SANTIAGO 5

Tti vitonhe chojni rico

1¡Jaha ra chojni rico, ttinhi ra jihi! Tsjanga ra co toyao ra ixin tti anto tangui jichonha ra. 2Cain cosa rentte que jaha ra chonda ra jai iẍonhi ẍé, co lonttoa ra anto fino que chonda ra ndadijine cochí. 3Cain oro co plata que chonda ra ndadiguihi chjín, co chjín mé tjago ixin jaha ra joincheha ra inchin jiquininxin conixin tomia ra. Co mé tsjaga nttaoha ra inchin rrocji ẍohi. ¿Quedonda anto joatse ra tomi co cosa anto rentte ngain tiempo jihi que ochian ndatsjexin mundo? 4Jaha ra cjoengueha ra hna tti chojni que joinchehe ẍá ra ngataon jnguiha ra co tomí chojni mé tti tec̈ho jie jai para ixin jaha ra. Co Dios, tti chonda cain joachaxin, jinohe cain jihi. 5Nttihi ngataha nontte jaha ra techonda ra ná vida anto c̈hjoin ixin nchehe ra cain tti rinao ra co jintte ra cain tti nttaẍoxinha ra, tetjonttao ra ẍá coleco para ngain nchanho de matanza. 6Jaha ra joic̈ho ra jie para ixin chojni que ẍonhi teca co nagoenxon ra na. Co jehe na tsinha rá na nganji ra.

Queẍén rrochonda ni paciencia co queẍén sinchecoanxinhi ni Dios

7Mexinxin hermanos, chonda ra paciencia hasta que Jesús tsí iná. Inchin tti ttenga ngataon jngui si jehe rinao rrotsín jian cosecha, jehe chonda que rrochonhe conixin paciencia hasta tsija c̈hin. 8Jamé jaha ra cai chonda ra paciencia co doanha ra desanimado ixin ochiaon joí nchanho que Jesucristo tsí iná. 9Hermanos, toñaoeha chó ra para que Dios sinchejuzgaha nganji ra ixin Dios tti Juez co jehe ochian joí. 10Hermanos, tse ra de ejemplo tti tangui que conhe cain profeta que nichja conixin joachaxín nombré Dios co tti paciencia que jehe na vechonda na. 11Ixin ján na ẍaxaon na feliz tti chojni que ttixinhi are jehe tangui tonhe. Jaha ra ocoinhi ra tti paciencia que vechonda Job. Co jaha ra onoha ra queẍén joinchehe Dios ngain Job después ixin Dios jehe anto ttiaconoehe ni.

12Pero de cainxin cosa nttatsanha ñao ra hermanos que ncheha ra jurado ni de ixin ngajni, ni de ngataha nontte, ni de iná cosa chondaha ra que sinchehe ra jurado. Are rrondac̈ho ra: “Ján”, que ján jamé tsonhe. Co are rrondac̈ho ra: “Nahi”, que jamé nahi, para que Dios rrochjaha ra castigo.

13Si c̈honja de jaha ra tedetan ra tangui, chonda ra que nchetsenhe ra ñao Dios para que jehe sinttjian tangui mé. Si c̈honja ra anto chaha ra, chonda ra que tsje ra alabanza para ixin Dios. 14Si c̈honja de jaha ra niha ra, chonda ra que dayehe ra chojni que chonda joachaxin ngain nihngo para que chojni mé sinchetsenhe na ñao Dios para ixin jehe tti nihi mé. Co conixin joachaxin nombré Dios tsinga na aceite já tti nihi mé. 15Co are sinchetsenhe ra ñao Dios co rrochonda ra seguro que Dios sinchexingamehe jehe tti nihi mé, tti nihi mé rroxingamehe co Dios sinchetjañehe tti jianha que joinchehe jehe tti nihi mé. 16Mexinxin ndache chó ra naná ra tti jianha que joinchehe ra co nchetsenhe ra ñao Dios para ixin icha nicompañeroa ra para que cain ra rroxingamaha ra. Are ná chojni jian ngattoxon con Dios sinchetsenhe ñao Dios conixin ansén, palabré chojni mé chonda tsje joachaxin. 17Profeta Elías cjoi ná chojni janhi inchin ján na, co are jehe joinchetsenhe ñao Dios ixin itsiha c̈hin, jamé conhe; ijoiha c̈hin ngataha nontte jihi ní nano co rioho. 18Co después, are jehe joinchetsenhe ñao Dios iná ixin tsí c̈hin, jamé conhe; cjan joí c̈hin iná co nontte joanjo nontte cosecha.

19Hermanos, si c̈honja de jaha ra isitticaonha ra Dios co sinchehe ra ojé cosa, co si iná chojni tsjenguijna ra para que jaha ra rrocjan ra sitticaon ra Dios iná, 20ttettexin ñao ra que chojni que sinchequentoxinhi vidé iná chojni para que jehe isincheha jianha, chojni mé tsanc̈hjandaha almé chojni para que tsji ngain infierno, co tti chojni que rrondac̈ho jamé, jehe sinchehe que tti iná chojni sitjañehe tsje jianha que jehe joinchehe.

Currently Selected:

SANTIAGO 5: plsNT

Highlight

Copy