San Marcos 6

Ne caꞌve̱j rá nij síí ma̱n chiháán Jesús cuno̱ nij soꞌ snana̱ soꞌ maꞌ

1Ga̱a ne̱ curiha̱nj Jesús rej yoꞌ, ga̱a ne̱ namán soꞌ rej chiháán soꞌ, ne̱ canocoꞌ nij síí tucuꞌyón snana̱ soꞌ man soꞌ a. 2Ne̱ ga̱a quisíj güii naránj rá nij yuvii̱ israelitá me se caꞌanj soꞌ veꞌ tucuꞌyón nij síí ma̱n chiháán soꞌ stucua̱nj Moisés, ne̱ guun cheꞌe̱ soꞌ tucuꞌyón soꞌ man nij síí ma̱n rá veꞌ yoꞌ a. Ne̱ caꞌanj ndoꞌo rá nij yuvii̱ ga̱a cuno nij yuvii̱ snana̱ Jesús, ga̱a ne̱ cataj nij yuvii̱ a:

―Me rej nariꞌ síí nihánj nana̱ cu̱u avii raa̱ soꞌ ga̱. Me rej nariꞌ soꞌ se nucua̱j ꞌyaj soꞌ suun sa̱ꞌ noco̱o ga̱. 3Né si̱j acój chruun me soꞌ naꞌ. Ne̱ taꞌníí Mariá me soꞌ á. Ne̱ tinúú síí cuꞌna̱j Jacobo do̱ꞌ, José do̱ꞌ, Judas do̱ꞌ, Simón do̱ꞌ, me soꞌ á. Ne̱ nij raꞌvij soꞌ me chana̱ ya̱nj chiháán níꞌ á ―taj nij síí ma̱n chiháán Jesús rihaan tuviꞌ nij soꞌ, ne̱ guun naco̱o̱ rá nij soꞌ niꞌya̱j nij soꞌ man Jesús a.

4Ga̱a ne̱ cataj Jesús rihaan nij soꞌ a:

―Me rej maꞌa̱n va̱j ꞌo̱ síí nataꞌ snana̱ Yaꞌanj, ne̱ aráj cochro̱j nij yuvii̱ rihaan soꞌ, tza̱j ne̱ nij yuvii̱ ma̱n chiháán soꞌ do̱ꞌ, nij tuviꞌ soꞌ do̱ꞌ, nij síí ya̱nj tucuá soꞌ do̱ꞌ, naꞌvej rá cara̱a̱ cochro̱j rihaan soꞌ maꞌ ―taj Jesús a.

5Ne̱ ne gu̱un nucua̱j Jesús quiꞌya̱j soꞌ a̱ doj suun sa̱ꞌ noco̱o chiháán soꞌ, ma̱an se do̱j síí ranꞌ me se cutaꞌ soꞌ raꞌa soꞌ raa̱ ne̱ nahuun sa̱ꞌ nij soꞌ, quiꞌyaj soꞌ a. 6Ne̱ caráyaꞌa̱nj ndoꞌo soꞌ se vaa ne cuchuma̱n rá nij síí ma̱n chiháán soꞌ niꞌya̱j nij soꞌ man soꞌ a. Ga̱a ne̱ cavii soꞌ caꞌanj soꞌ nij chumanꞌ na̱j nichru̱nꞌ, tucuꞌyón soꞌ snana̱ soꞌ man nij yuvii̱ a.

