San Marcos 15

Caꞌmii Pilató ga̱ Jesús a

1Ga̱a ne̱ rej ranga̱ꞌ cunuu chre̱ꞌ nij xrej ata̱ suun noco̱o do̱ꞌ, nij síí uun chij do̱ꞌ, nij síí naquiꞌyaj cu̱u stucua̱nj Moisés do̱ꞌ, nu̱ꞌ Xꞌneꞌ Nij Síí Ata̱ Suun Noco̱o Doj do̱ꞌ, quiꞌyaj nij soꞌ juntá, ga̱a ne̱ numíj nij soꞌ man Jesús, ne̱ nica̱j nij soꞌ man Jesús caꞌanj nij soꞌ rihaan Pilató, ne̱ tacuachén nij soꞌ man Jesús rihaan soꞌ a. 2Ga̱a ne̱ xnáꞌanj Pilató man Jesús a:

―So̱ꞌ me síí nica̱j suun rey uun chij rihaan nij yuvii̱ israelitá naꞌ ―taj soꞌ a.

―Veé ya̱ nda̱a vaa cataj so̱ꞌ roꞌ, veé da̱nj vaa na̱nj á ―taj Jesús rihaan soꞌ a.

3Ne̱ cutaꞌ ndoꞌo nij xrej ata̱ suun noco̱o cacunꞌ xráá Jesús a. 4Ga̱a ne̱ xnáꞌanj uún Pilató man Jesús a:

―Me cheꞌé ne aꞌmii so̱ꞌ ga̱. Nihánj me se utaꞌ uxrá nii cacunꞌ xráá so̱ꞌ asânj ―taj Pilató a.

5Tza̱j ne̱ yu̱u̱n cheꞌe̱ ne caꞌmi̱i̱ Jesús a̱ doj nana̱ rihaan soꞌ, ne̱ caráyaꞌa̱nj uxrá Pilató cheꞌé yan quiꞌyaj soꞌ da̱nj a.

Cataj Pilató se vaa cavi̱ꞌ Jesús rihaan rcutze̱ a

6Ne̱ vaa ꞌo̱ tucuáán noco̱ꞌ Pilató se vaa rii soꞌ man ꞌo̱ síí ꞌni̱j tagaꞌ ꞌo̱ ꞌo̱ Chaꞌanj Pascuá, ne̱ tinavij u̱u̱n soꞌ cacunꞌ tumé síí uriha̱nj tagaꞌ yoꞌ a. Me maꞌa̱n ꞌo̱ síí ꞌni̱j tagaꞌ achíín nij yuvii̱ se vaa quiri̱i̱ soꞌ, ne̱ caꞌve̱e da̱nj quiꞌya̱j soꞌ a. 7Dan me se vaa ꞌo̱ síí cuꞌna̱j Barrabás ꞌni̱j tagaꞌ ga̱ ꞌó nij síí tucuáá rihaan gobiernó, ne̱ nij soꞌ me se ga̱a cunuꞌ nij soꞌ ga̱ gobiernó, ne̱ ticaviꞌ nij soꞌ yuvii̱ a. 8Dan me se cavii ri̱i̱ nij yuvii̱ israelitá, ne̱ guun cheꞌe̱ nij soꞌ cachíín nij soꞌ man Pilató se vaa quiri̱i̱ soꞌ man ꞌo̱ síí ꞌni̱j tagaꞌ nda̱a vaa uꞌyón soꞌ ꞌyaj soꞌ cheꞌé nij soꞌ a. 9Ga̱a ne̱ xnáꞌanj Pilató man nij yuvii̱ a:

―Me rá soj quiri̱i̱ ꞌu̱nj man síí nica̱j suun rey uun chij rihaan soj si̱j israelitá naꞌ ―taj soꞌ a.

10Da̱nj caꞌmii soꞌ, cheꞌé se neꞌen soꞌ se vaa ma̱an cheꞌé se guun xco̱j ruva̱a̱ rá nij xrej ata̱ suun noco̱o me tacuachén nij xrej man Jesús rihaan soꞌ a.

11Tza̱j ne̱ nij xrej ata̱ suun noco̱o me se rquee̱ nij soꞌ man nij yuvii̱ se vaa cachi̱nj nij yuvii̱ se vaa quiri̱i̱ Pilató man Barrabás tagaꞌ a.

12Ga̱a ne̱ xnáꞌanj uún Pilató man nij yuvii̱ a:

―Cheꞌé se me rá soj quiri̱i̱ ꞌu̱nj man Barrabás rihaan soj, ne̱ da̱j qui̱ꞌyáj man síí tucuꞌnáj soj síí nica̱j suun rey uun chij rihaan soj rá soj ga̱ ―taj soꞌ a.

