Efesios 4

Radxaꞌga lasaaꞌ nuꞌh pur Spíritu Saantu

1Pwihsi ziga ñieꞌwꞌhn pur xcweenta xchiꞌdxyi Jesucristu rnaꞌbaꞌhn loh tu gulguibahan ziga nin rgaꞌha guunn tu laꞌhtu nin bibwiꞌhi pur xigaaba Dxiohs. 2Gulgahca bwiinn nadoꞌlaadzi, bwiinn nazaꞌcaduxa, gulgahpa paseensi, nee gulgahpa guelnadziiꞌhi lasaaꞌ cun ziga tuhbi cun ziga stuhbi lasaaꞌ tu, 3nee gulguiꞌhnn para guibahan tu tuhsi loh lligaaba tin ayi taaꞌha loh lasaaꞌ tu cun guelrahcanee xteenn Spíritu Saantu nee pur xcweenta za guelridxyiistoꞌ nin ruchiꞌdxiu-ruchaꞌga laꞌhtu. 4Ziꞌchi tuhsi tihxi naa nuꞌh loh Jesucristu, nee tuhsiza naa xigaaba nuꞌh cun laꞌh Ñiꞌh, cun tuhsi za hereensi nin naannloh nuꞌh zachicaꞌha nuꞌh loh nin gudihdxyi laꞌhnuꞌh, 5nee tuhsi za Daada cun tuhsi za guelriachiistoꞌ, nee cun tuhsi za guelrohbañihsa, 6nee nuu za tuhbi dxiꞌh Daada Dxiohs nin rnabwaꞌ loh garaatiiꞌ, nin zuu galaayillee garaatiiꞌ nee nuu Ñiꞌh loh garaatiiꞌ.

7Per cada tuhbigah raꞌ nuꞌh bachicaꞌha raꞌ nuꞌh dziꞌn raꞌ nin babwiꞌhnn Jesucristu lligaaba bachicaꞌha raꞌ nuꞌh. 8Pwihsi niꞌchin rñiꞌ loh Xchihtsi Dxiohs squiiꞌ:

Chin bacah Ñiꞌh llaaꞌndxibaaꞌ hasta rnabwaꞌ Ñiꞌh, ya bwiꞌhnn Ñiꞌh gahn loh garaa raꞌ guelrnabwaꞌ,

ya chiꞌchi bwiꞌhnntaaꞌyi Ñiꞌh yihca raꞌ xpwiinn Ñiꞌh tin guunn raꞌ ba xtsiꞌn Ñiꞌh.

9¿Xi zee loh dxyiꞌdxyi riiꞌ ziga rñiꞌin, “Bacah Ñiꞌh”? Pwihsi nin rariaꞌcaa rñiꞌ dxyiꞌdxyi riiꞌ naa biehtaza Daada Jesucristu hasta riaꞌhan gabihldxyi. 10Nin biehta chi niꞌchi gahcan nin bacah za hasta naa mahzi guiyaꞌduxa nez dxibaaꞌ tin ziꞌchi gucaꞌha Ñiꞌh nahpa Ñiꞌh guelrnabwaꞌ nez dxibaaꞌ cun loh guidxyiyuh. 11Ya laꞌh gahca za Ñiꞌh bwiꞌhnn Ñiꞌh lligaaba bazuh Ñiꞌh laꞌh raꞌ bwiinn nin naa raꞌ pooxtla, ya spaaldaa raꞌ ba bazuh Ñiꞌh ziga profeta raꞌ, spaaldaa raꞌ ba ziga nin riaguiꞌhnbiñih xchiꞌdxyi Jesucristu, spaaldaa raꞌ ba ziga gaca pastohr raꞌ, cun spaaldaa raꞌ ba ziga mwehsu raꞌ. 12Ya ziꞌchi bazuh Ñiꞌh nin naa raꞌ xpwiinn Ñiꞌh tin guunn raꞌ ba dziꞌn nin badiꞌhi Ñiꞌh cada tuhbigah raꞌ ba nee tin ziꞌchi guunn raꞌ ba chuu ziga lliiꞌdzi tihxi Jesucristu garaa lahdu, 13hasta gadzihnyi dxyih nin gaca garaa raꞌ nuꞌh tuhsi loh ziga riachiistoꞌ raꞌ nuꞌh nee gadzihnyi dxiuꞌnbwaꞌ zaꞌca nuꞌh Lliiꞌn Dxiohs, ya ziꞌchi gaca nuꞌh bwiinn nin baniin ca zuu loh ziga rahcabwaꞌ nuꞌh xchiꞌdxyi Ñiꞌh, ziga tuhbi bwiinn nin bagurooꞌ loh xquelrnabwaꞌ Jesucristu. 14Ya ayiru chyu gusaaꞌn gaca xigaaba nuꞌh ziga xigaaba biñiꞌn tin biñiꞌn ayi guinagahntiiꞌ ruhnn bwiinn gahn rusaguiꞌhi raꞌ ba laꞌh raꞌ bi cun dxyiꞌdxyi nin ayi galluꞌyi nin ruluuꞌyi raꞌ ba laasii nuu raꞌ bwiinn nin nasiin nin ruhnn raꞌ squiiꞌ. 15Mahz bwen gabweꞌhecaa nuꞌh guidiꞌhnn nuꞌh ziga chozah nuꞌh loh dxyiꞌdxyi nanchii cun guidxiaapaza nuꞌh guelnadziiꞌhi lasaaꞌ lastoꞌ nuꞌh cun chyuchiꞌhzi bwiinn niꞌchin nahpa guidiꞌhnn nuꞌh para chioo nuꞌh loh garaatiiꞌ guelnazaꞌca xteenn nin naa Daada nin dziꞌbaloh loh nuꞌh nin naa laꞌh Jesucristu. 16Ya pur Jesucristu rnaꞌzu-dxaꞌga raꞌ xpwiinn Ñiꞌh zigazi tuhbi tihxi bwiinn tin ziꞌchi naꞌzu zaꞌca raꞌ ba tin rahcanee lasaaꞌ raꞌ ba pur ziga naa xtsiꞌn cada tuhbigah raꞌ ba, ya ziꞌchi cadxiꞌhyi raꞌ ba xa cayahca ziahanru raꞌ bwiinn loh guelnadziiꞌhi xteenn Jesucristu.

