San Juan 9
9
Jesuhs basiaca loh tuhbi bwiinn nin ayi biin loh ñiꞌh desde chin guulaa ba
1Ya loh nin zeediiꞌdxi Jesuhs tuhbi lahta, bwaꞌha Ñiꞌh laꞌh tuhbi ndxiꞌhw nin ayi riin loh ñiꞌh desde chin guulaa ba, 2ya chiꞌchi gunaabadxyiꞌdxyi raꞌ xpwiinn Ñiꞌh loh Ñiꞌh, rahbi raꞌ ba:
―Mwehsu, ¿xixnaa guulaa bwiinn riiꞌ ayi riin loh ba? ¿Ta pur xtuhlda xcuzahn ba or pur xtuhlda gahca ba?
3Chiꞌchi rahbi Jesuhs loh raꞌ ba:
―Ayi pur xtuhlda dxiꞌ ba nin ayiza pur xtuhlda dxiꞌh xcuzahn ba; guulaa ba ziꞌca tin pur laꞌh ba guluuꞌyi Dxiohs nin gaca guunn Ñiꞌh pur laꞌh ba. 4Ya gaduhbi nin naa radxyii nahpa guidiꞌhnn nuꞌh xtsiꞌn Bwiinn nin guluꞌnehza naꞌh laasii laꞌh gueꞌla zeꞌ chin ayi chyu gaca guunn dziꞌn, 5ya gaduhbi nin nuuꞌhuhn loh guidxyiyuh riiꞌ naꞌh naan biaꞌñih loh guidxyiyuh riiꞌ.
6Ya chin guyaꞌloh guñiꞌ Jesuhs dxyiꞌdxyi raꞌ riiꞌ, chiꞌchi bachahn xihin Ñiꞌh loh yuh, ya cun xihin Jesuhs bwiꞌhnn Ñiꞌh nuhn bwen ya gudaꞌbi Ñiꞌhn loh bwiinn chi, 7ya chiꞌchi rahbi Ñiꞌh loh bwiinn nin ayi biin loh ñiꞌh chi:
―Gwachiꞌbi loh luꞌh loh estanque nin laa Siloeh.
Ya riꞌchi gwachiꞌbi loh bwiinn chi, ya chin gubiaꞌgarii ba hasta zuu Jesuhs, laꞌh ba rahca la rwaꞌha. 8Ya xbisihn ba cun garaa raꞌ bwiinn raꞌ nin nuꞌnbwaꞌ laꞌh ba chin ayi biin loh ba cun chin guleꞌhe gahca za ba guhn, rahbi loh lasaaꞌ raꞌ bwiinn chi:
―¿Tayi dee dxiꞌh nin rzohba bweꞌhe guhn?
9Nuu raꞌ ba rahbi raꞌ ba: “Laꞌh ban”, ya snuhn raꞌ ba rahbi: “Ayi laꞌh dxiꞌh ban, nicala ziꞌchi rñah ba”, ya laꞌhgahca bwiinn nin ayi biin loh ñiꞌh chi rahbi: “Naꞌhan.” 10Ya chiꞌchi rahbi raꞌ bwiinn chi loh ba:
―¿Xaalla guhca chiꞌh nnah rwaꞌha luꞌh?
11Chiꞌchi rahbi bwiinn chi:
―Laꞌh bwiinn nin laa Jesuhs, laꞌh ba bwiꞌhnn ba nuhn bwen gudaꞌbi ban loon, chiꞌchi nah ba loon: “Gwachiꞌbi loh luꞌh loh estanque nin laa Siloeh.” Ya guyaaꞌhahn, ya chin guyaꞌloh gudxiꞌbiꞌhn loon lwehgu guhca bwaꞌhahn.
12Ya chiꞌchi rahbi raꞌ ba:
―¿Ca nuu ndxiꞌhw chi?
Ya chiꞌchi rahbi bwiinn nin biaca loh ñiꞌh:
―Ayi gaꞌnnahn.
Bwiinn fariseu raꞌ gunaabadxyiꞌdxyi loh bwiinn nin biaca loh ñiꞌh
13Chiꞌchi gwanee raꞌ ba laꞌh bwiinn nin biaca loh ñiꞌh chi loh raꞌ bwiinn fariseu, 14ya dxyih nin basiaca Jesuhs loh bwiinn chi naa dxyih nin ruziꞌlaaꞌdzi raꞌ bwiinn Israel, gudaꞌbi Ñiꞌh bwen loh ba, ya lwehgu ballaala loh ba, 15ya chiꞌchi gunaabadxyiꞌdxyi raꞌ bwiinn fariseu loh bwiinn nin biaca loh ñiꞌh xa guhca biaca loh ba, ya chiꞌchi rahbi ba:
―Gudaꞌbi Jesuhs bwen loon ya chiꞌchi gudxiꞌbiꞌhn loon yannah laꞌn rwaꞌha.