Caꞌnéé Jesús man chuvi̱j nij síí tucuꞌyón snana̱ soꞌ caꞌa̱nj caꞌmi̱i̱ natáj nij soꞌ a

7Ga̱a ne̱ canacúún Jesús man chuvi̱j nij síí tucuꞌyón snana̱ soꞌ, ga̱a ne̱ guun cheꞌe̱ soꞌ caꞌnéé soꞌ man vi̱j vi̱j nij soꞌ, ne̱ rqué soꞌ se nucua̱j man nij soꞌ, ga̱a ne̱ caꞌve̱e quiꞌya̱j canaán nij soꞌ rihaan nij nana̱ chre̱e a. 8Ne̱ caꞌneꞌ soꞌ suun rihaan nij soꞌ se vaa a̱ doj rasu̱u̱n se̱ nica̱j nij soꞌ ga̱a va̱j nij soꞌ chrej maꞌ. Ma̱an o̱rúnꞌ chruun garroté me se caꞌve̱e ni̱caj nij soꞌ, tza̱j ne̱ rachrúún do̱ꞌ, nanj do̱ꞌ, se̱ nica̱j nij soꞌ, ne̱ se̱ caꞌvee cu̱nuû saꞌanj rque marque̱ numi̱i catuu̱n nij soꞌ maꞌ. 9Tza̱j ne̱ qui̱ꞌnij tacóó nij soꞌ canj, ne̱ o̱rúnꞌ yatzéj quita̱j xráá nij soꞌ, taj Jesús a. 10Ne̱ cataj uún Jesús rihaan nij soꞌ a:

―Me maꞌa̱n veꞌ cara̱nꞌ soj, ne̱ ꞌo̱ ca̱yáán soj veꞌ yoꞌ nda̱a se cu̱riha̱nj soj chumanꞌ yoꞌ á. 11Ne̱ me rej maꞌa̱n se̱ caꞌmii sa̱ꞌ nij yuvii̱ ga̱ soj do̱ꞌ, se̱ caꞌvej rá nij yuvii̱ cuno̱ nij yuvii̱ nana̱ aꞌmii soj do̱ꞌ, ne̱ asa̱ꞌ cavii soj rej yoꞌ, ne̱ nacuna̱nꞌ soj tacóó soj tucuayu̱u soj yoꞌóó tachru̱u̱ canó tacóó soj á. Ne̱ nda̱a dan, ga̱a ne̱ xca̱j nij síí ma̱n rej yoꞌ cuentá se vaa ya̱ tumé ndoꞌo nij soꞌ cacunꞌ ado̱nj. Cata̱j xnaꞌanj yá yá ꞌu̱nj rihaan soj cuano̱ se vaa doj a̱ quira̱nꞌ nij soꞌ cacunꞌ rihaan nij yuvii̱ ma̱n chumanꞌ Sodoma ga̱ chumanꞌ Gomorra na̱nj ado̱nj ―taj Jesús rihaan chuvi̱j nij soꞌ a.

12Ga̱a ne̱ caꞌanj nij soꞌ, ga̱a ne̱ caꞌmii natáj nij soꞌ rihaan nij yuvii̱ se vaa nuchra̱nꞌ nimán nij yuvii̱ ne̱ ta̱náj nij yuvii̱ chrej chiꞌi̱i̱ a. 13Ne̱ quirii ndoꞌo nij soꞌ man nij nana̱ chre̱e nimán nij yuvii̱, ne̱ cutáj ndoꞌo nij soꞌ casté raa̱ nij síí ranꞌ, ne̱ nahuun sa̱ꞌ nij síí ranꞌ, quiꞌyaj nij soꞌ a.

Caviꞌ Juan Síí Cutaꞌ Ne man yuvii̱, quiꞌyaj rey Herodes a

14Dan me se cuchiꞌ nana̱ rihaan rey Herodes cheꞌé nu̱ꞌ se vaa quiꞌyaj Jesús, cheꞌé se nu̱ꞌ cachra̱ꞌ chaꞌnuu̱ ndoꞌo nana̱ cheꞌé Jesús a. ꞌO̱ se cataj taꞌa̱j nij yuvii̱ a:

―Jesús me Juan Síí Cutaꞌ Ne man yuvii̱ se vaa cunuu iꞌna̱ꞌ ya̱ uún soꞌ, ne̱ cheꞌé dan uun nucua̱j soꞌ ꞌyaj soꞌ suun sa̱ꞌ noco̱o yoꞌ na̱nj ado̱nj ―taj taꞌa̱j nij yuvii̱ a.