Tuhbi guelnabahan nacuubi nin rdxeela pur laꞌh Jesucristu

17Pwihsi dxyiꞌdxyi raꞌ riiꞌ naa nin rñiꞌn loh tu nee rucaꞌbizañin laꞌhtu pur lah Daada Jesucristu, ayiru chezah guibahan tu ziga nabahan raꞌ bwiinn nin ayi nuꞌnbwaꞌ laꞌh Dxiohs, bwiinn raꞌ nin sola nabahan raꞌ loh lligaabachiꞌhzi nin riagadziiba yihca raꞌ ñiꞌh. 18Ya nuu nacahyitiiꞌ loh xigaaba raꞌ ba; laꞌh raꞌ ba ayi rudiꞌhi guuxta stoꞌ raꞌ ba loh guelnabahan nin runiꞌhi Dxiohs laasii naa raꞌ ba bwiinn nadiiꞌdxii rwaaꞌ raꞌ ñiꞌh, 19nee ya guhca dxiipa stoꞌ raꞌ ba ya gucaꞌha mahn raꞌ ba, ayiru xa dxiaꞌchyu loh xigaaba raꞌ ba, ya zeezaꞌbi raꞌ ba loh garaaloh cohsa dxaaba raꞌ, 20per laꞌhtu ayi biuꞌnbwaꞌdxiꞌh tu Jesucristu, tin nee tu gaca tu bwiinn ziꞌchi raꞌ, 21ya sidela guchii tu bazoꞌbadxiahga tu xchiꞌdxyi Jesucristu nee cun sidela neezaa basiꞌdxi tu xcweenta Ñiꞌh nin naa dxyiꞌdxyi guchii, 22pwihsi basaaꞌn tu loh garaa cohsa raꞌ nin gudiiꞌdxi-guzah nin gubahan tu loh ñiꞌh. Pwihsi niꞌchin nnah gulgasiaꞌhan garaa raꞌ cohsa dxaaba raꞌ chi nez dihtsi tu, laasii niꞌchi raꞌ nin basaguiꞌhi laꞌhtu loh dxyih raꞌ nin gudiiꞌdxi. 23Niꞌchin nnah gulgasacuubi lastoꞌ tu cun loh xigaaba tu, 24nee gulgasacuubi za laꞌhtu loh guelnabahan nacuubi nin basiinloh Dxiohs pur laꞌhtu tin ziꞌchi pur xcweenta xchiꞌdxyi Ñiꞌh guluuꞌyi xquelnabahan tu tuhbi guelnabahan nayaa, tuhbi guelnabahan nin nalluꞌyi para loh xtsiꞌn Dxiohs.

25Pwihsi niꞌchin ayiru chezah tu guuyi tu dxixiꞌhw, mahz gulguiñiꞌ dxyiꞌdxyi nin naa guchii loh raꞌ lasaaꞌ tu laasii laꞌhnuꞌh naa nuꞌh bwiinn raꞌ nin naa tuhsi famihyi.

26Sidela laꞌhtu rdxyiꞌchi tu gulguiaꞌha ayi dxiaaba tu loh duhlda, nee gulguiꞌhnn pur ayi gahw llahn lastoꞌ tu loh gaduhbi dxyih. 27Ayi gusaaꞌn tu gusiaꞌchi bwiinndxaaba lastoꞌ tu.

28Bwiinn nin naa bwiinn gubaaꞌn ayiru guunn ba gubaaꞌn, mahzi guunn ba dziꞌn cun naa ba tin ziꞌchi gaapaa ba nin gacanee ba laꞌh raꞌ bwiinn raꞌ nin ayi xi nahpa.

29Nee ayi gusaaꞌn tu guiriaꞌh dxyiꞌdxyi nnah rwaaꞌ tu, mahz gusiaꞌha rwaaꞌ tu guiñiꞌ tu dxyiꞌdxyi zaꞌca raꞌ tin ziꞌchi guunn tu gahn guchiooꞌ tu ziga chechiistoꞌ raꞌ snuhn bwiinn nin dxihnn dxiahga raꞌ xchiꞌdxyi tu. 30Ayi chiꞌhyi tu nez guibiin lastoꞌ Spíritu Saantu xteenn Dxiohs nin bwiꞌhnn para gucah tu bwaꞌ laꞌn lastoꞌ tu para hasta loh dxyihyi nin gadzihn chee tu hasta nuu Dxiohs.

31Gulcweꞌhe stoꞌ tu garaaloh raꞌ llahn nin cayuhnn naltaa laꞌn lastoꞌ tu, ziga guelnadxyiꞌchi, guelrbwihdxidxiah cun guelrbwidxihndxinee lasaaꞌ, nee cun garaaloh raꞌ ru cohsa dxaaba raꞌ. 32Gulgahca bwiinn nadoꞌlaadzi nee gulgalahsa stoꞌ tu lasaaꞌ tu ziga tuhbi ziga stuhbi raꞌ ba, nee gulguiꞌhnn pardohn lasaaꞌ ziga tuhbi ziga stuhbi za tu zigaza bwiꞌhnn Dxiohs pardohn laꞌhtu pur xcweenta Jesucristu.

Currently Selected:

Efesios 4: zpv

Highlight

Copy