13Ga̱a ne̱ caguáj uún nij yuvii̱, cataj nij yuvii̱ a:

―Cavi̱ꞌ soꞌ rihaan rcutze̱, qui̱ꞌyáá so̱ꞌ á ―taj nij yuvii̱ a.

14Ga̱a ne̱ cataj Pilató rihaan nij yuvii̱ a:

―Tza̱j ne̱ me cacunꞌ tumé soꞌ ga̱ ―taj Pilató a.

Tza̱j ne̱ doj a̱ caguáj nij yuvii̱, cataj nij yuvii̱ a:

―Cavi̱ꞌ soꞌ rihaan rcutze̱, qui̱ꞌyáá so̱ꞌ cuaj á ―taj nij yuvii̱ caguáj nij soꞌ a.

15Ne̱ Pilató me se guun rá soꞌ quiꞌya̱j soꞌ se vaa gu̱un niha̱ꞌ rá nij yuvii̱, ne̱ cheꞌé dan quirii soꞌ man Barrabás tagaꞌ, ne̱ goꞌ nij tanuu cuartá xráá Jesús, quiꞌyaj soꞌ, ne̱ tacuachén soꞌ man Jesús rihaan nij tanuu cheꞌé rej cachro̱n nij tanuu man Jesús rihaan rcutze̱ a.

Caꞌngaꞌ naco̱o̱ nij tanuu niꞌya̱j nij tanuu man Jesús a

16Ga̱a ne̱ caꞌanj nica̱j nij tanuu man Jesús tucuá suun ya̱nj gobernador, ga̱a ne̱ canacúún nij tanuu man ta̱ranꞌ nij tuviꞌ tanu̱u nij soꞌ cunu̱u chre̱ꞌ nij soꞌ a. 17Ga̱a ne̱ nanuû Jesús saga̱nꞌ rey yatzíj tintá, quiꞌyaj nij tanuu, ne̱ quiꞌyaj nij soꞌ cachriin tanj, cutaꞌ nij soꞌ raa̱ Jesús a. 18Ga̱a ne̱ guun cheꞌe̱ nij tanuu caguáj nij tanuu rihaan Jesús, cataj nij soꞌ a:

―Ya̱ ya̱ si̱j nica̱j suun rey rii taꞌngaꞌ rihaan nij yuvii̱ israelitá mé so̱ꞌ na̱nj ado̱nj ―taj nij soꞌ, tihaꞌ nij soꞌ man Jesús a.

19Ga̱a ne̱ goꞌ uxrá nij soꞌ vará raa̱ Jesús, ne̱ quirii talúj nij soꞌ man soꞌ, ne̱ cayáán ru̱j nij soꞌ rihaan soꞌ, ne̱ quiꞌyaj nij soꞌ nda̱a vaa ꞌyaj yuvii̱ aráj gue̱e̱ rihaan ꞌo̱ yaꞌanj a. 20Síj caꞌngaꞌ naco̱o̱ nij soꞌ niꞌya̱j nij soꞌ man Jesús, ga̱a ne̱ quirii uún nij soꞌ saga̱nꞌ rey yatzéj tintá nu̱u̱ Jesús, ne̱ naꞌnéé uún nij soꞌ saga̱nꞌ Jesús man soꞌ a. Ga̱a ne̱ nica̱j nij soꞌ man Jesús cavii nij soꞌ caꞌanj nij soꞌ yan cachro̱n nij soꞌ man Jesús rihaan rcutze̱ a.

Cachrón nij tanuu man Jesús rihaan rcutze̱ a

21Dan me se ga̱a va̱j nij tanuu ga̱ Jesús, ne̱ ꞌnaꞌ nique ꞌo̱ síí cuꞌna̱j Simón síí cavii chumanꞌ Cirene rej tacaan, ne̱ rej ro̱j síí cuꞌna̱j Alejandró ga̱ Rufo me soꞌ, ne̱ cata̱ Simón rcutze̱ quiꞌyaj nij tanuu a.

22Dan me se nica̱j nij tanuu man Jesús caꞌanj nij tanuu tacaan cuꞌna̱j Gólgota, ne̱ nana̱ Gólgota roꞌ, me raj cata̱a Tacaan Cúú Yave̱ Xnangá a. 23Ga̱a ne̱ rqué nij tanuu do̱j na vinó nachej ga̱ rmedió e̱ꞌ cuꞌna̱j “mirra” man Jesús coꞌo̱ soꞌ a. Tza̱j ne̱ ne coꞌo̱ soꞌ maꞌ. 24Veé dan, ne̱ cachrón nij tanuu man Jesús rihaan rcutze̱, ne̱ tico tixaj nij soꞌ cheꞌé saga̱nꞌ Jesús me síí quiꞌya̱j canaán ꞌo̱ ꞌo̱ taꞌa̱j saga̱nꞌ soꞌ a.

