San Mateo 16

Xanapuxcún judíos taucxilhputún lanca li̠cá̠cni̠t xtascújut Jesús

(Marcos 8.11‑13; Lucas 12.54‑56)

1Makapitzí̠n fariseos xa̠huá saduceos táalh antanícu xlama̠chá Jesús la̠qui̠ xlacán natatzaksay y natama̠mokosi̠ya̠huay; xlacán tahuánilh pi̠ catláhualh aktum lanca li̠cá̠cni̠t tascújut hua̠ntu̠ natasiyuy la̠qui̠ xlacán nataucxilha y nataca̠najlay para xli̠ca̠na huá Dios xmacamini̠t. 2Pero huata xlá chiné ca̠kálhti̠lh:

—Acxni̠ ko̠tanu̠majá aya tzanka̠ma chichiní y ucxilhá̠tit pi̠ luu ca̠huán tasiyuy nac akapú̠n huaná̠tit: “Chú cha̠lí luu tla̠n huij nahuán quilhtamacú porque luu ca̠tzutzoko nac akapú̠n.” 3Y chi̠nchú para lacatzi̠sa luu tatapuni̠t y ma̠rí lhca̠cnán, huaná̠tit: “Chú ma̠x ni̠ luu tla̠n catichichíni eé quilhtamacú porque luu tzutzoko akapú̠n xa̠huachí tapucsni̠t.” ¡Xli̠ca̠na pi̠ luu mákat aktzanká̠tit! ¿Lácu chú tla̠n li̠ma̠lakchipini̠yá̠tit y akata̠ksá̠tit hua̠ntu̠ tasiyuy nac akapú̠n, pero chi̠nchú ni̠lay akata̠ksá̠tit hua̠ntu̠ la̠nchú ca̠li̠ma̠lacahua̠ni̠má̠n Dios eé quilhtamacú? 4¡Koxutaní̠n huixinín cristianos hua̠nti̠ lapá̠tit ca̠lacchú quilhtamacú porque xli̠ca̠na pi̠ luu li̠xcájnit mintapuhua̠ncán, huixinín ankalhi̠ná quila̠maksquima̠náhu xlacata pi̠ cacca̠li̠ma̠lacahua̠ní̠n aktum lanca li̠cá̠cni̠t tascújut! Pero aquit lacatancs cca̠huaniyá̠n pi̠ ni̠tu̠ cactica̠laca̠xtlanín hua̠ntu̠ luu ucxilhputuná̠tit, huata mejor huá nacca̠li̠ma̠lacahua̠ni̠yá̠n aktum tascújut cumu la̠ tu̠ Dios titláhualh nac xlatáma̠t profeta Jonás.

Acxni̠ chuná ca̠huaniko̠lh xla̠ ca̠akxtekyá̠hualh y alhá.

Xta̠yatcán fariseos xta̠chuná cumu la̠ levadura

(Marcos 8.14‑21)

5Maktum quilhtamacú acxni̠ discípulos tapa̠tacutko̠chá a̠li̠quilhtu̠án chúchut xlacán ni̠ tapá̠stacli para natalé̠n caxtilá̠nchahu hua̠ntu̠ natahuaya̠chá acxni̠ natahua̠yán. 6Na̠ acxnitiyá chú Jesús chiné ca̠huánilh:

—Aquit cca̠huaniyá̠n pi̠ huixinín luu cuentaj catlahuátit xlacata ni̠tu̠ naca̠ma̠pasi̠yá̠n xlevadurajcán fariseos y saduceos.

7Ama̠ko̠lh discípulos chiné tzúculh tala̠huaniy sacstucán:

—Ma̠x huá quinca̠li̠huanimá̠n porque ni̠ li̠miná̠hu caxtilá̠nchahu.

8Jesús tuncán cátzi̠lh hua̠ntu̠ xtaquilhuamá̠nalh y chiné ca̠huánilh:

—¿Túcu xpa̠lacata la̠ntamá li̠huaná̠tit pi̠ ni̠tu̠ li̠taná̠tit caxtilá̠nchahu? ¡Xli̠ca̠na pi̠ ni̠lay ca̠najlayá̠tit hua̠ntu̠ aquit ctlahuay! 9¿Lácu pi̠ nia̠ tiakata̠ksá̠tit y niaj pa̠stacá̠tit acxni̠ lá a̠ ctica̠ma̠kpitzínilh macquitzis caxtilá̠nchahu acxni̠ la̠ a̠ titahuá̠yalh ma̠x cumu akquitzis mi̠lh cristianos? Pus chú caquila̠huaníhu, ¿nícu pa̠li̠t cana̠stas akatá̠xtulh hua̠ntu̠ ni̠ tahuako̠lh? 10Na̠chunali̠túm ma̠x na̠ niaj pa̠stacá̠tit acxni̠ la̠ a̠ ctica̠li̠má̠hui̠lh caj mactujún caxtilá̠nchahu acxni̠ pu̠tum xtahuilá̠nalh akta̠ti mi̠lh cristianos, chi̠nchú acxni̠ a̠má lá u̠cuanima, ¿nícu pa̠li̠t cana̠stas akatá̠xtulh hua̠ntu̠ ni̠ tahuako̠lh? 11¿Túcu chi̠nchú xpa̠lacata ni̠ liakatá̠kstit pi̠ ni̠ huá aquit cli̠chuhuí̠nalh a̠má caxtilá̠nchahu hua̠ntu̠ nali̠hua̠yaná̠tit? Acxni̠ cli̠chuhuí̠nalh a̠má levadura, aquit xacca̠huaniputuná̠n pi̠ luu cuentaj catlahuátit ni̠tu̠ tica̠ma̠pasi̠yá̠n xta̠yatcán fariseos y saduceos porque luu xta̠chuná xli̠lamanka cumu lá levadura.

12Acxnicú chú xlacán taakáta̠ksli xlacata pi̠ Jesús ni̠ huá xli̠chuhui̠nama a̠má levadura hua̠ntu̠ ta̠tlahuacán caxtilá̠nchahu hua̠ntu̠ huacán, huata huá xlá xli̠chuhui̠nama la̠ta lácu xlacán xtama̠kalhchuhui̠ni̠y cristianos a̠ma̠ko̠lh fariseos y saduceos, porque huá u̠ma̠ko̠lh lacchixcuhuí̠n ni̠ luu aksti̠tum xtale̠má̠nalh xtalacapa̠stacnicán.

Pedro lacatancs huan pi̠ Jesús huá Cristo

(Marcos 8.27‑30; Lucas 9.18‑21)

13Acxni̠ chú Jesús ca̠tá̠cha̠lh xdiscípulos nac xapu̠latama̠n hua̠ntu̠ xuanicán Cesarea de Filipo xlá chiné ca̠kalhásquilh:

—Acxni̠ cristianos quintaucxilha, ¿tícuya̠ chixcú quintali̠macá̠n?

14Xlacán takalhtí̠nalh:

—Makapitzí̠n tahuán pi̠ mat huix Juan Bautista, hui̠ntí huamparay pi̠ mat huix profeta Elías, osuchi mat huix a̠má profeta Jeremías, o la̠tachá tícuya̠ profeta tali̠maca̠ná̠n.

15Huata xlá chiné ca̠kalhasquimpá:

—Y chi̠nchú huixinín, ¿tícu luu lacpuhuaná̠tit aquit?

16Pedro tuncán kálhti̠lh:

—¡Huix Cristo Xkahuasa Dios hua̠nti̠ xli̠ca̠na lama xastacná!

17Jesús chiné huánilh:

—Luu ca̠na̠ li̠pa̠xúhu calatapa Simón xkahuasa Jonás porque ni̠para caj cha̠tum chixcú ma̠catzi̠ni̠ni̠tán hua̠ntu̠ huix aya catzi̠ya, sinoque huá Quintla̠t hua̠nti̠ huilachá nac akapú̠n ma̠catzi̠ni̠ko̠ni̠tán. 18Aquit lacatancs cuaniyá̠n la̠nchú pi̠ huix nali̠ma̠pa̠cuhui̠cana Pedro (huamputún lanca chíhuix) y antá nac xokspú̠n eé lanca chíhuix nacma̠lacatzuqui̠y a̠ma̠ko̠lh cristianos hua̠nti̠ luu xli̠ca̠na naquintali̠pa̠huán; y hua̠nchú ti̠ aquit nacca̠ma̠quilhaqui̠y ni̠para huá xli̠makatlihueke ca̠li̠ní̠n catimakatlájalh. 19Xa̠huachí aquit nacma̠xqui̠yá̠n a̠má xallave xtapéksi̠t Dios hua̠nti̠ huí nac akapú̠n. Aquit lacatancs cuaniyá̠n pi̠ hua̠ntu̠ huix nachi̠ya uú nac ca̠quilhtamacú na̠chuná xatachí̠n natahuilaya̠chá nac akapú̠n, y na̠chuná hua̠ntu̠ huix naxcuta uú nac ca̠quilhtamacú na̠ xataxcutni nahuán nac akapú̠n.

