiaho xannchinnchinchjan mé. 16Pero Jesús ndache xannchinnchinchjan mé ixin icha tsonchienhe xan ngain co Jesús ndac̈ho ngain chojni que vacao:
―Tanc̈hjanda ra que xannchinnchinchjan tsí xan nganji na janha, co cayacoenha ra xan ixin tti ttetonha Dios, mé para ixin tti chojni inchin jehe xannchinnchinchjan. 17Atto ndoa tti rrindattjo ra que tti chojni que sitticaonha tti ttetonha Dios inchin ná xannchinchjan ditticaon xan tti ttetonhe xan nindoha xan, chojni mé ẍonhi tiempo rrochonda parte ngain tti ttetonha Dios.
Ná xí rico cjoao xa Jesús
(Mt. 19.16‑30; Mr. 10.17‑31)
18Ná xí importante para ngain chojni judío joanchiangui xa ngain Jesús co ndac̈ho xa:
―Maestro, soixin que anto jian, ¿quehe icha sinttaha janha para rrochonda iná vida naroaxin que ẍonhi tiempo tsjexin?
19Jesús ndac̈ho ngain xa:
―¿Quedonda ndac̈ho jaha que janha jian na? ẍonhi iná tti jian, jeho nacoaxinxon, co mé Dios. 20Jaha onoha cain mandamiento de Dios que ndac̈ho: “Ncheyeha c̈hihi iná chojni, dantsjeha vidé iná chojni, tteha cosé iná chojni, nichjaha cosa ndoaha de iná chojni, co ttjiho respeto ngain ndodá co ngain janná.”
21Jehe tti xí mé ndac̈ho:
―Cain yá janha rrinttaha desde are ẍa nchín na.
22Are coinhi Jesús jihi, jehe ndac̈ho ngain xa:
―Jaha ẍa nchetján sinchehe nacoa cosa. Nchecji cain tti chonda co tonchjeyehe chojni noa tomi; jamé ngajni jaha rrochonda cosa icha rentte. Cottimeja sihi para sacjin na tti janha sacji.
23Pero are xí mé coinhi xa jihi, anto vechín xa ixin anto rico vehe xa. 24Are vicon Jesús ixin anto vechín xa jehe ndac̈ho:
―¡Atto tangui para que chojni rico rrochonda na parte ngain tti ttetonha Dios! 25Icha tanguiha para ixin ná cocamello sattoxinhi va ttoechjenhe ná nttachiehe manta que para chojni rico rrochonda na parte ngain tti ttetonha Dios.
26Co cain tti nicoinhi jihi ndac̈ho na:
―Mexinxin, ¿quensen nchao rrochonda iná vida naroaxin remé?
27Jesús ndac̈ho ngain na:
―Tti c̈hoha sinchehe chojni, Dios nchao sinchehe.
28Pedro ndac̈ho ngain Jesús:
―Janha na cointtoa na cain tti joichonda na para que jai c̈hjin na soixin.
29Cottimeja Jesús ndac̈ho:
―Atto ndoa tti rrindattjo ra que quexeho chojni que ttinttohe nchiandoha, o ndodé, o janné, o xanchó, o c̈hihi, o xenhe para sindache icha chojni de ixin queẍén ttetonha Dios ngain ansén ni, 30chojni mé ngataha nontte nttihi sayé na anto icha tsje cosa, co ngain mundo que tsí sayé na vida naroaxin que ẍonhi tiempo tsjexin.
Jesús cjan ndac̈ho iná ixin jehe ndasenhe
(Mt. 20.17‑19; Mr. 10.32‑34)
31Jesús joantsjenda tti tteyó chojni que vacao co ndac̈ho ngain na:
―Jai jaha ra onoha ra que satettjin na para Jerusalén. Nttiha tti tsoenxin cainxin tti dindac̈ho cain profeta de ixin janha, tti Xí que joixin de ngajni. 32Chojni nttiha sanjo na na janha ngain chojni que jeha judío co jehe na tsjanoa na na, co feo rronichja na de ixin janha, co tsjatjo na na nttatté na. 33Sicaon na janha co después nasoenxon na na. Pero ngain nchanho ninxin janha rroxechon na.
34Jehe tti tteyó chojni que vacao Jesús ẍonhi coinxin na de ixin jihi, ni venoeha na de ixin tti ndac̈ho Jesús, ixin para ixin jehe na jihi ná cosa que c̈hoha coinxin na.
Are Jesús joinchexingamehe ná tti xí que c̈hoha vaguicon de ngain Jericó
(Mt. 20.29‑34; Mr. 10.46‑52)
35Are Jesús conixin tti chojni que vacao ochiaon tediji na ciudad de Jericó, ná tti xí que c̈hoha vaguicon tají ngandehe nttiha jidanchiagaha. 36Are jehe xa coinhi xa que nttiha tedatto tsje chojni, joanchiangui xa ixin quehe conhe. 37Icha chojni ndache xa na que ixin Jesús de Nazaret jidatto nonttiha. 38Cottimeja jehe xa ndac̈ho xa sén:
―¡Jesús, tti razé David, co tti chonda joachaxin que vechonda rey David, ttiaconoana na janha!
39Tti chojni que tetaon nttiha joinchesattehe xa para que rrotencoa xa, pero jehe xa ndac̈ho xa icha sén:
―¡Soixin, tti razé David, co tti chonda joachaxin que vechonda rey David, ttiaconoana na janha!
40Cottimeja Jesús tavengattjen co coetonha para que joiaho na ngain Jesús jehe tti vaguiconha mé. Co are ojoí ngaca Jesús, jehe Jesús joanchiangui ngain jehe tti vaguiconha mé co ndac̈ho:
41―¿Quehe rinao sinttaha janha nganji?
Jehe tti vaguiconha mé ndac̈ho:
―Janha rinaho que nchao sicon.
42Jesús ndac̈ho:
―¡Ján, jaha onchao dicon! Jaha oxingamaha ixin vitticaon na janha.
43Ngain rato mé jehe tti vaguiconha mé onchao vicon, co sarroé tti sacjoi Jesús, co joinchecoanxinhi Dios. Co cain chojni que vicon jihi cai joinchecoanxinhi na Dios.
Currently Selected:
SAN LUCAS 18: plsNT
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 1982, Wycliffe Bible Translators, Inc.