15Ne̱ ꞌó taꞌa̱j nij yuvii̱ me se cataj se vaa síí cuꞌna̱j Elías síí nataꞌ snana̱ Yaꞌanj ga̱a naá me Jesús, ne̱ ꞌó taꞌa̱j nij yuvii̱ uún cataj se vaa ase vaa ꞌó nij síí nataꞌ snana̱ Yaꞌanj ga̱a naá me Jesús a. 16Dan me se cuno Herodes da̱j guun rá nij yuvii̱, ga̱a ne̱ cataj soꞌ a:

―Síí cuꞌna̱j Juan síí caꞌneꞌ nij tanuu cúú yave̱ quiꞌyáj roꞌ, a̱j cunuu iꞌna̱ꞌ ya̱ soꞌ chugua̱nj ―taj soꞌ a.

17ꞌO̱ se maꞌa̱n Herodes me síí caꞌnéé man nij tanuu ta̱ꞌaa nij tanuu man Juan asi̱j rque̱ doj, ne̱ numíj nij tanuu man Juan, ne̱ caxríj Herodes tagaꞌ man Juan cheꞌé chana̱ cuꞌna̱j Herodías nica̱ tinúú Herodes síí cuꞌna̱j Felipé a. ꞌO̱ se xcaj Herodes man chana̱ Herodías yoꞌ, 18ga̱a ne̱ cataj Juan rihaan Herodes a:

―Ne nó xcúún so̱ꞌ xca̱j so̱ꞌ man choco̱ꞌ so̱ꞌ taj stucua̱nj Yaꞌanj maꞌ ―taj Juan a.

19Cheꞌé dan nachriꞌ Herodías niꞌya̱j noꞌ man Juan, ne̱ guun ndoꞌo rá noꞌ cavi̱ꞌ Juan, tza̱j ne̱ ne caꞌve̱e maꞌ. 20ꞌO̱ se cuchuꞌviꞌ Herodes niꞌya̱j soꞌ man Juan, cheꞌé se queneꞌen Herodes se vaa síí nica̱ rá síí sa̱ꞌ nimán rihaan Yaꞌanj me Juan, ne̱ cheꞌé dan caráán Herodes rihaan se chiꞌi̱i̱ cheꞌé Juan a. Dan me se ga̱a cuno Herodes snana̱ Juan, ne̱ nitunj ndoꞌo nimán soꞌ, tza̱j ne̱ guun niha̱ꞌ rá soꞌ caꞌmi̱i̱ Juan rihaan soꞌ a.

21Dan me se quisíj ꞌo̱ güii caꞌve̱e quiꞌya̱j canaán Herodías, ne̱ dan me se se‑chaꞌa̱nj Herodes me yoꞌ, ne̱ caꞌneꞌ soꞌ suun se vaa ca̱nuû se‑chaꞌa̱nj soꞌ, ne̱ canacúún soꞌ caꞌna̱ꞌ nij síí ꞌyaj suun ga̱ maꞌa̱n soꞌ do̱ꞌ, nij tanuu uun chij doj do̱ꞌ, nij síí uun chij rihaan estadó Galilea do̱ꞌ, caꞌna̱ꞌ cha̱ niꞌyánj nij soꞌ ga̱ soꞌ a. 22Ga̱a ne̱ catúj taꞌnij cha̱na̱ Herodías rej anuû chaꞌanj, ne̱ raꞌánj noꞌ, ne̱ guun niha̱ꞌ uxrá rá Herodes ga̱ nij síí caꞌnaꞌ chaꞌanj yoꞌ niꞌya̱j ta̱ranꞌ nij soꞌ man taꞌnij cha̱na̱ Herodías a. Ga̱a ne̱ cataj rey Herodes rihaan chana̱ ya̱a̱n yoꞌ a:

―Cuano̱ nihánj me se a̱ me maꞌa̱n rasu̱u̱n me rá so̱ꞌ cachi̱nj so̱ꞌ rihanj, ne̱ rque̱ ꞌu̱nj mán so̱ꞌ ado̱nj 23Cuta̱ꞌ yá ꞌu̱nj raa̱ Yaꞌanj se vaa a̱ me maꞌa̱n rasu̱u̱n cachi̱nj so̱ꞌ rihanj, ne̱ rque̱ ꞌu̱nj mán so̱ꞌ á. Nda̱a yane̱j yoꞌóó uun chij ꞌu̱nj rihaan roꞌ, rque̱ ꞌu̱nj mán so̱ꞌ na̱nj ado̱nj ―taj Herodes a.

24Ga̱a ne̱ curiha̱nj chana̱ ya̱a̱n, ne̱ xnáꞌanj noꞌ man nii noꞌ, ne̱ cataj noꞌ a:

―Me se cachi̱nj ꞌu̱nj, ga̱ nahiin ―taj noꞌ rihaan nii noꞌ a.

Ga̱a ne̱ cataj nii noꞌ a:

―Cachi̱nj so̱ꞌ cúú yave̱ Juan Síí Cutaꞌ Ne man yuvii̱ á ―taj noꞌ rihaan taꞌníí noꞌ a.

25Ga̱a ne̱ nu̱ꞌ catúj raꞌya̱nj chana̱ ya̱a̱n yoꞌ rej ma̱n síí nica̱j suun rey Herodes, ne̱ cachíín niꞌya̱j noꞌ rihaan soꞌ, cataj noꞌ a:

―Me rá ꞌu̱nj se vaa ma̱an orá cuano̱ roꞌ, caꞌne̱j so̱ꞌ cúú yave̱ Juan Síí Cutaꞌ Ne man yuvii̱ rque agaꞌ rcoꞌo̱o, ne̱ rque̱ so̱ꞌ rihanj cuaj á ―taj noꞌ a.

26Ga̱a ne̱ nanó ndoꞌo rá síí nica̱j suun rey se vaa cachíín noꞌ man soꞌ, tza̱j ne̱ cheꞌé se a̱j cutaꞌ soꞌ raa̱ Yaꞌanj ne̱ a̱j cuno ta̱ranꞌ nij síí ya̱nj rihaan mesá ga̱ soꞌ, ne̱ cheꞌé dan ne caꞌve̱j rá soꞌ tari̱ꞌ soꞌ snana̱ soꞌ se vaa se̱ quiꞌyaj soꞌ nda̱a vaa taj chana̱ ya̱a̱n yoꞌ rihaan soꞌ a. 27Ga̱a ne̱ nu̱ꞌ caꞌnéé soꞌ man tanuu ticavi̱ꞌ man Juan, ne̱ caꞌneꞌ soꞌ suun se vaa ni̱caj tanuu cúú yave̱ Juan caꞌna̱ꞌ soꞌ a. 28Ga̱a ne̱ caꞌanj tanuu tagaꞌ, ne̱ caꞌneꞌ soꞌ cúú yave̱ Juan, ne̱ caꞌnéé soꞌ cúú yave̱ Juan rque agaꞌ rcoꞌo̱o, nica̱j soꞌ, caꞌnaꞌ soꞌ, ne̱ rqué soꞌ man chana̱ ya̱a̱n, ne̱ nagoꞌ chana̱ ya̱a̱n yoꞌ man nii noꞌ a.

29Ga̱a ne̱ ga̱a cuchiꞌ nana̱ rihaan nij síí tucuꞌyón snana̱ Juan se vaa caviꞌ Juan, ne̱ caꞌnaꞌ nij soꞌ, ne̱ nica̱j nij soꞌ cúú man Juan, cachinꞌ nij soꞌ rque yuꞌuj yuvej a.