20Acxni̠ chú ta̠chuhui̠nanko̠lh Pedro, hua̠k ca̠li̠ma̠péksi̠lh xdiscípulos xlacata pi̠ ni̠tícu catali̠ta̠chuhuí̠nalh pi̠ xli̠ca̠na huá Cristo hua̠nti̠ xmimaj ca̠lakma̠xtuy.

Jesús li̠chuhui̠nán pi̠ namakni̠cán

(Marcos 8.31–9.1; Lucas 9.22‑27)

21Acxnitiyá a̠má quilhtamacú Jesús luu tzúculh ca̠ma̠lacapu̠tuncuhui̠niy xdiscípulos hua̠ntu̠ xamaj akspulay, xlá ca̠huánilh xlacata pi̠ juerza xliánat xuani̠t nac xaca̠chiquí̠n Jerusalén, xa̠huachí xanapuxcún cura xa̠huá xma̠kalhtahuake̠nacán judíos xlacán la̠n xtaamá̠nalh tama̠pa̠ti̠ni̠y. Xlá luu lacatancs ca̠huánilh pi̠ namakni̠cán pero na̠ ca̠huánilh pi̠ caj xliaktutu quilhtamacú xama̠paj lacastacuanán nac ca̠li̠ní̠n. 22Huata Pedro tzinú ta̠tatampú̠xtulh y antá chiné tzúculh huaniy:

—Quimpu̠chiná, ¡ni̠ calacásquilh Dios para chuná huix naakspulayá̠n hua̠ntu̠ quilhuámpa̠t! Porque ni̠tlá̠n catiqui̠táxtulh para túcu nalaniya.

23Pero huata Jesús talakáspitli y chiné huánilh Pedro:

—¡Luu xli̠ca̠na catlahua li̠tlá̠n catatampu̠xtu antanícu aquit cyá porque huix xta̠chuná akskahuiní y caj quisaka̠li̠ya! Xli̠ca̠na pi̠ huix ni̠chuná kalhi̠ya mintalacapa̠stacni cumu lá lacapa̠stacnán Dios huata huix chuná lacapa̠stacnana cumu lá talacapa̠stacnán cati̠hua lacchixcuhuí̠n.

24Y acali̠stá̠n xlá pu̠tum ca̠huánilh xdiscípulos:

—Para tícu luu xli̠ca̠na li̠taxtuputún cumu lá quintama̠kalhtahuaké̠n, pus huata luu xlacasquinca capa̠tzánka̠lh hua̠ntu̠ caj sacstu lakati̠y li̠pa̠xuhuay, mejor cacúcalh xcruz la̠qui̠ napa̠ti̠nán caj quimpa̠lacata y caquista̠lánilh. 25Porque hua̠nti̠ lakma̠xtuputún xlatáma̠t uú nac ca̠quilhtamacú ámaj ma̠laktzanke̠y; pero hua̠nti̠ nama̠laktzanke̠ya̠huay xlatáma̠t caj quimpa̠lacata, huata xla̠ luu lacatancs pi̠ ama̠paj makamaklhti̠nán nac xlacatí̠n Dios. 26Porque ¿túcu li̠macuaniy cha̠tum chixcú para la̠n xkálhi̠lh la̠ta túcu anán nac ca̠quilhtamacú y para antá nac xlacatí̠n Dios ámaj ma̠laktzanke̠y xlatáma̠t? ¿Osuchí nícu chulá tla̠n cxokóxtulh xlatáma̠t cha̠tum chixcú xlacata ni̠ napa̠ti̠nán? 27Porque xli̠ca̠na pi̠ ámaj cha̠n quilhtamacú acxni̠ aquit Xatalacsacni Chixcú nacmimparay y nacli̠mín xli̠hua̠k xli̠lanca xli̠tlihueke hua̠ntu̠ kalhi̠y Quintla̠t, y na̠ hua̠k nacca̠ta̠mín xángeles la̠qui̠ aquit nacca̠ma̠xoko̠ni̠y xcuentajcán xli̠hua̠k cristianos y cha̠tunu cha̠tunu nacca̠ma̠kalhapali̠y la̠tachá túcu tatitlahuani̠t nac ca̠quilhtamacú. 28Aquit lacatancs cca̠huaniyá̠n pi̠ makapitzí̠n hua̠nti̠ uú tayá̠nalh hasta nia̠ tani̠y nahuán acxni̠ nalakchá̠n a̠má quilhtamacú acxni̠ xlacán naquintaucxilha pi̠ nacmín xta̠chuná cumu la̠ lanca rey hua̠nti̠ luu xli̠ca̠na nama̠peksi̠nán.

Currently Selected:

San Mateo 16: toc

Highlight

Copy