16Ya chiꞌchi rahbi raꞌ paaldaa raꞌ bwiinn fariseu raꞌ chi:
―Nin bwiꞌhnn deeꞌ ayi naa ba xpwiinn Dxiohs, laasii ayi rahpadaa ba dxyih nin raziꞌlaaꞌdzi raꞌ nuꞌh.
Ya snuhn raꞌ ba rahbi:
―Per ¿caalla gaca chiꞌh guunn ba dziꞌn rooꞌ sidela laꞌh ba naa ba tuhbi bwiinn duhlda?
Ya ziꞌchi guhca chiohpa stoꞌ bwiinn raꞌ chi, 17ya chiꞌchi gunaabadxyiꞌdxyi laꞌgaꞌh raꞌ ba loh bwiinn nin biaca loh ñiꞌh chi:
―Pwihsi ziga biaca loh luꞌh, ¿xa rñiꞌ luꞌh pur bwiinn chi?
Chiꞌchi rahbi bwiinn nin biaca loh ñiꞌh chi:
―Naꞌh rñiꞌn naa bwiinn chi tuhbi daada nin rñiꞌ xchiꞌdxyi Dxiohs.
18Per laꞌh raꞌ bwiinn Israel raꞌ chi ayi riachiistoꞌ raꞌ ba dxieꞌpa bwiinn nin ayi biin loh ñiꞌh desde chin guulaa ba nee nnah rwaꞌha ba, ya hasta que no gudihdxyi raꞌ ba xcuzahn bwiinn chi, 19chiꞌchi gunaabadxyiꞌdxyi raꞌ ba loh raꞌ xcuzahn ba squiiꞌ:
―¿Ta lliiꞌn tu deeꞌ? ¿Ta rñiꞌ tu ayi riin loh bi desde chin guulaa bi? ¿Xaloh chiꞌh nnah rwaꞌha bi?
20Chiꞌchi rahbi raꞌ xcuzahn bi:
―Laꞌh nu riuꞌnbwaꞌ nu lliiꞌn nu laꞌh bi desde guulaa bi ayi biin loh bi, 21per nnah ayi chyu gaann xa guhca biaca loh bi nee nin ayiza chyu gaann chyu basiaca loh bi. Gulguinaabadxyiꞌdxyi loh bi; baniin ca zuu bi, ya laꞌh bi guiñiꞌ bi loh tu chyu basiaca loh bi.
22Squiiꞌ guñiꞌ raꞌ xcuzahn bi laasii rdxyihbi raꞌ ba zahca raꞌ ba ziga biaꞌhan dxyiꞌdxyi bwiinn Israel raꞌ chi gabweꞌhedxiaꞌhla raꞌ ba laꞌn guidoꞌ chyu chiꞌzi bwiinn raꞌ nin guiñiꞌ Jesuhs naa Crixtu, 23pwihsi pur niꞌchin rahbi raꞌ xcuzahn bwiinn chi: “Gulguinaabadxyiꞌdxyi loh bi, baniin ca zuu bi.” 24Ya chiꞌchi gubiaꞌgarii gudihdxyi raꞌ ba bwiinn nin ayi biin loh ñiꞌh chi stuhbi tin rahbi raꞌ ba loh bi:
―Guñiꞌ loh nu dxyiꞌdxyi nin guchii paꞌh nez loh Dxiohs, laasii laꞌh nu naann nu laꞌh ndxiꞌhw chi naa ba tuhbi bwiinn duhlda.
25Chiꞌchi rahbi bwiinn nin ayi bihn loh ñiꞌh chi:
―Naꞌh ayi gaꞌnnahn gu naa ba bwiinn duhlda o ayi naa ban, pwihsi nin naann dxiꞌhn ayi riin loon nee nnah laꞌn rwaꞌha.
26Chiꞌchi rahbi raꞌ ba stuhbi:
―¿Xa bwiꞌhnnee ba yiꞌh? ¿Xa bwiꞌhnnee ba yiꞌh tin rwaꞌha luꞌh?
27Chiꞌchi rahbi bwiinn nin ayi biin loh ñiꞌh chi:
―Laꞌn guñiꞌ la loh tu, per ayi riachiistoꞌ tu xchiꞌdxyiꞌhn. ¿Xixnaa xclaaꞌdzi tu guiñiꞌñin stuhbi? ¿Ta nee laꞌh tu xclaaꞌdzi tu gaca tu xpwiinn ba?