Rqué Jesús se chá ꞌu̱nꞌ míj (5,000) snóꞌo a

30Dan me se nij síí cuneꞌ Jesús caꞌa̱nj nata̱ꞌ snana̱ soꞌ roꞌ, cunuu chre̱ꞌ nij soꞌ ga̱ Jesús, ne̱ nataꞌ nij soꞌ rihaan soꞌ cheꞌé nu̱ꞌ se vaa quiꞌyaj nij soꞌ do̱ꞌ, cheꞌé cunuda̱nj nij nana̱ tucuꞌyón nij soꞌ man nij yuvii̱ do̱ꞌ a. 31Ga̱a ne̱ cataj Jesús rihaan nij soꞌ a:

―Caꞌa̱nj níꞌ do̱j rej taj va̱j yuvii̱, ga̱a ne̱ caꞌve̱e nara̱a̱n rá nij soj do̱j á ―taj Jesús a.

ꞌO̱ se caꞌnaꞌ ndoꞌo yuvii̱ do̱ꞌ, caꞌanj ndoꞌo yuvii̱ do̱ꞌ, ne̱ a̱ ne vaa yaꞌnúj rihaan nij soꞌ cha̱ nij soꞌ a.

32Ga̱a ne̱ cavii nij soꞌ rque rihoo chéé rihaan na, ne̱ caꞌanj o̱rúnꞌ nij soꞌ ꞌo̱ rej taj va̱j yuvii̱ a. 33Tza̱j ne̱ queneꞌen ndoꞌo nij yuvii̱ se vaa caꞌanj nij soꞌ, ne̱ xcaj yuvii̱ cuentá se vaa nij tuvi̱ꞌ Jesús me nij soꞌ, ga̱a ne̱ chéé taco̱j nij yuvii̱ ma̱n cunuda̱nj nij chumanꞌ na̱j rej yoꞌ, ne̱ cunánj nij yuvii̱ cuchiꞌ nij yuvii̱ asino ya̱a̱n rej caꞌa̱nj nij tuvi̱ꞌ Jesús a. 34Ne̱ nanij Jesús rá rihoo, ne̱ queneꞌen soꞌ se vaa a̱j ma̱n ri̱i̱ uxrá yuvii̱, ne̱ cunuu ꞌe̱e̱ rá soꞌ niꞌya̱j soꞌ man nij yuvii̱ a. ꞌO̱ se ase vaa matzinj nuviꞌ síí tumé man vaa nij yuvii̱, niꞌya̱j Jesús, ga̱a ne̱ guun cheꞌe̱ soꞌ tucuꞌyón ndoꞌo soꞌ snana̱ soꞌ man nij yuvii̱ a.

35Dan me se cachén ndoꞌo orá, ga̱a ne̱ caꞌnaꞌ nij síí tucuꞌyón snana̱ Jesús rihaan soꞌ, ga̱a ne̱ cataj nij soꞌ a:

―Rcoꞌ tacaan u̱u̱n me nihánj, ne̱ a̱j caꞌanj güii na̱nj á. 36Naꞌne̱j so̱ꞌ chrej man nij yuvii̱, caꞌa̱nj nij yuvii̱ chumanꞌ na̱j nichru̱nꞌ do̱ꞌ, nij ranchó na̱j nichru̱nꞌ do̱ꞌ, quira̱a̱n nij yuvii̱ se chá cha̱ nij soꞌ na̱nj á ―taj nij soꞌ a.

37Ga̱a ne̱ cataj Jesús rihaan nij soꞌ a:

―Rque̱ maꞌa̱n soj se chá cha̱ nij yuvii̱ á ―taj soꞌ a.

Ga̱a ne̱ cataj nij soꞌ rihaan Jesús a:

―Caꞌa̱nj núj go̱ꞌ núj saꞌanj vaa tuꞌvee yuvii̱ ꞌyaj suun tu̱nj yavii ne̱ quira̱a̱n núj rachrúún, ne̱ rque̱ núj cha̱ nij yuvii̱, rá so̱ꞌ a̱ naꞌ ―taj nij soꞌ a.