25Dan me se agaꞌ u̱u̱n rej xta̱ꞌ güii me cachrón nij tanuu man Jesús rihaan rcutze̱ a. 26Ne̱ cachrón nij tanuu letrá rihaan ꞌo̱ rcuchra̱ꞌ, ne̱ taj xnaꞌanj letrá yoꞌ me cheꞌé cavi̱ꞌ Jesús a: “Síí nihánj me síí nica̱j suun rey uun chij rihaan nij yuvii̱ israelitá a”, taj letrá yoꞌ a. 27Ga̱a ne̱ cachrón nij tanuu man yavíj snóꞌo rihaan yavíj rcutze̱, ne̱ síí itu̱u̱ me ro̱j soꞌ a. Dan me se nicu̱nꞌ ꞌo̱ soꞌ rej nuva̱ꞌ Jesús, ne̱ nicu̱nꞌ ꞌó soꞌ rej nichru̱un Jesús a. 28Ne̱ veé da̱nj quisíj ya̱ nu̱ꞌ nana̱ no̱ rihaan Danj Yaꞌanj nana̱ taj ya̱ da̱j gu̱un a. Ne̱ taj nana̱ yoꞌ a: “Guun rá nii se vaa ꞌo̱ tuviꞌ nij síí tumé cacunꞌ me soꞌ, rá nii a”, taj snana̱ Yaꞌanj yoꞌ a.

29Ga̱a ne̱ cachén yuvii̱ rej nicu̱nꞌ Jesús, ne̱ caꞌmii chiꞌi̱i̱ ndoꞌo nij yuvii̱ niꞌya̱j nij yuvii̱ man Jesús a. Dan me se tucunó nij yuvii̱ raa̱ nij yuvii̱, cataj nij yuvii̱ a:

―Nihánj táá so̱ꞌ si̱j guun rá ta̱cuanee man nuvií noco̱o ne̱ cune̱ꞌ ꞌó nuvií noco̱o rque vaꞌnu̱j güii naꞌ. 30Ti̱nanii so̱ꞌ man ma̱ꞌán so̱ꞌ rihaan rcutze̱, ne̱ nani̱j so̱ꞌ rihaan yoꞌóó ya̱j vi̱j ―taj nij yuvii̱ yoꞌ a.

31Ne̱ da̱nj quiꞌyaj uún nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, caꞌmii chiꞌi̱i̱ nij soꞌ rihaan tuviꞌ nij soꞌ niꞌya̱j nij soꞌ man Jesús a:

―Tinanii síí nihánj man ꞌó yuvii̱ rihaan sayuun, rá soꞌ, tza̱j ne̱ ne gu̱un nucua̱j soꞌ ti̱nanii soꞌ man maꞌa̱n soꞌ a̱ maan asânj. 32Sese ya̱ ya̱ Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ do̱ꞌ, sese ya̱ ya̱ si̱j nica̱j suun rey uun chij rihaan níꞌ si̱j israelitá me soꞌ do̱ꞌ, ne̱ nani̱j soꞌ cuano̱ rihaan yoꞌóó, ne̱ queneꞌe̱n níꞌ, ne̱ cuchuma̱n rá níꞌ ni̱ꞌyaj níꞌ man soꞌ ado̱nj ―taj nij soꞌ a.

Ne̱ ro̱j síí itu̱u̱ nicu̱nꞌ rihaan rcutze̱ rej xꞌnu̱j Jesús me se caꞌmii ro̱j soꞌ nana̱ nij rihaan Jesús uún a.

Caviꞌ Jesús a

33Veé dan, ne̱ caxu̱j, ne̱ yu̱u̱n cheꞌe̱ guun rmi̱ꞌ nu̱ꞌ rihaan yoꞌóó nda̱a quisíj agaꞌ vaꞌnu̱j rej anocoꞌ güii a. 34Veé dan, ne̱ quisíj agaꞌ vaꞌnu̱j, ga̱a ne̱ nucua̱j ndoꞌo caguáj Jesús, cataj soꞌ a:

―Eloi, Eloi, lama sabactani ―taj soꞌ, caguáj soꞌ xnaꞌánj aꞌmii maꞌa̱n soꞌ a. Ne̱ nana̱ caguáj soꞌ me raj cata̱a a: Taꞌanj ꞌu̱nj, Taꞌanj ꞌu̱nj mé so̱ꞌ á. Me cheꞌé tanáj u̱u̱n so̱ꞌ mán ꞌu̱nj ga̱, taj nana̱ caguáj Jesús a.

35Ne̱ cuno taꞌa̱j nij síí nicu̱nꞌ rej xꞌnu̱j Jesús nana̱ caguáj soꞌ, tza̱j ne̱ ne queneꞌe̱n nij soꞌ me taj Jesús a̱ maꞌ. Ma̱an se cataj nij soꞌ a:

―Ni̱ꞌyaj soj á. Nacúún síí nihánj man Elías asânj ―taj nij soꞌ a.