28Chiꞌchi guñiꞌ tohnta raꞌ ba loh bwiinn chi rahbi raꞌ ba:
―¡Yiꞌh dela gaca luꞌh xpwiinn ndxiꞌhw chi, per laꞌh nu xpwiinn Moisehs naa nu! 29Laasii laꞌh nu naann nu guñiꞌ Dxiohs loh Moisehs, per ziga niꞌchi, ¡nin ayi chyu gaann canehza biinloh niꞌchi!
30Ya chiꞌchi rahbi bwiinn nin ayi biin loh ñiꞌh chi:
―¿Xiilla deeꞌ? ¡Laꞌh tu ayi gaann tu canehza biinloh ba, per naꞌh laꞌh ba basiaca loon! 31Pwihsi naann nuꞌh Dxiohs ayi rucaꞌdxiahga Ñiꞌh xchiꞌdxyi bwiinn nin naa raꞌ bwiinn duhlda; rucaꞌdxiahga si Ñiꞌh laꞌh raꞌ bwiinn nin riachiistoꞌ raꞌ ñiꞌh xchiꞌdxyi Ñiꞌh cun nin ruzoꞌbadxiahga raꞌ xchiꞌdxyi Ñiꞌh. 32Nin tuhbi nagahdxi saꞌbi dxyiꞌdxyi chyu bwiinn basiaca la loh tuhbi bwiinn nin guulaa dxieꞌpa. 33Sidela laꞌh ndxiꞌhw riiꞌ ayi zeꞌ ba pur xcweenta Dxiohs, ayi nuu ñuhnn ba nin tuhbi dziꞌn raꞌ riiꞌ.
34Chiꞌchi rahbi raꞌ ba loh bwiinn chi:
―Yiꞌh desde guulaa luꞌh naa luꞌh bwiinn duhlda; ¿ta xclaaꞌdzi chiꞌh luꞌh guluuꞌyi luꞌh laꞌh nu?
Chiꞌchi babweꞌhedxiaꞌhla raꞌ ba laꞌh bwiinn chi laꞌn guidoꞌ.
35Ya chin bihn Jesuhs babweꞌhedxiaꞌhla raꞌ ba laꞌh bwiinn nin ayi biin loh ñiꞌh chi laꞌn guidoꞌ, niꞌchin chin badxiꞌloh Ñiꞌh laꞌh ba, chiꞌchi rahbi Ñiꞌh loh ba:
―¿Ta riachiistoꞌ luꞌh laꞌh Lliiꞌn Dxiohs nin naa ndxiꞌhw?
36Chiꞌchi rahbi bwiinn chi:
―Daada, gudxixteeꞌ loon cuun nin naa laꞌh ba tin chechiistoꞌn laꞌh ba.
37Chiꞌchi rahbi Jesuhs loh ba:
―Laꞌh luꞌh bwaꞌha la; naꞌh naan laꞌh ba, naꞌh nin cañiꞌ loh luꞌh riiꞌ.
38Ya chiꞌchi bazuꞌnllihbi bwiinn chi loh Jesuhs, ya rahbi ba loh Ñiꞌh:
―Riachiistoꞌn yiꞌh, Daada.
39Lwehgu rahbi Jesuhs:
―Naꞌh zeꞌldahn loh guidxyiyuh riiꞌ tin guꞌnnahn guelguxchisi, tin garaa raꞌ bwiinn raꞌ nin ayi riin raꞌ loh ñiꞌh gwaꞌha raꞌ ba, nee tin laꞌh za raꞌ bwiinn nin riin raꞌ loh raꞌ ñiꞌh dxiaꞌhan dxieꞌpa raꞌ ba.
40Ya paaldaa raꞌ bwiinn fariseu raꞌ nin zuunee Ñiꞌh riꞌchi, chin bihn raꞌ ba dxyiꞌdxyi raꞌ riiꞌ, gunaabadxyiꞌdxyi raꞌ ba loh Ñiꞌh rahbi raꞌ ba:
―¿Ta zee loh xchiꞌdxyi chiꞌh luꞌh nee laꞌh nu naa nu dxieꞌpa?
41Chiꞌchi rahbi Jesuhs loh raꞌ ba:
―Sidela laꞌh tu ñahca tu dxieꞌpa ayi xi duhlda ñahpa tu pur xtuhlda tu; per ziga rñiꞌ tu rahbi tu rwaꞌha tu, nahpa tu duhlda.
Currently Selected:
San Juan 9: zpv
Highlight
Share
Copy
Want to have your highlights saved across all your devices? Sign up or sign in
© 1990, Wycliffe Bible Translators, Inc. All rights reserved.