38Ga̱a ne̱ cataj Jesús rihaan nij soꞌ a:

―Me daj rachrúún vaa rihaan soj ga̱. Caꞌa̱nj soj, ne̱ xca̱j soj cuentá á ―taj soꞌ a.

Quisíj quiꞌyaj nij soꞌ da̱nj, ga̱a ne̱ canica̱j nij soꞌ, ne̱ cataj nij soꞌ a:

―Vaa ꞌu̱nꞌ rachrúún ne̱ vi̱j gue̱e̱ xcuaj rihaan núj na̱nj á ―taj nij soꞌ a.

39Ga̱a ne̱ caꞌneꞌ Jesús suun rihaan nij síí tucuꞌyón snana̱ soꞌ se vaa caꞌa̱nj ca̱yáán taꞌngaꞌ xꞌneꞌ nij yuvii̱ rihaan coj chri̱nꞌ a. 40Ga̱a ne̱ naguun xꞌneꞌ cientó yuvii̱ do̱ꞌ, vi̱j chiha̱a̱ chi̱ꞌ (50) yuvii̱ do̱ꞌ, ne̱ cayáán nij soꞌ rihaan coj chri̱nꞌ a.

41Ga̱a ne̱ taꞌaa Jesús ꞌu̱nꞌ nij rachrúún ne̱ vi̱j ro̱j xcuaj, ga̱a ne̱ niꞌya̱j soꞌ rej xta̱ꞌ, ne̱ cataj soꞌ guun niꞌya̱j níꞌ rihaan Yaꞌanj, ga̱a ne̱ cuxraꞌ taꞌa̱j soꞌ man rachrúún yoꞌ, ne̱ caxríj soꞌ ston nij síí tucuꞌyón snana̱ soꞌ, cheꞌé rej caxri̱i̱ nij soꞌ ston nij yuvii̱ a. Ga̱a ne̱ cuxraꞌ taꞌa̱j soꞌ nee̱ xcuaj cha̱ cunuda̱nj nij yuvii̱ a. 42Ga̱a ne̱ chá ta̱ranꞌ nij yuvii̱, ne̱ caraa rque cunuda̱nj nij soꞌ a. 43Ga̱a ne̱ naquiꞌyaj chre̱ꞌ nij síí tucuꞌyón snana̱ soꞌ se vaa quináj tuꞌva yuvii̱, ne̱ caraa chuvi̱j ya̱ scaa rachrúún do̱ꞌ, nee̱ xcuaj do̱ꞌ a. 44Ne̱ vaa ꞌu̱nꞌ míj snóꞌo scaꞌnúj nij yuvii̱ chá rachrúún rqué Jesús a.

Cachéé Jesús rihaan na a

45Ga̱a ne̱ raꞌya̱nj caꞌneꞌ Jesús suun rihaan nij síí tucuꞌyón snana̱ soꞌ se vaa cavi̱i̱ nij soꞌ rihoo chéé rihaan na caꞌa̱nj nij soꞌ rej xco̱ na laguaná yoꞌ nda̱a chumanꞌ Betsaida, quita̱j ya̱a̱n nij soꞌ rihaan soꞌ a. Dan me se maꞌa̱n Jesús naꞌne̱j chrej man nij yuvii̱ ri̱i̱ yoꞌ, taj Jesús a. 46Dan me se caꞌanj nij soꞌ, ne̱ cataj Jesús rihaan nij yuvii̱ se vaa caꞌve̱e caꞌa̱nj nij yuvii̱ a. Ga̱a ne̱ cavii soꞌ raa̱ tacaan cachi̱nj niꞌya̱j soꞌ rihaan Yaꞌanj a.