36Ga̱a ne̱ cunánj ꞌo̱ soꞌ, ne̱ caraa soꞌ na vinó yu̱u̱ rque ꞌo̱ yataa̱n, ne̱ cutaꞌ soꞌ raa̱ ꞌo̱ rihaa, ne̱ ruꞌmaan soꞌ yataa̱n tuꞌva Jesús, ne̱ coꞌo Jesús na yu̱u̱ yoꞌ, quiꞌyaj soꞌ, ne̱ cataj síí quiꞌyaj da̱nj a:

―Dínj quiꞌya̱j soj á. Queneꞌe̱n níꞌ sese caꞌna̱ꞌ Elías ta̱nanij Elías man soꞌ rihaan yoꞌóó na̱nj á ―taj soꞌ a.

37Ga̱a ne̱ nucua̱j caguáj Jesús, ne̱ caviꞌ soꞌ a. 38Ga̱a ne̱ yatzíj mantá cortiná xi̱j ma̱nj noco̱ꞌ rá nuvií noco̱o yoꞌ roꞌ, quisinꞌ rej raa̱ yoꞌ nda̱a tacóó yoꞌ a.

39Veé dan, ne̱ nicunꞌ tanuu capitán romanó ꞌni̱j raꞌa cientó tanuu rihaan Jesús, ne̱ queneꞌen soꞌ nu̱ꞌ se vaa guun ga̱a caviꞌ Jesús, ga̱a ne̱ cataj soꞌ a:

―Ya̱ ya̱ Taꞌni̱j Yaꞌanj me snóꞌo nihánj asânj ―taj soꞌ a.

40Ne̱ ga̱nꞌ doj nicunꞌ queꞌe̱e̱ chana̱, niꞌya̱j nij chana̱ man Jesús a. ꞌO̱ noꞌ me Mariá Magdalena, ne̱ ꞌó noꞌ me Mariá nii síí cuꞌna̱j Jacobo síí cuni̱j ga̱ José a. Ne̱ ꞌó noꞌ me chana̱ cuꞌna̱j Salomé a. 41Dan me se ga̱a va̱j Jesús estadó Galilea roꞌ, nocoꞌ nij chana̱ yoꞌ man soꞌ ne̱ racuíj nij noꞌ man soꞌ a. Ne̱ vaa queꞌe̱e̱ doj chana̱ níí caꞌanj chumanꞌ Jerusalén ga̱ Jesús a.

Cachinꞌ nii man Jesús a

42Dan me se rej ataꞌ güii me yoꞌ, ne̱ güii no̱ xcúún nij yuvii̱ israelitá quiꞌya̱j chuvi̱i nij soꞌ cheꞌé güii naránj rá nij soꞌ me yoꞌ, 43ne̱ cheꞌé dan caꞌnaꞌ José síí cavii chumanꞌ Arimatea a. ꞌO̱ síí sa̱ꞌ me soꞌ, ne̱ ꞌo̱ tuviꞌ Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá me soꞌ, ne̱ síí naꞌvi̱j gu̱un chij Yaꞌanj me uún soꞌ a. Dan me se quisíj rá soꞌ, ne̱ catúj soꞌ rihaan Pilató, ne̱ cachíín niꞌya̱j soꞌ rihaan Pilató se vaa caꞌve̱j Pilató cachi̱nꞌ soꞌ cúú man Jesús a. 44Dan me se caráyaꞌa̱nj ndoꞌo Pilató ga̱a cuno soꞌ nana̱ se vaa a̱j caviꞌ Jesús, ga̱a ne̱ canacúún soꞌ caꞌna̱ꞌ tanuu capitán ꞌni̱j raꞌa cientó tanuu rihaan soꞌ, ne̱ xnáꞌanj soꞌ man tanuu yoꞌ sese ya̱ ya̱ caviꞌ Jesús a. 45Ga̱a ne̱ cataj tanuu capitán yoꞌ se vaa ya̱ ya̱ caviꞌ Jesús, ne̱ cheꞌé dan caꞌvej rá Pilató ni̱caj José cúú man Jesús caꞌa̱nj cachi̱nj soꞌ a. 46Ga̱a ne̱ xcaj José yatzéj mantá, ga̱a ne̱ tananij soꞌ man Jesús, ne̱ nacutáj soꞌ yatzéj mantá xráá Jesús, ne̱ cuchruj soꞌ cúú man Jesús rque yuꞌuj gáán nii rque yuvej, ne̱ caráán soꞌ yuvej xi̱j caxra̱ꞌ tuꞌva yuꞌuj yoꞌ a. 47Ne̱ queneꞌen Mariá Magdalena ga̱ Mariá nii José rej cachinꞌ nii man Jesús a.

Currently Selected:

San Marcos 15: trc

Highlight

Copy