47Dan me se ga̱a da̱j doj cata̱ꞌ güii, ne̱ va̱j rihoo tanu̱u̱ rihaan na laguaná, ne̱ o̱rúnꞌ maꞌa̱n Jesús nicunꞌ rihaan yoꞌóó a. 48Ne̱ queneꞌen soꞌ man nij síí tucuꞌyón snana̱ soꞌ se vaa sayu̱u̱n tacuachéé nij soꞌ rihoo rihaan na cheꞌé se goꞌ nana̱ rej riha̱a̱n rihoo a. Dan me se rej rá ranga̱ꞌ caꞌanj Jesús rej va̱j nij soꞌ, chéé taco̱j u̱u̱n soꞌ rihaan na, va̱j soꞌ na̱nj ado̱nj. Ne̱ guun rá soꞌ gu̱un ya̱a̱n soꞌ rihaan nij soꞌ a. 49Ne̱ queneꞌen nij síí tucuꞌyón snana̱ soꞌ man soꞌ se vaa chéé u̱u̱n soꞌ rihaan na, ne̱ guun rá nij soꞌ se vaa taꞌnaj me soꞌ, ne̱ cheꞌé dan caguáj ndoꞌo nij soꞌ a. 50ꞌO̱ se queneꞌen cunuda̱nj nij soꞌ man soꞌ, ne̱ cuchuꞌviꞌ ndoꞌo nimán nij soꞌ a. Veé dan, ne̱ nu̱ꞌ cataj Jesús rihaan nij soꞌ a:

―Naquiꞌya̱j nucua̱j soj nimán soj á. ꞌU̱nj ꞌnaꞌ ado̱nj. Se̱ cuchuꞌviꞌ soj maꞌ ―taj soꞌ a.

51Ga̱a ne̱ catúj soꞌ rque rihoo rej nu̱u̱ nij síí tucuꞌyón snana̱ soꞌ, ga̱a ne̱ canicunꞌ nana̱ yoꞌ, ne̱ caꞌanj ndoꞌo rá nij soꞌ a. 52ꞌO̱ se ne xca̱j sa̱ꞌ nij soꞌ cuentá cheꞌé se nucua̱j nica̱j Jesús ga̱a cuxraꞌ taꞌa̱j Jesús rachrúún chá nij yuvii̱ a. Ma̱an se nichra̱j ndoꞌo nimán nij soꞌ a.

Nahuun sa̱ꞌ nij síí ranꞌ ma̱n rej Genesaret, quiꞌyaj Jesús a

53Ga̱a ne̱ cuchiꞌ nij soꞌ tuꞌva na laguaná rej cuꞌna̱j Genesaret, ne̱ numíj nij soꞌ rihoo tuꞌva na laguaná a. 54Ga̱a ne̱ nanij nij soꞌ rá rihoo, ne̱ nu̱ꞌ cunuu ya̱a̱n nij síí ma̱n rej yoꞌ man Jesús a. 55Ne̱ yo̱o caꞌanj nij soꞌ, ne̱ guun cheꞌe̱ nij soꞌ cuchruj nij soꞌ tuviꞌ nij soꞌ síí ranꞌ rihaan yuvéé, ne̱ quitáá chihá nij soꞌ nij síí ranꞌ yoꞌ, va̱j nij soꞌ me rej maꞌa̱n va̱j Jesús a. 56Ne̱ me maꞌa̱n chumanꞌ raꞌa̱ do̱ꞌ, chumanꞌ noco̱o do̱ꞌ, ranchó do̱ꞌ, catúj Jesús me se cuchruj nij yuvii̱ man nij síí ranꞌ rihaan yuꞌvee a. Ne̱ rquee̱ nij yuvii̱ man Jesús se vaa caꞌve̱j rá Jesús cano̱ raꞌa nij soꞌ do̱j tuꞌva saga̱nꞌ soꞌ a. Ne̱ nu̱ꞌ nij síí canó raꞌa do̱j man soꞌ roꞌ, nahuun sa̱ꞌ cunuda̱nj nij soꞌ cuaj na̱nj ado̱nj.

Currently Selected:

San Marcos 6: trc

Highlight

Copy